लूका 17
17
पाप, बिसवास और करम
(मत्ती 18:6,7,21,22; मरकुस 9:42)
1एक दिन फिर ईसु नै अपने चेलौ सै कैई, “लोगौं कै इस दुनिया मै पाप मै गिरनै की परिक्छा होती रैहंगी, पर परमेसर उसकै बड़ी सजा देगो, जिसनै लोग उस पाप मै फसाए। 2पर जो मेरे ऊपर बिसवास करैं हैं, इन छोटौ मै सै एक कै बी पाप मै गिरावै है, उसके ताँई जौ भलो होतो, कै चक्की को पटा उसके गरदन मै लटकाओ जातो, और बौ समन्दर मै डार दओ जातो। 3#मत्ती 18:15इसताँई चौकस रैहऔ, अगर तेरो भईया, कोई पाप करै है तौ उसकै समजा, अगर बौ अपने पाप सै पछताऐ तौ बाकै माफ कर दे। 4अगर बौ दिनभर मै तेरे खिलाप सात फेरी पाप करै और सातौं फेरी तेरे धौंरे आकै कैए, मुस्सै गलती हो गई मैंकै माफ कर दे, तौ बाकै माफ कर।” 5तब भेजे भए चेलौ नै परभु ईसु सै कैई, “परमेसर के ऊपर हमरो बिसवास बढ़ानै के ताँई हमरी मदत कर।” 6परभु ईसु नै कैई, “अगर तुमकै राई के दाने के बराबर बी बिसवास होतो, तौ तुम इस सैंतूत के पेड़ सै कैते कै जड़ सै उखड़ कै समन्दर मै लग जा, तौ बौ तुमरी मान लेतो।
नौकर को फरज
7 “फिर ईसु नै कैई, मान लो तुम्मै सै किसी के धौंरे एक नौकर है जो हर जोतै है या भेड़ौ के चुंगावै है जब बौ खेत सै लौहटकै आय तौ का उसको मालिक बासै कैगो, ‘जल्दी आ और रोटी खानै बैठ जा?’ 8पर बजाऐ इसके का बौ उसकै जौ ना कैगो, ‘मेरी रोटी तईयार कर, और अपने लत्ता पैहर और जब तक मैं खा-पी ना लौं, मेरी सेवा कर; तब इसके बाद तू बी खा-पी सकै है?’ 9इतनोई ना, बानै मालिक को कैहनो मानकै उसको काम करो, इसताँई बौ उसको ऐहसान ना मानैगो। 10तुमरे संग बी ऐंसोई है। जो कुछ तुमसै कन्नै कै कैओ गओ है, उसकै कन्नै के बाद तुमकै कैनो चँईऐ, ‘हम तौ नौकर हैं’ हम किसी बड़ाई के हकदार ना हैं। हमनै तौ बस अपनो फरज पूरो करो है।”
दस कोढ़िऔं को ठीक करो जानो
11और ऐंसो भओ कै ईसु ऐरूसलेम कै जाते भए सामरिया और गलील के बीच मै सै होकै जा रओ हो। 12जैसेई ईसु किसी गाम मै घुसो तौ तबई उसकै दस कोढ़ी मिले। 13और उनौनै दूर खड़े होकै, ऊँची अबाज सै कैई, “हे ईसु, मालिक, हमरे ऊपर दया कर।”
14ईसु नै उनकै देखकै कैई, “जाऔ और अपने आपकै पुजारिऔं#17:14 मूसा के नियम के अनुसार पुजारी जाँचकै घोसना करै हो कै जौ कोढ़ी सुद्द हो गओ है कै दिखाऔ।” जातेई जाते बे ठीक होकै सुद्द हो गए। 15पर उनमै सै एक नै जब जौ देखो कै बौ ठीक और सुद्द हो गओ है, तौ बौ बापस लौहटो और ऊँची अबाज सै परमेसर की बड़ाई करल लगो। 16और ईसु के पाँएऔं मै मौह के बल गिरकै, ईसु को धन्नबाद करल लगो; बौ तौ सामरी मुलक को आदमी हो। 17ईसु नै उस्सै पूँछी, “का सबई दसके दस कोढ़ी मैंनै ठीक ना करे? फिर बे नौ कहाँ हैं? 18का इस गैर यहूदी कै छोड़कै उनमै सै कोई बी परमेसर की बड़ाई कन्नै बापस ना लौहटो।” 19फिर ईसु नै उस्सै कैई, “खड़ो हो और चलो जा, तैनै मेरे ऊपर बिसवास करो है, इसताँई तू ठीक हो गओ है।”
परमेसर को राज तुमरे भीतरई है
(मत्ती 24:23–28,37–41)
20एक दफै जब फरीसिऔं नै ईसु सै पूँछी, “परमेसर कब लोगौ के ऊपर राज करैगो?”
तौ बानै उनकै जबाब दओ, “परमेसर को राज कोई बी देख ना सकै है। 21सुनौ, लोग जौ ना कैंगे, ‘बौ हिंया है,’ या ‘बौ बहाँ है,’ कैसेकै परमेसर को राज तौ तुमरे भीतरई है।”
22पर ईसु नै अपने चेलौ सै कैई, “ऐंसो टैम आगो जब तुम, आदमी के लौंड़ा के दिनौ मै सै एक दिन कै बी देखनै कै तरसौगे, पर उसकै देख ना सकौगे 23जब लोग तुमसै कैंगे, बहाँ है, या देखौ हिंया है; पर तुम बिसवास करकै उनके पीछे मत चले जईओ।
24 “बैसेई जैसे बिजली चमक कै एक कौने सै दूसरे कौने तक आसमान कै चमका देवै है, बैसेई ‘मैं’ आदमी को लौंड़ा बी अपने दिन मै दुबारा आंगो, और सब लोग देखंगे। 25पर पैले जरूरी है, कै बौ भौत दुख उठाऐ, और इस पीड़ी के लोग उसको इनकार कर दंगे।
26 “जैसे नूह के दिनौ मै भओ हो, बैसेई आदमी के लौंड़ा के दिनौ मै बी होगो। 27जिस दिन तक नूह और उसके परिबार के लोग जिहाज मै ना चढ़े, उस दिन तक लोग दुसट, और पापी हे उनमै बिहा-सादी होती रैहंई; तब जलपरलै भई और परमेसर नै बे सब नास कर दए।
28 “इसई हाँई लूत के दिनौ मै बी ठीक ऐंसोई भओ हो, कै लोग खाते-पीते, लेन-देन करते, पेड़ लगाते और घर बनाते रैहए। 29पर जिस दिन लूत, सदोम सैहर सै लिकरो, उस दिन परमेसर नै आग और जरते भए पत्थर आसमान सै बरसाए और सब कुछ बरबाद कर दओ। 30उस दिन बी जब ‘मैं’ आदमी को लौंड़ा परकट हौंगो, ठीक ऐंसोई होगो।
31 #
मत्ती 24:17,18; मरकु 13:15,16 “उस दिन अगर कोई आदमी छत मै हो और उसको सामान घर के भीतर हो तौ उसकै लैनै बौ नीचे ना उतरै। इसई तरै अगर कोई आदमी खेत मै हो तौ बौ पीछे ना लौहटै। 32लूत की बईयर को का भओ उसकै याद करौ।
33 #
मत्ती 10:39; 16:25; मरकु 8:35; लूका 9:24; यहून 12:25 “जो कोई अपनी जिन्दगी बचानै की कोसिस करैगो, बौ जिन्दगी खो देगो, और जो कोई मेरे ताँई अपनी जिन्दगी दैनै कै तईयार होगो उसकै हमेसा की जिन्दगी मिलैगी। 34मैं तुमसै कैरओ हौं, उस रात एक खटिया मै दो आदमी सोते हौंगे, उनमै सै एक उठा लओ जागो और दूसरो छोड़ दओ जागो। 35दो बईयरैं एक संग चकिया मै अनाज पीस रई हौंगी एक उठा लई जागी और दूसरी छोड़ दई जागी। 36दो जनी खेत मै हौंगे एक ले लओ जागो और दूसरो छोड़ दओ जागो।”#17:36 कुछ यूनानी हस्तलेखौ मै जौ जोड़ो गओ है।
37फिर ईसु के चेलौ नै बासै पूँछी, “हे परभु ईसु, ऐंसो कहाँ होगो?” बानै उनसै कैई, “जहाँ लाहस पड़ी हौंगी, गिज्ज बी बहीं इखट्टे हौंगे।”
Currently Selected:
लूका 17: TKB
Highlight
Share
Copy
Want to have your highlights saved across all your devices? Sign up or sign in
New Life Compute Institute [NLCI] - CC BY-NC-ND 4.0
