ଲୁକ 5
5
ଯୀଶୁ ହ୍ର୍ତୁ ଚେଲାକେ କୁଦ୍ଲା
(ମାଥି. ୪:୧୮-୨୨; ମାର୍କ ୧:୧୬-୨୦)
1ଗଟେଦିନ୍ ଯୀଶୁ ଗିନେସରତ୍ ସ୍ମ୍ଦୁର୍ କ୍ଣ୍ଡିଏ ଟିଆ ଅଇରିଲା, ସେଡେବ୍ଳ୍ ଲକ୍ମ୍ନ୍ ତାର୍ ତ୍ଇହ୍ଣି ଇଶ୍ଵରାର୍ ବାକ୍ୟ ଶୁଣୁକେ ତାର୍ ଉହ୍ରେ ହେଲା ହେଲି ଅଉତି ରିଲାଇ। 2ସେ ସ୍ମ୍ଦୁର୍ କ୍ଣ୍ଡିଏ ଜଳେକ୍ ଡଙ୍ଗା ରିଲାର୍ ଦ୍କ୍ଲା। ମାଚୁଆ ଲକ୍ମ୍ନ୍ ଡଙ୍ଗାଇ ହ୍ଣି ଉତ୍ରି କ୍ରି ତାକାର୍ ଜାଲ୍ମ୍ନ୍ ଦ୍ଉତି ରିଲାଇ। 3ସେ ଜଳେକ୍ ଡଙ୍ଗା ବିତ୍ରେହ୍ଣି ଜୁଇରି ଶିମୋନାର୍ ଡଙ୍ଗାରିଲି, ଯୀଶୁ ସେତି ଜାଇକ୍ରି ବ୍ସ୍ଲା ଆର୍ ଡଙ୍ଗାକେ କ୍ଣ୍ତିଲ୍ଗେ ହ୍ଣି ଅଡ୍କ୍ ଦୁରିକେ ନେ ବ୍ଲି କଇଲା, ଆର୍ ଯୀଶୁ ସେତି ବ୍ସି ଲକ୍ମ୍ନ୍କେ ଶିକ୍ୟା ଦିଲା।
4ଯୀଶୁ ଲକ୍ମ୍ନ୍କେ ପର୍ଚାର୍ କ୍ରି ସ୍ର୍ଲା ହ୍ଚେ ଶିମୋନ୍କେ କଇଲା, “ଡଙ୍ଗାକେ ଅଡ୍କ୍ ବେସି ହାଣି ବିତୁର୍କେ ନ୍ଇକ୍ରି, ତୁଇ ଆର୍ ତର୍ ସ୍ଙ୍ଗୁଆଳିମ୍ନ୍ ମାଚ୍ ଦ୍ର୍ତାର୍ ଗିନେ ଜାଲ୍ ମାରା।” 5ଶିମୋନ୍ ଉତର୍ଦିଲା, “ଏଗୁରୁ ଗୁଳା ରାତି ମାଚ୍ ଦ୍ର୍ତାର୍ ଗିନେ ଜାଲ୍ ମାର୍ଲୁ, ମ୍ତର୍ ଗଟେକ୍ ହେଁ ଦ୍ରୁ ନାହାର୍ଲୁ। ଅବେ ତୁଇ କଇଲାର୍ ଗିନେ ମୁଇ ଜାଲ୍ ମାରିନ୍ଦ୍।” 6ଆରେକ୍ ଜ୍ଡେବ୍ଳ୍ ପିତର୍ ଆର୍ ତାର୍ ସ୍ଙ୍ଗ୍ମ୍ନ୍ ଜାଲ୍ ମାର୍ଲାଇ, ଆର୍ ଅତେକ୍ ମାଚ୍ ଲାଗ୍ଲି ଯେ, ତାକାର୍ ଜାଲ୍ମ୍ନ୍ ଚିଡୁକେ ଲାଗ୍ଲି। 7ସେଡେବ୍ଳ୍ ସେମ୍ନ୍ ବିନ୍ ଡଙ୍ଗାଇ ରିଲା ତାକାର୍ ସ୍ଙ୍ଗୁଆଳିମ୍ନ୍ ଆସିକ୍ରି ଜ୍ନ୍କ୍ରି ସେମ୍ନ୍କେ ସାଇଜ କ୍ର୍ତି, ସେତାର୍ଗିନେ ସେମ୍ନ୍କେ ଆତ୍ ଟାରି ସେମ୍ନ୍କେ କୁଦ୍ଲାଇ। ସେଡେବ୍ଳ୍ ସେମ୍ନ୍ ଆସି ଜଳେକ୍ ଡଙ୍ଗାଇ ବ୍ର୍ତି ମାଚ୍ ଦେର୍ଲାଇ, ଆର୍ ଡଙ୍ଗାମ୍ନ୍ ବୁଡୁକେ ଲାଗ୍ଲି।
8ମ୍ତର୍ ଇ ସ୍ବୁ ଗଟତାର୍ ଶିମୋନ୍ ପିତର୍ ଦ୍କ୍ଲା ଆର୍ ଯୀଶୁର୍ ଗଡ୍ତ୍ଳେ ଡୁଳି ମୁଣ୍ତିଆ ମାରିକ୍ରି କଇଲା, “ଏ ମାପ୍ରୁ ମ୍ର୍ ଲଗେହ୍ଣି ଉଟି ଯା, କାଇତାକ୍ ମୁଇ ଗଟେକ୍ ପାପିଲକ୍।” 9କାଇତାକ୍ ଶିମୋନ୍ ଆର୍ ତାର୍ ସ୍ଙ୍ଗୁଆଳିମ୍ନ୍ ବେସି ମାଚ୍ ଦ୍ରି ରିଲାର୍ ଲାଗି, ସେରି ଦ୍କି ସେମ୍ନ୍ ବେସି କାବାଅଇଲାଇ। 10ଜେବଦୀର୍ ଜଳେକ୍ ହଇସି ଯାକୁବ ଆର୍ ଯୋହନ୍ ହେଁ ସେରି ଦ୍କି ବେସି କାବାଅଇଲାଇ, କାଇତାକ୍ ଏମ୍ନ୍ ହେଁ ଶିମୋନାର୍ ସ୍ଙ୍ଗ୍ ରିଲାଇ, ଯୀଶୁ ଶିମୋନ୍କେ କଇଲା, “ଡିରାନାଇ ଆଜିହ୍ଣି ମୁଇ ତୁମୁକ୍ମ୍ନ୍ ଲକ୍ମ୍ନ୍କେ ମର୍ଲ୍ଗେ ଆଣି ଚେଲା କ୍ରୁକେ ଶିକାଇନ୍ଦ୍।” 11ସେଡେବ୍ଳ୍ ସେମ୍ନ୍ ଡଙ୍ଗାକେ କ୍ଣ୍ତିଲ୍ଗେ ଆଣି ମାଚ୍ ଦ୍ର୍ତା ଜାଲ୍ ଚାଡ୍ଲାଇ ଆର୍ ଯୀଶୁର୍ ହ୍ଚେ ହ୍ଚେ ଗ୍ଲାଇ।
ଯୀଶୁ ଗଟେକ୍ କୁଷ୍ଟରଗ୍ ଅଇଲା ଲକ୍କେ ବ୍ଲ୍କ୍ଲା
(ମାଥି. ୮:୧-୪; ମାର୍କ ୧:୪୦-୪୫)
12ଯୀଶୁ ତରେକ୍ ଗଟେକ୍ ସ୍ହ୍ର୍ ଲ୍ଗେ ରିଲାବ୍ଳ୍, ଦ୍କା, ସେତି ଗଟେକ୍ କୁଷ୍ଟରଗ୍ ଅଇରିଲା ଲକ୍ରିଲା। ସେ ଯୀଶୁକେ ଦ୍କି ସ୍ଙ୍ଗେ ସ୍ଙ୍ଗେ ଆସିକ୍ରି ତାର୍ ଗଡେ ମୁଣ୍ତିଆ ମାରି କାନିକ୍ର୍ମ୍ ଅଇ କଇଲା, “ଏ ମାପ୍ରୁ, ତୁଇ ଯଦି ମ୍ନ୍ କ୍ରୁଲିସ୍, ତ୍ବେ ମକେ ବ୍ଲ୍ କ୍ରୁହାର୍ସି।” 13ଯୀଶୁ ନିଜାର୍ ଆତ୍କେ ଲାମାଇ କ୍ରି ସେ ରଗିକେ ଚୁଇଲା ଆର୍ କଇଲା, “ମୁଇ ମ୍ନ୍କ୍ରୁଲେ, ତୁଇ ବ୍ଲ୍ ଅଉ।” ସେମାଡେ ସେ କୁଷ୍ଟରଗେ ହ୍ଣି ବ୍ଲ୍ ଅଇଲା।
14ଆର୍, ଯୀଶୁ ସେ ଲକ୍କେ ଆଦେଶ୍ ଦେଇ କଇଲା, “ଇକ୍ତା କାକେ କ୍ଉନାଇ, ମ୍ତର୍ ସିଦା ଜାଜକାର୍ ଲ୍ଗେ ଜା ଆର୍ ମକେ ପରିକ୍ୟା କ୍ର୍ବ୍ଲି କ୍ଉ, ତାର୍ ହ୍ଚେ ତୁଇ ବ୍ଲ୍ ଅଇଲିସ୍ ବ୍ଲି ସେ କଇଲେକ୍, ଲକ୍ମ୍ନ୍ ଜାଣ୍ତାର୍ ଗିନେ ମୋଶାର୍ ଆଦେଶ୍ ହ୍ର୍, ନିଜାର୍ ବ୍ଲ୍ ଅଇଲାର୍ ସାକି ଦେତାର୍ ଗିନେ ମାନ୍ସି ଦିଆସ୍।”
15ମ୍ତର୍ ଯୀଶୁର୍ କ୍ତା ବେସି ଆଉଜି ଅଇଲି, ଆର୍ ବେସି ଲକ୍ମ୍ନ୍ ତାର୍କ୍ତା ଶୁଣ୍ତାର୍ ଗିନେ ଆର୍ ରଗେ ହ୍ଣି ବ୍ଲ୍ ଅଉତାର୍ ଗିନେ, ଗଟେତ୍ଇ ରୁଣ୍ଡୁକେ ଲାଗ୍ଲାଇ। 16ମ୍ତର୍ ସେ ଶୁନ୍ସାନ୍ ଜାଗା ମ୍ନ୍କେ ଜାଇକ୍ରି ପାର୍ତେନା କ୍ର୍ତିରିଲା।
ଯୀଶୁ ଗଟେକ୍ ନିର୍କୁଳୀ ରଗିକେ ବ୍ଲ୍କ୍ଲା
(ମାଥି. ୯:୧-୮; ମାର୍କ ୨:୧-୧୨)
17ଗଟେଦିନ୍ ଯୀଶୁ ଶିକ୍ୟା ଦେତିରିଲା, ଆରେକ୍ ଗାଲିଲୀ ଜିଲାର୍ ସ୍ବୁ ଗାମ୍ ଆର୍ ଯିହୁଦା ଜିଲା ଆର୍ ଯିରୁଶାଲମ୍ ସ୍ହରେ ହ୍ଣି ଆସିରିଲା କ୍ତେକ୍ ଫାରୂଶୀମ୍ନ୍ ଆର୍ କ୍ତେକ୍ ମୋଶାର୍ ନିଆଇ ଶିକାଉତା ଲକ୍ମ୍ନ୍ ସେତି ରିଲାଇ। ଆରେକ୍ ଜ୍ନ୍କ୍ରି ସେ ରଗିମ୍ନ୍କେ ବ୍ଲ୍ କ୍ର୍ତି, ଇତାର୍ଗିନେ ମାପ୍ରୁର୍ ଶ୍କ୍ତି ଯୀଶୁର୍ ସ୍ଙ୍ଗ୍ ରିଲି।
18ଆରେକ୍, ଦ୍କା, ଚାର୍ ଲକ୍ ଗଟେକ୍ ନିର୍କୁଳୀ ରଗିକେ ଟାଟିଏ ବଇକ୍ରି ଆନ୍ଲାଇ। ଆର୍ ଗ୍ର୍ ବିତ୍ରେ ଯୀଶୁର୍ ମୁଏ ତାକେ ନେମ୍କେ ଚେଷ୍ଟା କ୍ର୍ତିରିଲାଇ। 19ମ୍ତର୍ ସେତି ଜ୍ବର୍ ବିଡ୍ ଲାଗି, ରଗିକେ ଯୀଶୁର୍ ଲ୍ଗେ ନେମ୍ ନ୍ହାର୍ଲାଇ, ସେତାର୍ଗିନେ ସେମ୍ନ୍ ସେ ଗ୍ରାର୍ ଚାନି କାଣା କ୍ଲାଇ, ଆର୍ ସେବାଟ୍ ରଗିକେ ଟାଟି ସ୍ଙ୍ଗ୍ ଯୀଶୁର୍ ମୁଏ ଆର୍ ଲକ୍ମ୍ନ୍କାର୍ ମ୍ଜାଇ ଉତ୍ରାଇ ଲାଇ।
20ଯୀଶୁ ସେମ୍ନ୍କାର୍ ବିଶ୍ବାସ୍ ଦ୍କିକ୍ରି ସେ ରଗିକେ କଇଲା, “ଏ ବାଇ, ମୁଇ ତର୍ ପାପ୍ସ୍ବୁ କେମା କ୍ଲେଆଚି।” 21ସେଡେବ୍ଳ୍ ମୋଶାର୍ ନିଆଇ ଶିକାଉତା ଲକ୍ ଆର୍ ଫାରୂଶୀମ୍ନ୍ ତାକାର୍ ତାକାର୍ ବିତ୍ରେ କ୍ଉଆ କୁଇ ଅମ୍କେ ଦ୍ର୍ଲାଇ, “ଇ ମାନାଇକେ? ଏ ଇଶ୍ଵରାର୍ ଲିନ୍ଦା କ୍ରୁଲା, ଇଶ୍ଵରାର୍ ଚାଡି ଆରେକ୍ କେ ପାପ୍ କେମା କ୍ରୁହାରେ?”
22ଯୀଶୁ ସେମ୍ନ୍କାର୍ ଚିଡ୍ହଡ୍ ଅଉତି ରିଲାର୍ ଜାଣିକ୍ରି ସେମ୍ନ୍କେ କଇଲା, “ତୁମିମ୍ନ୍ ନିଜାର୍ ନିଜାର୍ ମ୍ନେ କାଇତାକ୍ ଚିଡ୍ହଡ୍ କ୍ରୁଲାସ୍? 23‘ତର୍ ପାପ୍ସ୍ବୁ କେମା ଅଇଲିବେ’ ବ୍ଲି କ୍ଉତାର୍ ସ୍ହଜ୍ କ୍ତା, କି ‘ଉଟ୍ ଆର୍ ଇଣ୍ତିକ୍ରି ଜା’ ବ୍ଲି କ୍ମା ସ୍ହଜ୍? 24ମ୍ତର୍ ଜ୍ଗତାର୍ ପାପ୍ କେମା କ୍ରୁକେ ମୁଇ ମାନାଇ ହିଲାର୍ ଯେ ଅଦିକାର୍ ଆଚେ, ଇରି ତୁମିମ୍ନ୍ ଜାଣି ରିଆସ୍।” ଇରି କ୍ଇ ଯୀଶୁ ନିର୍କୁଳୀ ରଗିକେ କଇଲା, “ମୁଇ ତକେ କ୍ମ୍ଲେ, ଉଟ୍, ନିଜାର୍ ଟାଟିଦ୍ରି ତର୍ ଗ୍ରେ ବାରିଯା।।”
25ସେମାଡେ ସେ ମାନାଇ ସ୍ବୁଲକାର୍ ମୁଏ ଉଟି ଟିଆଅଇଲା, ଆର୍ ଜୁଇ ଟାଟିଏ ସଇରିଲା ସେଟାଟି ବଇକ୍ରି ଇଶ୍ଵର୍କେ ଦନ୍ୟବାଦ୍ କ୍ରି କ୍ରି ନିଜାର୍ ଗ୍ରେ ବାରିଗ୍ଲା।
26ସେତିରିଲା ସ୍ବୁଲକ୍ ଇରି ଦ୍କିକ୍ରି କାବାଅଇ ଇଶ୍ୱର୍ ମଇମା କୀର୍ତନ୍ କ୍ରୁକେ ଲାଗ୍ଲାଇ, ଆର୍ ବେସି ଡିରିକ୍ରି କଇଲାଇ, “ଆଜି ଅମିମ୍ନ୍ କେଡେକ୍ ଚାନିଆଅଉତା ଗଟ୍ଣା ଦ୍କ୍ଲୁ।”
ଯୀଶୁ ଲେବୀକେ କୁଦ୍ଲା
(ମାଥି. ୯:୯-୧୩; ମାର୍କ ୨:୧୩-୧୭)
27ତାର୍ ହ୍ଚେ ଯୀଶୁ ସେ ସ୍ହରେ ହ୍ଣି ବାରିଗ୍ଲା ଆର୍ ଲେବୀ ନାଉର୍ ଗଟେକ୍ ଲକ୍କେ ସିସ୍ତୁ ଆଦାଇ କ୍ର୍ତା ଜାଗାଇ ବ୍ସି ରିଲାର୍ ଦ୍କି ତାକେ କଇଲା, “ମର୍ ହ୍ଚ୍ ହ୍ଚ୍ ଆଉ।” 28ସେତାକ୍ ଲେବୀ ଉଟି ତାର୍ ସ୍ବୁକାମ୍ ଚାଡିକ୍ରି, ଯୀଶୁର୍ ହ୍ଚେ ହ୍ଚେ ଗ୍ଲା।
29ଆରେକ୍, ଲେବୀ ଯୀଶୁର୍ ଗିନେ ତାର୍ ଗ୍ରେ ଗଟେକ୍ ବ୍ଡ୍ ବଜି ତିଆର୍ କ୍ଲା, ସେ ବଜିତ୍ଇ ବେସି ସିସ୍ତୁ ଆଦାଇ କ୍ର୍ତା ଲକ୍, ଆର୍ ବିନ୍ସ୍ବୁ ଲକ୍ ହେଁ ବଜି କାମ୍କେ ତାକାର୍ ସ୍ଙ୍ଗ୍ ବ୍ସ୍ଲାଇ। 30ସେଡେବ୍ଳ୍ ଫାରୂଶୀମ୍ନ୍ ଆର୍ ସେମ୍ନ୍କାର୍ ଦ୍ଳାର୍ ମୋଶାର୍ ନିଆଇ ଶିକାଉତା ଲକ୍ମ୍ନ୍, ଯୀଶୁର୍ ଚେଲାମ୍ନ୍କାର୍ ବିରୁଦେ କ୍ତା କ୍ମ୍କେ ଲାଗ୍ଲାଇ, “ତୁମିମ୍ନ୍ କାଇତାକ୍ ସିସ୍ତୁ ଆଦାଇ କ୍ର୍ତା ଲକ୍ ଆର୍ ପାପିମ୍ନ୍କାର୍ ସ୍ଙ୍ଗ୍ ମିସିକ୍ରି କାମ୍ଲାସ୍?” 31ଯୀଶୁ ସେମ୍ନ୍କେ କଇଲା, “ବ୍ଲ୍ ଲକ୍ମ୍ନ୍କାର୍ ଗିନେ ଡାକ୍ଟର୍ ଲଡାନାଇ, ମ୍ତର୍ ରଗି ଲକ୍ମ୍ନ୍କାର୍ ଗିନେ ଲଡା। 32ମୁଇ ଦ୍ର୍ମ୍ ଲକ୍ମ୍ନ୍କେ କୁଦୁକ୍ ଆସି ନ୍କେରି, ମ୍ତର୍ ପାପେହ୍ଣି ମ୍ନ୍ ବାଦ୍ଲାଉତାର୍ ଗିନେ ପାପି ମ୍ନ୍କେ କୁଦୁକ୍ ଆଇଲେଆଚି।”
ଉପାସ୍ ବିଷୟେ ଶିକ୍ୟା
(ମାଥି. ୯:୧୪-୧୭; ମାର୍କ ୨:୧୮-୨୨)
33ସେମ୍ନ୍ ଯୀଶୁକେ କଇଲାଇ, “ଯୋହନାର୍ ଚେଲାମ୍ନ୍ ତରେକ୍ ତରେକ୍ ଉପାସ୍ ପାର୍ତେନା କ୍ର୍ତି, ଫାରୂଶୀମ୍ନ୍କାର୍ ଚେଲାମ୍ନ୍ ହେଁ ସେନ୍ କ୍ର୍ତି, ମ୍ତର୍ ତର୍ ଚେଲାମ୍ନ୍ ଉପାସ୍ ନ୍କେରି କାଦି କାତି।” 34ସେଡେବ୍ଳ୍ ଯୀଶୁ ସେମ୍ନ୍କେ କଇଲା, “ବ୍ର୍ ଦ୍ଙ୍ଗ୍ଳା ବାଟାର୍ ଲକ୍ମ୍ନ୍କାର୍ ସ୍ଙ୍ଗ୍ ବ୍ର୍ ରେତା ହ୍ତେକ୍, କାଇରି ତୁମିମ୍ନ୍ କି ସେମ୍ନ୍କେ ଉପାସ୍ କ୍ରାମ୍ ହାରାସ୍? 35ମ୍ତର୍ ସମୟ୍ ଆସେଦ୍। ଆରେକ୍ ଜ୍ଡେବ୍ଳ୍ ସେମ୍ନ୍କାର୍ ତ୍ଇହ୍ଣି ବ୍ରକେ ନିଆ ଅଇଦ୍, ସେଦିନ୍ ସେମ୍ନ୍ ଉପାସ୍ କ୍ର୍ତି।”
36ଆରେକ୍ ଯୀଶୁ ସେମ୍ନ୍କେ ଗଟେକ୍ ଦ୍କାଇକ୍ରି କ୍ଉତା କ୍ତା କଇଲା, “କେ ନ୍ଉଆ ହ୍ଚିଆକେ କାଟିକ୍ରି ହ୍ର୍ନା ହ୍ଚିଆର୍ କାଣାଇ ସିଲାଇ ନ୍କେର୍ତି। ସେରି ସିଲାଇଲେକ୍ ନ୍ଉଆ ହ୍ଚିଆ ଅଦିକ୍ ବ୍ଡ୍କାଣା କ୍ରେଦ୍, ଆରେକ୍, ନ୍ଉଆ ହ୍ଚିଆ ହ୍ର୍ନା ହ୍ଚିଆ ସ୍ଙ୍ଗ୍ ମିସି ନ୍କେରେ।
37ଆରେକ୍, କେ ନ୍ଉଆ ଅଙ୍ଗୁର୍ ର୍ସ୍ ହ୍ର୍ନା ଚାମ୍ ମଣାଇ ନ୍ସେଙ୍ଗାଉତି। ଯଦି ସ୍ଙ୍ଗାଇଲେକ୍ ଚାମ୍ ମଣାକେ ଅଙ୍ଗୁର୍ ର୍ସ୍ ହେହୁଲ୍ ଅଇ ହୁଲିକ୍ରି ଚିରି ଦେଇଦ୍, ଆରେକ୍ ଚାମ୍ଳା ମଣା ଆର୍ ଅଙ୍ଗୁର୍ ର୍ସ୍ ନ୍ଷ୍ଟ ଅଇଦ୍। 38ତ୍ବେ ନ୍ଉଆ ଅଙ୍ଗୁର୍ ର୍ସ୍ ନ୍ଉଆ ଚାମ୍ ମଣାଇ ସ୍ଙ୍ଗାଉତା ଦ୍ର୍କାର୍। 39ଆରେକ୍, ଜୁଇଲକ୍ ହ୍ର୍ନା ଅଙ୍ଗୁର୍ ର୍ସ୍ କାଇକ୍ରି, ନ୍ଉଆ ଅଙ୍ଗୁର୍ ର୍ସ୍ କାମ୍କେ ମ୍ନ୍ ନ୍କେରେ, କାଇତାକ୍ ସେ କଇଦ୍, ‘ହ୍ର୍ନାରି ବ୍ଲ୍।’”
Currently Selected:
ଲୁକ 5: BDVNT
Highlight
Share
Copy
Want to have your highlights saved across all your devices? Sign up or sign in
Bodo Parja Bible (ବ୍ଡ଼୍ ହ୍ର୍ଜା) by The Love Fellowship is licensed under Creative Commons Attribution-ShareAlike 4.0 License.
