ଯୋହନ୍ 19
19
ଯୀଶୁର୍ ମ୍ରଣ୍ ଡ୍ଣ୍ତ୍
1ତାର୍ ହ୍ଚେ ପିଲାତ ଯୀଶୁକେ ନ୍ଇକ୍ରି କ୍ର୍ଡା ସ୍ଙ୍ଗ୍ ମାରୁକେ ଆଦେଶ୍ ଦିଲା। 2ଆରେକ୍ ଶଇନ୍ମ୍ନ୍ କାଟାର୍ ମୁକୁଟ୍ ବ୍ନାଇ କ୍ରି ତାର୍ ମୁଣ୍ଡେ ହିନ୍ଦାଇଲାଇ, ବେଜା ର୍ଙ୍ଗାର୍ ହ୍ଚିଆ ହିନ୍ଦାଇଲାଇ। 3ସେମ୍ନ୍ ତାର୍ ଲ୍ଗେ ଆଇଲାଇ ଆର୍ କଇଲାଇ, “ଏ ଯିହୁଦିମ୍ନ୍କାର୍ ର୍ଜା, ଜୁଆର୍।” ଆର୍ ସେମ୍ନ୍ ତାକେ ଚାହୁଳ୍ ମାରୁକେ ଲାଗ୍ଲାଇ। 4ପିଲାତ ଆର୍ ଗଟେତର୍ ହ୍ଦାଇ ଜାଇକ୍ରି ରୁଣ୍ତିରିଲା ଲକ୍ମ୍ନ୍କେ ହ୍ଚାର୍ଲା, “ଦ୍କା ସେ ଲକ୍କେ ମୁଇ ତୁମାର୍ ମୁଏ ଆଣୁଲେ, କାଇତାକ୍ ତାକେ ଦସି କ୍ରୁକେ ମୁଇ କାଇ ହେଁ ବାଟ୍ ନାହାମ୍ଲେ ସେତାର୍ଗିନେ ଇରି ତୁମିମ୍ନ୍ ବୁଜା।” 5ବେଜା ର୍ଙ୍ଗାର୍ ହ୍ଚିଆ ଆର୍ କାଟାର୍ ମୁକୁଟ୍ ହିନ୍ଦାଇ କ୍ରି ଯୀଶୁକେ ହ୍ଦାଇ ଆନ୍ଲାଇ, ଆର୍ ପିଲାତ ଲକ୍ମ୍ନ୍କେ କଇଲା, “ଦ୍କା ଏ ହ୍କା ସେ ମାନାଇ!” 6ତାକ୍ ଦ୍କ୍ଲା ଦାହ୍ରେ ମୁକିଆ ଜାଜକ୍ମ୍ନ୍ ଆର୍ ମନ୍ଦିର୍କେ ଜାଗ୍ତା ଲକ୍ମ୍ନ୍ ବେଲ୍କି ଅଇକ୍ରି କଇଲାଇ, “ତାକେ କୁର୍ଶକାଟେ ଚ୍ଗାଉଆ,” ପିଲାତ ସେମ୍ନ୍କେ କଇଲା, “ତୁମିମ୍ନ୍ ତାକେ ନ୍ଇକ୍ରି କୁର୍ଶକାଟେ ଚ୍ଗାଉଆ, କାଇତାକ୍ ତାକେ ଡ୍ଣ୍ତ୍ ଦେମ୍କେ ମୁଇ କାଇ ହେଁ ଦସ୍ ତାର୍ ତ୍ଇହ୍ଣି ନାହାଇ।” 7ଯିହୁଦି ଲକ୍ମ୍ନ୍ ଉତର୍ ଦିଲାଇ, “ଅମାର୍ ମୋଶାର୍ ଦ୍ର୍ମ୍ ଶାସ୍ତରାର୍ ନିୟମ୍ ହର୍ ସେ ମ୍ର୍ତାର୍ ଲଡା, କାଇତାକ୍ ସେ ତାର୍ ନିଜ୍କେ ଇଶ୍ଵରାର୍ ହଇସିବ୍ଲି କ୍ମ୍ଲା।” 8ଇକ୍ତା ଶୁଣିକ୍ରି ପିଲାତ ବେସି ଡିର୍ଲା। 9ତାର୍ ପ୍ରାସାଦେ ଲେଉଟି ଗ୍ଲା, ଆର୍ ଯୀଶୁକେ ହ୍ଚାର୍ଲା, “ତୁଇ କ୍ଇହ୍ଣି ଆସି ଆଚ୍ସି?” ମ୍ତର୍ ଯୀଶୁ ତାକେ ଉତର୍ ନ୍ଦିଲା। 10ପିଲାତ ତାକେ କଇଲା, “ତୁଇ ମର୍ସ୍ଙ୍ଗ୍ କ୍ତା ଅମ୍କେ ନ୍ଚୁଲିସ୍, ମ୍ତର୍ ତକେ କୁର୍ଶକାଟେ ମ୍ର୍ନେ ମାରୁକ୍ ଆର୍ ମୁକ୍ଳାମ୍କେ ମର୍ ଅଦିକାର୍ ଆଚେ, ଇରି କି ତୁଇ ନ୍ଜାଣ୍ସି?” 11ଯୀଶୁ ତାକେ କଇଲା, “ମର୍ ଉହ୍ରେ ତର୍ ଅଦିକାର୍ ନାଇ, କାଇତାକ୍ ଇଶ୍ୱର୍ ତକ୍ ସେ ଅଦିକାର୍ ଦିଲାଆଚେ, ମ୍ତର୍ ଯେ ମକେ ତର୍ ଆତେ ସ୍ହ୍ରି ଦିଲାଆଚେ, ସେ ଗଟେକ୍ ବେସିବ୍ଡ୍ ପାପ୍ କ୍ଲାଆଚେ।” 12ଇକ୍ତା ଶୁଣିକ୍ରି ପିଲାତ ଯୀଶୁକେ ମୁକ୍ଳାମ୍କେ ବାଟ୍ କଜ୍ଲା, ମ୍ତର୍ ଯିହୁଦି ଲକ୍ମ୍ନ୍ ବେଲ୍କି ଅଇ କଇଲାଇ, “ତୁଇ ଯଦି ତାକେ ମୁକ୍ଳାଉସି ତ୍ବେ ତୁଇ ବ୍ଡ୍ ର୍ଜା କାଇସରାର୍ ସ୍ଙ୍ଗ୍ ନ୍ଇ, ଯେ ନିଜ୍କେ ର୍ଜା ବ୍ଲି କଇଦ୍ ସେ କାଇସର୍ ର୍ଜାର୍ ଶ୍ତ୍ରୁ।” 13ଇକ୍ତା ଶୁଣିକ୍ରି ପିଲାତ ଯୀଶୁକେ ହ୍ଦାଇ ଦ୍ରି ଆନ୍ଲା, ଆର୍ ଟେଳାର୍ ମଣ୍ତପ୍ ଲ୍ଗେ (ଏବ୍ରୀ ବାଷାଇ ଇକ୍ତା, “ଗବ୍ବାଥା ବ୍ଲି କ୍ଉତି”) ବିଚାର୍ କ୍ର୍ତା ଟାଣେ ବ୍ସ୍ଲା। 14ସେଡେବ୍ଳ୍ ମୁଣ୍ତେବେଳ୍ ଅଇରିଲି, ଆର୍ ସେ ଦିନ୍ ନିସ୍ତାର୍ ହ୍ର୍ବାର୍ ଆଗ୍ତୁର୍ ଦିନ୍ରିଲି, ପିଲାତ ଯିହୁଦି ଲକ୍ମ୍ନ୍କେ ଯୀଶୁକେ ଦ୍କାଇକ୍ରି କଇଲା, “ଦ୍କା ଏ ହ୍କା ତୁମାର୍ ର୍ଜା!” 15ମ୍ତର୍ ସେମ୍ନ୍ ବେଲ୍କି ଅଇ କଇଲାଇ, “ଯୀଶୁକେ ମ୍ର୍ନେ ମାରା, ତାକେ କୁର୍ଶକାଟେ ଚ୍ଗାଉଆ।” ପିଲାତ ସେମନ୍କେ କଇଲା, “ମୁଇ ତୁମାର୍ ର୍ଜାକେ କୁର୍ଶକାଟେ ଚ୍ଗାଇନ୍ ବ୍ଲି ତୁମିମ୍ନ୍ କାଇରି ମ୍ନ୍କ୍ରୁଲାସ୍ କି?” ମୁକିଆ ଜାଜକ୍ମ୍ନ୍ ଉତର୍ ଦିଲାଇ, “କାଇସର୍ ହ୍କା ଅମାର୍ ର୍ଜା।” 16ତାର୍ ହ୍ଚେ ପିଲାତ ଯୀଶୁକେ କୁର୍ଶକାଟେ ମାରୁକ୍ ସେମ୍ନ୍କାର୍ ଆତେ ସ୍ହ୍ରିଦିଲା, ଆର୍ ସେମ୍ନ୍ ଯୀଶୁକେ ଦ୍ରି ନିଲାଇ।
ଯୀଶୁକେ କୁର୍ଶକାଟେ ଚ୍ଗାଇଲାଇ
17ଯୀଶୁ କୁର୍ଶକାଟ୍ ବଇକ୍ରି କାହାଳ୍ ନାଉର୍ ଜାଗାକେ ଆଇଲା, “ସେ ଡଙ୍ଗୁର୍ କିହ୍ରି ହର୍ ରିଲି,” ଜାକେ ଏବ୍ରୀ ବାଷାଇ “ଗଲ୍ଗଥା ବ୍ଲି କ୍ଉତି।” 18ସେତି ସେମ୍ନ୍ ଯୀଶୁକେ କୁର୍ଶକାଟେ ମାର୍ଲାଇ, ଯୀଶୁକେ ମ୍ଜାଇ କ୍ରି ଦୁଇବାଟ୍ ଦୁଇ ଲକ୍କେ କୁର୍ଶକାଟେ ଚ୍ଗାଇଲାଇ। 19ଯୀଶୁ କାଇତାକ୍ ମ୍ଲା, ସେ ବିଷୟେ ଲକ୍ମ୍ନ୍କେ ଜାଣାମ୍କେ, ପିଲାତ ଗଟେକ୍ ହାଟାଇ ଲେକିକ୍ରି କୁର୍ଶକାଟେ ଅଳାଇ ରିଲା, ସେତି ଲେକା ଅଇରିଲି, ନାଜରିତୀୟ ଯୀଶୁ ଯିହୁଦିମ୍ନ୍କାର୍ ର୍ଜା। 20ଯିହୁଦିମ୍ନ୍କାର୍ ବିତ୍ରେ ଗାଦି ଲକ୍ମ୍ନ୍, ଇ ଲେକାର୍ ବିଷୟକେ ହଳ୍ତି ରିଲାଇ, କାଇତାକ୍ ଜୁଇ ଟାଣେ ଯୀଶୁକେ କୁର୍ଶକାଟେ ମାରିରିଲାଇ, ସେରି ସ୍ହର୍ ଲ୍ଗେ ରିଲି, ସେ ହାଟାଇ ଏବ୍ରୀ ବାଷାଇ, ଲାଟିନ୍ ବାଷାଇ ଆର୍ ଗ୍ରୀକ୍ ବାଷାଇ ଲେକା ଅଇରିଲି। 21ଯିହୁଦିମ୍ନ୍କାର୍ ମୁଖିଆ ଜାଜକ୍ମ୍ନ୍ ପିଲାତକେ କଇଲାଇ, “ନାଜରିତୀୟ ଯୀଶୁ ଯିହୁଦିମ୍ନ୍କାର୍ ର୍ଜା ବ୍ଲି ଲେକି ନ୍କେରି, ସେ ନିଜେ ଯିହୁଦିମ୍ନ୍କାର୍ ର୍ଜା କ୍ଉତିରିଲା ବ୍ଲି ଲେକ୍।” 22ମ୍ତର୍ ପିଲାତ ଉତର୍ଦିଲା, “ମୁଇ ଜୁଇରି ଲେକିଆଚି ସେରି ସେ ରେଇଦ୍।”
23ଯୀଶୁକେ କୁର୍ଶକାଟେ ମାର୍ଲା ହ୍ଚେ, ଚାରିଗଟ୍ ଶଇନ୍ମ୍ନ୍ ତାର୍ ହ୍ଚିଆକେ ଚାରିବାଗ୍ କ୍ଲାଇ, ଗଟେକ୍ ଗଟେବାଗ୍ ବାଟାକ୍ରି ନିଲାଇ, ମ୍ତର୍ ଯୀଶୁର୍ ଉହ୍ରେ ଡାହି ରିଲା ହ୍ଚିଆ, ସେରି ସିଲାଇ ଅଇନ୍ରିଲି ମ୍ତର୍ ଆତେ ସ୍ବୁ ବୁଣା ଅଇରିଲି। 24ଶଇନ୍ମ୍ନ୍ ତାକାର୍ ତାକାର୍ ବିତ୍ରେ କ୍ଉଆ କୁଇ ଅଇଲାଇ, “ଇ ହ୍ଚିଆକେ ଚିରୁ ନ୍ଚୁ, ମ୍ତର୍ ବଟ୍ କ୍ରୁମା ତ୍ବେ ଯାର୍ ନାଉଁଏ ବଟ୍ ହୁଟ୍ଲେକ୍ ସେ ନେଇଦ୍, ଇ ଗଟ୍ଣା ଗଟ୍ଲାକେ ଦ୍ର୍ମ୍ ଶାସ୍ତର୍ ଲ୍ଗେ ଲେକା ଅଇରିଲା ଇ ବାକ୍ୟ ହୁରା ଅଇଲି, ସେମ୍ନ୍ ମର୍ ହ୍ଚିଆକେ ତାକାର୍ ତାକାର୍ ବିତ୍ରେ ବାଟା କ୍ର୍ତି, ଆର୍ ମର୍ ଉହ୍ରେ ଗୁଳିଆଇ ଅଇରିଲା ହ୍ଚିଆକେ ବଟ୍ କ୍ରିନେତି।” ଶଇନ୍ମ୍ନ୍ ସେନ୍କ୍ଲାଇ। 25ଯୀଶୁର୍ କୁର୍ଶକାଟ୍ ଲ୍ଗେ ତାର୍ ଆଇସି, ତାର୍ ସାମାନ୍ କ୍ଳୋପାର୍ ଡକୁର୍ସି ମରୀୟମ୍, ଆର୍ ମଗ୍ଦଲୀନୀ ମରୀୟମ୍ ଟିଆ ଅଇରିଲାଇ। 26ଯୀଶୁ ତାର୍ ଆଇସିର୍ ଲ୍ଗେ ସେ ଲାଡ୍ କ୍ର୍ତିରିଲା ଚେଲାକେ ଟିଆ ଅଇରିଲାର୍ ଦ୍କ୍ଲା, ଆର୍ ସେ ତାର୍ ଆଇସିକେ କଇଲା, “ଦ୍କ୍ ଇରି ତର୍ ହଇଦି!” 27ତାର୍ ହ୍ଚେ ଯୀଶୁ ସେ ଲାଡ୍ କ୍ର୍ତିରିଲା ଚେଲାକେ କଇଲା, “ଇରି ତର୍ ଆଇଦି!” ସେଦିନ୍ ହ୍ଣି ସେ ଚେଲା ଯୀଶୁର୍ ଆଇସିକେ ତାର୍ ନିଜାର୍ ଗ୍ରେ ନିଲା।
ଯୀଶୁ ମ୍ଲା ବିଷଇ
28ଯୀଶୁ ଜାଣୁହାର୍ଲା ଯେ ସ୍ବୁ ବିଷୟ୍ ହୁରା ଅଇଲି, ସେତାର୍ଗିନେ ଦ୍ର୍ମ୍ ଶାସ୍ତରାର୍ ବାକ୍ୟ ହୁରାକ୍ରୁକେ ସେ କଇଲା, “ମକେ ଶସ୍ ଲାଗୁଲି।” 29ସେତି ଅମ୍ବ୍ଳି ର୍ସ୍ ବ୍ର୍ତି ଅଇରିଲାର୍ ଗଟେକ୍ ମତାରିଲି। ସେତାକ୍ ସେମ୍ନ୍ ଡାଙ୍ଗ୍ ସ୍ଙ୍ଗ୍ ସ୍ପଞକେ ଗୁଳିଆଇକ୍ରି ସେ ଅମ୍ବଳି ର୍ସ୍ ଲ୍ଗେ ବୁଡାଇ ଯୀଶୁକେ ଡୁକୁକେ ଦିଲାଇ। 30ଯୀଶୁ ସେରି ଶକ୍ଲା ଆର୍ କଇଲା, “ସ୍ର୍ଲିବେ।” ଅନ୍କ୍ରି କ୍ଇକ୍ରି ସେ ତାର୍ ମୁଣ୍ତ୍ ତ୍ଳେକ୍ରି ମ୍ଲା।
ଯୀଶୁକେ ବାଲାସ୍ଙ୍ଗ୍ କୁଚିଏ ବୁସ୍ଲାଇ
31କୁର୍ଶକାଟେ ଚ୍ଗାଇ ରିଲା ଲକ୍ମ୍ନ୍କାର୍ ଗଡ୍ ବାଙ୍ଗୁକେ ଆର୍ ସେମ୍ନ୍କାର୍ ମ୍ଳ୍କେ କୁର୍ଶକାଟେ ହ୍ଣି ତ୍ଳେ ଉତ୍ରାଇ କ୍ରି ଆଣୁକ୍ ଯିହୁଦି ନେତାମ୍ନ୍ ପିଲାତକେ ଆଦେଶ୍ ମାଗ୍ଲାଇ, କାଇତାକ୍ ସେଦିନ୍ ଶୁକୁର୍ବାର୍ ଦିନ୍ରିଲି, ତାର୍ ଆରେଗଟ୍ ଦିନ୍ ପବିତର୍ ବିଶାଉଣି ଦିନ୍ରିଲି, କାଇତାକ୍ ହୁଣ୍ତ୍ତା ଦିନ୍ ମ୍ଲା ମ୍ଳ୍କେ କୁର୍ଶକାଟେ ନ୍ରେଅ ବ୍ଲି ସେମ୍ନ୍ ବାବ୍ତି ରିଲାଇ। 32ସେତାର୍ଗିନେ ଶଇନ୍ମ୍ନ୍ ଯୀଶୁର୍ ସ୍ଙ୍ଗ୍ କୁର୍ଶକାଟେ ଚ୍ଗାଇ ରିଲା ଦୁଇଲକାର୍ ଗଡ୍ ବାଙ୍ଗ୍ଲାଇ। 33ମ୍ତର୍ ଯୀଶୁର୍ ଲ୍ଗେ ଗ୍ଲାଇ, ଆର୍ ଦ୍କ୍ଲାଇ ଯେ ସେ ମ୍ରି ଆଚେ, ସେତାର୍ଗିନେ ସେମ୍ନ୍ ଯୀଶୁର୍ ଗଡ୍ ବାଙ୍ଗି ନ୍ଚ୍ଲାଇ, 34ଗଟେକ୍ ସ୍ଇନ୍ ବାଲାସ୍ଙ୍ଗ୍ ଯୀଶୁର୍ କୁଚାଇ ବୁସ୍ଲା, ତ୍ବେ ସେତି ହାଣି ଆର୍ ବ୍ନି ବାର୍ଲି। 35ଯେ ଦ୍କିଆଚେ, ସେ କ୍ଇଆଚେ, ତାର୍ ଗିନେ ତୁମି ହେଁ ଶୁଣିକ୍ରି ବିଶ୍ବାସ୍ କ୍ରାସ୍। ସେ ଜୁଇରି କଇଦ୍ ସେରି ସ୍ତ୍, ସେ ଜାଣେଦ୍ ଯେ ସେ ସ୍ତ୍ କଇଲା। 36ଇ ଗଟ୍ଣା ଗଟ୍ଲାର୍ ଗିନେ ଦ୍ର୍ମ୍ ଶାସ୍ତରାର୍ ଇ ବାକ୍ୟ ହୁରା ଅଇଲି, “ତାର୍ ଗଟେକ୍ ହେଁ ଆଡ୍ ବାଙ୍ଗି ନ୍କେରେ।” 37ଆର୍ ଗଟେତର୍ ଦ୍ର୍ମ୍ ଶାସ୍ତର୍ ଲ୍ଗେ ଇରିହେଁ ଲେକାଆଚେ, “ଯାକେ ସେମ୍ନ୍ ବୁସ୍ଲାଇ ଆତ୍ତି ତାକେ ସେମ୍ନ୍ ଦ୍କ୍ତି।”
ଯୀଶୁର୍ ମ୍ସୁଣ୍
38ତାର୍ ହ୍ଚେ ହାରାମାଥିୟାର୍ ଯୋଷେପ୍ ପିଲାତ ଲ୍ଗେ ଗ୍ଲା, ଆର୍ ଯୀଶୁର୍ ମ୍ଲା ମ୍ଳ୍କେ ନେଇନ୍ ବ୍ଲି ଆଦେଶ୍ ମାଗ୍ଲା, ଯୋଷେପ୍ ଯୀଶୁର୍ ଗଟେକ୍ ଚେଲାରିଲା, ମ୍ତର୍ ଯିହୁଦି ନେତାମ୍ନ୍କେ ଡିରିକ୍ରି ସେ ଲୁକ୍ଣେ ଯୀଶୁର୍ ଚେଲା ଅଇରିଲା। ପିଲାତ ଆଦେଶ୍ ଦିଲାକେ ଯୋଷେପ୍ ଯୀଶୁର୍ ମ୍ଳ୍କେ ତହୁକେ ନିଲା। 39ତାର୍ସ୍ଙ୍ଗ୍ ନୀକଦିମ ରିଲା, ଏ ନୀକଦିମ ଗଟେଦିନ୍ ରାତିବ୍ଳ୍ ଯୀଶୁକେ ମିସୁକେ ଜାଇରିଲା, ନୀକଦିମ ତାର୍ସ୍ଙ୍ଗ୍ ତିରିଶ୍ କେଜି ବାସ୍ନା ଚିକାଣ୍ ଦ୍ରିକ୍ରି ଆସିରିଲା। 40ଇ ଦୁଇ ଲକ୍ ଯୀଶୁର୍ ମ୍ଲା ମ୍ଳ୍କେ ନିଲାଇ ଆର୍ ଯିହୁଦିମ୍ନ୍କାର୍ ନିତିନିୟମ୍ ହର୍ ମ୍ଳ୍କେ ତହ୍ତା ଆଗ୍ତୁ ଜ୍ନ୍କ୍ରି ତିଆର୍ କ୍ରି ରେମ୍ଲାଇ ସେନ୍କ୍ରି ବାସ୍ନା ଚିକାଣ୍ ଲାଗାଇକ୍ରି ସୁକ୍ଲା ହ୍ଚିଆ ସ୍ଙ୍ଗ୍ ଗୁଳିଆଇଲାଇ। 41ଯୀଶୁ ଜୁଇ ଜାଗାଇ କୁର୍ଶକାଟେ ମ୍ରିରିଲା, ସେଲ୍ଗେ ଗଟେକ୍ ବଗିଚା ବାଳ୍ ରିଲି, ସେ ବିତ୍ରେ ଗଟେକ୍ ନ୍ଉଆ କ୍ଣିରିଲା ମ୍ସୁଣ୍ ରିଲି, ସେତି ଆଗ୍ତୁ କାକେ ହେଁ ତହି ନ୍ରିଲାଇ। 42ସେଦିନ୍ ଯିହୁଦିମ୍ନାର୍ ବିଶାଉଣିଦିନାର୍ ଆଗ୍ତୁ ଦିନ୍ରିଲି ଲାଗି ବେସି ଦୁରିକେ ସେମ୍ନ୍ ଯୀଶୁର୍ ମ୍ଳ୍କେ ନ୍ନେଇକ୍ରି, ସେ ମ୍ସ୍ଣେ ସ୍ଙ୍ଗାଇଲାଇ, କାଇତାକ୍ ସେରି ଲ୍ଗେରିଲା।
Currently Selected:
ଯୋହନ୍ 19: BDVNT
Highlight
Share
Copy
Want to have your highlights saved across all your devices? Sign up or sign in
Bodo Parja Bible (ବ୍ଡ଼୍ ହ୍ର୍ଜା) by The Love Fellowship is licensed under Creative Commons Attribution-ShareAlike 4.0 License.
