Luc 9

Mizlinè Zhiklè ndohi 12

(Mt. 10,5-15; Marc 6,7-13)

1Aman Yèsu a ɓic ta tengahi 12 ma, a mva ta wuɗai, a wuɗi-bai a géɗ madzagihai, a géɗ matakwan, aman ta slaha ta mbel ta. 2A nzlinde ta, aman ta njè ma kokwar Bi Zhiklè, a ta mbel ta ndohi matakwan. 3A ngaɗa ta: Kin helda skwa a ri a nshèwèlè ɓai: gaɗa ka ɓai, gozhèm ka ɓai, movar ka ɓai, suli ka ɓai, maslaka cèw ka ɓai. 4Te gi man kin dè a pa, va-nza a pa, ha pats man kin dè a ma ma zaʼa. 5A sam man ndohi ta ce kinè azɓai, va-jèka ta kokwar ta, va-tassa lokotor a sak kinè. A skwi haha a gi a skwi malwudai a sam tengaʼa. 6A to do, a ta sawala te kokwar tèlèba, a ta njè ta ma mbelaʼa a sam tèlèba, a ta mbel ta ndohi matakwan.

Mʼmetsi Jean Baptiste

(Mt. 14,1-12; Marc 6,14-29)

7A Hérode, bai, a ntsena ma tèlèba man a gau, a nhur a vata. Aman ndohi ngiɗè ta gaɗa: Jean a nslambaɗa te ndev ndohi mʼmetsaʼa. 8Ndohi ngiɗè ta gaɗa: Elie a ngudoko nga va a dai. Ndohi ngiɗè ta gaɗa: Staɗ te va ndohi nhadka ma nhalaʼa a nslambaɗkaɗa. 9A Hérode a ngaɗa: Iyè, i ngelama na gèɗ a Jean. Aman nengaʼa wa, man i tsena ma haha? A woya a nrka Yèsu a di na.

Ndohi 5.000 ta ngècè skwi nʼndai

(Mt. 14,13-21; Marc 6,30-44; Jean 6,1-14)

10Aman ndohi sak ta shkè a deɓa, ta ngreda na Yèsu skwi tèlèba man ta gau. A nengaʼa a nhel ta a nda nengaʼa, a mʼmenda va na a deɓa a kokwar ngiɗè, nzlembaɗ na Bethsaida. 11Aman ndohi rèdèdèa ta tsenaʼa, ta dzodzora. A Yèsu a ngaɗa ta: Vo-washkè! A njè ta ma kokwar Bi Zhiklè, a mʼmbel ta ndohi man skwa a dza ta.

12A pats buwèʼa, ta 12 to do a sam Yèsu, a ta gaɗa na: Jèke ta ndohi rèdèdèa haha, aman ta dè a kokwar, kokwar, aman a ta ngècè gi ndo, a ta ndi skwai. Aman na haha hèshèkèɗ. 13A Yèsu a ngaɗa ta: Va-va ta skwi nʼndi ar kinè! A ta gaɗa na: Nga ngatsa skwi ngiɗè ɓai, sèi movar zlam a klèfi cèw. Man nga dè a nga shum skwi nʼndi ndohi rèdèdèʼa haha ma kla! 14Aman, ta gi 5.000. A Yèsu a ngaɗa ta golahi nengaʼa: Va-nger ta 50, 50, aman ta nzi a hai. 15A ta gu arsa, a ta nzahai. 16A Yèsu a nco movar zlam, a klèfi cèw, a mpu di a zhiklè, a mpshè na ma, a ntsakaʼa, a mva ta golahi nengaʼa, aman ta va ta ndohi rèdèdèʼa. 17A ta ndau, a ta ngeza, a ta ɓica njèkèɗi movar, gadagar 12, nʼndhaʼa.

Pierre a gèɗè a géɗ Yèsu

(Mt. 16,13-19; Marc 8,27-29)

18Te deɓ nasa, aman Yèsu a ntsu rai, na a gèɗ na, golahi nengaʼa ta zhè a sam na. A Yèsu a ndzhad ta: Ndohi rèdèdèa ta gaɗa, i wa? 19A ta mbeɗa na a ma: Jean Baptiste. Ndohi ngiɗè, Elie. Ndohi ngiɗè, staɗ te va ndohi nhadka ma nhalaʼa a nslambaɗkaɗa. 20A nengaʼa a mʼmbeɗa ta a ma: Kinè, kin gaɗa, i wa? A Pierre a ngaɗa na: Ka Kristi, Zhiklè.

Yèsu a hodko m metsi nengaʼa

(Mt. 16,20-28; Marc 8,30—9,1)

21A Yèsu a mfa ta ma a gèɗ zuraʼa, aman ta ngrédè ma haha a ndo ngiɗè azɓai.

22A ngaɗa: Sèi skwa a dza na kra-ndo a vata, a ndohi nhalaʼa, a ndohi mvi skwi a Zhiklè mbibihiaʼa a malamhai ta da kwolaʼa, a ta da keɗaʼa, a pats mamakaraʼa a da slambaɗkaɗauda.

23A ngaɗa ta ndohi tèlèba: Ndo man a woya a ndzadzarkayè, da hur a géɗ nshèffè na ɓai, da co wof ngézlèl na pèc pècèk, da dzadzarkayè. 24Aman ndo man a woya a mbél nshèffè na a ri na, a da zede nshèffè na. A ndo man a zede nshèffè na a géɗ ga, nengaʼa a da mbelaʼa. 25Ndo man a ngots herkeda tèlèba, aman nshèffê nengaʼa a zi na, a ngedassaʼa, a nʼngats te pa mè? 26Aman ndo man a gi hori ga, a hori ma ga, ko kra-ndo a da gi hori nengaʼa, aman a shkè a nʼnjèl na, a nʼnjèl Bab na, a nʼnjèl golahi Zhiklè nkezlahiaʼa. 27A vava i gaɗa kinè: Ndohi ngiɗè man ta zhe haha, ta tèr mʼmetsi di azɓai, sèi ta rka kokwar Bi Zhiklè dai.

Nʼngwèdè va Yèsu a géɗ za

(Mt. 17,1-8; Marc 9,2-8)

28Te deɓ nasa nʼngu ar haha: Mʼmèn tsamakaɗ te deɓ man a ngoɗ ma haha, Pierre a Jean a Jacques to do a nda Yèsu a géɗ za, aman ta tsi rai. 29Aman Yèsu a tsi rai, nʼnga ar haha: Va nengaʼa a nʼngwode na, a maslaka nengaʼa a nslekaɗ na nkuɗèkuɗèʼa, a si dai. 30Na haha, ndohi cèw ta gèɗè a vna. Tengaʼa, nda Moise a Elie. 31A ta gudoko ta va a dai a nʼnjèlè, a ta goɗ ma a géɗ nʼndikèma civèɗ nengaʼa, man Yèsu a da ndikèdèʼa te kokwar Jérusalem. 32A Pierre a ndohi man ta zhè a sam na, ta zhingétè, a ta nzhunè. Aman ta pidèkwe ta ma, ta rka nʼnjèl nengaʼa. A ndohi cèw man ta zlatsa a sam na. 33Te deɓaʼa, aman tengaʼa ta jèkeda Yèsu, Pierre a ngaɗa na: Bai, amba aman nga zhè a haha. Ngo-gokoy gihi makar, staɗ a ngaya, staɗ a Moise, staɗ a Elie. Aman nengaʼa a sun skwi man a gèɗè ɓai. 34Aman a ngoɗ ma haha, vani staɗ a mshkè, a mva ta mèzhèɓ a gèɗ. 35A zlau a ndza ta te va vanai. A ta tsena ngèɗè staɗ te va vanai, man a gaɗa: Nengaʼa kra ga man i ngotskoɗauda. Va-tsun ma na! 36Aman ta tsena ngèɗè haha ma, Yèsu a zhè a géɗ na. A ta nza tètè. A pats nasa ta ngreda na skwi man ta rkaʼa a ndo ngiɗè ɓai.

Yèsu a dzama mèzhèɓ ambaɓiaʼa auda te va kra

(Mt. 17,14-21; Marc 9,14-29)

37Te deɓ nasa, te mangoslèmaʼa, man ta shkèhi te za ma, ndohi rèdèdèa ta shkè a sam ta. 38Na haha, ndo ngiɗè te va ndohi rèdèdèa a mboho a wuɗai, a ngaɗa: Ndo njengè ma, i tsi ri a ka, rka kra ga dai, nengaʼa kra man i yau staɗgenè. 39Na haha, mèzhèɓ ambaɓiaʼa a gshèʼa, a nasa nasa a ntsu lalau, a nkaldahai, a ngudzeda, a kra a mɓerzl na, maslokof te ma. A njèkeda kra sèi a wuɗai, a woya a nkeɗaʼa. 40I tsu ri a golahi ngaya, aman ta jèr mèzhèɓ ambaɓiaʼa auda. Aman ta slaha ɓai. 41A Yèsu a mʼmbeɗa ta a ma: Kinè ndohi man ambaɓai, man kin ca a ndav kinè ɓai! 42Nʼnzi ga a sam kinè tèkè? A i takaha kinè nʼnzi tèkè? Cko kra ngaya a sam ga! Aman a herda na va, madzagi a nʼnga na kra, a ngudzeda, a mɓerzl na mèzhèɓ ambaɓiaʼa. A Yèsu a nguva, a mʼmbela kra nguraʼa, a mva na a deɓa a bab na. 43Tèlèba ta hur te ndav ta a vata, a géɗ wuɗi Zhiklè mbiaʼa.

Yèsu a hodko mʼmetsi nengaʼa zaʼa

(Mt. 17,22-23; Marc 9,30-32)

Aman tèlèba ta rzl ta a géɗ skwi man Yèsu a gau, Yèsu a ngaɗa ta golahi nengaʼa: 44Va-tsena ma haha a zlembaɗ kinè! Ta da gshè kra-ndo, a ta da va na a ri a ndohai. 45Aman tengaʼa ta tsena ma haha ɓai. Ma haha nʼngheda a sam ta, aman ta slaha a ta cinè di ɓai. A ta gu zlau, aman ta jhèdè a géɗèʼa.

Mbiaʼa man a fena ngiɗè, wa?

(Mt. 18,1-5; Marc 9,33-37)

46Aman ta hüno, ta gu gèjau a va ta: Ndo man a fena ngiɗè te ndev nga, wa? 47Aman Yèsu a sun skwi man ta huro, a nco kra nkèshèa, a mfeda a tsagi nengaʼa, a ngaɗa ta: 48Ko wawa man a cè kra nkèshèa aranta, a géɗ nzlembaɗ ga, a ciyè. Ko wawa man a ciyè, a cè nengaʼa man a zlindekayè. Aman ntabawaʼa te ndev kinè, nengaʼa ndo mbiaʼa.

Ndo man mayam kinè ka ɓai, mandal kinè

(Marc 9,38-40)

49Jean a mʼmbeɗa na a ma: Bai, nga rka ndo ngiɗè, a jèr madzagihai auda a nzlembaɗ ngaya. A nga gedassa skwi na, te man a te va nga ɓai. 50A Yèsu a ngaɗa na: Kin gedassa skwi nengaʼa ɓai! Ndo man ndo mayam kinè ka ɓai, nengaʼa mandal kinè.

Kokwar ngiɗè te Samarie a kwola Yèsu

51Te deɓ nasa: Ndul ndul ma, man ta gshè Yèsu, a mʼmana ndav na, a ndè a kokwar Jérusalem. 52A nzlinde ta golahi a ma, a to do, a ta shkè a kokwar ngiɗè te Samarie, aman ta tila na sam mʼmènè. 53A ta ca Yèsu ɓai, te man a woya a ndè a Jérusalem. 54Aman Jacques a Jean, golahi nengaʼa, ta rkaʼa, ta gaɗa: Bai, ka woy a nga tsi rai, aman vogwa a shkèhai te zhiklè, a nʼnde ta tèlèba a ma, lèmèlèmè ara Elie a ngau dè? 55A Yèsu a nʼngwoda ta ma, a nʼnga ta ndzoan. 56A to do a kokwar ngiɗè.

Ndohi njèjèr Yèsu mberzlazlahaʼa

(Mt. 8,19-22)

57Aman to do a civèɗ, ndo ngiɗè a ngaɗa na Yèsu: I woya man i jèjèr ka a sam tè-lèba man ka dè a pa. 58A Yèsu a ngaɗa na: Barkdadihai ta ngots vèvèɗ ta, dikihai tʼhwaɗ giɗfèk ta ngots gi ta. Aman kra-ndo a nʼngatsa sam na ɓai, aman a fi gèɗ a pa. 59A ngaɗa na ndo ngiɗè: Dza-dzarkayè! A nengaʼa a ngaɗa na: Bai, jè-kyè, aman i dè a i da ra bab ga dai! 60A Yèsu a ngaɗa na: Sèi ndohi mʼmetsaʼa ta ri ndohi tengaʼa mʼmetsaʼa. Aman ka, do, a ka njè ma kokwar Bi Zhiklè. 61A ndo ngiɗè a ngaɗa: I woya man i jèjèr ka, Bi ga. Aman jèkyè, aman i gaka ta mbalai a ndohi gi ga dai! 62A Yèsu a ngaɗa na: Ndo man devar te rai a mpizhè a vna, a pi di a deɓa, a slaha a ngi mizlinè kokwar Bi Zhiklè azɓai.

Currently Selected:

Luc 9: MOF89

Highlight

Copy