लूका 15
15
खोई भई भेड़ की दासतान
(मत्ती 18:12–14)
1 #
लूका 5:29,30 सब तरै की लगान लैनै बारे और पापी उसके धौंरे आए करै हे जिस्सै ईसु की बात सुनै। 2तौ फरीसी और यहूदी सास्तरी बड़बड़ाते भए कैललगे, “कै जौ आदमी तौ पापिऔं सै मिलै है और उनके संग रोटी बी खावै है।” 3इस बात मै ईसु नै जौ दासतान सुनाई, 4“मानौ तुम्मै सै किसी के धौंरे सौ भेड़ हैं और उनमै सै एक खो जाय, तौ का बौ निन्नियानबे भेड़ौ कै खुले मै छोड़कै उस खोई भई भेड़ कै तब तक ना ढूंड़तो रैहगो, जब तक कै बौ उसकै मिल ना जाय? 5और जब बौ मिल जावै है, तौ बौ उसकै बड़े खुसी सै अपने कंधा मै उठा लेबै है। 6और जब घर लौहटै है तौ अपने दोस्तौ और पड़ोसिऔं कै धौंरे बुलाकै उनसै कैबै है, ‘मेरे संग खुसी मनाऔ कैसेकै मैंकै मेरी खोई भई भेड़ मिल गई है।’ 7मैं तुमसै कैरओ हौं, इसई तरै जब कोई एक भटको भओ पापी, परमेसर की ओर लौहट आवै है तौ सुरग मै इत्ती खुसी होवै है जितनी कै उन निन्नियानबे लोगौं के ताँई ना होवै है जो धरमी हैं, जो भटके भए ना हैं।”
खोए भए चाँदी के रुपिया की दासतान
8 “या सोचौ कोई बईयर है जिसके धौंरे दस चाँदी के रुपिया हैं और उसको एक रुपिया खो जावै है तौ का बौ दिया पजारकै घर मै तब तक झाड़ा झूड़ी और निगाह मारकै ढूंड़ती ना रैहगी जब तक कै बौ उसकै मिल ना जाय? 9और जब मिल जावै है, तौ बौ अपनी सहेलिऔं और पड़ोसनौ कै इखट्टी करकै कैबै है, कै मेरे संग खुसी मनाऔ, कैसेकै मेरो खोओ भओ चाँदी को रुपिया मिल गओ है। 10मैं तुमसै कैरओ हौं कै इसई तरै सै एक भटके भए पापी के लौहट आनै सै परमेसर के दूतौ के सामने बड़ी खुसी मनाई जागी।”
खोए भए लौंड़ा की दासतान
11फिर ईसु नै कैई, “एक आदमी के दो लौंड़ा हे। 12उनमै सै छोटे लौंड़ा नै अपने अब्बा सै कैई, ‘हे अब्बा, जमीन जायदात मै सै जो हिस्सा मेरो है, बौ मैंकै दे दे,’ बानै अपनी जमीन जायदात दौनौ कै बाँट दई। 13अबी कोई जादा टैम ना बीतो हो, कै छोटे लौंड़ा नै अपनी सैरी जायदात समैटी और किसी दूर मुलक कै चलो गओ और बहाँ कुकरम और गंदे कामौ मै अपनी सैरी जायदात बरबाद कर डारी। 14जब बौ सब कुछ खरच कर चुको तौ, उस मुलक मै बड़ो अकाल पड़ गओ, और बौ कंगाल हो गओ। 15इसताँई बौ उस मुलक के किसी आदमी के घर जाकै मजदूरी करल लगो, और बानै बौ अपने खेतौ मै सूअर चुंगानै के ताँई भेजो। 16बौ भूँक के मारे सोचल लगो कै बे फरीअई पेट भन्नै कै मिल जाँय जो सूअर खावै हैं। पर किसी नै बाकै एक फरी तक ना खान दई। 17फिर जब उसके होस ठीकाने आए तौ बौ बोलो, ‘मेरे अब्बा के धौंरे भौत से ऐंसे नौकर हैं जिनके धौंरे खानै के बाद बी बचो रैहबै है, और मैं हिंया भूँको मर रओ हौं। 18मैं अब उठकै अपने अब्बा के धौंरे जांगो और उस्सै कैंगो कै अब्बा देख, मैंनै परमेसर और तेरी नजरौ मै पाप करो है। 19मैं अब इस लायक बी ना रैहओ कै तेरो लौंड़ा कैलाऔं, मैंकै एक मजदूर समज कैई रख ले।’ 20तब बौ उठकै अपने अब्बा के धौंरे चल दओ।
“अबी बौ कुछ दूरई हो कै उसके अब्बा नै देख लओ और उसके अब्बा कै बामै भौत तरस आओ, और दौड़कै उसनै अपनो लौंड़ा अकौरिया मै भर लओ और भौत चूमो। 21लौंड़ा नै अब्बा सै कैई, ‘अब्बा, मैंनै तेरे नजरौ मै और परमेसर के नजरौ मै पाप करो है, मैं अब तेरो लौंड़ा कैलानै के लायक बी ना हौं।’ 22पर उसके अब्बा नै अपने नौकरौ सै कैई; जल्दी सै जल्दी अच्छे सै अच्छे लत्ता लाऔ और उसकै पैहराऔ, और उसके हात मै मुंदरिया, और पाँऐ मै जूता पैहराऔ। 23और पलो भओ पसु लाकै काटौ जिस्सै हम खाँय और खुसी मनाऐ।#15:23 उन दिनौ मै यहूदी लोग अपनी रीती के अनुसार तौहार या खुसी मनानै के टैम मै अच्छो पलो भओ पसु काटकै खावै हे। 24कैसेकै मेरो जौ लौंड़ा मर गओ हो, पर अब फिर जिन्दो हो गओ है: पैले खो गओ हो, अब मिल गओ है: और बे खुसी मनाल लगे।
25 “पर उसको बड़ो लौंड़ा जो खेत मै हो, और जब बौ खेत सै लौहटते भए अपने घर के धौंरे पौंचो, तौ उसनै गानै बजानै और नाचनै की अबाज सुनी। 26और बानै एक नौकर कै बुलाकै पूँछी; जौ सब का हो रओ है? 27नौकर नै उस्सै कैई, तेरो छोटो भईया लौहटकै आ गओ है; इसताँई तेरे अब्बा नै पलो भओ पसु कटबाओ है, कै बौ सई सलामत सै लौहट आओ है। 28जौ सुनकै बड़ो भईया घुस्सा सै भर गओ, और बानै घर के भीतर जानो ना चाँहो, पर उसको अब्बा बाहार लिकरो और बौ समजाओ-बुझाओ। 29पर बानै अपने अब्बा कै जबाब दओ, ‘कै देख, मैं इतने साल सै तेरी सेवा कर रओ हौं, और कबी बी तेरी बात ना टाली, तौबी तैनै मैंकै कबी एक बकरी को बच्चा बी ना काटकै खबाओ, कै मैं बी अपने दोस्तौ के संग खुसी मना सकौं 30पर जब तेरो जौ लौंड़ा, जिसनै तेरी सैरी जायदात रंडिऔ मै उड़ाकै आओ है, तौ तैनै उसके ताँई पलो भओ पसु कटबाओ।’ 31उसके अब्बा नै उस्सै कैई, ‘देख लौंड़ा, तू हमेसा मेरे संग है; और देख जो कुछ मेरो है बौ सब तेरोई है। 32पर अब हमकै खुसी मनानी और मगन होनो चँईऐ, कैसेकै जौ तेरो छोटो भईया मर गओ हो, अब फिर जिन्दो हो गओ है पैले खो गओ हो, अब मिल गओ है।’”
Currently Selected:
लूका 15: TKB
Highlight
Share
Copy
Want to have your highlights saved across all your devices? Sign up or sign in
New Life Compute Institute [NLCI] - CC BY-NC-ND 4.0
