लूको 14
14
फरिसी ऊ चुंङ यीशु
1दंङ यीशु अरामो ध्याड़ारिंङ फरीसी मीहतु मुख्या विचंङज़ि इदिऊ घरबारंङ बगत ज़ेई इलि; दंङ दोरे दि साकिमारिंङ तोईरे कि छना यीशु टोईच़ी अरोप लगाएपोंई। 2दोहर इच्च़ा मीह तोहई दोऊ भत्ते फुकारिंङ मोह्ड़े-मोह्ड़े फोलर तोईरे दंङ दुह फोहाला तु दोरच़ी ती। 3दिरंङ यीशुज़ि कानून ञेंहच़ार ए फरीसी मीहतु हखा कुहतो, “छि अरामो ध्याड़ारिंङ कानूनो हिसाबे मीहतिंङ ठीक लेहई रूठे शुहदा मशुह?” 4पर दोरे चुप्पे बंङज़िरे, दंङ यीशुज़ि एनोह गुहड़ केह्चे दुह ठीक लहरी दंङ दोबि इबी रेंई, 5दंङ दोतंङ कुहतो “अगर केहतु बिचंङ अतुआ कटु या बंङ अरामो ध्याड़ारिंङ दोंङरिंङ दचे योतोता केहच़ी पक्का ए दोबि च़ुमने धह्तेका माह हुंपोना?” 6दोरे दिह गप्पो छल्ले जुबाब रेंऐ मरथिरे।
नम्रता ए प्रोहनातिंङ सत्कार
7अपेहल यीशुज़ि तंङरी कि बुलासी मीहरे छना रूठे, रूठे ठाहरी अंऊर इज्ज़तदार मीहरे बंङज़ी बोच़ा य्वातोर दंङ दोतिंङ यीशुज़ि इच्च़ा कथा कुंहई। 8“अगर अच़िया कनिंङ ब्याओ धामंङ बुलाएपोर, दंङ कांह रुठे ठाहरिंङ अंऊर इज्ज़तदार मीहरे बंङज़ातोर दोर तिंङ थाह बंङज़ुंई, कि झांह शुबी मेस कि दोई कांह बे ला मोह्ड़े मीहबी बुलाच़ी शोतो। 9दंङ अच़ि कनिंङ ए दोबि झुल्लाकु तिंङ शाहदेकसी तोह, अंज़े करंङ कुट्रा कि, दिबी ठहरि रंऊ दंङ कनिंङ शर्मिन्दा शुहचे भत्ते बे थल मुखंङ ठाहरिंङ बंङज़ी लेह्पोतो। 10पर अपेहल कांह शाहधेकतिरे भत्तेबे थल मुखंङ इच्च़ा ठाहरीरिंङ बंङज़ु कि अच़ि कांह शाहदेकसी ततो अंज़े कनिंङ कोतो, हे मित्रा, तुईमुखो ठाहरिंङ अंज़े बंङज़ु दंङ करंङ साते बंङज़ातु तुईज़ी कांह तारीफ शोतो। 11छना कुचे अच़ि एनाबि मोह्ड़े बणाएक्पोतो, दुह कवचि शोतो; दंङ अच़ि एनाबि क्वाच़ी लोहतो, दुह मोह्ड़े शोतो।”
12दंङ यीशुज़ि एनोह शाहधेकच़ा फरिसी मीहबी ला कुहतो; “अपेहल केई नीरो ए रातो बगतो धाम रमोंन ता केनोह साथीरे, न्वारे, टबरारे, या ढबाहो घ्राक पड़ोसिरे थशाहधेकतु, कि झांह शुबी मेस कि दोच़िला कांह शाहधेकपोर, दंङ कांह खोरसा योतो। 13पर अपेहल केई धाम रमोंन ता गरीब मीहरे, टुंडे, लट्टे ए कणेतिंङ शाहधेकतु। 14दंङ कह धन्य शोन छना कुचे दोतु दोहर कनिंङ यहच़िमी थल्जी छल्ले मद, पर कनिंङ अपेहल धर्मी मीहरे श्रींङे योर ता परमेश्वर कनिंङ ईनाम रमतो।”
मोह्ड़े ए धामो कथा
15यीशुरंङ साते बगत ज़जातु बिचंङज़ि इच्च़ा मीहे दिह गप्पारे रेड्रीरंङ साते कुहतो, “धन्य शुहरे दोरे अच़ि परमेश्वरो राज्यरिंङ धामंङ शामिल शोर।” 16यीशुज़ि दोरंङ कुहतो, “अरीया मीहे मोह्ड़े धाम रन्दो दंङ महसे मीहतिंङ शाहधेकतो। 17अपेहल बगत त्याहर शुहचे इलज़ा ता दोई एनोह परगराबि शाहदेकसी मीहतिंङ कुट्री चरच़तो, अतंई, धह, बगत त्याहर तोह।
18पर दोरे भत्ते माफी पेट्री लेहतिरे, तुहई मुखो दोई दोबि कुहतो, गेह रीह च़ुमसी तातग, दंङ दुह खंड्री ज़रूरी तोह; गेह करंङ साते बिनती लाहतग, गिह्बी माफ लेह च़रतु। 19अईदोई कुहतो, ‘गेह ङा जोड़ी बंङरे चुहमसि तातग, दंङ गेह दोरे खंड्री यवातग; ज़ि शबस गिह्बी माफी रेंऐ च़रतु।’ 20ऊईदि कुहतो, गेह ब्याह लहसी तातग, दिऊ थल्जी गेह अपि माहरपोग। 21दुह परगरे अंज़े एनोह मालिकाबि दिह गप्पारे कंज़े रन्दो। दंङ घरबारो मालिके रोहषे एनोह परगराबि कुहतो, नगरीऊ बज़ारंङ गलीतिङ हेंतेग इलजे गरीबरे, टंऊंणे, लट्टे ए कणेतिंङ देहर रेंज़ा हता।
22परगरे यहचा कुहतो, हे मालिका, केई छना कुहतेन, ध्यांए लेह केहतेग; दंङ ऊई लाह ठहरि तोह; 23मालिका ज़ि परगराबि कुहतो, नगरो धह्कतेकी अमरिंङ च़ि मीहतिंङ दोर्तिंङ अपिमी थल्जी मज़बूर लांही कि गिऊ घरबार पिंङे योतो। 24छना कुचे गेह कनिंङ कुट्रातग कि, अरी मुण्डा बुलासी तोईरे दोतु बिचंङज़ि अच़िला गिऊ बगत ज़ेह मरफोतो।”
चेला बणेक्चीमि मोल
25अपेहल मोह्ड़े भीड़ यीशुरंङ साते इपि लेहकी तोहई, दंङ दोई थलका यह्च़ा दोतंङ कुहतो, 26“अगर अरीया गिऊ कछंङ अपा दंङ एनोह याह ए बाह, मेच़ा, कटुरे दंङ न्वारे ए रिंङरे देहर तचेक कि एनोह जहानो ला गिहबे ला महस प्यारे चेहच़ा, दंङ दुह गिऊ चेला शुबी मरपोतो; 27अरी गिऊ चेला शुहबिमी बजाए दुख सहन लहज़िमी ए सीमी ला तेयार माह दुह गिऊ चेला बणेक्पिमी जोगे माह।”
28“केहतु बिचंङ अरी झांह ठ्रोह अरी मोह्ड़े घरबार बणाएषिमी ततो, दंङ तुई बंङज़ा दिह गप्पो हिसाब माह लोहतो कि दिह्बी बणाएच़िमी थल्जी अंयों खर्चा अपतो?” 29अगर दोई झांह माह लोहतो ता अपेहल दोई मुयांद केह्चे तेयार लेह च़रपोतो दंङ कम पुरा लेह मरपोतो माह लोहतो ता, दंङ मीहरे दिह खंड्रा दोऊ मज़ाक लोहर, 30कि दीह मीह बणाच़ी ताह लेहती पर पुरा लेह मरति
31या झांह ठ्रोह अरी रज्ज़ा शोतो अरी ऊई रज्ज़ारंङ साते लड़ाई लहज़ी यवा, पर तुहई रज्ज़ा सभा रंङ साते बंङज़ा बिचार माह लहतो कि छि गेह सा हज़ार मीहरे रेंज़ा निज़ा हज़ार मीहतु सामना लेह तरपोग कि मरपोग? 32माह ता दुह रज्ज़ाओ कछंङ घेंङौ दूत चरच़े दोरंङ साते समझोता लोहतो। 33दिए रीतिङ केहतु बिचंङज़ि अच़िआ एनोह भत्तेधिर ब्याड़ा माह लोहतो दुह गिऊ चेला शुबी मरपोतो।
स्वाद मेह छा
34“छाह ता रूठे तोह पर अगर छ़ाऊ स्वाद अच़ा इलि ता, दंङ दुह छना छ़कू लहज़ी। 35दुह माह रीहऊ माह खादो थल्जी कम अपतो; दुह ताह मीहज़ी धह्तेका छङें चरच़ि। छि; गेह कुट्रातग दुह ध्यानारंङ साते रेड्रुंई।”
Currently Selected:
लूको 14: LBFNT
Highlight
Share
Copy
Want to have your highlights saved across all your devices? Sign up or sign in
Lahuali Bible (लाहौली) by The Love Fellowship is licensed under Creative Commons Attribution-ShareAlike 4.0 License.
