लूको 9

सनी चेलारे चरच़ि

(मत्ती 10:1-15; मरकु 6:7-13)

1दंङ यीशुज़ि एनोह अंङषी सनी चेलारे एनोह कछंङ बुलाएती दंङ दोतिंङ मांजी आत्मा ए बीमारी ठीक लहच़िमी सामर्थ ए अधिकार रेंई। 2दंङ दोतिंङ परमेश्वरो राज्यों रुठे खबर ए बीमारीतिंङ ठीक लहज़िमी थल्जी च़रति। 3दोई दोतंङ साते कुतोह, “अमू थल्जी छिला था शिलांई, माह लठी, माह झोली, माह रोटी, माह ढबाह दंङ माह झुह्ट कुरतिरे। 4अंऊ ला घरबारंङ केहरे योंई, दोहर ए बंङज़ुंई, दंङ दोरच़ी ए बिदा शुई। 5अंऊ नगरो मीहरे केहतु गप्पा माह रेड्रोर, दंङ दोरच़ी हुंच़िमी मुका केहच़ी केनातु चप्पलो धुह्‌ड़ ला ठुड़ेके कि च़रतुंई झांह खंड्रा दुह नगरो मीहच़ी ञेंओर कि परमेश्वरे दोतिंङ ज़रुर सज़ा रमतो। छना कुचे दोच़ी परमेश्वरो उपदेश माह रेड्रिर।” 6दंङ दोरे हुंच़ा नगर-नगरंङ रूठे खबरो प्रचार लहज़ी लेहतिर, दंङ हर ठाहरीरिंङ मीहतिंङ ठीक लहज़ी लेहती।

हेरोदेसो परेशानी

7दंङ चौथाई देशो रज्ज़ा हेरोदेस दी भत्ते धिर रेड्रा बेवा इलि, छना कुचे रेहज़ि कुतोह कि यूहन्ना बपतिस्मा रंड्रा सीमी दोरच़ी श्रींङे इलज़ा, 8दंङ रेह ज़ि कुट्रातेर कि एलियाह भविष्यवक्ता तंङरी, दंङ रेहज़ि कुट्री लेहतिर कि पुराने भविष्यवक्तातु दोरच़ी अरीया श्रींङी तोह। 9पर रज्ज़ा हेरोदेसे कुंई, “यूहन्ना अतु गेह पुंज़ा ट्रिकी च़रतेग, दंङ दीह अरी शुह अतु पाहठी गेह झांह ठ्रोह गप्पारे रेड्रातोग?” दंङ दोई दोबि खंड्रिमी हिटी लहरी।

ङा हज़ार मीहतिंङ खिलाच़ी

10दंङ दोरे सनी चेलारे यह्च़ा अंज़े छिला दोच़ी लाहतेर, यीशुबि कंज़े कहरी, दंङ यीशु दोतिंङ मीहतु दोरच़ी शत्‌ह लेह बैतसैदा नगरो हखा लेन्ज़ा इलि। 11दीह ञेंए मीहरे दोऊ थले शुहचे इलिर, दंङ यीशु दोतिंङ अपि रांई, दंङ दोतंङ साते परमेश्वरो राज्यों गप्पा लहज़ी लेहती, दंङ अंऊ दोरे ठीक शुहबिमी थल्जी दोहर अन्जी तोईरे दोरे ला ठीक शुहचे इलिर।

12अपेहल ञोंकोल शुहचे लेहती ता सनी चेलाज़ि दोऊ कछंङ अंज़े कुड़ी, “भीड़ो मीहतिंङ बिदा लोहू कि पिला हासी नगरंङ इलजे दोर तिंङ बंङज़िमी ए ज़ेइमी थल्जी रोटीऊ इंतज़ाम लोहनी, छना कुचे ञेंहरे देर्तिंङ सुनसान ठाहरीरिंङ तोतोंई।”

13यीशुज़ि चेला तंङ साते कुतोह, “केहच़ी ए दोतिंङ छा ज़ेइमी थल्जी रांई।” दोच़ी कुतोह “ञेंहतु कछंङ ङा रोटी ए झुह्ट मह्छ़ ओ अलावा छिला माह, पर अगर ञेंहच़ी दीह भत्ते मीहतु थल्जी बगत मोल लेह हपोंई ता शुबी तरपोतो।” 14(छना कुचे दोरे लगभग ङा हज़ार गंङमीहरे तोईरे) दंङ यीशुज़ि एनोह चेला तिंङ कुहतो, “दोतिंङ निन्जो सा निन्जो सा लेह लाइनङ बिठाएतुंई।” 15दोच़ी ध्वांए लहरीर, दंङ दोतिंङ लेन बार दोर तिंङ बिठाएति। 16दंङ यीशु ङा रोटीए झुह्ट मह्छ़ लेहप्ती, दंङ स्वर्गो हखा खांई परमेश्वरो धन्यवाद लहरी, दंङ रोटी खन्नी-खन्नी लेह चेला तिंङ रमा लहरी, दंङ दोच़ी मीहतिंङ फाहरी। 17दंङ भत्ते मीहच़ी खोकटुंङ पिंङे बगत ज़हरिर, दंङ चेलाज़ि न्वाशी रोटी रंङ साते सनी टोकरीरे पिंङे उठाएतिर।

पतरसो यीशु बि मसीह स्वीकार लहज़ी

(मत्ती 16:13-20; मरकु 8:27-30)

18अपेहल यीशु एकांतारिंङ प्रार्थना लहच़ी लेहकी तोहई दंङ दोऊ चेलारे दोरंङ साते तोईरे ता दोई दोतिंङ रुहक्ती, “मीहच़ी गिह्बी छि कुट्रातोर?” 19चेलाज़ि जुबाब रेंहई, “मीहच़ी कनिंङ यूहन्ना बपतिस्मा, एलियाह भविष्यवक्ता दंङ रेह मीहच़ी क्वातर कि काह तुहई कि भविष्यवक्तातु बिचंङज़ि इच्च़ा शुनाह।” 20यीशुज़ि दोतिंङ रुहक्ती, “दंङ केहच़ी गिह्बी छी कुट्रातंई? पतरसे दोबि जुबाब रेंहई, कांह मसीह शुनाह अंऊ परमेश्वरो दोरच़ी चरच़ि शुनाह।” 21यीशुज़ि दोतिंङ खबरदार लेह च़रति, दिह पाहठी केहच़ी अतंङ साते लाह था कुंहई।

एनोह सीमी पाहठी यीशु भविष्यबाणी

22दंङ यीशुज़ि कुतोह, “गेह मीहू योह थल्जी ज़रूरी तोह कि यहुदी सेंहणा, यहुदी मोह्ड़े पुरोहित ए यहुदी शास्त्रीज़ि गेह मीहू योह बि अस्वीकार लोहर। दंङ दोच़ी गेह पक्‍का सच़ी च़रपोर, दंङ गेह षुमु ध्याड़ो थल यह्ज़ा श्रींङे योग।”

यीशु थालेसी जोईमी मतलब

23यीशुज़ि एनोह चेला ए ऊई मीहतु हखा कुंई, “अरीला गिऊ चेला बणेकपी तातंई दोच़ी एनोह हिटी छोड़ेके रोज एनोह क्रूस उठाके गिऊ थलेच़ि अच़ा अतंई। 24छना कुचे अच़ि एनोह जहानो दिह धरतीऊ टोईच़ी बचाएपोतो दोई परमेश्वरारंङ साते अनंत जीवन खोकसिमी मोका योह्च़े च़रपोतो दंङ अंऊ मीह गिऊ टोहकठे विशवास लहच़ी ए दंङ गिऊ रुठे खबर सुनाएच़िमी बज़ाहसि सिओतो दुह मीह परमेश्वरारंङ साते अनंत जीवन खोकपोतो। 25अगर मीह भत्ते संसाराबि प्राप्त लोहतो दंङ एनोह जहानो नुकसान लोहतो, ता दोबि छी फायदा शोतो? 26अंऊ ला गेह मीहू योह बि ए गिऊ शिक्षा ग्रहण माह लोहतो, दंङ अपेहल गेह ला घेंङौ पवित्र स्वर्गदूतारंङ साते घेंङौ बाहो महिमा रंङ साते अपोग, दंङ गेह ला दोतिंङ ग्रहण माह लोहग। 27गेह केतंङ साते हेले कुट्रातग कि देर खड़े मीहतु बिचंङज़ि रे झांह ठ्रोह तोतोर कि अपेहल तचेक परमेश्वरो राज्य मा खमोर धोंण तचेक मा सियोर।”

यीशु रूप लेहक्सी

(मत्ती 17:1-13; मरकु 9:2-13)

28दी गप्पो रेह ध्याड़ो थल यीशु पतरस, याकूब ए यूहन्नाबि साते लेन्ज़ा प्रार्थना लहज़िमी थल्जी गोऊ टोईच़ी इलि। 29अपेहल यीशु प्रार्थना लहज़ी लेहकी तोहई ता दोऊ मोह्दु रंग लेहक्सा इलि, दंङ दोऊ खमज़ेर छंङसी शुहचे छंङी लेहती। 30दुह मुका दोहर यहुदी मीहतु झुह्ट भविष्यवक्ता प्रगट शुहचे इलिर अतु मिन मूसा ए एलियाह तोहई दोकु झुल्ला यीशुरंङ साते गप्पा लेहच़ी लेहकी तोईरे। 31दिहरे महिमा रंङ साते शुई दंङ यीशु सीमी पाहठी गप्पा लहज़ी लेहकी तोईरे, अंऊ यरूशलेम शहरंङ शुहबिमी तोहई। 32पर पतरस ए दोऊ साथीरे महसे इमरिंङ तोईरे दंङ अपेहल दोतु इम अच़ा इलि, ता दोच़ी यीशु महिमा ए दुह झुह्ट मीहतिंङ अरी दोरंङ साते खड़े तोईरे, खंणी। 33अपेहल दोरे मीहरे यीशु कछंङ ज़ि इबी लेहतिर ता पतरसे यीशु रंङ साते कुतोह, “हे गुरु, ञेंहतु देहर बंङज़ी रुठे शुह; ञेंहच़ी देर्तिंङ श्रुम तम्बू बणापोंई इच्च़ा कांह थल्जी, इच्च़ा मूसा ओ थल्जी, इच्च़ा एलियाहा ओ थल्जी।” दोई माह ञेंहच़ाते कि दुह छी कुट्री लेहकी तोह।

34पतरस दी कुट्री ए लेहकी तोहई कि इच्च़ा डूहज़ि अंज़े दोरे कपचे केहरी दंङ अपेहल दोरे दुह डूहज़ि कप्चीमीरंङ दोरे बेवा इलिर। 35दंङ डुह बिचंङज़ि परमेश्वरे कुंहई, “दि गिऊ प्यारे योह शुह, दिऊ रेहड्रोंई।” 36छना ए चेलाज़ि दिह सग रेड्रिर दोऊ थल दोच़ी यीशुबि इच्च़ा ए तंङरीर, दोथल दोरे चेलार चुपे बंङज़िरी, दंङ अंऊ ला दोच़ी दोर तिंङ तंङातेर दुह गप्पा दुह ध्याड़ारिंङ अतिंङ ला साते माकुट्री।

माजी आत्मा ग्रस्त कटु बि ठीक लहज़ी

(मत्ती 17:14-21; मरकु 9:17-29)

37ऊई ध्याड़ारिंङ अपेहल यीशु ए दोऊ चेलारे गोहू दोरच़ी तकसिरी दुह मुका इच्च़ा मोह्ड़े मीहतु भीड़ दोरंङ साते दोई मी थल्जी अतिर। 38दंङ भीड़ो बिचंङज़ि इच्च़ा मीहए जोरे हाऊष रें कुतोह, “गुरू ज़ि गेह करंङ साते बिनती लह्ज़ातग कि गिऊ कटु टोईच़ी दया लोहू, छना कुचे दुह गिऊ इच्च़ा योह शुह। 39दंङ खंणु, इच्च़ा मांजी आत्माज़ि दुह चुम्ज़ा, दंङ दोहपले जोरे हाऊष रंड्रा; दंङ दुह दोबि झांह ठ्रोह पिरोडेक्चा कि दोऊ आहच़ि श्रुफ हुंच़ा; दंङ दोबि बड़ा मुशकिल रंङ साते छोड़ेक्च़ा। 40गेह कांह चेला तंङ साते बिनती लहरी कि गिऊ योहू दोरच़ी दिह मांजी आत्माबि हुंच़े च़रतेन, पर दोच़ी झांह लेह मरतिर।” 41यीशुज़ि जवाब रें, “हे अबिश्वासी ए हठीले मीहरे गेह अपेहल तचेक केतंङ साते बंङज़ोग दंङ अपेहल तचेक गेह केहतु अबिश्वासबि सेहन लोहग? कांह योह बि गिऊ कछंङ हता।”

42दुह अपि लेहकी तोहई कि मांजी आत्माज़ि दुह चुमेह दुह पिरोडेक्ति, पर यीशुज़ि दुह मांजी आत्मा रैहति दंङ कटु बि ठीक लहजे दोऊ बाहो हखा रें च़रति। 43दंङ भत्ते मीहरेर परमेश्वरो महा सामर्थरंङ साते हेरान शुहचे इलिर।

एनोह सिमी बारे यह्च़ा भविष्यबाणी

(मत्ती 17:22-23; मरकु 9:30-32)

पर अपेहल भत्ते मीहरेर दुह भत्ते कम अंऊ दोई लह्ज़ते, हेरान तोहई, दोई एनोह चेला तंङ साते कुहतो, 44“छिला गेह कुट्री लेहकी तोतोग दुह ध्यानारंङ साते रेड्रुंई दंङ हिद तांहई: गेह मीहू योह बि मीहतु गुहड़रिंङ चुम्ज़ी लोहर।” 45पर चेलार दिह गप्पा समझेकसी मरतिर, दिह गप्पा दोतु दोरच़ी ब्याके तोहई दिह ए बजह तोहई कि दोरे ञेंहई मरतिर, दंङ दोतिंङ दिऊ पाहठी मसीह यीशुबि रुहक्च़िमी याहऊ माह।

भत्तेबे मोह्ड़े अरी

46दंङ चेला तु बिचंङ दी बहस शुहबी लेहती कि ञेंहतु बिचंङ भत्तेबे मोह्ड़े अरी शुह। 47पर यीशुज़ि दोतु सेहमो गप्पा ञेंह केहरी दंङ इच्च़ा कटु बि दोतु तुईज़ी खड़े लहरी, 48दंङ दोतंङ साते कुंई, “अगर अच़िया गिऊ चेला शुहबिमी बज़ाहज़ि अरीया कटु अपनाच़ा, दंङ दोई गेह अपनाच़ा, दंङ अच़िला गेह अपनाच़ा दोई परमेश्वरा बि अपनाच़ा, छना कू सा ता अंऊ केहतु बिचंङ ज़ि भत्ते बे कवचि तो, दुह ए मोह्ड़े शुह।”

अंऊ बिरोधंङ मा, दुह पक्षङ शुह

49दंङ यूहन्नाज़ि कुतोह, “हे गुरु, ञेंहच़ी इच्च़ा मीहबी कांह मिन्दु अधिकारो इस्तेमाल लहज़ा मांजी आत्मा हुंपी तंङातन, दंङ ञेंहच़ी दोबि मना लहरीन, छना कुचे दुह कांह अंङषी चेला तु बिचंङज़ि माह तोहई।” 50यीशु ज़ि दोरंङ साते कुतोह, “दोबि मना थालांई; छना कुचे अंऊ कांह बिरोधंङ माह, दुह कांह हखा तोह।”

सामरियो दोरच़ी यीशु बिरोध

51अपेहल यीशु स्वर्गंङ इबिमी ध्याड़ा पिचे इलि, दोई यरूशलेम शहरो हखा इबिमी पक्‍का बिचार लहरी। 52इबिमी बे यीशु एनोह तुईज़ी एनोह दूतारे सामरी इलाकंङ इच्च़ा नगरंङ च़रति कि दोऊ थल्जी ठहरि तेयार लोहर। 53पर दुह नगरो मीहज़ी दोतिंङ वापिस लेह च़रतिर छना कुचे यीशु यरूशलेम शहरो हखा इबि लेहकी तोहई। 54दी खांई दोऊ चेला याकूबे ए यूहन्नाज़ि कुतोह, “हे प्रभु, ञेंहतिंङ हुकुम रौं कि ञेंहरे प्रार्थना लोहनी कि स्वर्गंङ च़ि मेह अंज़े दोतिंङ नाश लेह चर्तु?” 55पर दोई दोतु हखा शुहचे दोतिंङ रेहच़ि दंङ कुतोह, “केहच़ी माञेंहई कि केहच़ी दिह छि मतलब रंङ कुट्रातोन। छना कुचे गेह मीहू योह मीहतु प्राण नाश लहज़िमी थल्जी माह पर दोतिंङ बचाएच़िमी थल्जी अन्जी शुगाह।” 56दंङ दोरे ऊई नगरंङ अच़ा इलिर।

यीशु चेला बणेक्ची मोल

(मत्ती 8:18-22)

57अपेहल यीशु ए दोऊ चेलारे अमरिंङ जोई लेहकी तोईरे, दोपहल अच़िया यीशुरंङ साते कुतोह, “कांह अंऊर ला योंहन, गेह कांह थले अपोग।” 58यीशु ज़ि दोरंङ साते कुतोह, “गव्वा तु गुफा ए प्यारेतु बंङज़िमी थल्जी बंङ शुहबी, पर गेह मीहू योहू कछंङ इम लहज़िमी थल्जी ला घेंङौ घरबार माह।” 59यीशुज़ि अई मीहू हखा कुतोह, “अता दंङ गिऊ चेला शुहचे इला।” दुह मीह तेयार शुहचे इलि दंङ कुट्री लेहती, “हे प्रभु, हेगा गिह्बी चुंखा वापिस इबी रंऊ। गिऊ बाहओ सिमी थल दोबि पथेके कांह चेला बणेक्पिमी थल्जी कांह थले अपोग।” 60यीशुज़ि दोबि कुहतो, “अंऊ मीहरे आत्मिक रीतिरंङ सीए इलजे तोतोर, दोतिंङ एनोह मुर्दारे पथेक्च़ी रंऊ, पर कांह इलजे परमेश्वरो राज्यो रूठे खबर कुड्रू।” 61यच़ाह अई इच्च़ा मीहे कुंई, “हे प्रभु, गेह कांह थले अपोग, हेगा गिह्बी चुंखा वापिस इबी रौं कि गेह घेंङौ टबरा बि रुहक्पोग।” 62यीशु ज़ि दोरंङ साते कुतोह, “अंऊ ला मीहरेर हड़ रंड्रा दोपहल थलका खंड्रा, दुह परमेश्वरो राज्यों जोगे माह शुह।”

Currently Selected:

लूको 9: LBFNT

Highlight

Copy