लूको 12

पाखंडो बारे चेतावनी

1दुह टेमारिंङ दोर तिंङ हज़ार बे महस मीहतु भीड़ ठ्रोहका शुहचे इलि, देहर तचेक दोरे इदि ऊईदिऊ टोईच़ी दह्चे लेहतिर, यीशु ज़ि भत्ते बे तुहई एनोह चेला तङ साते कुंई, “फरीसी मीहतु कपटो खमीरो दोरच़ी बचेके तोहई। 2छना कुचे कि परमेश्वर दुह भत्ते गप्पातिंङ प्रगट लोहतो। अंऊ हेंतेग तचेक ब्याके तोहई। दंङ अंऊ ला गुप्त तोह दुह ला प्रगट शोतो। 3झांह लेह केहच़ी हंयारंङ छा छी कुहषी तोह, दुह छंङीरिंङ रेड्रोर; दंङ अंऊ ला गप्पा केहच़ी थाह्को थले कुहषी तातन दुह गप्पारे लंङदिंङ हाऊष रें प्रचार शोतो। कि भत्ते ज़ि दुह गप्पारे रेड्री तरपोर।”

अतंङ साते बेवोई

4“यीशु ज़ि एनोह चेला तिंङ कुहतो गिऊ प्यारे मित्रारे गिऊ रेड्रुंई: अरी फुको ता नाश लेह तरपोर पर दिबे महसे ऊई छ्लेह लेह मरपोर, दोतंङ साते थाह बेंईन। 5गेह केतिंङ खबरदार लहज़ातग कि केतिंङ अतंङ साते बेई जूंस, परमेश्वरारंङ साते बेंईन अतु कछंङ सच़िमी ए नरकंङ केट्रिमी अधिकार तोह, 6छि झुह्ट पेसारिंङ ङा प्यारे माह लंङसी आ? तांला परमेश्वर दोतु बिचंङ ज़ि इच्च़ा तिंङ ला मा पेश्री। 7देर तचेक कि केहतु पुंज़ो भत्ते क्रा ला मिक्सी तोह, केहरे बेंईन थाह, छना कुचे केहरे परमेश्वरो थल्जी दोरे प्याबे ला महसे तोतोंई।”

यीशु बि स्वीकार ए अस्वीकार लहज़ी

8“गेह केतंङ साते कुट्रातग अंऊ ला गिह्बी मीहतु तुईज़ी कुट्रातोर कि दोरे गिऊ चेलार शुहर ता दोबि गेह मीहू योह ला परमेश्वर ओ स्वर्गदूता तु तुईज़ी मनेक्पोग। 9पर अंऊ ला मीहतु तुईज़ी गिऊ इन्कार लोहतो दोऊ परमेश्वरो स्वर्गदूतो तुईज़ी ला इन्कार लोहग।” 10“अच़िला गेह मीहू योहू खिलाप छाह गप्पा कोहतो, दोऊ दि गलती माफ शुहचे योतो, पर अंऊ पवित्र आत्मो बुराई लोहतो दोऊ दुह अपराध माफ माह शोतो।” 11“अपेहल मीहरेर केतिंङ यहुदी सभा घरबारारिंङ ए अधिकारितु तुईज़ी रेंज़ा शोर, दुह मुका चिंद थाह लांही कि ञेंहच़ी छी जुबाब रमोंई। 12छना कुचे पवित्र आत्मा केतिंङ दुह मुका ए सिखाएपोर कि छी कुट्री जूंस।”

इच्च़ा साहुकार मीहू कथा

13दंङ भीड़ो बिचंङज़ि इच्चे यीशु रंङ साते कुंई, “हे मित्रा, गिऊ न्वा बि कुड़ु कि गिऊ बाहू टंगा ढबाह गेरंङ साते फाए चर्तु।” 14यीशुज़ि दोरंङ साते कुहतो, “हे मित्रा! गेह अरी शुगाह कांह न्याय लहज़ा ए कांह टंगा ढबाह फाहज़ा?” 15दंङ यीशुज़ि दोतंङ साते कुंई, “खबरदार तोंई, भत्ते पाहठी लालच रंङ साते बचेकी बंङज़ुंई; छना कुचे अतु ला जीवन दोऊ टंगा ढबाहो दोरच़ी माह शुबी।” 16यीशुज़ि दोतंङ साते इच्च़ा कथारिंङ कुंई, “इच्च़ा साहुकारे रीहरिंङ महस फसल शुई।” 17“दंङ दुह एनोह सेहमरिंङ सोचेक्च़ी लेहती, ‘गेह छि लोहग? छना कुचे गिऊ दोर तिंङ घेंङौ फसल ठ्रोहका लहज़िमी थल्जी धोंण महस ठहरि माह।’ 18दंङ दोई कुतोह, गिह्बी पता तोह कि गिह्बी छि लेह जूंस गेह घेंङौ दिह कवचि गोदामरे थक्शे मोह्ड़े गोदाम बणेक्पोग दंङ दोर तिंङ भत्ते अनाज ए टंगा ढबाह केयोग; 19दिऊ थल गेह घेंङारंङ साते कोहग, ‘हे गिऊ प्राण कांह थल्जी महसे सालो थल्जी टंगा ढबाह ए अनाज ठ्रोहका लेह च़रतग ज़ौ ए तुंङ दंङ मौज़ लोहू।’ 20‘पर परमेश्वरे दोरंङ साते कुंई, हे मुर्ख, तोग रातारिंङ कांह सीए योंहन दंङ छि ला चीज़र केई केहनो थल्जी ठ्रोहका लहसी तोह दुह अतु शोतो?’ 21ध्यांए दुह मीहरंङ साते शोतो, अच़ि भत्ते धिर एनोह थल्जी ठ्रोहका लहज़ा, पर परमेश्वरो सेवा लहज़िमी थल्जी एनोह ताकत ए टंगा ढबाओ इस्तेमाल माह लहज़ा।”

परमेश्वरो टोईच़ी भरोसा तांई

22दंङ यीशुज़ि एनोह चेला तंङ साते कुंई, “हेंतेग गेह केतंङ साते कुट्रातग, केनातु प्राणो चिंद था लांही कि ञेंहच़ी छी ज़ोहनी; माह केनातु फूको कि, छी लेह्सुंई। 23छना कुचे बगत प्राण बे ए दंङ खमज़े फुक बे मोह्ड़े तोह। 24कागातु टोईच़ी ध्यान लाह्नी; दोच़ी माह एह्च़ी, माह ट्रीहक्ट्री; माह दोतु खलियान ए भंडार शुहबी; तांला परमेश्वर दोतिंङ ला टूंडा। केहतु मोल ता प्याबे ला महस ए तोह। 25केहतु बिचंङज़ि अरी तोह अच़ि चिंद लेह एनोह उम्र इच्च़ा घड़ी ला बड़ाएच़ी तरपोर। 26झांह लेह अपेहल केहच़ी भत्ते बे कवचि कम लहज़ी मरच़ातंई, ता मोह्ड़े गप्पातु पाहठी चिंद लहज़िमी रंङ साते छि फायदा? 27बंणो उड़तु टोईच़ी ध्यान लंहि कि दोरे छना बड़ेक्च़ी; दोच़ी ना मेहनत लहज़ी, माह एनातु थल्जी खमज़ेर बणाएषी; तांला दोरे अंयों सलठे तोतोर। गेह केतंङ साते कुट्रातग, कि रज्ज़ा सुलेमान ला एनोह सुखी जीवनंङ दिह उड़तु ठ्रोह खमज़ेर लेहसी माह शुह। 28झांह लेह अगर परमेश्वर धरती रिंङ श्रांङ उगाएच़ा, अंऊ श्रांङ तोग तो दंङ थले रोहष्रा य्वात, हे अबिश्वासी मीहरे, दुह परमेश्वरे केतिंङ खमज़ेर छिला माह रमतो? 29दंङ केहच़ी दी गप्पो चिंद था लांही कि छि जोओनी दंङ छि तुंङमोंई, दंङ माह केहच़ी शक लांही। 30छना कुचे दुहरे मीहरे अच़ि परमेश्वराबि माह सेहचातोर दिह भत्ते चीज़ा तु चिंदारिंङ बंङज़ातोर; पर केहतु स्वर्गो बाहे दिह ञेंहच़ा कि, केतिंङ दीह चीज़ो ज़रूरत तोह। 31गेह केतंङ साते कुट्रातग कि परमेश्वरो राजो खोज लांही ता भत्ते चीज़र केतिंङ खोकसा योतो।”

स्वर्गीय धन

32“केहरे गिऊ नज़रा त्रेंईतु क्वाच़ी झुण्डो ठ्रोह शुई, बेंईन था; छना कुचे केहतु बाह परमेश्वर बि दी रुठे चेहसिरी कि केहतु सेहमरिंङ राज लोहतो। 33कनु टंगा ढबाह लंङे गरीबातिंङ दान लेह च़रतु; दंङ केनातु थल्जी ध्वांए ठ्रोह बटुआ रे बणाएतुंई अंऊ युई माह शोतो, दंङ केनोह थल्जी स्वर्गंङ झांह ठ्रोह टंगा ढबाह ठ्रोहका लोहू अंऊ अपेहला माह योसतो, दंङ अंऊर माह चोरा ज़ि चोर लेह तरच़ी दंङ माह ओमड्रा लेह्प्तो। 34छना कुचे केहतु सेहम दोरे लेहके बंङज़ोतो अंऊर केहतु ढबाह तोह।”

चेहकी बंङज़ु

35“परमेश्वरो सेवाओ थल्जी हमेशा तेयार बंङज़ु, छना कम लहज़िमी थल्जी मीहज़ी ऊम छ़ुचे केहरी दंङ पुरे रात मशाल तुप्चे तेयार बंङज़ातोर। 36दंङ केहरे दुह मीहतु ठ्रोह बणेक्तुंई अंऊ एनोह मालिको इंतज़ारंङ शुहबी कि गिऊ मालिक ब्याह ओ दोरच़ी अपेहल अपतो; दंङ छना ए दुह मालिके ठुक-ठुक लोहतो दंङ ध्वांए दोऊ थल्जी पेतंङ अल्ज़ी च़रतुंई दंङ दोऊ स्वागतो थल्जी तेयार तोहई। 37धन्य शुह दुह परगर अरी एनोहो मालिको इंतज़ार लहज़ा दंङ दुह ध्याड़ो थल्जी तेयार तोह, गेह केतंङ साते हेले कुट्रातग कि दुह मालिक एनोह परगराबि बगत ज़ेइमी थल्जी बेठाएपोतो दंङ एनोह उम छ़ुचे दोऊ सेवा लोहतो। 38अगर दुह मालिक अद्धा रातारिंङ, ए मुंजे सरके अंज़े एनोह परगराबि चेहके तंङफोतो ता दंङ दुह परगर धन्य शुह। 39पर केहच़ी दिह ञेंहई च़रतेंई कि अगर चुंखी मालिके ञेंहच़ा कि चोर अंऊ मुखंङ अपतो ता दुह चेहके बंङज़ोतो ए एनोह घरबारंङ चोरी शुहबी माह रमतो। 40केतिंङ हमेशा चेहकी बंङज़ी जूंस छना कुचे गेह मीहू योह झांह ठ्रोह टेमारिंङ स्वर्गंङ ज़ि अपोग अपेहल केहच़ी सोचेक्सी ला माह शोनी।”

विशवासो जोगे ए अबिश्वास जोगे दास

41दंङ पतरसे यीशुबि रुहक्ती, “हे प्रभु, छि दिह कथा ञेंहतु थल्जी शुह आ कि भत्तेतु थल्जी शुह।” 42प्रभु ज़ि दोबि जुबाब रेंई, “दुह विशवासो जोगे ए समझकार परगर अरी शुह, अतु मालिके दोबि ऊई नोकरा तु टोईच़ी मुख्या नियुक्त लोहतो कि दोतिंङ टेमा रिंङ बगत रमतो।” 43धन्य शुह दुह परगर अतिंङ दोऊ मालिके अंज़े ध्यांए लेह तंङफोतो। 44गेह केतंङ हेले कुट्रातग दोई दुह परगराबि एनोह भत्ते टंगा ढबाह सोठेक्च़िमी अधिकारी रमतो। 45पर अगर दुह परगरे सोचेक्पोतो, कि गिऊ मालिक अपिमी थल्जी ध्याड़ा लहच़ी लेहकी तोह, दंङ ऊई परगरातिंङ तेंङपोतो दंङ ज़ेई ए तुंङे शराबी शुहचे योतो। 46दंङ दुह सेवको मालिक दुह मुका अपतो अपेहल दोरे दोऊ इंतज़ार माह लहज़ातेर, दंङ झांह ठ्रोह टेमारिंङ अपतो अंऊ दोई ञेंहच़ाते माह दंङ दुह परगराबि सज़ा रें अबिश्वासीतु बिचंङ चरच़े च़रपोतो।

47दुह परगर खरे सज़ा खोकसोतो छना कुचे अपेहल दुह एनोह मालिको हिटीऊ पाहठी पता तोहई तांला दोई दोऊ हिटी पुरा माह लेहती। 48पर दोरे मीहरे अंजान शुहचे गलत कम लहज़ातोर दोर तिंङ थोड़े सज़ा खोक्शातो, अतिंङ महस खोक्शातो दोरंङ साते महस हिसाब रंड्री लेह्पोतो, दंङ अतिंङ महस रांहषी तोह दोबि ला धोंण ए हिसाब रंड्री लेह्पोतो अंयों दोबि रांहषी तोह।

यीशु अपिमी परिणाम

49“गेह धरतीऊ टोईच़ी मेह तुप्च़िमी थल्जी अंज़े शुगाह; दंङ गेह सिर्फ दिह पेट्रातोग कि दिह हेंतेग ए रोहष्रा योतो। 50गिह्बी ता युरनाह ए खरे टेहषी सहन लहच़िमी तातग; दंङ अपेहल तचेक गेह दुह टेहषी माह लहज़ातग धोंण तचेक गेह बेचेन तोतोग! 51छि केहच़ी चेहच़ातंई आ कि गेह धरती रिंङ मीहतु बिचंङ मेल मिलाप लहज़िमी अंज़े शुगाह? गेह केतंङ साते कुट्रातग; माह, पर शत्‌ह लहज़िमी थल्जी अंज़े शुगाह। 52अगर इच्च़ा चुंङ ङा मीहरे तोतोर, दंङ दोरे शत्‌ह बंङज़ोर, षुमु मीहरे अंऊ गिऊ टोहकठे बिशवास माह लहज़ातोर, दुह जुह्टतु बिरोध लोहर अच़ि गिऊ टोहकठे बिशवास लहज़ातोर, ध्वांए दुह झुह्ट मीहज़ी ला दुह षुमुरंङ साते लोहर। 53बाहे योह रंङ साते, दंङ योहे बाह रंङ साते बिरोध लोहतो; याह मियो रंङ साते दंङ मियो याह रंङ साते, युह्ग भोऊड़ी रंङ साते, दंङ भोऊड़ी युह्ग रंङ साते बिरोध लोहतो।”

ध्याड़ो लक्षण

54यीशुज़ि भीड़ो मीहतु हखा कुंई, “अपेहल केहच़ी डुह बि पश्चिम दिशाज़ि अपि खंड्रातंई, ता ध्वांए कुट्रातोनि कि संदाण शोतो; दंङ ध्यांए शवात। 55दंङ अपेहल दक्षिण दिशाज़ि लहन अपि खंड्रातंई दंङ केहच़ी कुट्रातंई, कि महसे च़चे शोतो, दंङ ध्यांए शवात। 56हे कपटी मीहरे, केहच़ी धरती ए सर्गो भेद ता पर दिह जुगारिंङ परमेश्वरे छि लहज़ा दोऊ पाहठी भेद छारिंङ माह?”

एनोह गवाह रंङ साते समझोता

57“केतिंङ केनातिंङ ए फेंसला लहज़ी जूंस कि केहतु थल्जी छि ठीक शुह? 58अगर केतिंङ कोर्टारिंङ रेंज़ा शोहर दंङ अमरिंङ केहति केनातु बैरी खोकसोतो अच़ि कांह टोहकठे केस लहते दंङ दोरतिंङ ए दोरंङ साते सुलाह लेह च़रतु माह ता कनिंङ सज़ा शुबी तरपोतो दंङ कनिंङ अरीया हाकिमो हखा रें कनिंङ जेलंङ केयोर। 59अगर झांह शोतो ता केहरे जेलंङच़ि हुंज़ी मरपोतो अपेहल तचेक केई इच्च़ा-इच्च़ा टंगो हिसाब माह रमोंन।”

Currently Selected:

लूको 12: LBFNT

Highlight

Copy