लूका 14
14
फरीसी के घर मै ईसु
1एक दफै ईसु फिर आराम कन्नै बारे दिन फरीसिऔं के सरदारौं मै सै किसी एक के घर मै रोटी खानै गओ और बे उसकी ताख मै हे कै कब गलती करै। 2और देखौ, एक आदमी उसके सामने हो, जिसकै हात-पाँऐ फूलनै बारी बेमारी ही। 3तब ईसु यहूदी सास्तरिऔं और फरीसिऔं सै बोलो कै, “आराम कन्नै बारे दिन नियम के अनुसार किसी कै ठीक कन्नो अच्छो है, कै ना?” पर बे चुप रैहए। 4तब ईसु नै बौ हात सै छूँकै ठीक कर दओ और बहाँ सै जान दओ। 5#मत्ती 12:11फिर बानै उनसै कैई, “कै तुम्मै सै ऐंसो कौन है, जिसको लौंड़ा या बैल कुँआ मै गिर जाय, तौ का आराम कन्नै बारे दिन तुम उसकै बाहार ना लिकारौगे?” 6बे इन बातौं को कोई जबाब ना दे सके।
पौंहनेऔ की खातरदारी और नमरता
7कैसेकै ईसु नै जौ देखो कै पौंहने लोग अपने बैठनै के ताँई इज्जतदार जघै चुन रए हे, तौ बानै एक दासतान सुनाई। और बोलो, 8“जब तुमकै कोई बिहा की दाबत मै बुलाए तौ बहाँ किसी आदर बारी जघै मै मत बैठिओ। कैसेकै हो सकै है कै बहाँ कोई तुमसै जादा बड़ो आदमी बानै बुलार खाओ होए। 9फिर तुम दौनौ कै बुलानै बारो तुमरे धौंरे आकै तुमसै कैगो, ‘अपनी जौ जघै इस आदमी कै दे, दे।’ और फिर सरम के मारे तेकै सबसै नीची बारी जघै मै बैठनो पड़ैगो। 10और जब तुमकै बुलाओ जावै है तौ जाकै सबसै नीची बारी जघै मै बैठौ, जिस्सै जब तुमकै बुलानै बारो आगो तौ तुमसै कैगो, ‘हे दोस्त, उठ और ऊपर बैठ।’ फिर उन सबके सामने, जो तेरे संग बहाँ पौंहने हौंगे, तेरी इज्जत बढ़ैगी। 11#मत्ती 23:12; लूका 18:14कैसेकै जो कोई अपने आपकै बड़ो बनागो, बौ छोटो करौ जागो; और जो कोई अपने आपकै छोटो बनागो, बौ बड़ो करो जागो।”
ईनाम
12तब ईसु नै नौहतो दैनै बारे सै बी कैई, “जब तू दिन कै या रात कै दाबत करै, तौ अपने दोस्तौ या भईया या टब्बर या सेट पड़ोसिऔं कै ना बुला, कहीं ऐंसो ना हो, कै बे बी तेकै नौहतो दैं, और तेरो बदलो हो जाय। 13पर जब तू दाबत करै तौ, दीन दुखिऔं, अपाहिजौ, लंगड़ौं और अन्धौ कै बुला। 14तब तू धन्न होगो, कैसेकै उनके धौंरे तेरो बदलो चुकानै के ताँई कुछ बी ना है, पर तेकै धरमी लोगौं के फिर जी उठनै के टैम मै इस बात को ईनाम मिलैगो।”
बड़ी दाबत की दासतान
(मत्ती 22:1–10)
15फिर उसके संग रोटी खा रए लोगौ मै सै एक नै जौ सुनकै ईसु सै कैई, “हर बौ आदमी धन्न है, जो परमेसर के राज मै रोटी खागो।” 16तब ईसु नै उस्सै कैई, “एक आदमी किसी बड़ी दाबत की तईयारी कर रओ हो, उसनै भौत से लोगौ कै नौहतो दओ। 17जब रोटी तईयार हो गई, तौ बानै अपने नौकर के हात नौहतरिऔं कै बुलाबो भेजो कै, ‘आ जाऔ; अब रोटी तईयार है।’ 18पर बे सबके सब आनाकानी करल लगे, पैले नै उस्सै कैई, ‘मैंनै एक खेत मोल लओ है, मैंकै बौ बी देखनो है, मैं तेसै बिनती कर रओ हौं, मैंकै माफ कर दे।’ 19फिर दूसरे नै कैई, ‘मैंनै पाँच जोड़ी बैल मोल लए हैं, मैं तौ बस उनकै परखनै जाई रओ हौं, मैं तेसै बिनती कर रओ हौं, मैंकै माफ कर दे।’ 20एक और नै कैई, ‘मैंनै अबी बिहा करो है, इसताँई मैं ना आ सकतो।’ 21उस नौकर नै आकै अपने मालिक कै जे बात कैह सुनाई, तब घर के मालिक नै घुस्सा मै आकै अपने नौकर सै कैई, ‘जल्दी सैहर के गली मौहल्लौ मै जा और कंगालौ, अपाहिजौ, लंगड़ौं और अन्धौ कै हिंया ले आऔ।’ 22नौकर नै फिर कैई, ‘हे मालिक, जैसे तैनै कैई ही, बैसेई करो गओ है; फिर बी जघै बची है।’ 23फिर मालिक नै नौकर सै कैई, ‘सड़कौं और खेतौ की मैड़ौ तक जाकै लोगौ सै बिनती करौ और हिंया बुला लाऔ, जिस्सै मेरो घर भर जाय। 24और मैं तुमसै कैरओ हौं जो पैले बुलाए गए हे उनमै सै एक बी मेरी दाबत कै चख बी ना सकैगो।’”
चेला बन्नै की कीमत
(मत्ती 10:37,38)
25और ईसु के संग बड़ी भीड़ जा रई ही, तौ बानै पीछे मुड़कै उनसै कैई। 26#मत्ती 10:37“अगर कोई मेरे धौंरे आनो चाँहै है, और अपने अईया-अब्बा, बईयर और बालकौ, और अपने भईया और बहनौ, और अपनी जान कै बी मैंसै जादा पियार करै है, तौ बौ मेरो चेला ना बन सकै है। 27#मत्ती 10:38; 16:24; मरकु 8:34; लूका 9:23और जो अपनो कुरूस लेकै मेरे पीछे ना चलै है, तौ बौ मेरो चेला ना हो सकै है। 28तुम्मै सै कौन है कै बड़ो घर बनानो चाहतो हो, और पैले बैठकै खरचा ना जोड़ ले, कै पूरो कन्नै के ताँई मेरे धौंरे हिसाब किताब है कै ना? 29कहीं ऐंसो ना हो, कै जब नीह डारकै पूरो ना कर सकै, तौ सब देखनै बारे जौ कैह कै मजाक ना उड़ाल लगैं कै, 30‘जौ आदमी बनानै तौ लगो, पर पूरो ना कर सको?’ 31या कौन ऐंसो राजा है, कै दूसरे राजा सै लड़ाई कन्नै जा रओ हो, और पैले बैठकै बिचार ना कल्ले कै अपने दस हजार सिपाईऔं के संग लेकै दूसरे बीस हजार सिपाईऔं के संग सामनो कर सकौं हौं, कै ना? 32अगर बौ लड़ाई ना कर सकै है तौ, उसको दुसमन राजा अबी रस्ता मैई होगो, तौ बौ सान्ति दूत भेजकै मेल-मिलाब कन्नो चाँहैगो। 33इसई रीती सै तुम्मै सै जो कोई अपनो सब कुछ ना छोड़ैगो, तौ बौ मेरो चेला ना हो सकै है।
नौन की दासतान
(मत्ती 5:13; मरकुस 9:50)
34 “नौन तौ अच्छो है, लेकन अगर नौन को सबाद बिगड़ जाय, तौ उसकै नमकीन किस चीज सै करो जागो? 35बौ ना तौ खेत के ताँई और ना खात के ताँई काम मै आवै है: उसकै लोग ऐंसेई बाहार फैंक देवै हैं, जिसके सुन्नै के कान हौं बौ सुन ले।”
Currently Selected:
लूका 14: TKB
Highlight
Share
Copy
Want to have your highlights saved across all your devices? Sign up or sign in
New Life Compute Institute [NLCI] - CC BY-NC-ND 4.0
