मरकुसो 7

परम्परा भाषे लहज़िमी सवाल

(मत्ती 15:1-20)

1दंङ इच्च़ा ध्याड़ा फरीसी ए थोड़े अरे यहुदी शास्त्रीर, अंऊ यरूशलेम शहरो दोरच़ी अंज़े तोईर दोरे यीशुज़ि पिला हासी ठ्रोहका शुहचे इलिर। 2दोच़ी तंङातोर कि यीशु ए दोऊ थोड़े अरे चेलारे गुहड़ च़िह मेह बगत ज़ोवातोर अंऊ यहुदी रिति-रिवाज़ो हिसाबे अशुद्ध तोहई। 3यहुदी मीहरे, ए फरीसी मीहरे एनोह बुज़ुर्गतु रीति-रिवाज़ो हिसाबे ज़ोजातेर। अपेहल तचेक दोच़ी एनोह रीति-रिवाज़ो हिसाबे गुहड़ शुहल्ज़ी माह केट्रातेर धोंण तचेक दोरे बगत माह ज़ोआतेर। 4दंङ बज़ारा रंङ ज़ि अंज़े, अपेहल तचेक मा सुज़ि साते ता धोंण तचेक बगत मा ज़ेई; ऊई ला महस गप्पारे तो, अंऊ दोतु कछंङ मनेक्पी मी थल्जी तो, छना कव्लीरेह, लोटकी दंङ त्रामो नंदे शुगाह, मंज़ेक्ची,

5झांह लेह फरीसी ए यहुदी शास्त्रीज़ि यीशु हखा रुहक्तिरे, “कनु चेलारे छिले पूर्वजो प्रथा ऊ टोईच़ी माह जोज़ातोर, दंङ गुहड़ च़ि मेह रोटी ज्वातोर?” 6यीशुज़ि दोतंङ जवाब रांई, “यशायाह भविष्यवक्ताज़ि केहतु कपटी तु थल्जी भविष्यवाणी लहच़ी ठीक लहते, ‘कि दिहरे मीहरे एनोह आहच़ि गिऊ आदर लहच़ातोर पर सेहमे गिऊ दोरच़ी महस ऊई तार तोतोर।’ 7दिहरे गिऊ महिमा फज़ुल ए लहज़ातोर दंङ मीहतु बणाएष्री नियम सिखाएच़ातोर।

8छना कुचे ता केहच़ी परमेश्वरो हुकुम टालेके मीहतु रीति बि मनेक्च़ी लेहकी तोईनी।” 9दोई दोतंङ साते कुतोह, “केहच़ी केनातु प्रथा मनेक्च़िमी थल्जी परमेश्वरो आज्ञा छना चालाकी रंङ साते टालेके केट्रातनी। 10उदाहरणो थल्जी परमेश्वरे एनोह सेवक मूसाओ दोरच़ी ञेंतिंङ हुकुम रांहषी तोह कि, ‘केहच़ी केनातु याह बाहो इज्ज़त लोहुई,’ दंङ अच़िला एनोह याह बाह बि मांजी कोहतो, दुह पक्‍का ए सच़ी च़रपोर। 11पर केहच़ी दिह हुकुमो फुचंङ सिखाएच़ि कि अगर अच़िला मीहच़ी एनोह याह बाहओ सेवा लेह ततो पर दोई एनोह याह बाह बि कोतो कि, अंऊ ला केतिंङ गिऊ दोरच़ी फायदा खोकसोतो दुह गेह केनाह तिंङ रें मरपोग, छना कुचे दुह भत्ते धिर गेह परमेश्वरा बि रेह चरच़ातग। 12पर केहच़ी दुह मीहबी दोऊ बाह ए दोऊ याहो छले सेवा लहज़ी माह रंड्रातन। 13झांह कुह्चे, अंऊ रिति-रिवाज़ा बि केहच़ी मीहतु कछंङ पिपि लहसी तातंई, दू परमेश्वरो कुहषी गप्पा बि शुहके लहज़िमी वहज़ा बणेंके यवा,”

मीह तिंङ अशुद्ध लहज़ा गप्पा

14दंङ यीशुज़ि दुह भत्ते दि एनोह कछंङ बुलाके कुट्री लेहती, “केहच़ी भत्तेज़ि गिऊ गप्पा रेड्रा दुह समझेकतानि। 15अंऊ ला चीज़ झांह ठ्रोह माह, कि दुह मीहू अन्दरे इलजे दोबि अशुद्ध लोहतो। पर छिल्ला ह दिर मीहू अन्द्रेगच़ि धखतेका हुंज़ा दोई दुह अशुद्ध लेह च़रच़ा। 16छि गेह कुड्रातग दुह ध्यानारिंङ साते रेड्रुंई।”

17अपेहल यीशु भीड़ केहट्रा चुंखा इलि दंङ दोऊ चेलाज़ि कथा ओ मतलबो पाहठी रुहक्च़ी लेहतिर। 18यीशुज़ि दोतंङ साते कुतोह, “छि केरे धोंण अंजान तोतोंई आ? केहति दिह ला पता माह कि अंऊ ला चीज़ मीहू खोकटुंङ य्वात दुह चीज़ ज़ै तेह अरीला मीह अशुद्ध माह शुहबी। 19छना कुचे दुह ज़ेइमी चीज़ दोऊ सेहमरिंङ मेहबि दंङ दोऊ खोकटुंङ इबि, दंङ ज़ेइमी थल दुह धकते हुंच़ा इबि।” झांह समझाके यीशुज़ि कुट्री कि अंयों ला ज़ेइमी चीज़ तोह दुह भत्ते परमेश्वरो तुईज़ी शुद्ध तोह।

20यीशुज़ि यह्च़ा कुहतो, “अंऊ मदम गप्पा मीहू सेहमे धकते हखा हुंच़ा, दोई मीह अशुद्ध लेह चरच़ि। 21छना कुचे मदम विचार मीहू अन्देरगच़ि हुंज़ी। दंङ दुह, मीहू सेहमज़ि मांजी-मांजी ख्याल, कुकम, चोरी, हत्या, ऊई मेच़मीऊ थल्जी लालच, 22लोभ, दुष्टता, आलास, मांजी टीरा, बुराई, घमण्ड, मुर्खता हुंज़ी। 23दी भत्ते मदम गप्पारे मीहू सेहमो अन्द्रेगच़ि हुंज़ी दंङ दोच़ी दुह अशुद्ध लेह चरच़ि।”

सरुफिनिकि जातिऊ मेच़मीऊ विशवास

24गलील प्रदेशंङज़ि हुंच़ा यीशु एनोह चेलारंङ साते सोर ए सीदोन प्रदेशंङ अच़ा इलि। दंङ दोर्तिंङ इच्च़ा चुंङ इलि दोई माह जुंज़ाते कि मीहच़ी पता लेहपतो कि दुह दोहर तोह, पर मीहतिंङ पता लेहकी इलि कि यीशु दोहर तोह। 25दोह इच्च़ा मेच़मी यीशु पाहठी रेड्रा अति अतु मियो अंद्रेग मांजी आत्मा तोहई। दंङ दुह यीशु ऊ कोन्ज़ंङ दह्चे इलि। 26दुह मेच़िमी फिनिकि इलाको यहुदी मेच़िमी तोहई। दोई यीशु हखा घड़ी-घड़ी बिनती लहज़ी कुट्री लेहती, “गिऊ मियो दोरच़ी मांजी आत्मा हुंज़ी च़रतु।” 27यीशुज़ि दुह मेच़िमी बि कथारंङ साते दोबि परखेक्च़िमी थल्जी कुंहई, “मुंडा कटुतिंङ कापि रोंऊ छि इच्च़ा बाह एनोह कटुतु रोटी खुह्ईतिंङ रमतो आ? कटुतु रोटी शिल्ज़े खुह्ई तु तुईज़ी केहट्री ठीक मशुहबी।” (यहुदी मीहज़ी ऊई मीहरे अंऊ यहुदी माहतोईरे दोतिंङ खुह्ई तु बराबर च़ेहच़ी तेर।) 28मेच़िमी यीशुबि जुबाब रेंहई, “हेले शुह प्रभु; पर खुह्ई ला मेजो पोयंङ इलजे कटुतु पेशी रोटी ज्वातेर।” 29यीशुज़ि दुह मेच़िमी ऊ झांह ठ्रोह जवाब रेड्रा दोऊ हखा कुट्री लेहती, “कनु विशवास महस मोह्ड़े तोह का चुंखा ईला, कनु मियो दोरच़ी मांजी आत्मा हुंच़ा इलज़ा।” 30दोई एनोह चुंङ अंज़े खंणी साते ता मेच़मी कटु मन्ज़िऊ टोईच़ी तोहई, दंङ मांजी आत्मा दोऊ दोरच़ी हुंच़ा इलि।

टंऊंणे ए हकला मीहबी ठीक लहज़ी

(मत्ती 15:29-31)

31दोहथल यीशु सोर शहर केहट्रा सीदोन शहर च़ि शुहचे दिकापुलिस प्रदेशंङ गलील झीलो कछंङ पिचे इलि। 32दोरकी मीहच़ी इच्च़ा मीह यीशु ऊ कछंङ हतिर अंऊ टटे ए टाऊंड़े तोहई, दुह मीहच़ी यीशु हखा बिनती लहरिर कि, “दिबी केनोह गुहटे पछ रोंऊ ताकि दि ठीक शुहचे योतो।”

33दंङ यीशुज़ि दुह मीहबी भीड़ो दोरच़ी शत्‌ह रेंज़ा इलि, दंङ एनोह ब्रेंज़ा दोऊ रेहट्राङ केहरिर, दंङ थू लेह दोऊ लेह थोक्ति; 34दंङ दोई सर्गो हखा खाए मिक्ति हति, दंङ दोहरंङ साते कुंई, “इप्फत्तह।” दिऊ मतलब शुह “अल्सा इल!” 35दोऊ रेहट्रा अल्सा इलि, दंङ दोऊ लेहऊ रुल युप्सा इलि, दंङ दुह संङा कुट्री लेहती।

36यीशुज़ि दुह मीहतिंङ रुठेरंङ समझाके कुंहई, “केहच़ी दि गप्पारे अतंङ साते लाह थाकुंई।” पर अंयों दोतिंङ मना लहज़ातंई धोंण ए दोच़ी दोऊ पाहठी कुट्री लेहतिर। 37“दुरेह महस हेरान शुहचे कुट्री लेहतिर, दोई छिल्ला लहतो रुठे लहतो; दोई टोउंणे दोतिंङ रेड्रिमी, ए टटे दोतिंङ कुट्रीमी शक्ति रंड्रा।”

Currently Selected:

मरकुसो 7: LBFNT

Highlight

Copy