लूको 10

श्रुम निंज़ो सा चेला तिंङ चरच़ि

1दीह गप्पो थल प्रभु यीशुज़ि षुमु निहज़ो सा ऊई चेलार नियुक्त लहरी दंङ अंऊ इलाकंङ ए ठाहरीरिंङ यीशुज़ि ऐनाह इबिमी थल्जी बिचार लहते, दोर तिंङ ऐनाह बे तुई झुह्ट-झुह्ट चेलारे च़रतिर। 2यीशुज़ि दोतंङ साते कुंई, “छना रीहरिंङ महसे फसल शुबी, ध्वांए महस मीहरेर तोतोर अरी परमेश्वरो बचन रेड्रिमी थल्जी तेयार तोतोर। पर परमेश्वर ओ राज्यो पाहठी कंड्रा मीहरे थोड़े तोतोर। दिऊ थल्जी परमेश्वरारंङ साते अंऊ रिहू मालिक तोह बिनती लांई कि दोई एनोह रीहरिंङ कम लहज़िमी थल्जी महस मज़दूरा रे चरच़े च़रतु।” 3ईलांई; खंणुई, गेह केतिंङ त्रैंईतु ठ्रोह शंखुतु बिचंङ चरच़ातग। 4दिरंङ माह बटुआ, माह झोली, माह बुह्टर शिलांई; दंङ माह अमरिंङ अतिंङ ला हाल चाल रुक्च़िमी थल्जी टेम बर्बाद था लांही।

5अंऊ ला घरबारंङ केहरे योंई, हेगा कुंई, घरबारंङ कल्याण शोतो 6दंङ अगर दुह घरबारंङ अरीया मेहमानातु सेवा टहल लहज़ा मीह शोतो ता, केहतु कल्याण दोऊ टोईच़ी शोतो, अगर झांह माह शुई ता केहतु कल्याण केहतु ए कछंङ यह्च़ा अपतो। 7दुह ए घरबारंङ तोनि, दंङ अंऊ ला चीज़ दोतु दोरच़ी खोकसोतो, दुह ए ज़ोहनी ए तुंङमोंई, छना कुचे कम लहज़ा दोतिंङ एनोह ध्याड़ी खोकसी जूंस; चुंङ-चुंङ था ईलांई। 8अंऊ ला इलाकंङ केहतु खुशी रंङ स्वागत लोहर दंङ छिला केतिंङ ज़ेइमी थल्जी रमोर दुह खुशी रंङ साते ज़ेईन। 9दोरकी टेहची मीहतिंङ केहच़ी ठीक लांही दंङ दोतंङ साते कोनी, परमेश्वर ओ राज केहतु कछंङ पिचे अन्जा। 10पर अंऊ इलाकंङ मीहरे केहतु स्वागत माह लोहर ता दुह इलाकाओ सड़कारिंङ इलजे कुंई, 11“केहतु इलाकाओ धुह्‌ड़ ला, अंऊ ञेंहतु कोन्ज़ा रिंङ तोह, ञेंहच़ी केहतु तंङशी ठुड़केगी केओनि; दिरंङ ला केहच़ी दीह ञेंह केहनि कि परमेश्वरो राज केहतु कछंङ पिचे अन्जी तोह।” 12गेह केतंङ साते कुट्रातग न्याय ध्याड़ारिंङ दुह इलाकाओ हलात दुह सज़ा बे अंऊ परमेश्वर सदोम शहरो मीहतिंङ रमतो दोबि ला महस शोतो।

अबिश्वासी नगर तिंङ धिक्कार

13“धिक्कार शुह! खुराजीन शहरो मीहरे, धिक्कार शुह! बैतसैदा शहरो मीहरे। अंऊ हेरानी ऊ कम ए रूठे कम गेह केहतु बिचंङ लहज़ी तातग, अगर दुह कमाबि गेह ऊई इलाकारिंङ सोर ए सीदोन शहरारिंङ लांईया ता दोच़ी टाठ चोकसा दंङ तब चाह्सा अपेहल बे एनोह पाप छोड़ेके चरच़ि शुंईआ। 14पर गेह केतिंङ कुट्रातग न्याय ध्याड़ारिंङ केहतु हलात दुह सज़ा बे अंऊ परमेश्वर सोर ए सीदोन शहरो मीहतिंङ रमतो दोबि ला महस शोतो। 15हे कफरनहूम शहरो मीहरे, छि केरे स्वर्ग तचेक रंगी शोना? कांह ताह अधलोक तचेक योंखा योन।” 16“दंङ यीशुज़ि एनोह सनी चेला तिंङ कुहतो, अंऊ ला केहतु रेड्रा, दोई गिऊ रेड्रा; दंङ अच़िला केहतु शिक्षा माह रेड्रोर दोरे गिह्बी माह चेहच़ातोर, दंङ अच़िला गिऊ गप्पा माह मनेक्च़ातेर दोरे दोबि ला माह मनेक्च़ातेर अंऊ दोई गिह्बी च़रतो।”

श्रुम निंज़ो सा चेला तु यह्च़ा अपि

17दोरे चेलारे खुशी रंङ साते यह्च़ा अतिर दंङ कुट्री लेहती, “हे प्रभु, मांजी आत्माज़ि ञेंहतु गप्पा मनेक्तिर अपेहल ञेंहच़ी दोतिंङ कांह मिंदंङ हुकुम रेंईन।” 18यीशुज़ि दोतंङ साते कुंई, “अपेहल मांजी आत्माज़ि केहतु गप्पा मनेक्ती, ता गेह अचानक शेतानाबि यरच़ा बिजलिऊ ठ्रोह सर्गंङच़ि दह्च़ी तंङातग। 19खंणु, गेह केतिंङ ओमड्रा ए बिच्छु तिंङ ए शेतानो भत्ते सामर्थो टोहकठे अधिकार रांहषी तातग; दंङ अंऊ ला चीज़ा रंङ साते केतिंङ नुकसान माह शोतो। 20पर दिरंङ खुश था शुई कि मांजी आत्मारे केहतु हुकुम मनेक्च़ातेर, पर दिरंङ खुश शुई कि केहतु मिन स्वर्गंङ च़ेहसी तोद।”

यीशु खुश शुहबी

21दोथरे यीशु पवित्र आत्मा रंङ साते शुहचे खुशी रंङ साते बिंङे इलि, दंङ कुट्री लेहती, “हे बाह स्वर्ग ए धरतीऊ प्रभु गेह कांह धन्यवाद लहज़ातग कि केई दिह गप्पारे ञेंच़ाहरे ए समझकार मीहतु दोरच़ी प्याके त्याहतेन दंङ अंऊ मीहरे कटुतु ठ्रोह सीधे तोतोर दोतु टोईच़ी प्रगट लहतन। वेई! हे बाह। छना कुचे कनिंङ दिए लहज़ी रूठे अति।”

22“गिऊ बाहे गिह्बी भत्तेधिर रांहषी ततो, सिर्फ बाह ए तोह अंऊ दोई योह बि सेहचा, सिर्फ इच्च़ाए योह तोह अंऊ दोई हेले बाहबि सेहचा, दंङ अंऊ मीहतिंङ गेह योह, अंङषातोग दोरे मीहरे बाहबि सेहपोर।”

23दंङ यीशुज़ि चेला तु हखा किरच़ा दोतंङ साते कुहतो, “धन्य शुह दुह टीरा रे, अंऊ झांह खंड्रा। 24छना कुचे गेह केतंङ साते हेले कुट्रातग, कि महस भविष्यवक्ताज़ि ए रज्ज़ा ज़ि जुन्ज़ातोर कि छि गप्पारे केहच़ी खंड्रातंई, दोच़िला खांहषी जूंस, पर खांऐ माहतिर, दंङ अंऊ गप्पा केहच़ी रेड्रातंई; दोच़ी ला रेड्री जूंस, पर रेड्री मरतिरे।”

दयालु सामरिऊ कथा

25इच्च़ा ध्याड़ा अपेहल यीशु मीहतिंङ शिक्षा रंड्री लेहकी तोहई, दोहपल इच्च़ा कानून ञेंहच़ा खड़े शुहचे दी कुट्रा दोऊ परीक्षा लहज़ी लेहती, “हे गुरु, अनंत जीवन खोकसी मी थल्जी गेह छि कम लोहग?” 26यीशु ज़ि दोरंङ साते कुतोह, “मूसा ओ कानूना छी च़ेहसी तोह? दंङ केई दुह छना समझएक्च़तंई?” 27दुह मीहे जुबाब रेंई, “केई प्रभु केनोह परमेश्वरारंङ साते केनोह भत्ते सेहमा रंङ साते दंङ केनोह भत्ते प्राण रंङ साते, दंङ केनोह भत्ते शक्ति रंङ साते दंङ केनोह भत्ते समझ रंङ साते दाह लोहू; दंङ केनोह पड़ोसीतंङ साते केनोह ठ्रोह दाह लोह”

28यीशुज़ि दोबि जुबाब रेंई, “केई ठीक जुबाब रेंई, दी ए लोहू दंङ कनिंङ अनंतो जीवन खोकसोतो।” 29पर दोई एनोह कम ठीक साबित लहज़िमी थल्जी यीशु दोरच़ी दि रुहक्ती, “गिऊ पड़ोसी अरी शुह?”

30यीशुज़ि इच्च़ा कथाओ दोरच़ी जुबाब रेंई, “इच्च़ा मीह यरूशलेम शहरंङज़ि यरीहो शहरो हखा इपि लेहकी तोहई कि लुटेरा ज़ि दोऊ टोहकठे हमला लहरिर दंङ दोऊ खमज़ेर ए दोऊ भत्ते धिर छिला दोई तते दुह भत्ते रें शिलिर, दंङ घाह रे अधमरा लहज़ा छङें च़रतिर। 31दंङ झांह शुई कि दुह अमज़ि इच्च़ा यहुदी पुरोहित इबि लेहकी तोहई, पर दोबि खांई, दोऊ मदत माह लेह अच़ा इलि। 32ध्वांए इच्च़ा लेवी (अरी यहुदी मंदिरंङ लहज़ा तोहई) ला दोबि खांई, दोऊ मदत माह लेह अच़ा इलि। 33पर इच्च़ा सामरी#10:33 यहुदी ए सामरी मीहरे एनातु बिचंङ कट्टर बैरी तोईरे। दोई घायल मीहू मदतो थल्जी अपेहल ला झांह ठ्रोह मीहू उम्मीद लहसी माह शोतो, खास लेह दोहपल, अपेहल ऊई यहुदी मीहज़ी दोऊ मदत लेहमी थल्जी इन्कार लेह च़रतिर। प्रदेशो मुसाफिर दुह ए ठाहरीरिंङ च़ि अति अंऊर दुह घायल मीह तोहई दंङ दोबि खांई दोऊ टोईच़ी दया लहरी। 34दंङ दोऊ कछंङ अंज़े दोऊ ज़ख्मा जेतूनो तेल ए औषद केहरी दंङ पट्टी लहरी, दंङ एनोह कारंङ टोईच़ी केट्रा इच्च़ा सराय तोहई लेन्ज़ा शिली, दंङ दोऊ सेवा टहल लहज़ी लेहती। 35अई ध्याड़ा रिंङ दोई झुह्ट मुलतु टंगा हुन्ज़ा (अंऊ झुह्ट ध्याड़ो बराबर तोहई) सरायो मालिका बि रें च़रति दंङ कुंई, दिऊ सेवा टहल लाहनी, दंङ छिला कांह बणेक्पोतो गेह वापिसी मुका कनिंङ रे च़रपोग। 36दंङ यीशुज़ि दोबि रुहक्ती, कांह हिसाबे अंऊ दोबि लुटेराज़ि हमला लहतेर, दी षुमु दोतु बिचंङज़ि दोऊ पड़ोसी अरी शुई?” 37दोई कुतोह, दुह ए अंऊ दोई दोऊ टोहकठे दया लहरी। यीशु ज़ि दोबि कुतोह, इला, “केई ला झांह ए लोहू।”

मार्था ए मरियमो चुंङ यीशु

38अपेहल प्रभु यीशु ए दोऊ चेलारे इच्च़ा साते सफर लहज़ी लेहकी तोईरे ता दोरे इच्च़ा नगरंङ पिचातेर। दोर तिंङ मार्था मिन्दु इच्च़ा मेच़मी ज़ि यीशुबि एनोह चुंखा शिली। 39दंङ मरियम मिन्दु दोऊ इच्च़ा रिंङ तोहई। दुह प्रभुऊ कोंज़ो कछंङ बंङज़ा दोऊ शिक्षा रेड्री लेहकी तोहई। 40पर मार्था बगत बणाएके छछे इलि, दंङ दोऊ कछंङ अंज़े कुट्री लेहती, “हे प्रभु, छि कनिंङ छिला चिंद माह कि गिऊ अच्च़ा भत्ते कम लहज़िमी थल्जी गेह इच्चे केह्चे केहरी? दिऊ थल्जी दोबि कुह कि गिऊ मदत लोहू।”

41प्रभु ज़ि दोबि जुबाब रेंई, “मार्था, हे मार्था; केई महस गप्पो थल्जी चिंद छिला लहच़ातन। 42सिर्फ इच्च़ा गप्पा चिंद लहज़िमी जोगे तोह। दंङ दुह रुठे हिस्सा बि मरियमे अंङे च़रति अंऊ दोऊ दोरच़ी अपेहला कूज़ा मा शोर।”

Currently Selected:

लूको 10: LBFNT

Highlight

Copy