मरकुसो 5

माजी आत्मा ग्रस्त मीहबी ठीक लहज़ी

1अपेहल यीशु ए दोऊ चेलारे गलील झीलो नुरेच़ि गिरासेनियो मीहतु इलाकारिंङ पिचातेर। 2अपेहल यीशु किशतीऊ टोहकठे च़ि तकसिरी दुह मुका ध्वांए इच्च़ा मीह कब्रो दोरच़ी हुंच़ा यीशुरंङ साते दोई, अतु अंद्रेग मांजी आत्मा तोहई। 3दुह मीह कब्ररंङ बंङज़ाते अंऊर मुर्दा मीहरे पथेक्च़ी। दंङ दुह अच़िला षाङड़ि रंङ साते छुहच़ी मरच़ातेर, 4छना कुचे दोबि घड़ी-घड़ी रशी ए षाङड़ि रंङ साते छ़ुह्च़ी तहच़ातेर तरीरे, दंङ दोई दुह थाव्गे खन्नी-खन्नी लेह चरच़ाते। दोबि अच़िला मीह काबू लेह माह तरच़ाते। 5दुह लगातार रात दिन दुह ठाहरीरिंङ अंऊर मुर्दा रे केट्री दंङ घोह टोहकठे इलजे हाऊष रंड्राते, दंङ रघटे रंङ साते एनाबि घाह केहच़ी घायल लहज़ाते।

6दोई यीशुबि ऊई तारेह खांई ज़रका रेह, दंङ कोंङा शुहचे दोबि फ्यग लहरी, 7-8यीशुज़ि दोऊ अंद्रेग अंऊ मांजी आत्मा तोहई दोऊ हखा कुंई, “हे मांजी आत्मा दिह मीहबी केट्रा धह्कते हुंच़ा इली।” मांजी आत्मा ए यीशु हखा हाऊष रेह कुंहई, “हे महान परमेश्वरो योह यीशु! केई गेरंङ साते छि जुन्ज़ातन? गेह करंङ साते परमेश्वरो मिंदंङ बिनती लहज़ातग कि केई गिह्बी दुख थारोंह।” 9यीशुज़ि दुह मांजी आत्मा रंङ साते रुहक्ती, “कनु मिन छी शुह?” मांजी आत्माज़ि कुहतो, “गिऊ मिन सेना शुह; छना कुचे ञेंरे दिह मीह ऊ अंद्रेग महसे तोतोंई।” 10दुह मीहू दोरच़ी दुह मांजी आत्मा ए यीशु हखा घड़ी-घड़ी बिनती लहरी कि, “ञेंतिंङ दीह इलाको दोरच़ी धह्कते हखा थाह हुंदुंई।”

11दोहर गोह रिंङ सुअरों इच्च़ा झुण्ड रवाक्सी लेहकी तोहई। 12दुह मांजी आत्मा ए यीशु रंङ साते बिनती लेह कुंई, “हेन्दिंङ दुह सुअरों बिचंङ चरच़ि च़रतु कि ञेंहच़ी दोतु अंद्रेग अच़ा योंई।” 13दंङ दोई दोतिंङ इबि रेंहई दंङ भत्ते मांजी आत्मा दुह मीहू दोरच़ी हुंज़ी दुह सुअरों झुंडो अंद्रेग अच़ा इलि। दंङ झुंड, अंऊ झुह्ट हज़ारो तोहई, गोहू ठेपुरिंङ ज़ि ज़रका रेह झीलंङ दह्चे सिए इलि। 14दुहरे सुअरतु पोहालाज़ि ज़रका रेह नगरंङ इलजे दी खबर सुनाति, दंङ दोहर छी शुहते, दुह खंड्रिमी थल्जी मीहरे हतिरेह। 15दोरे मीहरे यीशु कछंङ अतिरे दंङ दोच़ी अंऊ दोबि मांजी आत्माओ भत्ते सेना तोहई, दोबि खमज़े लहज़ा होषङ शुहबीरंङ साते खंजे दुरेह बेवा इलि। 16खंड्रा दोच़ी मीहरे, दुह मीहबी अतु अंद्रेग मांजी आत्मा तोहई, दंङ सुअरों पाहठी भत्ते हाल ऊई मीहतिंङ सुनाति। 17दंङ दुरेह मीहज़ी यीशु रंङ साते बिनती लेह कुट्री लेहती कि, “ज़ि शबस! हेंदु इलाकंङज़ि अच़ा इला।”

18अंऊ मुका यीशु वापिस इबिमी थल्जी किशतीऊ टोईच़ी हुंज़ी लेहती ता दंङ दुह मीह अतु दोहर मांजी आत्मा तोहई, दोहरंङ साते बिनती लहज़ी लेहती, “गिह्बी लाह केनारंङ साते अपि राऊँ।” 19पर यीशुज़ि दोबि ऐनाहरंङ साते अपिमी आज्ञा मरेहईं, दंङ दोहरंङ साते कुतोह, “केनोह चुंङ इलजे केनोह मीहतिंङ कंड्रु कि प्रभुज़ि केनोह टोईच़ी दया ले केनोह थल्जी अंयों मोह्ड़े कम लहरी।” 20यीशु कुट्रिमीरंङ साते दुह इलि दंङ दिकापुलिस#5:20 सा शहर प्रदेशंङ इलजे दि गप्पारे कुट्री लेहती कि, “यीशुज़ि गिऊ थल्जी अंयों मोह्ड़े कम लहरी।” दंङ झांह रेड्रिमी रंङ साते भत्ते मीहरे हेरान शुहचे इलि।

याईरो मेच़िमी कटु बि श्रींङी लहज़ी

(मत्ती 9:18-26; लूको 8:40-56)

21अपेहल यीशु यहचा किशतीरिंङ झीलो नुरेच़ि इलि, दंङ दोहर झीलो मुखंङ यीशु ऊ कछंङ इच्च़ा महस मोह्ड़े भीड़ ठ्रोहका शुहचे इलि। 22दंङ यहुदी सभा घरबारो इच्च़ा प्रधान यीशु ऊ कछंङ अति, अतु मिन याईर तोहई। दंङ दुह यीशुबि खंड्रे तेह दोऊ कोंज़ो कछंङ दचे इलि, 23दंङ दी कुचे ते यीशुरंङ साते बिनती लहरी, “गिऊ मेच़िमी कटु सी मी तो, केई गिऊ चुंङ अंज़े दोऊ टोईच़ी गुहड़ केऊ ता दुह सिमी दोरच़ी बचेके योतो।” 24दंङ यीशु दोहरंङ साते इलि; दंङ महस मोह्ड़े भीड़ दोऊ थले शुहचे इलि, धोंण तचेक कि भीड़ दोऊ टोईच़ी दह्पी लेहकी तोहई।

25दुह भीड़ो बिचंङ इच्च़ा झांह ठ्रोह मेच़मी तोहई, अतिंङ सनी साल बेहच़ी शुहई बहेक्फिमी बीमारी तोहई। 26दोई बेदातु दोरच़ी इलाज लहचे लेह महस दुख उठाषी, दंङ दोई एनोह भत्ते टंगा ढबाह खर्च ले च़रति पर दोबि छले फायदा मा शुई, बल्कि दोऊ बीमारी ऊई ला महसे बेहसा इलि। 27-28दोई यीशु पाहठी रेहशी तरेह कि यीशुज़ि महसे नतपरे ठीक लहरी, दोई सोचेक्ति कि, “अगर गेह यीशु सिर्फ खमज़ेर ए थोके च़रपोग, दंङ गेह अईन शुहचे योग।” झांह लेह दुह भीड़ो बिचंङज़ि दोऊ थलेसी अति दंङ दोऊ खमज़े थोह्की च़रति। 29दोहथले दोऊ शुई बहेक्पी बंद शुहचे इलि। दंङ दोई एनोह फुकाङ चेहती कि गेह ठीक शुहचे इलि।

30यीशु ज़ि दोहथले ञेंह केहरिर कि गिऊ अंद्रेगज़ि ठीक शुहबिमी सामर्थ हुंच़ा इलि। दंङ दोहपल ए भिड़ो हखा किरच़ा रुहक्ती, “गिऊ खम अच़ि थोक्ति?” 31यीशु चेलाज़ि दोहरंङ साते कुतोह, “केई खंड्रातन कि कनु टोईच़ी भीड़ द्फी लेहकी तो, तांला केई ञेंहच़ी रुक्च़ातोंई कि, ‘अच़ि गेह थोकातो?’” 32दंङ यीशुज़ि भीड़ो हखा देखा न्वेखा खंड्री लेहती कि गिह्बी अच़ि थोक्सी शोतो? 33दंङ दुह मेच़मीज़ि दी ञेंहए कि यीशु ऊ सामर्थे गेह ठीक लेह च़रति। झांह लेह दुह यीशु कछंङ अति, दंङ दोऊ तुईज़ी पुंन्ज़ कोंङे लहज़ी पुष्टू बाहरे अच़ा दंङ दोई बेवा ए डगेकी ते यीशुबि भत्ते कंड्री लेहती कि दोई छि लहते ओ दोहरंङ साते छि शुई। 34यीशुज़ि दोहरंङ साते कुतोह, “मियो, का ठीक शुहचे इलोन; छना कुचे केई गिऊ टोहकठे विशवास लहज़ातन। शांतिरंङ साते इला, दंङ केनोह दि बीमारीरंङ साते बचेके तोह।”

35अपेहल यीशु दी कुट्री लेहकी तोहई दंङ दुह ए मुका दुह प्रधान याईरो चूंङज़ि मीहच़ी अंज़े कुट्री लेहती, “गुरुबि दुख थाह रोंहू छना कुचे का मीओ सी ए इलज़ा।” 36अंऊ गप्पा दोच़ी कुट्रातेर, यीशु दुह मा रेड्रातिका ते दुह प्रधानो हखा कुहतो, “थाबेऊ; दंङ सिर्फ गिऊ टोहकठे विशवास लोहु! कि दुह षिङे योतो।”

37यीशुज़ि पतरस, याकूब ए याकूबो न्वा यूहन्नाबि एनोह साते शिलोह दोई ऊई अतिंङ ला ऐनारंङ साते माह शिली। 38यीशु याईरो चुंङ पिचे दंङ दोई मीहतिंङ हाऊष रेह तंङरी। 39यीशु तोंङ इलि दंङ दोतंङ साते कुट्री लेहती, “केरे क्रपतांई था दंङ हल्ला थालांई छना कुचे दिह मेच़िमी कटु सिए माह पर इमरिंङ तोह।” 40दिह गप्पा रेड्रा भीड़ो मीहरे यीशु मज़ाक उड़ाठी लेहतिरे। दंङ दोई दोरच़ी भत्ते मीहतिंङ धकते हखा हुंज़ी च़रति। दंङ यीशु ए दुह मेच़िमी कटु याह-बाह षुमु चेलारे रेंज़ा तोंखा अच़ा इलिरे अंऊर दुह मेच़िमी कटु तोहई।

41यीशुज़ि दुह मेच़मी कटु गुहड़ च़ुमज़िरी दंङ दोबि एनोह भाषा रिंङ कुट्री लेहती, “तलिता कुमी।” अतु मतलब शुह, “हे मेच़िमी कटु, गेह कनिंङ कुट्रातग खड़े अहच़ु।” 42दुह सनी सालो मेच़िमी कटु दोहथले खड़े शुहचे जोज़ि लेहती। दिह खंड्रा दोरे महसे हेरान शुहचे इलिर। 43यीशुज़ि सख्तिरंङ साते दोतिंङ खबरदार लहरी कि दिह गप्पाओ पाहठी अतिंङ ला पता लेहपि माह जूंस कि मेच़िमी कटु सिमी दोरच़ी श्रींङे इलज़ा। दंङ यीशुज़ि दुह मेच़िमी कटु याह-बाह रंङ साते दि कुंहई, “दिह मेच़िमी कटुबि ज़ेइमी थल्जी छाह रांई।”

Currently Selected:

मरकुसो 5: LBFNT

Highlight

Copy