Luc 13
13
Nʼngwèdè ndav
1A pats nasa ndohi ngiɗè ta zhè, a ta menda na Yèsu: Pilate a nhumda Pombaz ndohi Galilée a Pombaz skwi man ta va na Zhiklè. 2A Yèsu a mʼmbeɗa ta a ma: Kin huro, mba mali ndohi Galilée haha a ndohi Galilée ngiɗè dè? A géɗ man ta su matakwan aranta. 3I gaɗa kinè: Aʼai! Aman kin ngwèdè ndav kinè azɓai, kin da zi kinè lèmèlèmè. 4Aman ndohi ngiɗè 18, man gi ngurèʼa te Siloé a mʼmbeɗa ta a gèɗ, kin huro, mba mali ta a gèɗ ndohi ngiɗè te kokwar Jérusalem dè? 5Aʼai; aman kin ngwèdè ndav kinè azɓai, kin da zi kinè lèmèlèmè.
Ngèlègèɗ-ma wof kslor man a yi wuda azɓai
6A ngaɗa ta a ngèlègèɗ-ma: Ndo ngiɗè a nʼngots wof kslor te ndev gi wof barassa na. A mshkè, a woya nyi wof te pa, a nʼngatsa bai. 7A ngaɗa na ndo mɓer gi wof barassa: Na haha, mvi makar man i shkè, a i woya nyi kslor haha, á i ngatsa bai. Ngelaʼa! A baray gi wof barassa ga èhèmè? 8A nengaʼa a mʼmbeɗa na a ma: Bai, jèkeda a vi na dai, a i pizhè gerzia dai, a i ndérh ndaderɗa a verzia dai. 9Aman te deɓaʼa a yi wuda, amba; man ɓai ka da ngeldaussa.
Yèsu a mbela ngwoz man vedal
10A pats nshèk va Yèsu a nsenda ta te gi njèngè ma Zhiklè. 11Na haha, ngwoz ngiɗè a zhè, mèzhèb ambaɓiaʼa a ga na, mvi 18, nhurvaʼa, a slaha a nzlècè-dè va ɓai. 12Aman Yèsu a rkaʼa, ambaha na, a ngaɗa na: Ngwoz, ka mbela te ri matakwan ma! 13A mfa na ri a gèɗ, a nasa nasa nzlatsa saraʼa, a nslubordo Zhiklè. 14Aman ndo mɓer gi njèngè ma Zhiklè a ngu ndav, a géɗ man Yèsu a mbelaʼa a pats nshèk va. A hüno a ngaɗa ta ndohi rèdèdèa: Mʼmèn mokwa ta gi mizlinè. Vo-washkè, da mbel kinè te matakwan tʼhwaɗ mʼmèn mokwa, a pats nshèk va ka ɓai! 15A Bai Yèsu a ngaɗa na: Ndohi nʼngwèdè ndo! Kin prè zlè a kɗèh auda te kudom, a kin de ta a ma iyam a pats nshèk va azbi dè? 16Aman ngwoz haha, dem Abraham, man Sadan a ndzawaʼa mvi 18, da pra teɓa nengaʼa a pats nshèk va ɓi dè? 17Aman a ngoɗ ma haha, ndohi tèlèba man ta sassaya ndav ta a sam na, ta gu horai. A ndohi rèdèdèʼa ta wuffè a géɗ skwi mbiaʼa tèlèba man Yèsu a gau.
Ngèlègèɗ-ma a gèɗ tser gevda
(Mt. 13,31-32; Marc 4,30-32)
18A ngaɗa: I lèmdè kokwar Bi Zhiklè a mè? 19Nengaʼa ara tser gevda, man a nwushahai a gi dau ndo ngiɗè. A grè, a grè, a gi a wof, man ɗiakihi tʼhwaɗ giɗfèk ta gi gi ta a hwaɗaʼa.
Ngèlègèɗ-ma a géɗ skwi nshégèr skwai
(Mt. 13,33)
20A ngoɗ zaʼa: I lèmdè kokwar Bi Zhiklè a mè? 21Lèmèlèmè ara skwi nshégèr skwai, man ngwoz a nco, a nhumda na va a gufa, a gi agoda 30, ha tèlèba nsegaraʼa.
Ntamagi nlühaʼa
(Mt. 7,13-14, 21-23)
22A Yèsu a nsawala te kokwar mbiaʼa, te kokwar nkèshèa tèlèba, a nsenda ta. A ndo a kokwar Jérusalem.
23A ndo ngiɗè a ngaɗa na: Bai, ndohi kètè genè, man ta mbél ta ɗè? A Yèsu a ngaɗa ta: 24Va-gu wuɗai, a kin bizhè a ntamagi nlühaʼa. I gaɗa kine, ndohi kumba ta woy a ta dè a pa, aman ta slaha ɓai. 25Te deɓaʼa, aman babgiaʼa a nslambaɗa, a mpizla ntamagi ma, a kin zlatsa tʼuda, a kin bèhè a ntamagai, a kin gaɗa: Bai, wina nga! A nengaʼa a da mbeɗa kinè a ma: I sun sam man kin shkè te pa ɓai! 26Te deɓaʼa kin hinè a kin gaɗa: Nga ndau skwi a nda ka, nga sau skwi a nda ka, a ka senda nga a gaba nga. 27A nengaʼa a da gaɗa ta: I gaɗa kinè, i sun sam man kin shkè te pa ɓai. Va-kazlay auda a tsagai, kinè ndohi mphömè! 28Te deɓaʼa kin kuɗai, a kin peɗi zlèʼèn. A kin da rka Abraham, a Isaac, a Jacob, a ndohi nhadka ma te kokwar Bi Zhiklè. A kinè, ta dzam kinè auda. 29A di ndohi ta shkè te man a verzi gai, te géɗèʼa, te tsagi te tsagai, a ta ndi skwi te kokwar Bi Zhiklè. 30A na haha, ndohi ngiɗè te va nʼndikèma ndohai, ta da ndi a ndohi nshèlèkurhiaʼa. A ndohi nshèlèkurhiaʼa ta da ndi a nʼndikèma ndohai.
Yèsu a kuɗi a géɗ kokwar Jérusalem
(Mt. 23,37-39)
31A pats nasa ndohi pharisie ngiɗè ta shkè, a ta gaɗa na: Do ngaya, jèkeda sam haha, aman Hérode a woya a keɗ ka. A nengaʼa a ngaɗa ta: 32Vo-do, a kin gaɗa na zhüzhok ndoʼa: Na haha i jèr madzagihai, i mbél ndohi matakwan, a patsna, angoslèm dai. Te pats mamakaraʼa i da ndeva mizlinè ga ma. 33Aman sèi i shè-wèlè a patsna, angoslèm, anvakastaɗ dai. Ambaɓai, aman ndo nhadka ma a metsi na dra a kokwar Jérusalem.
34Jérusalem, Jérusalem, man ka bazl ta ndohi nhadka ma, a ka kal ta ndohi man Zhiklè a zlinde ta a sam ngaya, a kwa! Sak ngama, man i woy a i ɓic ta wudahi ngaya a sam ga, ara wotsak man a ɓic ta wudahi na a hwaɗ kelpasl na. A kin woya ɓai. 35Na haha, ta da jèkeda gi kinè a dikai. Aman i gaɗa kinè: Anai kin da rkayè asaɓai, ha pats man kin da gaɗa: Nga slébèrdè nengaʼa man a shkè a nzlembaɗ Bi Zhiklè.
Currently Selected:
Luc 13: MOF89
Highlight
Share
Copy
Want to have your highlights saved across all your devices? Sign up or sign in
Alliance Biblique du Cameroun 1989
