मरकुसो 6
6
नासरतंङ यीशु अनादर
(मत्ती 13:53-58)
1कफरनहूम शहरंङज़ि हुंच़ा यीशु एनोह नगर नासरतरिंङ अच़ा अति, दंङ दोऊ चेलारे ला साते अच़ा अतिरे। 2अरामो ध्याड़ारिंङ यीशु यहुदी सभा घरबारंङ परमेश्वरो उपदेश रंड्री लेहकी तोहई, दोऊ उपदेश रेड्रा महस मीहरे हेरान शुहचे इलिरे। दंङ दोरे कुट्री लेहतिरे, “दि मीह दि गप्पारे अंऊच़ि सिखेसि शोतो? दंङ झांह ठ्रोह सामर्थो कम लहज़िमी बुद्धि दिबी अच़ि रांहषी शोतो? 3दि ता मिस्त्रीऊ, ए मरियमो योह शुह, दंङ याकूब, योसेस, यहूदा, दंङ शमौनो मोह्ड़े न्वा शुह। दिऊ रिङरेह ला ञेंहतु बिचङ बंङज़ातोर, दोच़ी दोबि ठुकराके केई।” झांह लेह दुह मीहतिंङ दोऊ टोहकठे शक शुहचे इलि दंङ दोच़ी दोऊ टोहकठे विशवास माह लहरिरे।
4यीशुज़ि दोतंङ साते कुतोह, “इच्च़ा भविष्यवक्ताओ आदर भत्ते ठाहरीरिंङ शुहबी अंऊर लाह दुह इबि। सिर्फ एनोह नगरंङ, एनोह नातातु बिचंङ, ए दंङ एनोह चुंङ माहशुहबी।” 5यीशुज़ि दोहर थोड़े अरे टेहची मीहतिंङ पाहछ रेह ठीक लहरी। ऊई मीहतु अबिश्वास लहच़िमी रंङ साते दोई दुह सामर्थो कम लेह मरथी। 6यीशुबि दोतु अबिश्वास खांई हेरानी शुहचे इलि, दुह थल यीशु देच़ि न्वेच़ि नगरंङ इलि दंङ परमेश्वरो रुठे खबर सुनाएची लेहती।
सनी चेलारे चरच़ि
(मत्ती 10:1-15; लूको 9:1-6)
7यीशुज़ि एनोह अंङषी सनी चेलारे एनोह कछंङ बुलाएती, दंङ दोतिंङ मीहतु दोरच़ी मांजी आत्मारे हुपिमी हुकुम रेह चरच़ि, दंङ दोतिंङ झुह्ट-झुह्ट लहच़ी शत्ह-शत्ह नगरंङ च़रति लेहती। 8दंङ यीशुज़ि दोतिंङ आज्ञा रेंहई कुहतो, “अमू थल्जी लठीऊ सिवा छले थाह शिलांई, माह रोटी, माह झोली दंङ माह ए च़न्ज़ारिंङ ढबाह, 9पर पोहाल लेहतुंई ऊई कुर्ती लाह थाह शिलेंई, अंऊ खमज़ेर केहच़ी लेहच़ी तातंई दुह ए झोबड़ी शोतो।” 10यीशुज़ि दोतिंङ दिला कुतोह, “अपेहल केरे अंऊ ला नगरंङ योंई दंङ अच़िया केरे एनोह चुंङ बुलाएपोतो दंङ दुह मुका तचेक केरे दुह ए चुंङ बंङज़ोंई अपेहल तचेक केरे दुह नगरंङ तोतोंई। 11अंऊ नगरो मीहरे केहतु गप्पा माह रेड्रोर ए केहतु इज्ज़त माह लोहर, दंङ दोरच़ी हुंच़िमी मुका केहच़ी केनातु चप्पलो धुह्ड़ ला ठुड़ेके कि च़रतुंई झांह खंड्रा दुह नगरो मीहच़ी ञेंओर कि परमेश्वरे दोतिंङ ज़रुर सज़ा रमतो। छना कुचे दोच़ी परमेश्वरो उपदेश माह रेड्रिर।” 12दुह थल दुह चेलार प्रचार लहज़ी लेहतिर कि, “मदम कमो दोरच़ी सेहम किर्ज़ुंई दंङ पापो अम ब्याड़ा लहच़ी परमेश्वरो अमरिंङ अच़ा अतंई।” 13दोच़ी महस मीहतु दोरच़ी मांजी आत्मारे हुंति, दंङ महस टेहची दोतु पुंज़ंङ तेल चाए दोतु थल्जी प्रार्थना लहज़ी दोतिंङ ठीक लहरिर।
यूहन्ना बपतिस्मा रंड्राढो हत्या
14हेरोदेस रज्ज़ा ज़ि यीशु पाहठी रेड्रा छना कुचे हेंतेग तचेक यीशु ऊ मिन पिला हासी फेलेक इलजी तोहई। यीशु पाहठी भत्ते मीहतु शत्ह-शत्ह राय तोहई। रें मीहच़ी कुट्रातेर कि यीशु, “यूहन्ना बपतिस्मा रंड्रा शुह, अंऊ सिमी दोरच़ी ला श्रींङे इलज़ा। झांह लेह यीशु दोरच़ी हेरान लहज़िमी ठ्रोह कम प्रगट शुबी लेहकी तोईरे।” 15रेह मीहच़ी कुट्रातेर, “कि दिह एलियाह शुह।” दंङ ऊई मीहच़ी कुट्रातेर कि, “दिह तुई ज़मानाओ भविष्यवक्तातु ठ्रोह तोह।” 16रज्ज़ा हेरोदेस दिह रेड्रा ते कुट्री लेहती, “दिह यूहन्ना बपतिस्मा रंड्रा ए शुह, अतु पुंज़ा गेह ट्रिकी च़रचातेग दंङ दुह सिमी दोरच़ी ला श्रींङे इलज़ा।” 17-18हेरोदेस रज्ज़ा ज़ि दि दिऊ थल्जी सोचेकच़ते छना कुचे दोई एनोह न्वा फिलिप्पुस ओ मेच़ा हेरोदियासा रंङ साते ब्याह लहसी तहरे, दंङ यूहन्नाए दोबि कुट्राते कि केई गलत लहसी तातन, केनोह न्वाऊ मेच़ाबि केनोह मेच़ा बणाएठी ठीक माह शुह (देर तचेक कि दोऊ न्वा श्रींङे तोह।) दिऊ थल्जी ए हेरोदेसे यूहन्नाबि च़ुमने जेलंङ केह्चे चरच़ाते। 19झांह लेह हेरोदियास यूहन्ना रंङ साते नफरत लहज़ाते दंङ दोबि सच़िमी तते पर दोई झांह लेह माहरति, 20छना कुचे हेरोदेस रज्ज़ा दि ञेंच़ाते कि यूहन्ना धर्मी ए पवित्र मीह शुह झांह लेह दोहरंङ साते महस बेवाते, दंङ दोऊ बचाव ला लहज़ाते। हर फेरे हेरोदेस रज्ज़ा युहन्नो गप्पा रेड्राते हलांकि दोबि समझ माह अपते तांला दुह दोबि रेड्री पसंद लहज़ाते।
21दंङ इच्च़ा ध्याड़ा हेरोदेसे एनोह जन्मदिन मनाएक्च़िमी थल्जी इच्च़ा धाम रेंई दोई एनोह मोह्ड़े अधिकारी, फौजी तु अफसर दंङ गलील झीलो भत्ते मीहरे बुलाएती। दंङ हेरोदियासो दोर्तिंङ दिए मोका तोहई यूहन्ना बि सच़िमी। 22दंङ हेरोदियासो मियो तोंखा अति, दंङ गरचे ते हेरोदेस ए दोऊ मेहमानातु सेहम खुश लहरी। दंङ राजा ज़ि दोहरंङ साते कुतोह, “केई छिल्ला जुना गिऊ दोरच़ी पेट्रातंई कनिङ गेह दुह रामोग।” 23दंङ हेरोदेस वाईदा लहरी ते कुंई, “केई छि जुन्ज़ातन गेह रें च़रपोग देर तचेक कि घेंङौ अध्धा राज्य लाह।” 24धह्कते इलजे एनोह याह रंङ साते कुतोह, “गेह छी पेट्रीगा?” दोई कुतोह, “दोहरंङ साते कुह कि यूहन्ना बपतिस्मा रंड्राऊ पुंज़ा ट्रिकी रोंऊ।” 25दुह दोहथल ए रज्ज़ो कछंङ अति दंङ दोहरंङ साते प्रार्थना लहरी, “गेह ज़ुन्ज़ताग कि केई हेंतेग यूहन्ना बपतिस्मा रनड्राडो पुंज़ा ट्रिकी इच्च़ा पेतड़ाङ गिह्बी हता।” 26रज्ज़ा महस परेशान शुई, दंङ कुट्री लेहती, हे मेच़िमी कटु केई दिह छि पेट्री च़रतिन? दंङ दुह एनोह वाईदाऊ बजहच़ि मुकरेकि मरति छना कुचे दुह मेहमानातु तुईज़ी बेइज्ज़त माह शुहबी तते। 27दंङ रज्ज़ा ए दोहथल ए इच्च़ा सिपाही बि हुकुम रेह च़रति, कि यूहन्नाओ पुंज़ा ट्रिकी हतांईं। 28दोई जेलंङ इलजे दोऊ पुंज़ा ट्रिके च़रति दंङ इच्च़ा पेतंङ केचे हति, दंङ दुह मेच़मी कटु बि रेंहई, दंङ दोई दुह एनोह याह ओ हखा रेंहई। 29दी रेड्रा दोऊ चेलारे अति, दंङ यहुदी रीति रिवाज़ो हिसाबे दोऊ क्रिया कर्म लहरिर।
प्रेरिता तु वापसी
30अपेहल दोरे सनी चेलारे नगर-नगरओ दोरच़ी वापिस अति दंङ अंज़े यीशु पिला हासी ठ्रोहका शुहचे, दंङ छिल्ला दोच़ी लहसी तरेर या सिखाच़ी तोहई दुह भत्ते यीशुबि कंड्रातेर। 31दोहर महसे मीहरे इबिए अपि लेहकी तोईरे झांह लेह यीशु ए दोऊ चेला तिंङ बगत ज़ेईरी ला टैम माह खोकसिरी। दोहपल ए यीशुज़ि दोतंङ साते कुंहई, “अतंई हेनर झांह ठ्रोह ठाहरीरिंङ योंहई अंऊर हेनर सुनसान ठहरि बंङज़ा तरपोंई, दंङ थोड़े हरे आराम ला लहच़ी तरपोंई।” 32दंङ दुरेह किशतीऊ टोईच़ी बंङज़ा, सुनसान ठाहरीरिंङ अच़ा इलिरे।
ङा हज़ार मीह तिंङ खिलाच़ी
33दंङ महसे मीहज़ी दोरे इबि तंङातोर दंङ ञेंहई केहतोर कि दोरे अंऊखा य्वातोर। झांह लेह दोरे दुह ठाहरीरिंङ ए देच़ि-न्वेच़ि भत्ते नगरो दोरच़ी मीहरे झीलो मुखंङ-मुखंङ ज़रका रेंईर दंङ यीशु ए दोऊ चेला तु तुहई ए दुह ठाहरीरिंङ पिचे इलिरे। 34अपेहल यीशु किशतीऊ टोहकठे ज़ि तकसिरी दुह मुका दोई इच्च़ा मोह्ड़े भीड़ तंङरी, दंङ दोतु टोईच़ी दया लहरी, छना कुचे ता दुरेह दुह त्रैंईतु ठ्रोह तोहई, अतु पोहाल अरीला माह तोहई; दंङ दुह दोतिंङ महस गप्पा कंड्री लेहकी तोहई।
35अपेहल ध्याड़ा योहसी लेहती, ता दोऊ चेलारेह दोऊ कछंङ अंज़े कुट्री लेहती, “दी सुनसान ठहरि तोह, दंङ ध्याड़ा ला महस शुहचे इलि। 36दितिंङ बिदा लोहु कि पिला हासी नगरंङ दंङ बस्ती ज़ि इलजे, एनोह थल्जी छा छी ज़ेइमी हाताईं।”
37दिह रेड्रा यीशुज़ि चेला तु हखा कुंई, “केहच़ी ए दोतिंङ छा ज़ेइमी थल्जी रेंई।” दोच़ी कुट्री लेहतिरे, “अगर ञेंहतु दोहर धोंण मुलतु टंगा शुंईंया अंयों इच्च़ा मीह त्रुई लाहरिंङ कमाके च़रच़ा, तांला ञेंहच़ी दोतिंङ ज़ेइमी थल्जी बगत रें मरपोंई।” 38यीशुज़ि दोतंङ साते कुतोह, “इलजे खंणुई केहतु कछंङ अंयों रोटी रेह तोह?” दोच़ी पता लेह कुइरे, “ङा रोटी ए झुह्ट मह्छ़ तोह।”
39दंङ यीशुज़ि दोतिंङ झुंडारिंङ शुहचे श्रांङतु टोहकठे बंङज़िमी आज्ञा रें। 40दोरे राह-राहए दंङ निन्जो सा-निन्जो सा ओ झंडारिंङ बंङज़ा इलिरे। 41दंङ यीशुज़ि ङा रोटीए झुह्ट मह्छ़ लेहप्ती, दंङ सर्गो हखा खांई परमेश्वरो धन्यवाद लहरी, दंङ रोटी खन्नी-खन्नी लेह चेला तिंङ रमा लहरी, दंङ दोच़ी मीहतिंङ फाहरी, दंङ दुह झुह्ट मच्छ ला फाए च़रति। 42भत्ते मीहच़ी खोकटुंङ पिंङे बगत ज़हरिर। 43अपेहल भत्तेज़ि बगत ज़े चरच़ातेर दंङ चेलाज़ि रोटीए मह्छ़ ओ खन्नी ठ्रोहका लहरिर। दिऊ सनी टोकरी पिंङषा इलिर। 44दुह बगत ज़ोवा दोतु बिचंङ ङा हज़ार गंङमीहरे तोईरे।
यीशु तिऊ टोईच़ी ज़ोई
(मत्ती 14:22-33; यहून्न 6:16-21)
45यीशुज़ि एनोह चेलार मज़बूर लेहरी कि दोरे युरनाह एनोह किशतीऊ टोहकठे बंङज़ा झीलो नुरेच़ि बैतसैदा नगरो हखा अच़ा ईलांई, अपेहल तचेक कि दोई दोहर रुमज़ा मीहतिंङ बिदा लोहतो। 46दोतिंङ बिदा लेह दुह गोऊ टोईच़ी प्रार्थना लहज़ी अच्च़ा इलि। 47अंऊ मुका रात शुई, दंङ चेला तु किशती गलील झीलो विचंङ तोहई, दंङ यीशु एकांतारिंङ इच्च़ा ठहरि बंङज़ा तोहई। 48यीशुज़ि खंयतो कि तेज लहन दोतु किशतीबि तुंखा शुहबी माह रंड्राते दंङ दोतिंङ किशती चलाच़िमी थल्जी महस खरे शुहबी लेहकी तोहई, दोरे चेलारे बेवा इलिर। मुंजे शुहतर यीशु झीलारिंङ तिऊ टोहकठे ज़ोजा चेला तु कछंङ इलि। यीशु झीलारिंङ दोतु बे तुईज़ी इबिमी तहरे। 49दंङ दोच़ी दुह झीलो टोईच़ी जोतर खांई चेहती कि दी रागस शुह, दंङ हाऊष रेहईंरेह; 50छना कुचे ता भत्ते दोबि खांई बेवा इलि तोहई। दंङ यीशु दोहथल ए दोतंङ साते गप्पा लहरी, दंङ कुतोह, “याहो लाहनी: गेह शुगाह; बेओंई था।” 51दंङ दुह दोतु कछंङ किशतीऊ टोईच़ी अति, दंङ लहन चुपे शुहचे इलि: दंङ दुरेह महस हेरान शुहचे इलि। 52दुरेह दुह रोटीऊ पाहठी समझेकी माह तोईरे, छना कुचे ता दोतु सेहम डग-डग शुहचे तोईरे।
गनेसरतङ टेची दोतिंङ ठीक लहज़ी
53अपेहल यीशुए दोऊ चेलारे इच्च़ा किशती रिंङ गलीलो झीलारिंङ ऊई तुंखा शहरो गन्नेसरत प्रदेशंङ पिचातोर। दंङ दोच़ी किशती दोहर छ़ुह्च़ी च़रतिरे। 54अंऊ मुका दुरेह दुह किशतीऊ टोईच़ी ली तक्सिरे, ता मीहज़ी दुह सेसाते। 55दोरकी मीहच़ी भत्ते प्रदेशंङ इलजे टेहची मीहतिंङ मंजीऊ टोहकठे कुरच़ा दुह ठाहरीरिंङ रेंज़ा शिलिर अंऊर दोच़ी दिह थाक्शी ताहरेर कि यीशु देर तोह। 56अंऊर-अंऊर यीशु नगरंङ या शहरंङ य्वाते, दोहर मीहरे टेहची दोतिंङ बज़ारंङ बेठाके चरच़ातेर दोरे मीहरे यीशुरंङ साते विनती लहज़ातेर कि, “दोतिंङ केनोह खमज़ेतु इच्च़ा मिख थोक्च़ी रंऊ।” अंयों मीहरे यीशुबि थोकातेर दोरे भत्ते अईन शुहचे इलेर।
Currently Selected:
मरकुसो 6: LBFNT
Highlight
Share
Copy
Want to have your highlights saved across all your devices? Sign up or sign in
Lahuali Bible (लाहौली) by The Love Fellowship is licensed under Creative Commons Attribution-ShareAlike 4.0 License.
