मरकुस 2
2
फालस बारे आदमी कै ठीक कन्नो
(मत्ती 9:1–8; लूका 5:17–26)
1कुछ दिनौ के बाद जब बौ फिर कफरनहूम सैहर मै आओ तौ लोगौ कै पतो चल गओ कै बौ एक घर मै है। 2और भौत से आदमी घर मै इखट्टे हो गए, और मौहड़े के सामने तक की जघै बी ना बची। और ईसु उन लोगौ कै बचन सुना रओ हो। 3और लोग फालस के मारे भए एक बेमार कै चार आदमिऔ सै उठवाकै ईसु के धौंरे लाए। 4जादा भीड़ होनै की बजै सै बे उस बेमार कै ईसु के धौंरे ना ला सके; तौ जहाँ ईसु हो उनौनै बहाँ की खपड़ैल हटाकै जघै बना लई, और बा आदमी कै खटिया समेत नीचे उतार दओ। 5और ईसु नै उन आदमिऔ को बिसवास देखकै फालस बारे रोगी सै कैई, “बेटा, तेरे पाप माफ हो गए।”
6बहाँ कुछ सास्तरी पंडत बैठे भए हे। और बे अपने अपने मन मै सोचल लगे, 7“कै ईसु ऐंसो काए बोल रओ है? जौ तौ परमेसर की बुराई कर रओ है; परमेसर के अलाबा और कौन पाप माफ कर सकै है?”
8ईसु तुरन्त अपने मन मै जान गओ कै बे अपने मनई मन का सोच रए हैं, और ईसु नै सास्तरी पंडतौ सै कैई, “तुम अपने अपने मन मै इस बात के बारे मै ऐंसे काए सोच रए हौ? 9आसान बात का है, इस फालस के मारे भए आदमी सै जौ कैनो कै, ‘तेरे पाप माफ भए’ या जौ, ‘उठ और अपनो सितरो उठा और चल फिर’? 10पर तुमकै पतो हो जाऐ कै आदमी के लौंड़ा कै इस धरती मै पाप माफ कन्नै को हक मिलो भओ है।” तब ईसु नै उस फालस के मारे भए सै कैई, 11“मैं तेसै कैरओ हौं, ‘उठ, अपनो सितरो उठा और अपने घर जा।’” 12और बौ उठकै खड़ो हो गओ और तुरन्त अपनो सितरो उठाकै सब आदमिऔ के देखते भए बाहार चलो गओ; और बे सबके सब बड़े अचम्बे मै पड़ गए, और परमेसर की बड़ाई करते भए कैललगे, ऐंसो तौ हमनै कबी ना देखो।
एक लेबी नाम के आदमी कै चुननो
(मत्ती 9:9–13; लूका 5:27–32)
13ईसु फिर झील के किनारे गओ, और बड़ी भीड़ ईसु के धौंरे आल लगी, और ईसु उनकै सिक्छा देवै हो। 14जाते बखत ईसु नै हलफई के लौंड़ा लेबी कै चुंगी चौकी मै बैठो भओ देखो, और उस्सै कैई, “मेरे पीछे चलो आ।” बौ उठो और ईसु के पीछे चलो आओ। 15फिर ईसु अपने चेलौ के संग लेबी के घर रोटी खानै बैठो, और भौत से चुंगी लैनै बारे और पापी बी उसके संग रोटी खा रए हे, कैसेकै बे बड़े तादात मै ईसु कै माननै बारे बन गए हे। 16जब सास्तरिऔं मै सै कुछ फरीसी लोगौ नै देखो कै ईसु पापिऔं और चुंगी लैनै बारौं के संग रोटी खा रओ है, तौ उनौनै उसके चेलौ सै कैई, “बौ चुंगी लैनै बारे और पापिऔं के संग रोटी काए खावै है?” 17जौ सुनकै ईसु नै उनसै कैई, “भले चंगौ कै बैद की जरूरत ना, पर बेमारौं कै है। मैं धरमिऔं कै ना, पर पापिऔं कै बचानै आओ हौं।”
बरत को सबाल
(मत्ती 9:14–17; लूका 5:33–39)
18यहून्ना के चेला और फरीसी दल किसी दिन बरत रक्खे करै हे; कुछ लोग आकै ईसु सै बोले, “यहून्ना के चेला और फरीसी दल के लोग बरत रख रऐ हैं, पर तेरे चेला काए ना बरत रक्खैं हैं?” 19ईसु नै उनसै कैई, “जब तक दूलाह बरातियौ के संग रैहबैं है, तौ का बराती बरत रख सकै हैं? जब तक दूलाह उनके संग है बे बरत ना रख सकै हैं। 20पर बे दिन आंगे, जब दूलाह उनसै बिछड़ जागो, और तब उन दिनौ बे बरत रखंगे।
21 “कोई पुराने लत्ता मै कोरे लत्ता को थिकरा ना लगाबैं हैं। ना तौ नओ थिकरा पुराने लत्ता कै सकोड़ लेगो और पुरानो लत्ता पैले सै जादा फट जागो। 22नए अंगूरौं के रस कै पुरानी मटकिऔ मै कोई ना भरै है, कैसेकै नओ अंगूरौं को रस पुरानी मटकिऔ कै फाड़ देगो और अंगूरौं को रस और मटकिया दौनौ बरबाद हो जांगे; इसताँई नए अंगूरौं के रस कै नई मटकिऔ मै भरो जावै है।”
सब्त को परभु
(मत्ती 12:1–8; लूका 6:1–5)
23ईसु किसी सब्त#2:23 सब्त, आराम कन्नै को दिन। के दिन गैहूं के खेतौ सै होकै जा रओ हो, और बाके चेला चलते चलते बाल तोड़ललगे। 24और फरीसी दल के लोग ईसु सै कैललगे, “देख, जो काम सब्त के दिन कन्नो मनैह है, जे काए बौई कर रऐ हैं?” 25तब ईसु नै उनसै कैई, “का तुम लोगौ नै जौ ना पढ़ो, कै दाऊद और बाके संग बारे भूँके हे और खानै कै उनके धौंरे कुछ बी ना हो, तौ दाऊद नै का करो हो? 26उनौनै कैसे बड़े पुजारी अबियातार के टैम मै, परमेसर के मन्दर#2:26 उस टैम परमेसर के ताँई स्थाई मन्दर ना हो। लोग परमेसर की पूजा एक तम्बू मै करै हे। मै जाकै भेंट चढ़ी भई रोटी खाँई और अपने संगी सातिऔं कै बी खवाईं। पुजारिऔं कै छोड़कै और किसी कै उन रोटिऔं कै खानो नियम के खिलाप हो।”
27ईसु नै उनसै कैई, “सब्त को दिन आदमिऔ के ताँई बनो है, ना कै आदमी सब्त के दिन के ताँई। 28इसताँई आदमी को लौंड़ा सब्त के दिन को बी मालिक है।”
Currently Selected:
मरकुस 2: TKB
Highlight
Share
Copy
Want to have your highlights saved across all your devices? Sign up or sign in
New Life Compute Institute [NLCI] - CC BY-NC-ND 4.0
