ዮሃንሳ ምሽራቹዋ 13
13
የሱስ ባረ ካልያዋንቱ ገድያ ሜጬዳ
1ፓስጋ ቦንችያ ጋላሳይ ጋካናፐ ካሰቲደ፥ ሀ ሳኣፐ ሻከቲደ፥ አዉዋኮ ብያ ዎዲ ጋኬዳዋ የሱስ ኤሬዳ፤ ሀ ሳኣን ደእያ ባረዋንታ ኡባ ዎደ ሲቄዳ፤ ዉርሰይ ጋካናዉ ኡንቱንታ ሲቄዳ።
2የሱስነ ካልያዋንቱ ካዉዋ ሚሽን፥ ስሞና ናኣ ይሁዳ አስቆሮቱ የሱሳ አ እማናዳን፥ ጻላሂ አ ቆፍስ ዎዳ። 3የሱስ ባረ አዉ ኡባባ አ ኩሽያን ዎዳዋ፥ ቃይ ጾሳ ማታፐ እ ዬዳዋነ፥ ስሚደ አኮ ባናዋ ኤሬዳ። 4የሱስ ምያሳፐ ደንድ ኤቂደ፥ ቦላ ባጋ ማዩዋ ቃር ዎደ፥ ፖጻ ባረ ጼሳን ዳንጬዳ። 5ሄዋፐ ጉይያን፥ ሃ ሜቻ ሚሻን ትጊደ፥ ባረና ካልያዋንቱ ገድያ ሜቻነ ባረ ጼሳን ዳንጬዳ ፖጻን ቁጩሳ ዶሜዳ።
6የሱስ ስሞን ጰጽሮሳኮ ዪና ጰጽሮሰ፥ “ጎዳዉ፥ ኔን ታ ገድያ ሜጫናዉ ሀናይዬ?” ያጌዳ።
7የሱስ ዛሪደ አ፥ “ታን ኦያዋ ኔን ሀእ ኤራካ፤ ሽን ጉየፐ ኤራናሳ” ያጌዳ።
8ጰጽሮሰ፥ “ኔን ታ ገድያ ኡባካ ሜጫካ!” ያጌዳ።
የሱስ አ፥ “ታን ነ ገድያ ሜጫና ዮፐ፥ ነዉነ ታዉነ እትፐተይ ባዋ” ያጊደ ዛሬዳ።
9ስሞና ጰጽሮሰ የሱሳ፥ “ጎዳዉ፥ ያቶፐ፥ ታ ገድያ ጻላላ ሜጮፓ፤ ታ ኩሽያካ ታ ሁጲያካ ሜጫ!” ያጌዳ።
10የሱስ ዛሪደ፥ “ቦላ ሜጨት ድጌዳ ኡራይ ኦንነ ገድያፐ ሀራባ ሜጨታናዉ ኮሸና፤ አዉ ኡባሳይካ ጌሻ። ቃይ ህንተንቱካ ጌሻ፤ ሽን ኡባይ ጌሻ ግድክታ” ያጌዳ። 11አያዉ ጎፐ፥ የሱስ ባረና አ እማና ኡራይ ኦነንቶነ ኤሬዳ፤ እ፥ “ህንተንቱ ኡባይ ጌሻ ግድክታ” ጌዳዌ ሀዋሳ።
12ኡንቱንቱ ገድያ ሜጬዳዋፐ ጉይያን፥ የሱስ ባረ ማዩዋ ማዪደ፥ ባረሳ ጉየ ስም ብ ኡቲደ ኡንቱንታ ያጌዳ፤ “ታን ህንተንቶ ኦዳዋ አኬኪቴ? 13ህንተንቱ ታና፥ ታማርስያዎነ ጎዳዉ ጊታ፤ ታን ሄ ህንተንቱ ግያዋ ግድያ ድራዉ፥ ሎይድታ። 14ታን ህንተንቶ ጎዳነ ህንተንታ ታማርስያዋ ግዳደ፥ ህንተንቱ ገድያ ሜጭያዋ ግዶፐ፥ ህንተንቱካ እቱ እቱዋ ገድያ ሜጫናዉ በሴ። 15አያዉ ጎፐ፥ ታን ህንተንቶ ኦዳዋዳን፥ ህንተንቱካ ኦና ማላ፥ ህንተንቶ ሌምሱዋ ግዳድ። 16ታን ህንተንቶ ቱሙዋ ኦዳይ፤ ቆማይ ባረ ጎዳፐ አና። ቃይ ኪተቴዳ ኡራይካ ባረና ኪቴዳዋፐ አና። 17ህንተንቱ ሄዋ ኤሪደ ኦያዋ ግዶፐ አንጀቴዳዋንታ።
18“ታን ህንተንቶ ኡባባ ሃሳይከ። ታን ዶሬዳዋንታ ኤራይ፤ ሽን ጾሳ ማጻፋይ፥ ‘ታን ባርሴዳዌ ታ ኩሽያ ሳኤዳ’ ጌዳዌ ቱማ ግዳናዉ በሴ።#ማዝ. 41:9 19ሄዌ ሀንያ ዎደ ታን ታና#13:19 ታን ታና፦ ዮህ። 8:24 ጼልተ። ግድያዋ ህንተንቱ አማናና ማላ፥ ሄዌ ሀናናፐ ካሰታደ ህንተንቶ ሀናናዋ ኦዳይ። 20ታን ህንተንቶ ቱሙዋ ኦዳይ፤ ታን ኪትያ ኦናነ ሞክያ ኡራይ ታናካ ሞኬ፤ ቃይ ታና ሞክያ ኦንነ ታና ኪቴዳዋ ሞኬ” ያጌዳ።
የሱስ ባረና አ እማናዌ ኦነንቶ ካሰቲደ ኦዴዳ
(ማቶሳ 26:20-25፤ ማር. 14:17-21፤ ሉቃሳ 22:21-23)
21የሱስ ሄዋ ሃሳዬዳዋፐ ጉይያን፥ ባረ ዎዛናን ዳሮ መቶቲደ፥ “ታን ህንተንቶ ቱሙዋ ኦዳይ፤ ታና ህንተፐ እቱ አ እማናዋ” ጊደ ቆንጭያን ኦዴዳ።
22እ ኦና ሃሳይንቶነ፥ ካልያዋንቶ ኡባካ ኤረተናን እጽና፥ እቱ እቱዋ ጼሌድኖ። 23የሱሳ ካልያዋንቱፐ እቱ፥ የሱስ ሲቅያዌ፥ የሱሳ ማታን ኡቴዳ። 24ሄዋ ድራዉ፥ ስሞና ጰጽሮሰ ሄ ካልያዋ ስምኢደ፥ “እ ኦና ግንቶ፥ አነ አ ኦቻ” ያጌዳ።
25ሄዋ ድራዉ፥ ሄ ካልያዌ የሱሳ ሀይኮ ሺቂደ፥ “ጎዳዉ፥ እ ኦኔ?” ያጌዳ።
26የሱስ ዛሪደ፥ “ታን ኡክን ጫባ ቱሻደ እምያዌ አ” ያጌዳ። ቃይ ኡክ መን አኪደ፥ ጫባ ቱሺደ፥ ስሞና ናኣ፥ ይሁዳ አስቆሮታዉ እሜዳ። 27ይሁዳይ ኡክ መንዋ አኮዋፐ ጉይያን፥ ሴጻናይ ኤለካ ይሁዳን ገሌዳ። የሱስ አ፥ “ኔን ኦናዋ ኤሌላ ኦ!” ያጌዳ። 28ሽን ሄ ሳኣን ኡቴዳዋንቱፐ ኦንነ የሱስ ሄዋ አ አያዉ ጌደንቶነ ኤርቤና። 29ይሁዳይ ሚሻ ቃርጪትያ ኦይቂያ ድራዉ፥ ካልያዋንቱፐ እቱ እቱ የሱስ ይሁዳ፥ “ፓስጋ ቦንችያ ጋላሳዉ ባረና ኮሽያዋ ባደ ሻማ ዎይ ህዬሳዉ ምጹዋታ እማ ጌዳ” ያጊደ ቆፔድኖ።
30ይሁዳይ ኡክ መንዋ አኪደ፥ ኤለካ ካረ ከሴዳ፤ ሄ ዎደ ሳአይ ቃማ።
ኦራ አዛዙዋ
31ይሁዳይ ካረ ከሴዳዋፐ ጉይያን፥ የሱስ ያጌዳ፤ “ሀእ ታን አሳ ናአይ ቦንቼታድ: ጾሳይካ ታ ባጋና ቦንቼቴዳ። 32ጾሳይ ታ ባጋና፥ አሳ ናኣ ባጋና ቦንቼቶፐ፥ እ ባረ ሁጰዉ ታና አሳ ናኣ ቦንቻናዋ፤ ቃይ እ ታና ኤለካ ቦንቻናዋ። 33ታ ናቶ፥ ታን ህንተናና ዳሮ ዎድያ ጋምእከ። ህንተንቱ ታና ኮያና፤ ሽን ታን አይሁዳቱዋ፥ ‘ታን ብያሳ ህንተንቱ ባናዉ ዳንዳይክታ’ ጌዳዋዳን፥ ህንተዉካ ሀእ ኦዳይ። 34ታን ህንተንታ ኦራ አዛዙዋ አዛዛይ፤ እቱ እቱዋ ሲቅተ። ታን ህንተንታ ሲቄዳዋዳንካ፥ ህንተንቱ እቱ እቱዋ ሲቃና በሴ። 35ህንተንቱ እቱ እቱዋና ሲቀቶፐ፥ ታና ካልያዋንታ ግድያዋ አሳይ ኡባይ ኤራና” ያጌዳ።
ጰጽሮሰ ካዳናዋ የሱስ ካሰቲደ ኦዴዳ
(ማቶሳ 26:31-35፤ ማር. 14:27-31፤ ሉቃሳ 22:31-34)
36ስሞን ጰጽሮሰ የሱሳ፥ “ጎዳዉ፥ ኔን ሀቃ ባይ?” ያጌዳ።
የሱስ ዛሪደ፥ “ታን ብያሳ ኔን ሀእ ታና ካላናዉ ዳንዳያካ፤ ሽን ጉየፐ ካላና” ያጌዳ።
37ጰጽሮሰ፥ “ጎዳዉ፥ ታን ኔና ሀእ ካላናዉ አያዉ ዳንዳይክታ? ታን ነ ድራዉ፥ ሀይቃናዉካ ጊጋ ኡታድ!” ያጌዳ።
38የሱስ ዛሪደ፥ “ታ ድራዉ ሀይቃናዉ ሀእ ቱሙ ጊጋ ኡታዲ? ታን ነዉ ቱሙዋ ኦዳይ፤ ኩቱ ዋሳናፐ ካሰ፥ ኔን ታና ሄዙ ገደ ካዳናሳ” ያጌዳ።
Currently Selected:
ዮሃንሳ ምሽራቹዋ 13: DFBE
Highlight
Share
Copy
Want to have your highlights saved across all your devices? Sign up or sign in
The Word for the World Ethiopia
