ዮሃንሳ ምሽራቹዋ 15
15
ዎይንያ ግያ ቱራዉ ቱሙ አኑ የሱሳ
1“ታን ዎይንያ ጌተትያ ቱራዉ ቱሙ አኖ፤ ጎሻንቻይ ታ አባ። 2ታ ግዶን ደእያ አይፍያ አይፈና ቱራ ማራ ኡባ እ ካሬ፤ አይፍያ ቱራ ማራ ኡባይ ካሰዋፐ ሎይ አይፋናዳን፥ ሄ ማራ ጼራ እ ጭጊደ ጌሻና። 3ታን ህንተንቶ ሀእ ኦዴዳ ቃላ ጋሱዋን፥ ህንተንቱ ጌሻ። 4ታ ግዶን ደእተ፤ ታንካ ህንተንቱ ግዶን ደአና። ዎይንያ ቱራ ማራይ አኑዋና እትፐ ደኤናን ዮፐ፥ ሄ ማራይ ባረካ አይፍያ አይፋናዉ ዳንዳየናዋዳን፥ ህንተንቱካ ታ ግዶን ደኤናን ዮፐ፥ አይፍያ አይፋናዉ ዳንዳይክታ።
5“ታን ዎይንያ ቱራዉ አኖ፤ ህንተንቱ ሄ ቱራ ማራቱዋ። ታ ግዶን ደእያ ኡራይ፥ ታንካ አ ግዶን ደእያ ኡራይ፥ ዳሮ አይፍያ አይፋና፤ አያዉ ጎፐ፥ ታን ባይናን ህንተረካ አይነ ኦናዉ ዳንዳይክታ። 6ታ ግዶን ደኤና ኡራይ ቱራ ማራዳን፥ ካረን የግና መሌዳዋ ሺሺደ ታማን ዎና፥ እ ኤጻናዋ። 7ህንተንቱ ታ ግዶን ደኦፐ፥ ቃይ ታ ቃላይካ ህንተንቱ ግዶን ደኦፐ፥ ህንተንቱ ኮዬዳዋ አያ ግድናካ ዎስተ፤ ህንተንቱ አካንታ። 8ህንተንቱ ዳሮ አይፍያ አይፎፐነ ቃይ ታና ካልያዋንታ ግዶፐ፥ ሄዋን ታ አቡ ቦንቼታናዋ። 9አዉ ታና ሲቄዳዋዳን፥ ታንካ ህንተንታ ሲቃድ፤ ታ ሲቁዋን ደእተ። 10ታን ታ አቡ አዛዙዋ ናጋደ አ ሲቁዋን ደኤዳዋዳን፥ ህንተንቱካ ታ አዛዙዋ ናጎፐ፥ ታ ሲቁዋን ደአንታ።
11“ታ ናሸቻይ ህንተናና ደአና ማላነ፥ ህንተንቱ ናሸቻይ ኩመን ግዳና ማላ፥ ታን ሀዋ ህንተንቶ ኦዳድ። 12ታ አዛዙ ሀዋ፤ ታን ህንተንታ ሲቅያዋዳን፥ ህንተንቱካ እቱ እቱዋና ሲቀትተ። 13ባረ ሸምፑዋ ባረ ላገዉ አደ እምያዋፐ አያ ሲቁ ኦስነካ ባዋ። 14ታን ህንተንታ አዛዜዳዋ ኡባ ኦፐ፥ ህንተንቱ ታ ላገቱዋ።
15“አይሊ ባረ ጎዳይ ኦያዋ ኤረና ድራዉ፥ ታን ህንተንታ ሀዋፐ ስንዉ አይላቱዋ ጊከ፤ ሽን ታን ህንተንታ ታ ላገቱዋ ጋድ። አያዉ ጎፐ፥ ታ አዉዋፐ ስሴዳ ኡባባ ታን ህንተንቶ ኦዳድ። 16ታን ህንተንታ ዶሬዳዋፐ አትን፥ ህንተንቱ ታና ዶርበይክታ። ህንተንቱ ቢደ አይፍያ አይፋና ማላነ ደአና ማላ፥ ታን ህንተንታ ሱንድ። ቃይ አዉካ ህንተንቱ ታ ሱንን#15:16 ታ ሱንን፦ ዎይ “ታና ካልያዋንታ ግድያ ድራዉ” ዎሴዳዋ ኡባ እማና። 17ታን ህንተንታ አዛዝያዌ ሀዋ፤ እቱ እቱዋና ሲቀትተ።
የሱስ ሀ አላሚ እጽያዋ ኦዴዳ
18“አላሚ ህንተንታ እጾፐ፥ ካሰቲደ ታና እጼዳዋ አኬክተ። 19ህንተንቱ አላምያሳ ግዴደንቶ፥ አላሚ ባረዋዳን ህንተንታ ሲቃና፤ ሽን ታን ህንተንታ አላምያፐ ዶሬዳዋፐ አትን፥ ህንተንቱ አላምያሳ ግድክታ፤ አላሚ ህንተንታ እጽያዌ ሀዋሳ። 20‘አይሊ ባረ ጎዳፐ ዳረና’ ጋደ ታን ህንተንቶ ኦዴዳዋ ሀሳይተ። ኡንቱንቱ ታና የደርሴዳዋ ግዶፐ፥ ህንተናካ የደርሳና። ኡንቱንቱ ታ ቃላ ናጌዳዋ ግዶፐ፥ ህንተንቱ ቃላካ ናጋናዋንታ። 21ሽን ኡንቱንቱ ታና ኪቴዳዋ ኤረና ድራዉ፥ ሀ ኡባ ታ ጋሱዋን ኡንቱንቱ ህንተንቱ ቦላ ኦናዋንታ። 22ታን ያደ ኡንቱንቶ ኦደናዋ ግድንቶ፥ ኡንቱንቶ ናጋራ ግደና፤ ሽን ሀእ ኡንቱንቱ ኦያ ናጋራ ጋሶይያዌ ባዋ። 23-24ታና እጽያዌ ታ አዉዋካ እጼዳ። ኦንነ ኦቤና ኦሱዋ ኡንቱንቱ ግዶን ታን ኦቤናባ ግድንቶ፥ ኡንቱንቶ ናጋራ ግደናን አታናዋ፤ ሽን ሀእ ኡንቱንቱ ታን ኦዳ ኦሱዋ በኢደ፥ ታናካ ታ አዉዋካ እጼድኖ። 25ሽን ኡንቱንቱ ህግያን፥ ‘ታና ጮ እጼድኖ’ ጌተቲደ ጻፈቴዳዌ ፖለታና ማላ፥ ሀዌ ሀኔዳ።#ማዝ. 35:19፤ 69:4
26“ሽን አዉዋፐ ይያ ቱማተ አያናይ መንያዌ ያናዋ። ታን አዉዋፐ ህንተንቶ አ የዳና፤ ቃይ እ ታባ ማርካታናዋ። 27ህንተካ ቃይ ካሰፐ ዶሚደ፥ ታናና ደእያ ድራዉ፥ ታባ ማርካታና።
Currently Selected:
ዮሃንሳ ምሽራቹዋ 15: DFBE
Highlight
Share
Copy
Want to have your highlights saved across all your devices? Sign up or sign in
The Word for the World Ethiopia
