ዮሃንሳ ምሽራቹዋ 19

ዎታዳራቱ የሱሳ ቦላ ቅሊጬድኖ

(ማቶሳ 27:27-32፤ ማር. 15:15-21)

1ሄዋፐ ጉይያን፥ ጵላጾስ የሱሳ ኦይቂደ፥ ልሱዋን ሾጬዳ። 2ዎታዳራቱ አጉንፐ ካላቻ ጊግሲደ፥ አ ሁጲያን ዎድኖ፤ ቃይ ዞኦ ማዩዋካ አ ማይዜድኖ። 3አኮ ሺቂደ፥ “አይሁዳ ካተዉ፥ ሸምፑዋ ጋምአ!” ያጊደ አ ሻይያ ባቄድኖ።

4ጵላጾስ ቃይካ ካረ ከሲደ አይሁዳቱዋ፥ “በእተ፥ ታን አን አይ ባላነ ደማቤናዋ ህንተንቱ ኤራና ማላ፥ አ ህንተንቱኮ ካረ ከሳና” ያጌዳ። 5ሄዋፐ ጉይያን፥ የሱስ አጉን ካላቻ ባረ ሁጲያን ዎደ፥ ዞኦ ማዩዋ ማዪደ፥ ካረ ከሴዳ፤ ጵላጾስ አይሁዳቱዋ፥ “ብታንያ ሀዋ በእተ” ያጌዳ።

6ቄሳቱዋ ካፓቱነ ዎታዳራቱ አ በኤዳ ዎደ፥ ባረንቱ ኮሻ ቁ ኦደ፥ “ማስቃልያ ቦላ ምስማርያን ሻደ አ ሱላ! ሱላ!” ያጌድኖ።

ጵላጾስ ኡንቱንታ፥ “ህንተንቱ አ አፊደ፥ ማስቃልያ ቦላ ምስማርያን ሺደ ሱልተ፤ አያዉ ጎፐ፥ ታን አይ ባላነ ደማበይከ” ያጌዳ።

7አይሁዳቱ ዛሪደ፥ “ኑዉ ህጊ ደኤ፤ ኑ ህጊ ግያዋዳን፥ እ ሀይቃናዉ በሴ፤ አያዉ ጎፐ፥ እ ባረና ጾሳ ናኣ ኦዳ” ያጌድኖ።

8ጵላጾስ ሄዋ ስሴዳ ዎደ፥ ካሰዋፐ ሎይ ያዬዳ። 9ቃይካ ጵላጾስ ባረ ኦሱዋ ጎለ ስም ገሊደ የሱሳ፥ “ኔን ሀቃፐ ያዲ?” ያጊደ ኦቼዳ፤ ሽን የሱስ አዉ አይነ ዛርቤና። 10ሄዋ ድራዉ፥ ጵላጾስ አ፥ “ታዉ ኦድኪ? ኔና ብላናዉ ዎይ ማስቃልያ ቦላ ምስማርያን ሻደ ካቃናዉ ታዉ ማታይ ደእያዋ ኤርኪየ?” ያጌዳ።

11የሱስ፥ “ጾሳይ ነዉ ቦላፐ ማታ እምቤናባ ግድንቶ፥ ነዉ ታ ቦላ ማታይ ደኤና ሽን። ሄዋ ድራዉ፥ ታና ነዉ አ እሜዳዌ አያ ናጋራ ኦዳ” ያጌዳ።

የሱሳ ሀይቆ ፕርዴድኖ

(ማቶሳ 27:15-31፤ ማር. 15:6-20፤ ሉቃሳ 23:13-25)

12ጵላጾስ ሄዋ ስሴዳ ዎደ፥ የሱሳ ብላናዉ ኦግያ ኮዬዳ፤ ሽን አይሁዳቱ ባረንቱ ኮሻ ቁ ኦደ፥ “ኔን አ ብልያዋ ግዶፐ፥ ካትያ ቄሳረ ዳቦ ግዳካ! ባረና ካትያ ግያ ኦንነ ቄሳረ ሞርከ!” ያጌድኖ።

13ጵላጾስ ሄዋ ስሲደ፥ የሱሳ ካረ ከሴዳ። ያቲደ ሹቻ ባሱዋ ግያ ሳኣን ፕርዳ ኦይድያን ኡቴዳ፤ እብራይስጸ ቃላን ሄ ሳአይ ጋይታ ግያዋ። 14ሄ ጋላሳይ ፓስጋ ቦንችያ ጋላሳዉ ጊግስያ ጋላሳ፤ ሳአይ ኡሱፑን ሳትያ ሄራ ግዳናዋ። ጵላጾስ አይሁዳቱዋ፥ “ህንተንቱ ካትያ ሀዋ በእተ!” ያጌዳ።

15አይሁዳቱ ባረንቱ ኮሻ ቁ ኦደ፥ “ድጋ! ድጋ! ማስቃልያ ቦላ ምስማርያን ሻደ ሱላ!” ያጌድኖ።

ጵላጾስ ዛሪደ፥ “ህንተንቱ ካትያ ታን ማስቃልያ ቦላ ምስማርያን ሻደ ሱልያዋ ኮዪቴ?” ያጊደ ኦቼዳ።

ቄሳቱዋ ካፓቱ፥ “ቄሳረፐ ሀራ ካቲ ኑዉ ባዋ!” ያጌድኖ።

16ሄዋፐ ጉይያን፥ ኡንቱንቱ ማስቃልያ ቦላ ምስማርያን ሺደ፥ የሱሳ ካቃና ማላ፥ ጵላጾስ ኡንቱንቶ አ እሜዳ።

የሱሳ ሱሌድኖ

(ማቶሳ 27:32-44፤ ማር. 15:21-32፤ ሉቃሳ 23:26-43)

ኡንቱንቱ የሱሳ ኦይቂደ፥ አፌድኖ። 17የሱስ ባረ ማስቃልያ ቶኪደ፥ ጉግያሳ ጌተትያሳ ቤዳ። “ጉግያሳ”#19:17 “ጉግያሳ” ሄዋን አሳ ጉግያ ማላት መቴዳ ዎጋ ሹቻይ ደእያ ድራዉ፥ “ጉግያሳ ጌተቴዳ”። ግያዌ እብራይስጸ ቃላን “ጎልጎታ” ግያዋ። 18ኡንቱንቱ ሄ ሳኣን ማስቃልያ ቦላ ምስማርያን ሺደ፥ የሱሳ ካቄድኖ፤ ቃይ አናና ሀራ ላኡ አሳቱ፥ እቱዋ ያ ባጋና ቃይ እቱዋ ሀ ባጋና የሱሳ ግዱዋን ዎደ፥ ማስቃልያ ቦላ ምስማርያን ሺደ ካቄድኖ። 19ጵላጾስ ጽፋትያ ጻፊደ፥ ማስቃልያ ቦላ ዎዳ። እ ጻፌዳዌ፥ “አይሁዳቱ ካትያ፥ ናዝሬትያ የሱሳ” ያጌ። 20የሱስ ማስቃልያ ቦላ ምስማርያን ሸቲደ ሱለቴዳ ሳአይ ካታማ ማታን ደእያ ድራዉ፥ ዳሮ አይሁዳቱ ሄ ጽፋትያ ናባቤድኖ። ጽፋቲ እብራይስጸ ቃላን፥ ሮማይስጸ ቃላንነ ግሪከ ቃላን ጻፈቴዳ። 21ሄዋ ድራዉ፥ አይሁዳ ቄሳቱዋ ካፓቱ ጵላጾሳ፥ “ ‘ሀ ብታኒ ባረና አይሁዳ ካትያ ያጌዳ’ ጋደ ጻፋፐ አትን፥ ‘አይሁዳ ካትያ’ ጋደ ጻፎፓ” ያጌድኖ።

22ጵላጾስ፥ “ታን ጻፌዳዋ ጻፋ ድጋድ” ያጊደ ዛሬዳ።

23ዎታዳራቱ ማስቃልያ ቦላ ምስማርያን ሺደ፥ የሱሳ ካቄዳዋፐ ጉይያን፥ አ ማዩዋ አኪደ፥ ኦይዱ ከስ ሻኬድኖ፤ እት እት ዎታዳራ እት ሻኩ ጋኬዳ። አ አዱሳ ማዩዋካ አኬድኖ፤ አዱሳ ማዩ ሀሽያፐ ዶሚደ፥ ዱገ ጋካናዉ የድ ማየትያዋፐ አትን፥ ቃንጸቲደ ስከትቤና። 24ዎታዳራቱ እቱ እቱዋ፥ “ኦና ጋካነንቶ፥ ሳማ ዎይ ኤጻ የጋናፐ አትን፥ ማዩዋ ፔኮ” ያጌድኖ። ሄዌ ሀኔዳዌ ጾሳ ማጻፋይ፥ “ታ ማዩዋ ሻክ አኬድኖ፤ ታ አዱሳ ማዩዋን ሳማ የጌድኖ” ግያዌ ፖለታናሳ። ሄዋ ድራዉ፥ ዎታዳራቱ ሄዋ ኦድኖ።#ማዝ. 22:18

25ሽን የሱሳ ማስቃልያ ማታን አ ዳያ፥ አ አት ምቻታ፥ ቃልዮጳ ማቻታ ማይራማነ ማግዳላ ጌተትያ ካታማፐ ዬዳ ማይራማ ኤቄድኖ። 26የሱስ ባረ ዳያነ እ ሲቅያ ካልያዌ ሄዋን ኤቄዳዋንታ በኢደ፥ ባረ ዳዮ፥ “ሀ ምሽራቴ፥ ነ ናኣ ሀዋ በአ!” ያጌዳ።

27ሄዋፐ ጉይያን፥ ሄ ካልያዋ “ነ ዳዮ ሀኖ በአ!” ያጌዳ። ሄ ካልያዌ እዞ ሄ ሳትያፐ ዶሚደ፥ ባረ ሶይ አፌዳ።

የሱሳ ሀይቁዋ

(ማቶሳ 27:45-56፤ ማር. 15:33-41፤ ሉቃሳ 23:44-49)

28ሄዋፐ ጉይያን፥ የሱስ ኡባባይ ሀቅ ፖለቴዳዋ ኤሪደ፥ ጾሳ ማጻፋይ ጌዳዌ ፖለታና ማላ፥ “ታና ሳሜ” ያጌዳ።#ማዝ. 69:21፤ 22:15

29ሄ ሳኣን እት ጹጋ ኩሜዳ ጫላ ዎይንያ ኤሳይ ደኤ። ኡንቱንቱ እስፖንጅያ ሄ ዎይንያ ኤሳን የጊደ፥ ህሶጵያ ጌተትያ ም ጼራን ዎደ፥ የሱሳ ዶናኮ ሺሼድኖ። 30የሱስ ዎይንያ ኤሳ ጋንጽ በኤዳዋፐ ጉይያን፥ “ፖለቴዳ” ያጌዳ።

የሱሳ ምይያ ቶራን ጫዴድኖ

ቃይ ሄዋፐ ጉይያን፥ ባረ ሁጲያ ቶቺደ፥ ባረ ሸምፑዋ እሜዳ።

31ሄ ጋላሳይ አይሁዳቶ ጊገትያ ጋላሳ#19:31 አይሁዳቶ ጊገትያ ጋላሳ፦ ፓስጋይ ሳምንታፐ እት ጋላሳ አዉደነ ግዳና ዳንዳዬ፤ ሽን ዮሃንሳ ምሽራቹ ታማርስያዋዳን፥ ፓስጋ ዎዲ ሀናናዉ በስያዌ፥ ላይ ላይን የሱስ ማስቃልያን ካቀት ሀይቄዳ ሳምባታና ግዳና ኮሼ። ግድያ ድራዉነ ቃይ ሄ ሳምባታይ ዳሮ ቦንቾ ግድያ ድራዉ፥ ሳምባታን አሳቱዋ አሃይ ማስቃልያ ቦላ ፔሸና ማላ፥ ሱለቴዳ አሳቱዋ ሱይልያ መንደ፥#19:31 ሱለቴዳ አሳቱዋ ሱይልያ መንደ፦ ሀ ዎጋይ ሮመ ካዉተ ዎጋዳን፥ ማስቃልያን ሱለቴዳ አሳቱ ኤለካ ሀይቃና ማላ ኦያ ኦግያ ጉሳ። ማስቃልያፐ ዎና ማላ፥ አይሁዳቱ ጵላጾሳ ዎሴድኖ። 32ሄዋ ድራዉ፥ ዎታዳራቱ ዪደ፥ የሱሳና ሱለቴዳ ኮይሮ ብታንያ ሱይልያ መንድኖ፤ ቃይ አናና ሱለቴዳ ላኤን ብታንያ ሱይልያካ መንድኖ። 33ሽን የሱሳኮ ዬዳ ዎደ እ ሀይቂ ድጌዳዋ በኢደ፥ አ ሱይልያ መንበይክኖ። 34ግዶፐነ፥ ዎታዳራቱዋፐ እቱ አ ምይያ ቶራን ጫዴዳ። ኤለካ ሱይነ ሃይ ጎግ አጌዳ። 35ህንተንቱ አማናና ማላ፥ ሀዋ በኤዳዌ ማርካቴዳ፤ እ ማርካትያዌካ ቱሙዋ፤ ቃይ ባረ ሃሳያይ ቱማ ግድያዋ እ ኤሬዳ። 36ሄዌ ሀኔዳዌ ጾሳ ማጻፋይ፥ “አ መቀቱዋፐ እቱነ መኤና” ጌዳዌ ፖለታናሳ።#ከሳ 12:46፤ ፓይ. 9:12፤ ማዝ. 34:20 37ቃይካ ጾሳ ማጻፋይ ሀራይ፥ “አሳይ ባረ ጫዴዳዋ በአና” ያጌ።#ዛካ. 12:10፤ ሳፃ 1:7

የሱስ ሞገቴዳ

(ማቶሳ 27:57-61፤ ማር. 15:42-47፤ ሉቃሳ 23:50-56)

38ሄዋፐ ጉይያን፥ አርማትያሳ ጌተትያ ካታማፐ ዬዳ ዮሴፎ የሱሳ አሃ አኪደ አፋናዉ ጵላጾሳ ዎሴዳ፤ ዮሴፎ አይሁዳቶ ያዬዳ ድራዉ፥ አሳይ ኤረናን የሱሳ ካልያዋ።

ዮሴፎ ዎስና ጵላጾስ፥ “አፋ” ያጌዳ። ሄዋ ድራዉ፥ ዮሴፎ ቢደ፥ የሱሳ አሃ አፌዳ። 39ቃይ ንቆድሞስ ሄዋፐ ካሰ የሱሳኮ ቃማ ዬዳዌ፥ ካዋራናነ ጎዳረ ኡና ዋላከቴዳ ኦይታማነ እቼሹ ኪሎ ግራመ ግድያዋ ኬና ሽቱዋ ኦይቂ አኪደ፥ ዮሴፎና ዬዳ። 40ሄ ላኡ አሳቱ የሱሳ አሃ አኪደ፥ አይሁዳቱ አሃ ጻጽያ ዎጋዳን፥ ሽቱዋና ጋደ፥ ሞጉዋ አፍላን ጻጼድኖ። 41የሱስ ማስቃልያ ቦላ ምስማርያን ሸቲደ ሱለቴዳ ሳኣን ዳሮ አትክልትያ ሳአይ ደኤ፤ ሄ አትክልትያ ሳኣ ግዶን ሹቻ ዎጭ ከሴዳ ብሮ ኦንነ ሞገትቤና ኦራ ዱፉ ደኤ። 42ሄ ዱፉ ማታን ደእያ ድራዉነ ቃይ አይሁዳቱ ሳምባታዉ ጊገትያ ጋላሳ ግድያ ድራዉ፥ የሱሳ ያን ዎድኖ።

Currently Selected:

ዮሃንሳ ምሽራቹዋ 19: DFBE

Highlight

Copy