लूको 13

सेहम यह्दुंई या नाश शुईं

1दुह मुका दोर तिंङ बंङज़ा रेह मीहज़ी यीशुरंङ साते कुहतो, रोमी अफसर पिलातुसे गलील प्रदेशो मीहतु हत्या लहते, अपेहल दोरे यहुदी मंदिरंङ बलि चढ़ाएसी लेहकी तोईरे। 2दिह रेड्रीरंङ यीशुज़ि दोतिंङ जुबाब रेंई, “केतिंङ छि च़ेहसा कि दिहरे गलील प्रदेशो मीहरे ऊई गलील प्रदेशो मीहबे महस पापी तोईरे आ कि दोतु टोईच़ी दिह मुसीबत अंजा?” 3“गेह केतंङ साते कुट्रातग कि माहतोईरे; पर अगर केहच़ी पापो दोरच़ी सेहम माह यहच़ोंई ता केहरे भत्ते ध्यांए योह्सा योंई। 4केहच़ी दुह सारे मीहतु पाहठी छि चेहच़ातंई अतु टोहकठे शिलोह मीनार दह्चे इलि: दंङ दोरे भत्ते सीए इलिर। छि दोरे यरूशलेम शहरारिंङ बंङज़ा दोतु बे महस पापी तोईरे? 5गेह केतंङ साते कुट्रातग झांह ठ्रोह माहतोईरे; पर अगर केहच़ी पापो दोरच़ी सेहम माह किर्ज़ोंई ता केरे लाह ध्यांए नाश शुहचे योंई।”

फल मेह अंजीरो बुटो कथा

6दंङ यीशुज़ि दिह कथा ला कुंई, “अतुआ दाखो बगीचारिंङ इच्च़ा अंजीरो बुट लेहकी तोहई। दुह हर साल ओ ठ्रोह दोर तिंङ फल पेट्री अपते। पर माह खोकसिरी। 7दंङ दोई बगीचा ओ रखवाली लहज़ाबि कुहतो, खंणु, षुमु सालबे गेह दिह अंजीरो बुटंङ फल पेट्री अपाहतग, पर माह खोक्च़ातग। दिह्बी ट्रिके च़रतु छना कुचे दिह रुठे ठहरि बर्बाद लहज़ा 8दोई मालिकाबि जुबाब रन्दो, हे मालिका, दिबी दिह साल बंङज़ी रोंऊ गेह दिऊ फेरे ख्रलज़े खाद केओग। 9अगर अपिमी साल रिंङ दिह फल हति ता ठीक शुह, माहता ट्रिके च़रतु।”#13:9 अंजीरो बुह्ट इस्राएलो मीहतु मार्गदर्शन लहज़ा

सबतो ध्याड़ा रिंङ बुक्च़ा रंङ मेच़मी बि ठीक लहज़ी

10अरामो ध्याड़ारिंङ यीशु इच्च़ा यहुदी सभा घरबारारिंङ शिक्षा रंड्री लेहकी तोहई। 11दोर तिंङ इच्च़ा मेच़िमी तोहई अतु अंद्रेग सारे सालबे इच्च़ा अपंग लहज़ा मांजी आत्मा तोहई दंङ दोऊ ऊम पुरे कोंङा शुहचे इलजी तोहई दंङ अंऊला तरीका रंङ दुह सीधे शुबी मरपते। 12यीशुज़ि दुह तंङमीरंङ साते बुलाकतो दंङ कुहतो, “हे रिहंङ केई केनोह अपंगता ओ दोरच़ी छुटकारा खोक्शी चरच़ातन।” 13दंङ दोई दोऊ टोईच़ी गुहड़ केहरी, दंङ दुह दोथरे ठीक शुहचे इलि दंङ परमेश्वरो तारीफ लहज़ी लेहती। 14दिऊ थल्जी कि यीशुज़ि अरामो ध्याड़ारिंङ दुह ठीक लाहते, दिरंङ यहुदी सभा घरबारो प्रधान रोषेक्सा मीहतंङ साते कुट्री लेहती, “इच्च़ा हप्तारिंङ त्रुई ध्याड़ा शुबी दंङ दुह ध्याड़ारिंङ हेनज़ि कम लेह तरच़ी; दिऊ थल्जी दुहए ध्याड़ारिंङ अंज़े ठीक शुह पर अरामो ध्याड़ारिंङ मेस।”

15दिह रेड्रीरंङ प्रभु यीशुज़ि जुबाब रन्दो, “हे कपटी रे, छि केहच़ी अरामो ध्याड़ारिंङ केनातु बंङ ए कारा मोगा ओ दोरच़ी युप्शे ती तुंङमिमी थल्जी माह शिल्ज़ी आ?” 16“छि दिह ठीक माह तोंईया कि दिह मेच़िमी अरी अब्राहमो खानदानो शुह, दंङ शेताने सारे सालबे दिह बीमार लहसी तहरे, यहूदीतु अरामो ध्याड़ारिंङ दुह बीमारीऊ दोरच़ी ठीक शुहचे इलि?” 17अपेहल यीशुज़ि दिह गप्पारे कुहतो दंङ दोऊ भत्ते बिरोधिर शर्मिन्दा शुहचे इलिर। दंङ भत्ते मीहरे दोऊ महान कमो दोरच़ी अंऊ दोई लहज़ाते, राजी शुहचे इलि।

राईऊ सोल्तु कथा

18दंङ यीशुज़ि दोतु हखा कुतोह, “परमेश्वरो राज अतु ठ्रोह तोह? दंङ गेह दोऊ बराबरी अतंङ साते लोहग? 19दुह रांई ऊ इच्च़ा सोल्तु ठ्रोह तोह अतिंङ इच्च़ा मीहज़ी एनोह रीहरिंङ एहच़ा; दंङ दुह मोह्ड़े शुहचे, बुट शुहचे इलि दंङ प्यारेज़ि दोऊ ब्रन्ज़ो पोयंङ अंज़े बसेरा लहरिर।”

मलेड़ो कथा

20यीशुज़ि यच़ाह कुहतो, “गेह परमेश्वरो राज्यो बराबरी अतंङ साते लोहग? 21दुह खमीरो ठ्रोह तोह, अतिंङ इच्च़ा मेच़िमी षुमु पसेरी (फुकानो मोह्ड़े) फुकानो बिचंङ टुह्कट्रा दंङ शूतर, शूतर भत्ते फुकान खमीर शुहचे यवा।”

संगड़े पेतंङ

22यीशु एनोह चेला तंङ साते इलाका-इलाकंङ ए नगर-नगरंङ च़ि शुहचे शिक्षा रंड्रा यरूशलेम शहरो हखा इबि लेहकी तोहई, 23दंङ अच़िआ दुह रुहक्ती, “हे प्रभु, छि परमेश्वर थोड़े अरे मीहतिंङ ए दुह हमेशाऊ सज़ाओ दोरच़ी बचाएक्पोतो आ?” यीशुज़ि दोतिंङ जुबाब रेंई, 24“परमेश्वरो राज्यरिंङ संगड़े पेतंङज़ि इबि खरे तोह, छना कुचे गेह केतंङ साते कुट्रातग कि महसे मीहरे इबिमी कोशिश लोहर पर इबि मरपोर। 25अपेहल परमेश्वर अंऊ चुंङो मालिक शुह खड़े शुहचे पितंङ बंद लेह च़रपोतो, दंङ केरे दखतेह खड़े शुहचे पितंङ ठुकठुक लहच़ी ए बिनती लेह कुंई, हे प्रभु, ञेंहतु थल्जी पितंङ अल्ज़े च़रतु, दंङ दोई तोंङज़ि जुबाब रमोतो, गेह केहरे माह सेहका, केरे अंऊरकि शुंईआ?

26दंङ केहच़ी कुंई ञेंहरे करंङ साते ज़ेह ए तुंङमातेंई दंङ केई ञेंहतु गलीरिंङ शिक्षा रंड्रातन। 27पर दोई केतंङ कोहतो, गेह केतंङ कुट्रातग, गेह माह ञेंहगा केहरे अंऊर च़ि शुंईआ। हे कुकम लहज़ारे, केहरे भत्ते दिऊ कछंङ ज़ि दोखा तोहई। 28दोहर क्रपिए छ्वा रुहक्च़ी शोतो; अपेहल केहच़ी ञेंहतु बाह-मेमे अब्राहम, इसहाक ए याकूब भत्ते भविष्यवक्तातिंङ परमेश्वरो राजंङ बंङज़ाए दंङ केनाहतिंङ धकतेखा हुंच़े खमोंई; 29दंङ संसारो भत्ते मीहरे अंज़े परमेश्वरो राज्यरिंङ धामंङ बंङज़ोर। 30दंङ दिह ञेंहई च़रतेन, अरी कवचि तोतोर दोरे मोह्ड़े शोओर पर अच़िला एनाबि मोह्ड़े चेहच़ातोर दोरे कवचि शोर।”

हेरोदेसो बैरी

31दुहए मुका रेह फरीसी मीहज़ी अंज़े यीशुरंङ साते कुहतो, “देरच़ी हुंज़ा अह्च़ा इला, छना कुचे रज्ज़ा हेरोदेस कनिंङ सच़िमी ततो।” 32यीशुज़ि दोतंङ कुहतो, “इलजे दुह मीहू हखा अरी गव्वा ओ ठ्रोह चलाक तोह कुचे च़रतुंई कि खंणु, गेह तोग ए मुतंङ मांजी आत्मारे हुंपाग ए नत्पारे ठीक लोहग, दंङ षुमु ध्याड़ारिंङ गेह घेंङौ कम पुरा लेह च़रपोग। 33तांला गिऊ तोहग, मुतंङ ए युहरह्घ यात्रा लेह ज़रूरी तोह, छना कुचे इच्च़ा भविष्यवक्ता सिर्फ यरूशलेम शहरंङ ए सिओतो।

यरूशलेमो थल्जी क्रपि

34हे यरूशलेम शहरो मीहरे! केहच़ी दोरे भविष्यवक्तारे सच़ी च़रतिर अंऊ महसे तुहई तोईरे दंङ दुह मीहतु टोहकठे रघ द्रहले केहनि, अतिंङ कांह कछंङ च़रसी तहरेर; अंयों ए फेरा गेह चेहकातेग कि छना कुकड़ी एनोह क्युकच़ारे एनोह पाखो पोयंङ ठ्रोहका लाह, ध्वांए गेह ला कांह कटुतु रखवाली लोहग। 35दंङ खांई केहतु घरबार केहतु थल्जी उजाड़ केयोग, दंङ गेह केतंङ साते कुट्रातग; अपेहल तचेक केहच़ी माहकोंई, धन्य शुह दुह अरी प्रभु मिन्ज़ी अपा दंङ दोहपल तचेक केहच़ी गिह्बी यह्च़ा माह खमोंई।”

Currently Selected:

लूको 13: LBFNT

Highlight

Copy