ዮሃንሳ ምሽራቹዋ 20
20
የሱስ ሀይቁዋፐ ደንዴዳ
(ማቶሳ 28:1-8፤ ማር. 16:1-8፤ ሉቃሳ 24:1-12)
1ዎጋ ጋላስ ጉራን፥ ብሮ ዳብዳብያዋን፥ ማግዳላ ጌተትያ ካታማፐ ዬዳ ማይራማ የሱስ ሞገቴዳ ዱፉዋኮ ባደ ሹቻይ ሄ ጎንጎሉዋ ዶናፐ ደንድክቼዳዋ በኣዱ። 2ስሞን ጰጽሮሳኮነ የሱስ ሲቅያ የኮ ካልያዋኮ፥ እዛ ዎጻደ ባደ፥ “ዱፉዋፐ ጎዳ አፍ ድጌድኖ፤ ሀቃን አ ዎድኖንቶነ ኑን ኤሮኮ” ያጋዱ።
3ሄዋ ድራዉ፥ ጰጽሮስነ የኮ ካልያዌ አጊደ፥ ዱፉዋኮ ቤድኖ። 4ላኡካ እትፐ ዎጼድኖ፤ ሽን የኮ ካልያዌ ጰጽሮሳፐ አ ካሰቲደ፥ ሄ ዱፉዋኮ ጋኬዳ። 5ሄ ካልያዌ ሆኪደ፥ ሞጉዋ አፍላ በኤዳ፤ ሽን ግዶ ገልቤና። 6ስሞን ጰጽሮሰ አ ካል ዪደ፥ ዱፉዋ ግዶ ገሌዳ። ያቲደ ሞጉዋ አፍላይ ሄዋን ደእያዋ በኤዳ፤ 7ቃይ የሱሳ ሁጲያን ጻጸት ኡቴዳ አፍላይ ሄ ጻጸቴዳዋዳንካ ዱማ እት ሳኣን ደእያዋ በኤዳ፤ ሄ አፍላይ ዱማ ደኤፐ አትን፥ ሞጉዋ አፍላና እትፐ ደኤና። 8ሄ ዎደ፥ ካሰቲደ ጎንጎሉዋኮ ጋኬዳ የኮ ካልያዌ ገል በኢደ አማኔዳ። 9የሱስ ሀይቁዋፐ ደንዳናዉ በስያዋ ኦድያ ጾሳ ማጻፋ ኡንቱንቱ ብሮ አኬክበይክኖ። 10ሄዋፐ ጉይያን፥ ካልያዋንቱ ባረንቱ ጎለ ስሚደ ቤድኖ።
የሱስ ማግዳላ ማይራምዉ ቤቴዳ
(ማቶሳ 28:9-10፤ ማር. 16:9-11)
11ሽን ማይራማ ሄ ዱፉዋ ዶናን ኤቃደ ዬካደ ሆካደ ዱፉዋ ግዶ ጼላዱ። 12ቦ ማዩዋ ማዬዳ ላኡ ኪታንቻቱ የሱሳ አሃይ ግሴዳ ሳኣን እቱ ሁጲሳና እቱ ገድሳና ኡቴዳዋንታ በኣዱ። 13ኡንቱንቱ እዞ፥ “ምሽራቴ፥ አያዉ ዬካይ?” ያጊደ ኦቼድኖ።
እዛ፥ “አሳቱ ታ ጎዳ አፍ ድጌድኖ፤ ኡንቱንቱ ሀቃን ዎድኖንቶነ ታን ኤርከ” ያጋዱ።
14ሄዋ ጌዳዋፐ ጉይያን፥ ጉየ ስማ ጼላደ፥ የሱስ ኤቄዳዋ በኣዱ። ሽን እ የሱሳ ግዴዳዋ አኬካበይኩ። 15የሱስ እዞ፥ “ምሽራቴ፥ አያዉ ዬካይ? ኦና ኮያይ?” ያጊደ ኦቼዳ።
ማይራማ አትክልትያ ናግያዋ ጋደ፥ “ጎዳዉ፥ ኔን አኬዳዋ ግዶፐ፥ አ ሀቃን ዎድንቶ፥ ታዉ ኦዳርኪ፤ ታን አ አካና” ያጋዱ።
16የሱስ እዞ፥ “ማይራሜ” ያጌዳ።
አ አኮ ስማደ፥ እብራይስጸ ቃላን “ራቡኒ” ያጋዱ፤ ሄዋ ብለይ “ታማርስያዎ” ግያዋ።
17የሱስ እዞ፥ “ታን ብሮ ታ አዉዋኮ ባቤና ድራዉ፥ ታና ቦቾፓ፤ ሽን ታ እሻቱዋኮ ባደ፥ ‘ታን ታ አዉዋኮነ ህንተንቱ አዉዋኮ፥ ታ ጾሳኮነ ህንተንቱ ጾሳኮ፥ ፑደ ባይ ጌዳ’ ጋደ ኡንቱንቶ ኦዳ” ያጌዳ።
18ማግዳላ ጌተትያ ካታማፐ ዬዳ ማይራማ ጎዳ በኤዳዋነ እዝዉ እ ሄዋ ኦዴዳዋ ባደ ካልያዋንቶ ኦዳዱ።
የሱስ ባረ ካልያዋንቶ ቤቴዳ
(ማቶሳ 28:16-20፤ ማር. 16:14-18፤ ሉቃሳ 24:36-49)
19ሄ ዎጋ ጋላስ ኦማርስ፥ ካልያዋንቱ አይሁዳቶ ያዬዳ ድራዉ፥ ፐንግያ ጎርዲደ፥ ሺቅ ኡት ደእሽን፥ የሱስ ዪደ፥ ኡንቱንቱ ግዱዋን ኤቂደ፥ “ሳሮተይ ህንተንቶ ግዶ” ያጌዳ። 20ሄዋ ጌዳዋፐ ጉይያን፥ ባረ ኩሽያነ ባረ ምይያ ኡንቱንታ በሴዳ፤ ካልያዋንቱ ጎዳ በኤዳ ዎደ ሎይ ናሸቴድኖ። 21የሱስ ላኤንዋ ኡንቱንቶ፥ “ሳሮተይ ህንተንቶ ግዶ፤ ታ አቡ ታና ኪቴዳዋዳን፥ ታንካ ህንተንታ ኪታይ” ያጌዳ። 22ሄዋ ጌዳዋፐ ጉይያን፥ ኡንቱንቱ ቦላ ኡፉ ጊደ ሸምፔዳ፤ ቃይ፥ “ጌሻ አያና አክተ። 23ህንተንቱ አቶ ጌዳ አሳ ናጋራይ አቶ ጌተታናዋ፤ ህንተንቱ አቶ ጌናዋንቱ ናጋራይ አቶ ጌተተና” ያጌዳ።
የሱሳነ ቶማሳ
24ሽን ታማነ ላኡ ካልያዋንቱፐ እቱ፥ ማንትያ ግያ ቶማስ፥ የሱስ ዬዳ ዎደ ኡንቱንቱና ባዋ። 25ሄዋ ድራዉ፥ የኮ ካልያዋንቱ ቶማሳዉ፥ “ኑን ጎዳ በኤዶ!” ያጌድኖ።
ሽን ቶማስ ኡንቱንቶ፥ “ምስማርያን እ ጫደቴዳ አ ኩሽያን ደእያ ማላ በኤናንነ ሄ ማላ ታ ብራያን ቦቼናን፥ ቃይ ታ ኩሽያ አ ምይያን ዬዳ በኤናን ታን አማንከ” ያጌዳ።
26ሳምንታፐ ጉይያን፥ የሱሳ ካልያዋንቱ ቃይካ ጎለን ሺቅ ኡቴድኖ፤ ቶማስካ ኡንቱንቱና ደኤ። ፐንጊ ቃሸት ኡት ደእሽን፥ የሱስ ዪደ፥ ኡንቱንቱ ግዱዋን ኤቂደ፥ “ሳሮተይ ህንተንቶ ግዶ” ያጌዳ። 27ሄዋፐ ጉይያን፥ የሱስ ቶማሳ፥ “ነ ኩሽያ ሃ አሃደ፥ ታ ኩሽያ በአ፥ ቃይ ነ ኩሽያ ሃ አሃደ፥ ታ ምይያን ዬዳ በአ፥ ኔን አማንያዋ ግዳፐ አትን፥ አማነናዋ ግዶፓ!” ያጌዳ።
28ቶማስ ዛሪደ፥ “ታ ጎዳዉ፥ ታ ጾሳዉ!” ያጌዳ።
29የሱስ፥ “ኔን ታና በኤዳ ድራዉ አማናዳ፤ በኤናን አማኔዳዋንቱ አንጀቴዳዋንታ” ያጌዳ።
ሀ ማጻፋ ቆፋ
30የሱስ ሀ ማጻፋን ጻፈትቤና ሀራ ዳሮ ማላታቱዋ ባረና ካልያዋንቱ ስንን ኦዳ። 31ሽን የሱስ፥ እ ክርስቶሳ፥ ጾሳ ናኣ ግድያዋ ህንተንቱ አማናና ማላነ፥ ቃይ አ አማኒደ አ ሱንን ደኡዋ ህንተንቱ ደማና ማላ፥ ሀዌ ጻፈቴዳ።
Currently Selected:
ዮሃንሳ ምሽራቹዋ 20: DFBE
Highlight
Share
Copy
Want to have your highlights saved across all your devices? Sign up or sign in
The Word for the World Ethiopia
