मरकुस 1
1
यहून्ना जल संस्कार दैनै बारे को परचार
(मत्ती 3:1–12; लूका 3:1–18; यहून्ना 1:19–28)
1परमेसर के लौंड़ा ईसु मसी की अच्छी खबर की सुरूआत। 2जैसो परमेसर को सन्देसो दैनै बारे यसाया की किताब मै लिखो है कै,
“सुन मैं अपनो दूत तेसै पैले भेज रओ हौं।
बौ तेरे ताँई रस्ता तईयार करैगो।
3बियाबान मै किसी बुलानै बारे की अबाज सुनाई दे रई है कै,
‘परभु के आनै के ताँई रस्ता तईयार करौ
और बाके ताँई सड़कौं कै सीदी करौ।’”
4यहून्ना जल संस्कार दैनै बारो बियाबान मै आओ और जौ परचार करल लगो कै, “अपने पापौं कै छोड़ौ और जल मै डुबकी लेओ और परमेसर तुमरे पापौं कै माफ करैगो।” 5और यहूदिया मुलक और ऐरूसलेम के सब रैहनै बारे लोग यहून्ना के धौंरे जाल लगे और बे अपने अपने पापौं कै मानकै यरदन नाम की नद्दी मै यहून्ना सै जल संस्कार लेल लगे। 6यहून्ना तौ ऊँट के बार की ऊन के लत्ता पैहरै हो, और अपनी कमर मै चमड़ा को पट्टा बांधे रैहबै हो। बाको खानो टिड्डी और जंगली सैंत हो। 7बौ अपने उपदेस मै कैए करै हो, “जो मेरे बाद आनै बारो है, बौ मैंसै भौत सकति बारो है। मैं तौ इस लायक बी ना हौं कै नौहौर कै उसके जूता के फीता बी खोल सकौं। 8मैंनै तौ तुमकै पानी सै जल संस्कार दओ है पर बौ तुमकै पबित्तर आत्मा सै जल मै डुबकी देगो।”
ईसु को जल संस्कार और परखनो
(मत्ती 3:13—4:11; लूका 3:21,22; 4:1–13)
9उनई दिनौ मै ईसु नै गलील मुलक के नासरत गाम सै आकै, यरदन नद्दी मै यहून्ना सै जल संस्कार लओ। 10और जैसेई बौ पानी सै लिकरकै ऊपर आओ, तौ तुरन्त उसनै आसमान खुलो भओ और परमेसर की आत्मा कै कबूतर के रूप मै अपने ऊपर उतरतो भओ देखो। 11#मत्ती 3:17; 12:18; मरकु 9:7; लूका 3:22और आसमान सै एक अबाज आई कै, “तू मेरो पियारो लौंड़ा है और मैं तेसै भौत खुस हौं।” 12इसके बाद परमेसर की आत्मा नै तुरन्त ईसु, बियाबान की ओर भेजो। 13जहाँ चालीस दिन तक सैतान बाकै परखतो रैहओ। और बौ बियाबान मै जनाबरौ के संग रैहओ और सुरगदूत उसकी सेवा टहल करते रैहए।
ईसु के पैले चेला
(मत्ती 4:12–22; लूका 4:14,15; 5:1–11)
14यहून्ना के गिरप्तार हो जानै के बाद ईसु गलील मुलक मै आकै परमेसर की अच्छी खबर को परचार करल लगो। 15#मत्ती 3:2और कैललगो, “बखत पूरो हो चुको है, परमेसर को राज धौंरे आ गओ है और गलत कामौ सै मन फिराऔ और अच्छी खबर मै बिसवास करौ।”
16गलील की झील के किनार सै होकै जाते भए ईसु नै समौन और उसको भईया अन्दरयास झील मै जार डारते भए देखे; कैसेकै बे धीमर हे। 17ईसु नै उनसै कैई, “मेरे पीछे चले आऔ, मैं तुमकै आदमिऔ कै पकड़नै बारो बनांगो।” 18और बे तुरन्त अपने जार छोड़कै उसके पीछे चल दए। 19थोड़े अग्गे जाकै ईसु नै जबदी को लौंड़ा याकूब और उसको भईया यहून्ना कै किसती मै अपने जारौ कै सुदारते भए देखो। 20ईसु नै तुरन्त बे बुलाए; बे अपने अब्बा जबदी कै, मजदूरौ के संग किसती मै छोड़कै बाके पीछे चल पड़े।
दुसट आत्मा को लिकारो जानो
(लूका 4:31–37)
21फिर बे कफरनहूम सैहर मै आए, और यहूदिऔं को आराम कन्नै को दिन#1:21 आराम कन्नै को दिन, सब्त के दिन ईसु यहूदिऔं के पिराथना घरौं मै जाकै सिक्छा देल लगो। 22#मत्ती 7:28,29लोग उसकी सिक्छा सुनकै अचम्बे मै पड़ जावै हे; कैसेकै बौ सास्तरिऔं के हाँई ना बलकन अधकार के संग सिकाबै हो। 23उसई बखत बहाँ के एक पिराथना घर मै एक आदमी हो जिसमै दुसट आत्मा घुसी पड़ी ही, बौ जौ कैह कै चिल्ला पड़ी, 24“हे ईसु, नासरी, हमकै तेसै का काम? तू का हमरो सरबनास कन्नै आओ है? मैं जानौ हौं तू कौन है, तू परमेसर को भेजो भओ पबित्तर आदमी है।” 25ईसु नै उसकै डाँटकै कैई, “चुप रैह, और जा आदमी मै सै बाहार लिकर जा।” 26तब दुसट आत्मा उस आदमी कै झँजोड़ कै जोर से चिल्लाती भई उसमै सै लिकर गई। 27बे सब अचम्बे मै पड़ गए, और आपस मै कैते रैहए, “जौ कैसी बात है? जौ तौ नई तरीका की सिक्छा है; जौ तौ अधकार के संग बोलै है। बौ तौ दुसट आत्माऔ कै बी हुकम देवै है और बे बी बाको हुकम मानै है।” 28ईसु की जौ चरचा तुरन्तई गलील मुलक के सैरे कौने कौने मै फैल गई।
ईसु दुआरा भौस्से बेमारौं कै ठीक कन्नो
(मत्ती 8:14–17; लूका 4:38–41)
29बे पिराथना घर सै लिकरनै के बाद तुरन्त याकूब और यहून्ना के संग सीदे समौन और अन्दरयास के घर आए। 30बहाँ समौन की सास बुखार मै पड़ी भई ही और लोगौ नै तुरन्त उसके बारे मै ईसु कै बताई 31ईसु बाके धौंरे गओ और हात पकड़कै बौ उठाई और बाको बुखार उसई टैम उतर गओ और बौ उन लोगौ की सेवा-पानी करल लगी। 32साँज के टैम, सूरज डूबनै के बाद, सब बेमारौं कै और जिनमै दुसट आत्मा समाई भई हीं ईसु के धौंरे लाललगे। 33और सैरो गाम बाके दारे मै इखट्टो हो गओ। 34ईसु नै भौतौं कै, जो तरै-तरै की बेमारिऔ सै परेसान हे, ठीक करे, और भौत सी दुसट आत्मा बी लिकारीं और बौ उन दुसट आत्माऔ कै बोलन ना देवै हो, कैसेकै बे दुसट आत्मा जानै हीं कै बौ कौन है।
एकान्त मै ईसु की पिराथना
(लूका 4:42–44)
35दूसरे दिन ईसु तड़केई उठकै बाहार लिकरकै किसी एकान्त जघै मै जाकै पिराथना करल लगो। 36तब समौन और बाके संगी साती उसकै ढूंड़ल लगे। 37और उसकै ढूंड़तेई जौ बोले, “सब लोग तेकै ढूंड़ रऐ हैं।” 38ईसु नै उनकै जबाब दओ, “आऔ हम आस पास के गामौ मै चलैं, कै मैं बहाँ बी परचार कर सकौं, कैसेकै मैं जाके ताँई तौ आओ हौं।” 39#मत्ती 4:23; 9:35 और बौ सैरे गलील मुलक मै यहूदिऔं के पिराथना घरौं मै जाकै परचार करतो और दुसट आत्माऔ कै लिकारतो रैहओ।
कोढ़ी को ठीक करो जानो
(मत्ती 8:1–4; लूका 5:12–16)
40एक कोढ़ी ईसु के धौंरे आओ और उसके सामने घूंटे टेक कै बासै बिनती करकै कैललगो, “अगर तू चाँहे तौ मैंकै ठीक करकै सुद्द कर सकै है।” 41ईसु नै उसके ऊपर तरस खाकै अपनो हात बढ़ाओ, और उसकै छूँकै उस्सै कैई, “मैं चाँहौ हौं कै तू ठीक और सुद्द हो जा” 42तबई तुरन्त बाको कोढ़ चलो गओ और बौ सुद्द हो गओ। 43ईसु नै उसकै जौ कड़ी चितौनी देते भए बौ तुरन्त भेज दओ, 44और उस्सै कैई, “देख किसी सै कुछ मत कैईए और जाकै अपने आपकै पुजारी कै दिखा और ठीक होनै के बारे मै मूसा नै जो हुकम दओ है उसकै भेंट चढ़ा जिस्सै तेरो ठीक होनै और सुद्द होनै को सबूत हो जाऐ।” 45पर बौ बहाँ सै बिदा होकै चारौ लंग खुल कै जाकी चरचा करल लगो। इस्सै ईसु के ताँई खुले रूप सै सैहरौं मै जानो मुसकल हो गओ, इसताँई बौ एकान्त जघौं मै रैहओ, फिर बी लोग चारौ ओर सै बाके धौंरे आवै हे।
Currently Selected:
मरकुस 1: TKB
Highlight
Share
Copy
Want to have your highlights saved across all your devices? Sign up or sign in
New Life Compute Institute [NLCI] - CC BY-NC-ND 4.0
