ଲୁକ 6
6
ବିଶାଉଣିଦିନାର୍ ମାପ୍ରୁ
(ମାଥି. ୧୨:୧-୮; ମାର୍କ ୨:୨୩-୨୮)
1ତରେକ୍ ଯିହୁଦିମ୍ନ୍କାର୍ ବିଶାଉଣିଦିନ୍ ଯୀଶୁ ଆର୍ ତାର୍ ଚେଲାମ୍ନ୍ ହାଚି କ୍ଲା ହ୍ଦାବାଟ୍ ଅଇ ଜାତିରିଲାବ୍ଳ୍, ତାର୍ ଚେଲାମ୍ନ୍ କେଡ୍ ଚିଡାଇ କ୍ରି ଆତେ ର୍ମ୍ନ୍ଦି କାମ୍କେ ଦ୍ର୍ଲାଇ। 2ତ୍ବେ ଫାରୂଶୀମ୍ନ୍କାର୍ ବିତ୍ରେହ୍ଣି କ୍ତେକ୍ ଫାରୂଶୀମ୍ନ୍ ହ୍ଚାର୍ଲାଇ, “ବିଶାଉଣିଦିନ୍ ଜୁଇରି କ୍ର୍ତାର୍ ଯିହୁଦିମ୍ନ୍କାର୍ ନିୟମ୍ ନାଇ, କାଇତାକ୍ ତୁମିମ୍ନ୍ ସେରି କ୍ରୁଲାସ୍?”
3ଯୀଶୁ ସେମ୍ନ୍କେ କଇଲା, “ତୁମିମ୍ନ୍ କ୍ବେ ଇରି ଶାସ୍ତର୍ ଲ୍ଗେ ହଳି ନ୍କେରାସ୍? ଜ୍ଡେବ୍ଳ୍ ଦାଉଦ୍ ର୍ଜା ଆର୍ ତାର୍ ସ୍ଙ୍ଗ୍ମ୍ନ୍ ବୁକ୍ ହାଇଲାଇ, ସେଡେବ୍ଳ୍ ସେ କାଇରି କ୍ରିରିଲା। 4ଦାଉଦ୍ ର୍ଜା ବୁକେ ରିଲା ଆର୍ ଇଶ୍ଵରାର୍ ତମ୍ୱୁ ବିତ୍ରେ ହୁରିକ୍ରି, ଜୁଇ ମାନ୍ସି ରୁଟିକେ ଜାଜକ୍ମ୍ନ୍ ହ୍କା କାତାକ୍ତା, ଆରେକ୍ କାର୍ କାତାର୍ ଅଦିକାର୍ ନରିଲି। ସେରି ସେ କାଇଲା ଆର୍, ନିଜାର୍ ସ୍ଙ୍ଗ୍ମ୍ନ୍କେ ହେଁ କାମ୍କେ ଦେଇରିଲା।” 5ଆରେକ୍, ଯୀଶୁ ସେମ୍ନ୍କେ କଇଲା, “ମାନାଇ ହିଲା ବିଶାଉଣିଦିନାର୍ ହେଁ ମାପ୍ରୁ।”
ଯୀଶୁ ଗଟେକ୍ ଶୁକି ରିଲା ଆତ୍କେ ବ୍ଲ୍କ୍ଲା
(ମାଥି. ୧୨:୯-୧୪; ମାର୍କ ୩:୧-୬)
6ଯୀଶୁ ଆର୍ ଗଟେକ୍ ବିଶାଉଣିଦିନ୍ ଯିହୁଦିମ୍ନ୍କାର୍ ପାର୍ତେନା ଗ୍ରେ ଗ୍ଲା ଆର୍ ଶିକ୍ୟା ଦେତିରିଲା। ସେତି ଗଟେକ୍ ଆତ୍ ଶୁକି ରିଲା ଗଟେଲକ୍ ରିଲା, 7ଆର୍, ବିଶାଉଣିଦିନ୍ ସେ ଲକ୍କେ ଯୀଶୁ ବ୍ଲ୍ କ୍ରେଦ୍ କି ନାଇ, ଇରି ଦ୍କୁକେ କ୍ତେକ୍ ନିଆଇ ଶିକାଉତା ଲକ୍ ଆର୍ ଫାରୂଶୀମ୍ନ୍ ତାକେ ମ୍ନ୍ ଦିଆନ୍ ଦେଇକ୍ରି ଦ୍କ୍ତି ରିଲାଇ, ଜନ୍କ୍ରି ସେମ୍ନ୍ ତାର୍ ବିରୁଦେ ଦସ୍ ଦ୍ରୁ ହାର୍ତି। 8ମ୍ତର୍ ଯୀଶୁ ସେମ୍ନ୍କାର୍ ମ୍ନାର୍ କ୍ତା ଜାନ୍ଲା, ଆର୍ ଜୁଇଲକାର୍ ଆତ୍ ଶୁକି ଜାଇରିଲି ତାକେ କଇଲା, “ଆସିକ୍ରି ସ୍ବ୍କାର୍ ମ୍ଜାଇ ଟିଆ ଅଉ” ସେ ମାନାଇ ଉଟି ଜାଇକ୍ରି ସେତି ଟିଆଅଇଲା।
9ତାର୍ ହ୍ଚେ ଯୀଶୁ ଫାରୂଶୀମ୍ନ୍କେ ଆର୍ ଦ୍ର୍ମ୍ ଶାସ୍ତର୍ ଜାନ୍ତା ଲକ୍କେ କଇଲା, “ମୁଇ ତୁମୁକ୍ ହ୍ଚାରୁଲେ, ବିଶାଉଣିଦିନ୍ କାଇରି କ୍ର୍ତା ବିଦି ଆଚେ? ବ୍ଲ୍ କାମ୍କ୍ର୍ତା କି କ୍ରାପ୍ କାମ୍କ୍ର୍ତା? ଗଟେକ୍ ଲକାର୍ ଜୀବନ୍ ଉଦାର୍ କ୍ର୍ତାର୍ କି ଜୀବନ୍ ନ୍ଷ୍ଟ କ୍ର୍ତାର୍?” 10ତାର୍ ହ୍ଚେ ଯୀଶୁ ସେ ଚାରିହ୍କାର୍ ସ୍ବୁ ଲକ୍ମ୍ନ୍କେ ଦ୍କି ସେ ଆତ୍ ଶୁକି ରିଲା ଲକ୍କେ କଇଲା, “ତର୍ ଆତ୍ ଲାମାଉ, ତ୍ବେ ସେ ତାର୍ ଶୁକି ରିଲା ଆତ୍କେ ଲାମାଇଲା, ଆରେକ୍ ତାର୍ ଆତ୍ ବ୍ଲ୍ ଅଇଲି।” 11ମ୍ତର୍ ଫାରୂଶୀ ଆର୍ ଦ୍ର୍ମ୍ ଶାସ୍ତର୍ ଜାନ୍ତା ଲକ୍ମ୍ନ୍ ବେସି ରିସା ଅଇଲାଇ, ଆର୍ ଯୀଶୁକେ କାଇରି କ୍ରୁମା ବ୍ଲି ନିଜାର୍ ନିଜାର୍ ବିତ୍ରେ କ୍ତାବାର୍ତା କ୍ରୁକେ ଲାଗ୍ଲାଇ।
ଯୀଶୁ ବାରଗଟ୍ ଚେଲାକେ ବାଚ୍ଲା
(ମାଥି. ୧୦:୧-୪; ମାର୍କ ୩:୧୩-୧୯)
12ସେଡେବ୍ଳ୍ ଯୀଶୁ ପାର୍ତେନା କ୍ରୁକେ ଗଟେକ୍ ଡଙ୍ଗ୍ରେ ଗ୍ଲା, ଆର୍ ସେତି ସେ ରାତି ସାରା ଇଶ୍ଵରାର୍ ତ୍ଇ ପାର୍ତେନା କ୍ଲା। 13ତାର୍ ଆର୍ ଗଟେଦିନ୍ ସେ ତାର୍ ଚେଲାମ୍ନ୍କେ କୁଦ୍ଲା ଆର୍ ବାରଲକ୍କେ ବାଚ୍ଲା, ଆରେକ୍ ସେ ସେମ୍ନ୍କେ ହ୍ଟାଇଲା ଚେଲାବ୍ଲି ନାଉଁ ଦିଲା।
14ସେ ହ୍ଟାଇଲା ଚେଲାମ୍ନ୍କାର୍ ନାଉଁ ଶିମୋନ୍, ଯାକେ ସେ ପିତର୍ ବ୍ଲି ନାଉଁ ଦିଲା, ତାର୍ ସାନ୍ ବାଇସି ଆନ୍ଦ୍ରିୟ, ଯାକୁବ ଆର୍ ଯୋହନ୍, ଫିଲିପ୍ପ, ଆର୍ ବାର୍ଥଲମୀ, 15ମାଥିଉ, ଥୋମା, ଆଲଫିର୍ ହଇସି ଯାକୁବ ଆର୍ ଶିମୋନ୍, ଯାକେ ଦେଶ୍ ସେବାକ୍ରୁ ବ୍ଲି କ୍ଉତି, 16ଯାକୁବାର୍ ହଇସି ଯୀହୂଦା ଆର୍ ଇଷ୍କାରିୟତ୍ ଯିହୁଦା, ଯେ ଯୀଶୁକେ ଶ୍ତ୍ରୁ ଆତେ ସ୍ହ୍ରିଦିଲା।
ଯୀଶୁ ଶିକ୍ୟା ଦିଲା ଆର୍ ଗାଦି ଲକ୍ମ୍ନ୍କେ ବ୍ଲ୍କ୍ଲା
(ମାଥି. ୪:୨୩-୨୫)
17ଆର୍ ଯୀଶୁ ତାର୍ ଚେଲାମ୍ନ୍କାର୍ ସ୍ଙ୍ଗ୍ ଡଙ୍ଗ୍ରେ ହ୍ଣି ତ୍ଳେ ଉତୁର୍ଲା, ସେ ଗଟେକ୍ ସ୍ଦ୍ର୍ମ୍ କ୍ଣ୍ତିଲ୍ଗେ ଟିଆଅଇଲା, ସେଡେବ୍ଳ୍ ଯିହୁଦା ଜିଲା ଆର୍ ଯିରୁଶାଲମ୍ ସ୍ହରାର୍ ଚାରିବାଟାର୍ ଲକ୍ମ୍ନ୍, ଆର୍ ସର୍ ଆର୍ ସୀଦନ୍ ସ୍ହର୍ ସ୍ନ୍ଦି ବାଟାର୍ ବେସି ଲକ୍ମ୍ନ୍ ଆସି ସେତି ରୁଣ୍ତ୍ଲାଇ। 18ସେ ସ୍ବୁ ଲକ୍ମ୍ନ୍ ଯୀଶୁର୍ ବାକ୍ୟ ଶୁଣୁକେ, ଆର୍ ନିଜାର୍ ନିଜାର୍ ରଗେ ହ୍ଣି ବ୍ଲ୍ ଅମ୍କେ ଆସିରିଲାଇ, ଆର୍ ଜୁଇ ଲକ୍ମ୍ନ୍କେ ବୁତ୍ଆତ୍ମା ଡ୍ସି ରିଲି ଲାଗି କ୍ଷ୍ଟ ହାଉତିରିଲାଇ, ସେ ଲକ୍ମ୍ନ୍ ବ୍ଲ୍ ଅଇଲାଇ। 19ଆରେକ୍, ସ୍ବୁ ଲକ୍ମ୍ନ୍ ଯୀଶୁକେ ଚୁମ୍ନ୍ଦେ ବ୍ଲି ଚେଷ୍ଟା କ୍ର୍ତିରିଲାଇ, କାଇତାକ୍ ଯୀଶୁର୍ ତ୍ଇହ୍ଣି ଶ୍କ୍ତି ବାରି ବେସି ଲକ୍ମ୍ନ୍କେ ବ୍ଲ୍ କ୍ର୍ତିରିଲା।
କୁଇ ଲକ୍ମ୍ନ୍ ବେସି ବ୍ଲ୍
(ମାଥି. ୫:୧-୧୨)
20ଯୀଶୁ ତାର୍ ଚେଲାମ୍ନ୍କେ ଦ୍କିକ୍ରି କଇଲା, “ଗ୍ରିବ୍ ଯେ ତୁମିମ୍ନ୍, ତୁମିମ୍ନ୍ ଦନ୍ୟ କାଇତାକ୍ ପରମେଶ୍ଵରାର୍ ରାଜି ତୁମାର୍ମ୍ନ୍କାର୍। 21ଅବେ କାମ୍କେ ହିମ୍କେ ନ୍ରିଲା ଲକ୍ ଯେ ତୁମିମ୍ନ୍, ତୁମିମ୍ନ୍ ଦନ୍ୟ, କାଇତାକ୍ ତୁମାର୍ ହେଟ୍ ହୁର୍ନେ କାଦି ମିଳେଦ୍, ଅବେ କାନ୍ଦୁଲାସ୍ ଯେ ତୁମିମ୍ନ୍, ତୁମିମ୍ନ୍ ଦନ୍ୟ, କାଇତାକ୍ ତୁମିମ୍ନ୍ ସ୍ର୍ଦା ଅଉଆସ୍।
22ଲକ୍ ଜ୍ଡେବ୍ଳ୍ ତୁମୁକ୍ମ୍ନ୍ ମୁଇ ମାନାଇ ହିଲାର୍ ଲାଗି ଗିଣ୍ ଆର୍ ବିନେ କ୍ର୍ତି, ଆର୍ ଲିନ୍ଦା ଆର୍ ତୁମାର୍ ନାଉଁଏ କ୍ରାପ୍ କ୍ତା କ୍ଇ ତୁମୁକ୍ ଇଚ୍ଚା ନ୍କେର୍ତି, ତ୍ବେ ତୁମିମ୍ନ୍ ଦନ୍ୟ। 23ଜ୍ଡେବ୍ଳ୍ ଇ ସ୍ବୁ ଗଟେଦ୍ ସେଡେବ୍ଳ୍ ସ୍ର୍ଦା ଅଇକ୍ରି ନାଚା, କାଇତାକ୍ ସ୍ର୍ଗେ ତୁମୁକେ ଗଟେକ୍ ବ୍ଡ୍ ଇନାମ୍ ଦେମ୍କେ ପରମେଶ୍ପ୍ର୍ ସ୍ଙ୍ଗାଇ ଆଚେ। ସେନ୍କ୍ରି ତ ସେମ୍ନ୍କାର୍ ଦାଦିବାବୁମ୍ନ୍ ହେଁ, ବବିଶତ୍ କ୍ତା କ୍ଉତା ଲକ୍ମ୍ନ୍କାର୍ ସ୍ଙ୍ଗ୍ କ୍ରିରିଲାଇ।
ସ୍ର୍ଗେ ରେତାର୍ ଉବାର୍ ହିଲାହର୍ ଚାଲ୍ ଚଳ୍ନୀ
(ମାଥି. ୫:୩୮-୪୮; ୭:୧୨)
24ମ୍ତର୍ ହାଇ ଡ୍ଣ୍ଡ୍ ହାଉତା ଲକ୍ ଯେ ତୁମି ଦନୀ ଲକ୍ମ୍ନ୍, ଅବେ ତୁମିମ୍ନ୍ ନିଜାର୍ ନିଜାର୍ ସୁକେ ଜୀବନ୍ କାଟୁଲାସ୍। 25ହାଇ ଡ୍ଣ୍ଡ୍ ହାଉତା ଲକ୍ ଯେ ତୁମିମ୍ନ୍, ଯେ ଏବେ ହେଟ୍ ହୂର୍ନେ କାମ୍ଲାସ୍, କାଇତାକ୍ ତୁମୁକ୍ମ୍ନ୍ କାମ୍କେ ନ୍ମିଳେ। ହାଇ ଡ୍ଣ୍ଡ୍ ହାଉତା ଲକ୍ ଯେ ତୁମିମ୍ନ୍, ଏବେ ସ୍ର୍ଦା ଅଇ ନିଚଳୁଲାସ୍, କାଇତାକ୍ ତୁମିମ୍ନ୍ ଦୁକ୍ ଆର୍ କାନ୍ଦାବୁବା ଅଉଆସ୍।
26ଜ୍ଡେବ୍ଳ୍ ଲକ୍ମ୍ନ୍ ତୁମୁକ୍ମ୍ନ୍ ବ୍ଲ୍ ଆର୍ ବ୍ଡ୍ ବ୍ଲି କ୍ଉତି, ସେଡେବ୍ଳ୍ ଡ୍ଣ୍ଡ୍ ଆସି ତୁମୁକେ, କାଇତାକ୍ ତୁମାର୍ମ୍ନାର୍ ହୁର୍ବାର୍ ଦାଦିସି ମ୍ନ୍ ହେଁ ମିଚ୍ ବବିଶତ୍ କ୍ତା କ୍ଉତାର୍ ଲକ୍ମ୍ନ୍କେ ବ୍ଲ୍ ଆର୍ ବ୍ଡ୍ ବ୍ଲି କ୍ଉତିରିଲାଇ।
27ମ୍ତର୍ ଏବେ ଶୁଣୁଲାସ୍ ଯେ ତୁମିମ୍ନ୍, ମୁଇ ତୁମୁକ୍ମ୍ନ୍ କ୍ମ୍ଲେ, ତୁମିମ୍ନ୍ ତୁମାର୍ ଶ୍ତ୍ରୁମ୍ନ୍କେ ଲାଡ୍କ୍ରା। ଜୁଇଲକ୍ ତୁମୁକ୍ମ୍ନ୍ ଗିଣ୍ କ୍ର୍ତି, ସେମ୍ନ୍କାର୍ ଦ୍ର୍ମ୍ କ୍ରା। 28ଜୁଇ ଲକ୍ମ୍ନ୍ ତୁମୁକ୍ମ୍ନ୍ ଅବିଶାପ୍ ଦେତି, ସେମ୍ନ୍କେ ଆଶିର୍ବାଦ୍ କ୍ରା। ଜୁଇ ଲକ୍ମ୍ନ୍ ତୁମୁକ୍ମ୍ନ୍ କ୍ରାପ୍ ବ୍ଯବହାର୍ କ୍ର୍ତି, ସେମ୍ନ୍କାର୍ ଗିନେ ପାର୍ତେନା କ୍ରା।
29ଯେ ତୁମୁକ୍ ଗଟେକ୍ ଗାଲେ ଚାହୁଳ୍ ମାର୍ଲେକ୍, ତାକେ ଆର୍ଗଟେ ଗାଲ୍ ହେଁ ଦ୍କାଇ ଦିଆସ୍। ଆରେକ୍, ଯେ ତୁମାର୍ ଚାଦର୍ ନ୍ଇ ଗ୍ଲେକ୍, ତାକେ ତୁମାର୍ ଉହ୍ରେ ହିନ୍ଦ୍ତା ଆଙ୍ଗି ହେଁ ନେମ୍ କେ ମ୍ନା କ୍ରାନାଇ। 30ଯେ ହେଁ ତୁମୁକ୍ ମାଗେଦ୍, ତାକେ ଦିଆସ୍। ଆରେକ୍ ଯେ ତୁମାର୍ ସ୍ମ୍ପତି ନ୍ଇଜାଇଦ୍, ତାର୍ ତ୍ଇ ସେରି ଆର୍ ଗଟେତର୍ ଦାବି କ୍ରାନାଇ।
31ଲକ୍ମ୍ନ୍ ଜ୍ନ୍କ୍ରି ତୁମାର୍ ସ୍ଙ୍ଗ୍ କ୍ତାବାର୍ତା କ୍ରତ୍ବ୍ଲି ମ୍ନ୍କ୍ରୁଲାସ୍, ତୁମିମ୍ନ୍ ସେମ୍ନ୍କାର୍ ସ୍ଙ୍ଗ୍ ସେ ପର୍କାର୍ କ୍ତାବାର୍ତା କ୍ରା। 32ଆର୍ ଜୁଇ ଲକ୍ମ୍ନ୍ ତୁମୁକ୍ମ୍ନ୍ ଲାଡ୍କ୍ର୍ତି, ସେମ୍ନ୍କେ ଲାଡ୍ କ୍ଲେକ୍ ତୁମିମ୍ନ୍ କାଇ ଦୟା ହାଉଆସ୍? କାଇତାକ୍ ପାପିମ୍ନ୍ ହେଁ ନିଜାର୍ ନିଜାର୍ ଲାଡ୍ କ୍ର୍ତା ଲକ୍ମ୍ନ୍କେ ଲାଡ୍କ୍ର୍ତି। 33ଆରେକ୍ ଜୁଇଲକ୍ ତୁମାର୍ମ୍ନ୍କାର୍ ବ୍ଲ୍ କ୍ର୍ତି, ତ୍ବେ ତୁମିମ୍ନ୍ ସେମ୍ନ୍କାର୍ ବ୍ଲ୍କାମ୍ କ୍ରାସ୍, ସେତାକ୍ ତୁମିମ୍ନ୍ କାଇ ଦୟା ହାଉଆସ୍? କାଇତାକ୍ ପାପିମ୍ନ୍ ହେଁ ସେରି କ୍ର୍ତି। 34ଆରେକ୍, ଜୁଇ ଲକ୍ମ୍ନ୍ ରୁଣ୍ ସୁଜୁ ହାର୍ତି ବ୍ଲି ତୁମାର୍ ଆଶା, ସେମ୍ନ୍କେ ରୁଣ୍ ଦିଲେକ୍ ତୁମିମ୍ନ୍ କାଇ ଦୟା ହାଉଆସ୍? ପାପିମ୍ନ୍ ହେଁ ସ୍ମାନ୍ ବାବେ ସୁଦ୍ ହାମ୍କେ ପାପି ମ୍ନ୍କେ ରୁଣ୍ ଦେତି।
35ମ୍ତର୍ ତୁମିମ୍ନ୍ ତୁମାର୍ ଶ୍ତ୍ରୁମ୍ନ୍କେ ଲାଡ୍କ୍ରା ଆର୍ ସେମ୍ନ୍କାର୍ ଉପ୍କାର୍ କ୍ରା, ଆରେକ୍, ରୁଣ୍ ସୁଜ୍ତାର୍ ଆଶା ନ୍ରେକି କ୍ରି ରୁଣ୍ ଦିଆସ୍। ସେରି ଅଇଲେକ୍ ତୁମାର୍ମ୍ନ୍କାର୍ ଇନାମ୍ ବେସି ଅଇଦ୍ ଆର୍ ତୁମିମ୍ନ୍ ବ୍ଡ୍ ଇଶ୍ଵରାର୍ ହିଲା ଅଉଆସ୍, କାଇତାକ୍ ଇଶ୍ୱର୍ ଦନ୍ୟବାଦ୍ ନ୍ଦେତା ଲକ୍କେ ଆର୍ ଦୁଷ୍ଟ ଲକ୍ମ୍ନ୍କେ ବେସି ଦୟା କ୍ର୍ତି। 36ତୁମାର୍ମ୍ନ୍କାର୍ ସ୍ର୍ଗାର୍ ଉବା ଜ୍ନ୍କ୍ରି ଦୟା କ୍ର୍ତା ଲକ୍, ତୁମିମ୍ନ୍ ହେଁ ସେନ୍କ୍ରି ଦୟା କ୍ର୍ତା ଲକ୍ ଅଉଆ।”
ବିନ୍ଲକାର୍ ବିଚାର୍ କ୍ରାନାଇ
(ମାଥି. ୭:୧-୪)
37ଯୀଶୁ ସେମ୍ନ୍କେ ଆରେକ୍ କଇଲା, “ବିନ୍ଲକାର୍ ବିଚାର୍ କ୍ରାନାଇ, ତ୍ବେ ଇଶ୍ୱର୍ ହେଁ ତୁମାର୍ ବିଚାର୍ ନ୍କେରେ। ବିନ୍ ଲକ୍କେ ଦସି କ୍ରାନାଇ ତ୍ବେ ସେ ହେଁ ତୁମୁକ୍ ଦସି ନ୍କେରେ। ଲକ୍ମ୍ନ୍କେ କେମା କ୍ରା ତ୍ବେ ସେ ହେଁ ତୁମୁକେ କେମା କ୍ରେଦ୍।
38ବିନ୍ ଲକ୍ମ୍ନ୍କେ ଦାନ୍ କ୍ରା, ତ୍ବେ ଇଶ୍ୱର୍ ହେଁ ତୁମୁକେ ଦାନ୍ କ୍ରେଦ୍। ତ୍ବେ ତୁମି ବେସିକ୍ରି ହାଉଆସ୍ ବ୍ଲେକ୍ ମାଣେ ବ୍ଲ୍କ୍ରି ବ୍ର୍ତି କ୍ରି ନାହି ଦିଲେକ୍, ଲକ୍ମ୍ନ୍ ହେଁ ତୁମୁକେ ସେନ୍କ୍ରି ଦେତି, ବିନ୍ ଲକ୍କେ ଜ୍ନ୍କ୍ରି ତୁମିମ୍ନ୍ ନାହି ଦିଆସ୍ ସେନ୍କ୍ରି ମାପ୍ରୁ ହେଁ ତୁମୁକେ ନାହିକ୍ରି ଦେଇଦ୍।”
39ଆରେକ୍ ଯୀଶୁ ସେମ୍ନ୍କେ ଦ୍କାଇକ୍ରି କ୍ଉତା କ୍ତା କଇଲା, “ଗଟେକ୍ କାଣା ଆର୍ଗଟ୍ କାଣାକେ ବାଟ୍ଦ୍କାଇ ନେମ୍ ହାରେ କି? ଯଦି ସେବାଟ୍ ଦ୍କାଇକ୍ରି ନେଇଦ୍, ତ୍ବେ ସେ ଜଳେକ୍ କାଣା ହେଁ କାଲେ ଅଦୁର୍ତି? 40ଗୁରୁ ତ୍ଇହ୍ଣି ଚେଲା ବ୍ଡ୍ଅଇ ନ୍କେରେ। ମ୍ତର୍ ଜ୍ଡେବ୍ଳ୍ ଚେଲା ଗୁରୁ ତ୍ଇହ୍ଣି ସ୍ବୁ ବିଷୟ୍ ଶିକେଦ୍ ତ୍ବେ ସେ ଗୁରୁର୍ ସ୍ମାନ୍ ଅଇଦ୍।
41ଜ୍ଡେବ୍ଳ୍ ତୁମାର୍ ନିଜାର୍ ଜୀବନେ ପାପ୍ ଦସ୍ ଗଟେକ୍ ବ୍ଡ୍ କାଡା ହର୍ ତୁମାର୍ ଆକି ଲ୍ଗେ ଆଚେ, ସେରି ନ୍ଦେକି, ତୁମି କାଇରି ତୁମାର୍ ବାଇର୍ ଆକିର୍ ସାନ୍ କୁଟା ହର୍ ପାପ୍ ଦସ୍କେ ଦ୍କୁଲାସ୍?। 42ତୁମି ତୁମାର୍ ଆକି ଲ୍ଗେରିଲା କାଡାକେ ଆଗେ ନ୍ବେଟି କ୍ରି, କ୍ନ୍କ୍ରି ତୁମି ତୁମାର୍ ବାଇଦିର୍ ଆକି ଲ୍ଗେରିଲା କୁଟାକେ ବେଟି ଦ୍ଇନ୍ଦ୍ ବ୍ଲି କ୍ମ୍ହାରାସ୍? ରେ ଅକାରିଆମ୍ନ୍ ଆଗେ ନିଜାର୍ ଆକିଏ ହ୍ଣି କାଡାକେ ବାର୍ କ୍ରା, ତ୍ବେ ତୁମାର୍ ବାଇଦିର୍ ଆକି ଲ୍ଗେରିଲା କୁଟାକେ ବାର୍କ୍ରୁକେ ତୁମି ବ୍ଲ୍କ୍ରି ଦ୍କୁହାରାସ୍।
ଗ୍ଚ୍ ଆର୍ ତାର୍ ହ୍ଳ୍
(ମାଥି. ୭:୧୬-୨୦; ୧୨:୩୩-୩୫)
43ଗଟେକ୍ ବ୍ଲ୍ ଗ୍ଚେ କ୍ରାପ୍ ହ୍ଳ୍ ହ୍ଳି ନ୍କେରେ, କି କ୍ରାପ୍ ଗ୍ଚେ ବ୍ଲ୍ ହ୍ଳ୍ ହ୍ଳି ନ୍କେରେ। 44ସ୍ବୁ ଗ୍ଚ୍ ମ୍ନ୍କେ ତାର୍ ହ୍ଳ୍କେ ଦ୍କିକ୍ରି ଚିନା ଅଇଦ୍। କାଟା ଗ୍ଚେ ଅଙ୍ଗୁର୍ ହ୍ଳ୍ କି କାଟା କଳି ଗ୍ଚେ ହ୍ଣି ଡୁମ୍ବୁର୍ ହ୍ଳ୍ କଳି ନ୍କେର୍ତି।
45ଗଟେକ୍ ବ୍ଲ୍ ଲକ୍ ବ୍ଲ୍ ହୁର୍ଦୟ୍ ବିତ୍ରେହ୍ଣି ବ୍ଲ୍ କ୍ତାକେ ବାର୍ କ୍ରେଦ୍, ଆର୍ ଗଟେକ୍ କ୍ରାପ୍ ଲକ୍ ତାର୍ କ୍ରାପ୍ ହୁର୍ଦୟ୍ ବିତ୍ରେହ୍ଣି କ୍ରାପ୍ ବିଷୟ୍କେ ବାର୍ କ୍ରେଦ୍, କାଇତାକ୍ ମ୍ନ୍ ବିତ୍ରେ ଜୁଇରି ବ୍ର୍ତି ରେଇଦ୍, ସେ କ୍ତା ଟଣ୍ତ୍ କଇଦ୍।
ଜଳେକ୍ ଗ୍ର୍ ବ୍ନାଉତା ଲକ୍
(ମାଥି. ୭:୨୪-୨୭)
46ଆର୍ ତୁମିମ୍ନ୍ କାଇତାକ୍ ମକେ ମାପ୍ରୁ, ମାପ୍ରୁ ବ୍ଲି କୁଦୁଲାସ୍, ମ୍ତର୍ ମର୍କ୍ତା ମାନି ନ୍କେରୁଲାସ୍? 47ଜୁଇଲକ୍ ମର୍ଲ୍ଗେ ଆସିକ୍ରି ମର୍ ଇ ସ୍ବୁକ୍ତା ଶୁଣେଦ୍ ଆର୍ ସେ ତାକେ ମାନେଦ୍, ସେ କାର୍ ସ୍ଙ୍ଗ୍ ସ୍ମାନ୍ ଅଇଦ୍, ମୁଇ ସେରି ତୁମୁକେ କଇନ୍ଦ୍। 48ସେ ଅନ୍କାର୍ ଗଟେକ୍ ଲକ୍, ଯେ କି ଡେଙ୍ଗ୍କ୍ରି କାଲ୍ ମାରି, ଟେଡା ସ୍ଙ୍ଗ୍ କୁନାଦି ହ୍କାଇରିଲା ଲକାର୍ ସ୍ମାନ୍। ଆର୍, ହାଣି ହ୍ବନ୍ ଆସି ସେ ଗ୍ର୍କେ ଦ୍କା ମାର୍ଲି, ମ୍ତର୍ ସେ ଗ୍ର୍ ବ୍ଲ୍କ୍ରି ତିଆର୍ ଅଇରିଲି ଲାଗି କାଇ ନ୍ଇଲି।
49ମ୍ତର୍ ଜୁଇଲକ୍ ମ୍ର୍ କ୍ତା ଶୁଣିକ୍ରି ନ୍ମାନେ ସେ କୁନାଦି କାଲ୍ ନ୍ହେକାଇ ବୁଇଁ ଉହ୍ରେ ଗ୍ର୍ ତିଆର୍ କ୍ର୍ତା ଲକାର୍ ସ୍ମାନ୍। ଜ୍ଡେବ୍ଳ୍ ହାଣି ହ୍ବନ୍ ଆସେଦ୍ ଆର୍ ଗ୍ର୍କେ ଦ୍କା ମାରେଦ୍ ସେ ଦାହ୍ରେ ସେ ଗ୍ର୍ ବାଙ୍ଗି ଜାଇଦ୍ ଆର୍ ତାର୍ ଅବସ୍ତା ବ୍ୟଂକାର୍ ଅଇଲି।”
Currently Selected:
ଲୁକ 6: BDVNT
Highlight
Share
Copy
Want to have your highlights saved across all your devices? Sign up or sign in
Bodo Parja Bible (ବ୍ଡ଼୍ ହ୍ର୍ଜା) by The Love Fellowship is licensed under Creative Commons Attribution-ShareAlike 4.0 License.
