ዮሃንሳ ምሽራቹዋ 14
14
የሱስ አዉዋኮ አፍያ ኦግያ
1የሱስ ካልያዋንታ “ህንተንቱ ዎዛናይ ህርጎፖ፤ ጾሳን አማንተ፤ ታናንካ አማንተ።#14:1 ጾሳን አማንተ፤ ታናንካ አማንተ፦ ጾሳን አማኑ ህንተዉ ደኤ ጉሳይ፥ ታናንካ አማኑ ደኤ ጉሳ። 2ታ አቡ ጎለን ዳሮ ሳአይ ደኤ። ሄዋ ግደነንቶ፥ ታን ህንተንቶ ሄዋ ኦድከ፤ ታን ህንተንቶ ሳኣ ጊግሳናዉ ባይ። 3ታን ባደ ሳኣ ጊግሴዳዋፐ ጉይያን፥ ታን ደእያ ሳኣን ህንተንቱካ ደአና ማላ፥ ስማ ያደ ህንተንታ ታኮ አፋና። 4ቃይ ህንተንቱ ታን ብያ ኦግያ ኤሪታ” ያጌዳ።
5ቶማስ፥ “ጎዳዉ፥ ኔን ብያሳ ኑን ኤሮኮ፤ ኦግያ ዋኒደ ኤራናዉ ዳንዳዬቶ?” ያጌዳ።
6የሱስ ዛሪደ፥ “ኦጊ፥ ቱሙነ ደኡ ታና፤ ታ ባጋናፐ አትን፥ ኦንነ ታ አቡኮ ባናዉ ዳንዳየና። 7ህንተንቱ ታና ኤርያዋ ግድንቶ፥ ታ አባካ ኤራና፤ ሀእፐ ዶሚደ፥ ህንተንቱ አ ኤሪታነ ቃይ አ በኤድታ” ያጌዳ።
8ፕልጶስ የሱሳ፥ “ጎዳዉ፥ አዉዋ ኑና በሳ፤ ሄዌ ኑዉ ግዳናዋ” ያጌዳ።
9የሱስ ዛሪደ ያጌዳ፤ “ፕልጶሳ፥ ታን ሀዋ ኬና ዎድያ ህንተናና ደእናካ ታና ኤርኪ? ታና በኤዳ ኡራይ አዉዋካ በኤዳ፤ ያትና፥ ኔን ዋጋደ፥ ‘አዉዋ ኑና በሳ’ ጋይ?” 10ታን አዉዋ ግዶን ደእያዋ ቃይ አዉካ ታ ግዶን ደእያዋ ኔን አማንኪ? ታን ህንተንቶ ኦድያ ቃላ ታን ታፐ ኦድከ፤ ሽን ታ ግዶን ደእያ አዉ ባረ ኦሱዋ ኦ። 11ታን አዉዋ ግዶን ደእያዋነ ቃይ አዉካ ታ ግዶን ደእያዋ ታና አማንተ፤ ሄዌ ዮፐ፥ ታ ኦሱዋባዉ ታና አማንተ።
12“ታን ህንተንቶ ቱሙዋ ኦዳይ፤ ታና አማንያ ኡራይ ታን ኦያ ኦሱዋ ኦና። ታን አዉዋኮ ብያ ድራዉ፥ ሄ ኡራይ ሀዋፐ አያ ኦሱዋ ኦና። 13አዉ ናኣ ጋሱዋን፥ ታ ባጋና ቦንቼታና ማላ፥ ታ ሱንን ህንተንቱ ዎስያ ኡባባ ታን ህንተንቶ ፖላና። 14ህንተንቱ ታ ሱንን ታና አያነ ኦቾፐካ፥ ታን ፖላና።
የሱስ አያና ጌሻ ኪታናዉ እሜዳ ህዶታ
15“ህንተንቱ ታና ሲቅያዋ ግዶፐ፥ ታ አዛዙዋ ናጋና። 16-17ታን አዉዋ ዎሳና፤ ህንተናና መናዉ ደአና ማላ፥ ቱማተ አያና፥ ሀራ መንያዋ ህንተንቶ እ እማና። ሀ ሳአይ ሄ ቱማተ አያና በኤናዋነ ኤረናዋ ግድያ ድራዉ፥ አ አካናዉ ዳንዳየና፤ ሽን እ ህንተናና ደእያ ድራዉነ ህንተንቱ ግዶን ደአና ድራዉ፥ ህንተንቱ አ ኤሪታ።
18“ታን ህንተንታ አዉነ አታ ባይና ዪኦ ናናዳን ህንተረካ አጋባሽከ፤ ታን ስማደ ህንተንቱኮ ያና። 19ጉ ዎድያፐ ጉይያን፥ አላሚ ታና ላኤንዋ በኤና፤ ሽን ህንተንቱ ታና በአና፤ ታን ደኡዋን ደእያ ድራዉ፥ ህንተንቱካ ቃይ ደኡዋን ደአና። 20ታን ታ አዉዋ ግዶን ደእያዋነ ህንተንቱ ታ ግዶን ደእያዋ፥ ቃይ ታን ህንተንቱ ግዶን ደእያዋነ ህንተንቱ ሄ ጋላስ ኤራና።
21“ታ አዛዙ አ ማታን ደእያ አሳይ፥ ቃይ ሄ አዛዙዋካ ናግያዌ፥ እ ታና ሲቅያ አሳ። ታና ሲቅያ አሳ ታ አቡካ ሲቄ፤ ታንካ አ ሲቃይ። ታን አዉ ቆንጫና” ያጌዳ።
22ይሁዳ አስቆሮታ ግደና ይሁዳይ የሱሳ፥ “ጎዳዉ፥ ኔን ነ ሁጲያ አላምያ በሰናን፥ ኑና በሳና ግያዋ ዋጋደ ጋይ?” ያጌዳ።
23የሱስ፥ “ታና ሲቅያ ኦንነ ታ ቃላ ናጌ፤ ታ አቡ አ ሲቃናዋ፤ ቃይ ታ አቡነ ታንነ አኮ ዪደ፥ አናና ደአና። 24ታና ሲቀና ኡራይ ኦንነ ታ ቃላዉ አዛዘተና፤ ህንተንቱ ስስያ ቃላይ ታና ኪቴዳ አዉዋፐ አትን፥ ታዋ ግደና።
25“ታን ህንተናና እትፐ ደኣደ ሀዋ ህንተንቶ ኦዳድ፤ 26ሽን ጌሻ አያናይ፥ መንያዌ፥ አዉ ታ ሱንን ኪታናዌ፥ ህንተንታ ኡባባ ታማርሳናዋ። ታን ህንተንቶ ኦዴዳ ኡባባካ ህንተንታ ሀሳይሳናዋ።
27“ታን ሳሮተ ህንተናና ዎይ፤ ታ ሳሮተ ህንተንቶ እማይ። ታን አላሚ እምያ ሳሮተ ማላ እምከ። ህንተንቱ ህርጎፕተነ ያዮፕተ። 28ታን ህንተንቶ፥ ‘ታን ባይ፤ ሽን ስማደ ህንተንቱኮ ያና’ ጌዳዋ ስሴድታ፤ ህንተንቱ ታና ሲቄዳዋ ግድንቶ፥ ታፐ አዉ ዳርያ ድራዉ፥ ታን አዉዋኮ ብያዋን ህንተንቱ ናሸታንታ። 29ሄዌ ሀንያ ዎደ ህንተንቱ አማናና ማላ፥ ሄዌ ሀነናን ደእሽን፥ ሃናና ካሰታደ ታን ህንተንቶ ኦዳድ።
30“ሀ አላምያ ሞድያዌ ይያ ድራዉ፥ ታን ሀዋፐ ስንን ህንተናና ሎይ ሃሳይከ። ታና እ አይነ ኦናዉ ዳንዳየና። 31ሽን ታን አዉዋ ሲቅያዋ አላሚ ኤራናዉ በሴ፤ ቃይ ታንካ አዉ ታና አዛዜዳዋዳን ኦይ። ደንድ ኤቂተ፤ ሀዋፐ ቦይተ።
Currently Selected:
ዮሃንሳ ምሽራቹዋ 14: DFBE
Highlight
Share
Copy
Want to have your highlights saved across all your devices? Sign up or sign in
The Word for the World Ethiopia
