Genèse 31
31
Jacob a dè a deɓa a Canaan
1A ntsenaʼa, ara man wudahi Laban ta gaɗa: Jacob a nceda skwi bab nga tèlèba a ma. Jacob a ngu a ndo mèshèlè a skwi bab nga. 2A Jacob a rka di Laban az ara nte va nasa ɓai. 3A Ndo nzi pèc pècèk a ngaɗa na Jacob: Men ngaya a deɓa a kokwar bab ngaya, a sam gwoli ngaya! I woy a i zhè a sam ngaya. 4A Jacob a nzlündo ndo, da baha ta nda Rachel a Léa a dak a sam skwi na, 5a ngaɗa ta: Di Laban, bab kinè, a sam ga az ara mpats ngiɗè ɓai. Aman Bi Zhiklè bab ga a zhè a sam ga. 6Kinè ba kin sun te gèɗ kinè, i ga na mizlinè a bab kinè a wuɗi ga tèlèba. 7Bab kinè a ngwoday skwi ntul ga tsaɗ tsaɗ kumba. Aman Bi Zhiklè a mva na civèɗ aman a ngedassyè ɓai. 8Aman a ngaɗa: Skwi ndurtsotsoʼa, skwi ntul ngaya, skwi tèlèba a nyu ndurtsotsoʼa. Aman a ngaɗa: Skwi ntsatsaslaʼa, skwi ntul ngaya, skwi tèlèba a nyu ntsatsaslaʼa ntsatsaslaʼa. 9Aranta Zhiklè a nco skwi te ri bab kinè, a mvayè. 10Aman a pats man tambakihai ta tsi deɓa, nshunè a nkeɗyè, a i rka drokhi tèlèba man ta nza a deɓa, ta tsatsaslaʼa, ndurtsotsoʼa, mvècèʼa. 11A gol Zhiklè a ngaɗayè te nshunè: Jacob! I mbeɗa na a ma: Iyè anai! 12A nengaʼa a ngaɗayè: Ced gèɗ a zhiklè, wora, drokhi tèlèba ta nzi a deɓa skwai, ta tsatsasiaʼa, ndurtsotsoʼa, mvècèʼa. Aman i rka skwi tèlèba man Laban a gu a sam ngaya. 13I Bi Zhiklè man a ngudoko ka va a dai te Béthel, a sam man ka bada mbar a pa a ka shin samaʼa, a sam man ka gaɗayè ma a hai. Anai slambaɗa, jèkeda kokwar haha, a ka mena a deɓa a kokwar bab ngaya. 14A Rachel a Léa ta gaɗa na: Skwi nga, a skwi nʼndi gi bab nga, a zhè za ɗè? 15A rka nga ara ngwozi mbrokihi ka ɓi ɗè? A mpre nga a ma a sulai, a ndevda Suli sa ma. 16Gar haha skwi mèshèlè tèlèba man Bi Zhiklè a nco te ri bab nga, a nga nga a wudahi nga. Anai gau tèlèba, ara man Zhiklè a gaɗa ka.
17A Jacob a nslambaɗa, a mpeda wudahi a ngwozi a deɓ zlugumihai, 18a nlè ta skwi tèlèba auda, a skwi gi na tèlèba man a nʼngotso, skwi ndzham man a nʼngots te kokwar Paddan-Aram, aman a ndè a sam Isaac, bab na, a kokwar Canaan. 19Laban a mdo aman a ndè zli gwots tambakhi na. A Rachel a mco vri bab na a metsar. 20Aranta Jacob a nʼngwoda Laban, ndo Aram, a gai, a nʼngra na ɓai, a mwuc na mwucè. 21A mwuc na, a skwi na tèlèba, a nhelda rai, a ntawaɗa woyam Euphrate, a ngso civèɗ za Galaad.
Laban a hi a verzi Jacob
22Te mʼmèn mamakaraʼa ta ngra na Laban: Jacob a mwuc na! 23A nengaʼa a nhul gwoli na, a ta hi a verzi Jacob, mʼmèn 7, a ta ngotso te za Galaad. 24Aman Bi Zhiklè a mshkè na géɗ a Laban, ndo Aram, a vaɗ, a ngaɗa na te nshunè: Gu maya, ka da gaɗa na Jacob ɓi kla! 25Aman Laban ta zlü gèɗ a Jacob – gi Jacob a géɗ za, a Laban ba a ngau gi na a géɗ za – 26Laban a ngaɗa na Jacob: Ka ngwodkayè èhèmè, a ka hulkoɗi dalahi ga a ma a zlyè a gi èhèmè? 27Ka wuckaɗ ngaya a metsar, ka ngwodkayè a ka ngrayè a i feda ka ma a mwuffe, a di-mèsh, a ganzavar, a ganga, ɓai èhèmè? 28A ka vay civèɗ a i ga ta mbalai a wud dalahi ga a dalahi ga ɓai. Ka gokoɗa a nrzlè. 29Wuɗi ga a zhè, a i ga ka skwi ambaɓiaʼa. Aman Zhiklè bab ngaya a mshkay a gèɗ a vaɗ, a ngaɗayè: Gu maya, ka da gaɗa na Jacob ɓi kla! 30Anai ka de ngaya, te man mpataka bab ngaya a keɗ ka. Aman ka hulko vri ga a ri a metsar èhèmè?
31A Jacob a mbeɗa na a ma Laban: I gu zlau a i gaɗa, ka da helda dalahi ngaya a ma. 32Aman nengaʼa man ka da ngots vri ngaya a sam na, da nza a nshèffè ɓai! Wuzho kolongwi ga tèlèba, a sam di gwoli ga, a ka co skwi man a ngaya! Jacob a sun a ngaɗa Rachel a nckoɗi ɓai. 33A Laban a mdo a gi Jacob, a gi Léa, a gi ɓèlhi cèw, a nʼngatsa ɓai. Te deɓaʼa a njèkeda gi Léa, a ndo a gi Rachel. 34Aman Rachel a mco, a mfeda a hwaɗ wurom zlugumai, a nʼnza na a deɓa. A Laban a mwuzhè gi tèlèba, a nʼngatsa ɓai. 35Rachel a ngaɗa na bab na: Bi ga, ka gu ndav ɓai, aman i slèmbèɗè azɓai a sam di ngaya. Hwaɗ a va ga. A nengaʼa a mwuzhe skwi tèlèba, aman vri a nʼngatsa ɓai.
36A Jacob a ngu ndav, a nʼnga na ndzoan a Laban. Jacob a hüno a ngaɗa na: I ge mali mè, i ge ambaɓi mè, aman ka hakaɗa verzi ga aranta? 37Ka wuzhè skwi ga tèlèba, ka ngots skwi gi ngaya te va ɗè? Peda a haha, a sam di gwoli ga, a sam di gwoli ngaya, a ta ngela nga kitaʼa. 38Mvi ga 20 i nza a sam ngaya. Tambakihi a ɓokhi ngaya ta mèna kra a hi ɓai. I ca drok ngaya a i ndedama ɓai. 39Skwi man skwi dak a keɗaʼa, i da ka a deɓa ɓai, i co man a ga a i va ka te diaʼa; ka dzhoɗo te ri ga, ko a za a pats, ko a vaɗ. 40A pats, vazaza a ngayè, a vaɗ mtasl a nkeɗyè, a i nzhun ɓi fèt. 41Mvi ga 20 man i ga ka mizlinè te gi ngaya, mvi 14 a géɗ dalahi ngaya cèw mvi 6 a géɗ skwi kuɗom, a ka ngwoda skwi ntul ga tsaɗ tsaɗ kumba. 42Aman Bi Zhiklè bab ga, Zhiklè Abraham, nengaʼa man Isaac a gi zlauaʼa, az a sam ga ɓai, ar i dè ga antanta, skwa a te ri ɓai. Aman Zhiklè a nrka matakwan ga, a mizlinè man i gau a ri ga, a patsna a vaɗ a mbazla kita nga.
Jacob a Laban ta lèmdè ma ta
43A Laban a mʼmbeɗa na a ma, a ngaɗa na Jacob: Dalahi haha, dalahi ga. Wudahi haha, wudahi ga. Skwi kuɗom haha, skwi kuɗom ga. Skwi tèlèba man ka rka a haha, skwi ga. Aman a patsna i slaha a i takaha ta dalahi ga a wudahi man ta yau, a mè? 44Washkè a nga da dérzlè ma nga, nga a ka: nga ɗizlè kwa, da ga a skwi malwuɗai te ndev nga a ka. 45A Jacob a nco kwa, a nzlatseda a nshinè te pa. 46A Laban a ngaɗa ta gwoli na: Va-porko kwa! A ta porko kwa, a ta ɓica, a ta nza a géɗèʼa, a ta ndau skwi a pa. 47A Laban a mbaha na Jegar-Sahadutha, a Jacob a mbaha na Galed. 48A Laban a ngaɗa: Kwa mɓicaʼa a haha, skwi malwuɗai te ndev nga a ka. A géɗ nengaʼa a mbaha na Galed#Kwa mɓicaʼa a skwi malwuɗai. . 49A ta baha na Mitspa#Sam nɓer skwi te géɗèʼa. , aman a ngaɗa: Ndo nzi pèc pècèk da ɓer nga, nga da rka va nga te deɓaʼa asaɓai. 50Aman ka da ga ta matakwan a dalahi ga, aman ka da hil ngwozi ngiɗè a va dalahi ga — ko ndo ngiɗè a sun ɓai – na haha – Zhiklè a gi malwuɗi nga a ka. 51A Laban a ngaɗa na Jacob: War kwa mɓicaʼa, war kwa ndzaraʼa nzlatseda a haha, man i Zlatseda te ndev ngaaka; 52kwa mɓicaʼa agi malwuɗai, kwa ndzaraʼa nzlatseda haha a gi malwuɗi. I slaha a i tèwèɗè kwa mɓicaʼa haha a i dè a sam ngaya a shèwa te gèɗ ɓai. Ka slaha ka tèwèɗè kwa mɓicaʼa haha a kwa ndzaraʼa nzlatseda haha a ka shkè a sam ga a shèwa te gèɗ ɓai. 53Bi Zhiklè Abraham, Zhiklè Nachor, da ga nga kita nga! A Jacob a mʼmbaɗa a sam di Zhiklè man Isaac, bab na, a gi zlauaʼa. 54Te deɓaʼa Jacob a nzla na skwi a Zhiklè a géɗ za, a mbaha ta gwoli na tèlèba a sam skwi nʼndai. Aman ta ndau skwi ma, ta nza a géɗ za a ta mana a pa. 55Te mangoslèmaʼa a prèk te gai, Laban a nʼnga ta mbalai a wud dalahi na, a dalahi na, a mpshè ta ma. Te deɓaʼa Laban a ndo na, a mʼmenkaɗa deɓa a sam nʼnzi na.
Currently Selected:
Genèse 31: MOF89
Highlight
Share
Copy
Want to have your highlights saved across all your devices? Sign up or sign in
Alliance Biblique du Cameroun 1989
