Saŋ 6

Da Yensa afoolenne jamaŋ wuuliyeŋ ingi nintigeŋ

1Angu dam babáári, Yensa ingi ñantaalibeŋo andék anjuc jakaamo n’aretuhne Galile. Kanda jakaamo nómár ayikyik guret gúduk mees. Tiberiyad ingine gurethinem gunakinno. 2Angu jamaŋo banfégi Yensa ingi ñantaalibeŋo n’aŋŋane hadéko, ñanlabahi ankokálineeniŋ maro anféfeg ni Yensa ahatne bújebunku ñanraagofoŋo, ingi bukanku tamaseereŋo mees. 3Angu, Yensa mungu, bajuci mees, andék aŋŋaf a montaaño, úmár ingi ñantaalibehinem, k'annooh na. 4Agida waato nómár adékdek agida ingi gujuŋ gúduk gu Ñanyahudo. Gújuŋo gúmár Gújunku Guwusunaamo ganyéjehne. Angu inho ayikne fo gújuŋo gúmár atéejarne. Angu jamaŋo baŋŋandenem a montaaño, immereŋ mees aŋŋaf ba bulahunkánam na. 5Yensa banoohiinooh, aŋanden jamaŋo n'andékirehne anrumun tip ba a binaanam. Bafégi hómár ayéj Filip:

- Angu inini, mintor, beeraŋ gíndokhoŋne ba gugilakánin úmbuuro k'ankáb?

6Agida Yensa apápájul n’akaanorunkánehne, maŋ burifhu Filip gaŋane k'apájul k’agune. Filip aŋoyindem ayéj:

7- Huh! Mintoroŋ, immi nip haani inlahoŋer wuuliyeŋ nintigeŋ, dinlitineeniŋ k'anjah moŋon moŋon hotigilir.

8Angu na utaalibe úduk alób mees. Úmár údonku Simon Piyer, gurethinem Andáre. Ayéj:

9- Ingah! Ayikyik nanka hambaani m'alah ñómbuur ñómekila ingi ñokat ñonak mees. Kanda n’angu jamaŋo anrumunne dáde danlit.

Agida ñómbuuro ñómár ingi orugo#6.9 Orugo amímiir ingi buleŋo. Ingi buleŋo ganginumehne úmbuuro no Sénegal. A didiirahu Israyel mi halakánin toobendeŋeŋne, ingi orugo ganginumehne úmbuuro. gaginumaane. Angu, wolo adooh jafoolaŋo j'adoorne k’adék anéer Yensa. 10Fo Yensa ajahne jafoolaŋo jámár, ayéj ñantaalibehinem:

- Inini, yéjereeniŋ annooh.

K'angu andak ankaan maŋ nim. Agida japoño awalwal hotir k’asúum kunooŋo a réeŋo. Angu, annooh na anrumun tip. Índiigeeno ba bareŋ m’annoone ambábár agofoŋ wuuliyeŋ amákilaŋ (5,000). Agida indikaamo ingi jaraaho tébiira. 11Angu jamaŋo bannoohi, Yensa adooh úmbuuro. Badoohi úmbuuro, asali aramun Díino a gúbidhu jafoolaŋo. Baramuni Díino mees, adooh úmbuuro anéer jamaŋo k'ankibay. Bankibay mees, Yensa afak aramun Díino a nintiku ñokato. Bankibay nip, moŋon moŋon adooh k’afoola fo ahay.

12Jamaŋo banhay, Yensa ayéj ñantaalibeŋo:

- Inini údekhineŋ úduk ujaháraŋ ñofallaheeno ki biki impuñpuñinoonuŋ jafoolaŋo.

13Bayéji nim, andék anjah, f'andék ambádur hatehel haala ingi hanak. Te hómár nip hofallahenku ñómbuuro ñómákilaŋo ñ’aginumaane ingi orugo. 14Angu jamaŋo f'anfégne tamaseero no Yensa akanne andak anyéj:

- He! Marigen kaama! Údiigeeno ummu, úmár agune Anabiyoŋo mu Díino ayéjne adék adékekineh a duniyaŋo inno.

15Angu, ansíiba bulakánam k'ankaanam umaasa. Agida Yensa apápájul n'ansíibane bukaano. Gúmár akanne ayiirla k’adék aguy a didiiraŋo di raafo k’abénneeniŋ ingi ñantaalibehinem.

Da Yensa adékumne a raafununku jakaamo

16Babári bugaanigo, ñantaalibehu Yensa ankucor a montaaño k'andék ba a jakaamo. 17Bampúti, anlahun na sídeeno k’anyifa antuŋul hadéko ba gujuco ba a saariŋo n'aretuhne Kapáneyum. Agida ni bísibaŋo añuun, kanda Yensa mungu n'aroŋor. 18Angu ñantaalibeŋo bantuŋuli hadéko ingi sídeeno, bawuco akomb bumalo dáde, akaan gumbaŋ adé. 19Ñantaalibeŋo anyeeneh sídeeno. Banyeeni anaman buruhu kilometreŋ amákilaŋ ba amákilaŋ ingi amánduk, aŋŋanden Yensa n'adékirehne díhádiho a jakaamo. Angu anhar andéwun. 20Yensa apútor ayéjeeniŋ:

- Ingah! Dahu údewuneŋ. Maŋ me me!

21Angu balóbi nim, ñantaalibehinem anlóki ki Yensa aŋaf na a sídeeno. Angu anwonn ki Yensa aŋaf k’anfaalen hadéko. Yensa bayifay, anhar ampút gu beŋen.

Yensa agune úmbuuro n’anéerumehne kanjébo ka bandór

22-23Angu gucunkunom, jamaŋo m'anroŋurerne gúbido gu beŋen k’ankáberne úmbuuro déegen aŋŋay gumiihálaŋo . Ampájul maro Yensa gireŋ na. Agida déegen anfégfeger maro sídeen ínsenduk agune na. Kanda ampápájul mara Yensa yifaaraŋ a sídeeno símár. Ñantaalibehinem bareŋ anyifane k’anjuc. Angu antúyoh na múndeen múnduk ki nim immereŋ mees ampiren anjuc. Amiñaamiñ múndeen anfúrumor a saariŋo n'ayéjuhne Tiberiyad andéker ba ka jamaŋo anjógne bútuyhu múndeeno. Agida n'anjóg bi kantígo k’ankáberne úmbuuro déegen. Agida na Yensa aramunerne Díino k'anéer jamaŋo k'ankáb úmbuuro fo anhay. 24Angu jamaŋo banfégi maro Yensa ingi ñantaalibehinem guyroŋoŋ na, anyifa a múndeeno múmár k'anjuc ba bútibhu Yensa a saariŋo n'aretuhne Kapáneyum.

25Bampútri Kapáneyum, anlahun na Yensa k’anyéjem:

- Arafaŋ, fi waat nooraŋ gúputurne nanka?

26Yensa aŋoyindeeniŋ ayéjeeniŋ:

- Ninkinan! Horaŋ akanne k'uŋayaŋ bukokulinkum? Janteneŋ baŋ k’íteekinoonuŋ marigeno. Ingah! Bukokulinkum guŋayeŋne a gubaarhu n'icuufendoonuŋne ayéerenkinan déegen! Ingah! Ninkinan, ii, guyroŋ kari uningeŋning a tamaseereŋo n'ikanne, k'uyitemuŋ me ingine hantaŋ. Wówo! Hómár gireŋ! Maŋ n'icuufendoonuŋne ayéerenkinan akanne utifuremuŋ! 27Inini, ninkinan ii, dahu úduk ukokuroŋ jamméejenkánan nip a dohohu jafoolaŋo. Ingah! Jafoolaŋo adékididek gapuñapuña. Angu, dahu ukokuroŋ jamméejenkánan nip a bútibilahu jámár bareŋ. Kanda ninkinan, majaareŋ k’utibilahaŋ jafoola j’ópájul dapuñahar. Jafoolaŋo jámár agune j'anéerumehne kanjébo ka bandór. Jámár guñantaheŋne utibilahaŋ.

Ayéjeeniŋ:

- Úpájuleŋ, me Údiigeeno M'Acaabenaane, ipiren íneeroonuŋ jafoolaŋo jámár. Aji úfegeŋ ipiren íneeroonuŋ jámár, maro Bááhum anéereemne sembeŋo nómár ba búnekánan. Ninkinan, ikaanumi Bááhum Díino ajellihinoonuŋjellihin maro íbábár gufiyum, angu fiyumemuŋ!

28F'alóbne nim, anyéjem:

- Mint ii, ísiibáámiŋsiib bukanku dohoŋo no Díino asíibane. Inini, ikaanmiŋ neeraŋ?

29Bammiihem nim, Yensa aŋoyindeeniŋ ayéjeeniŋ:

- Úpájuleŋ, Díino dohoŋo n’asíibane k’ukaanaŋ, nómár agune k’ufiyumemuŋ, me Úbárám mu ámár abúuñurne.

30-31Yensa balóbi nim, jamaŋo anfak anyéjem:

- Inini, kandut mint tamaseer adúk, nim ungu ipirenmiŋ ídommiŋ gúlokon k’ifiyumomiŋ! Ingah! Maamaamankintor, ii, eke fam f'anguyerne a kanaŋaŋo ingi Musa, anfoolafoola a waato nómár jafoolaŋo j'aretuhne manaho? Aññañaañ a Hañaañeno anyéj: «Anaheeniŋnah úmbuuro n'afúruntne arjanna k'ankáb.» Angu, fi nuko, neeraŋ gúdekehne bukandukint?

32Banlóbi nim, Yensa ayéjeeniŋ:

- Ninkinan! Janteneŋ baŋ k'íteekinoonuŋ marigeno. Ninkinan, eke ulaheŋlah karo Musa anéerne maamaamankánan úmbuuro nómár? Ingah! Musa nédeeniŋ úmbuuro n'afúruntne arjanna. Bááhum anéereeniŋne úmbuuro nómár.

Ayéjeeniŋ:

- Úpájuleŋ, Bááhum ganéerumehne úmbuuro no marigeno. Nómár agune úmbuuro n'afúruntne arjanna. 33Angu, úmbuuro nómár, nómár agune horaŋ? Úmbuuro nómár agune wúuro m'afúruntne arjanna. Te wúuro úmár ganéerumehne a duniyaŋo inno kanjébo ka bandór.

34Yensa, balóbi nim, anyéjem:

- Angu úmbuuro nómár n’ólobne, nahar mint, gucum gucum!

35Yensa aŋoyindeeniŋ ayéjeeniŋ:

- Me fankum, me ingine úmbuuro nómár n'anéerumehne kanjébo kámár. Ingah! Moŋon moŋon údekirne uguy ingi me k’ufiyumeem, fi kúugo ingi baaruŋo dalahaharo. 36Túyomuŋ baŋ k'ifak ilentálinoonuŋ. Ingah! Ninkinan, úfegemuŋfeg kanda fiyumdumuŋ. 37Kanda jamaŋo mi Bááhum akarafareemne, immereŋ nip andékekineh a binaam k’anfiyumeem. Te moŋon moŋon údekirne a binaam dicucunahaaro.

Ayéjeeniŋ:

38- Ingah! Aji úfegeŋ n'ífuruntne arjanna, guyroŋ ba bukanku h’asúumne bigokum gídekuntne. Wówo! Me ídekridek ba bukanku ho m'abúuñureemne asíibane. Hómár gídekuntne.

Ayéjeeniŋ:

39- Angu m'abúuñureemne, horaŋ gasíibane k’ikaan? Úmár asíibáásiib k'ikooñ jamaŋo m'akarafareemne, ki nim haani úmánduk biki aniim. Ayéjeemyej, alikiyaama jamaŋo m’anfiyumeemne, iñantay ikenguneeniŋ nip k'anyik kanjébo ka bandór. Nim m'abúuñureemne asíibane k'ikaan. Angu, gúmár gíyejoonuŋne, moŋon moŋon údekirne a binaam dicucunahaaro.

40Ayéjeeniŋ:

- Túyomuŋ baŋ k'ibocin íteekinoonuŋ ho Bááhum asíibane faka. Úmár asíibáásiib ki jamaŋo nip m'ankokurne ígihinin imbi Úbárám k'anfiyumem, anyikum na kanjébo ka bandór. Asíibáásiib ki alikiyaama ikenguneeniŋ k'anyik kanjébo ka bandór. Nim Bááhum afak asíibane.

41Nim Yensa alóbne, kanda balóbi nim, Ñanyahudo ankomb buhunhuniino. Aji úfegeŋ n’anhunhuninehne, maro n'ayéjerne úmár agune úmbuuro n'afúruntne arjanna. 42Na ganyéjayehne Yensa:

- Eke úmár Yensa úbáku Isuf? Mintor ímpájuloŋpájul nunom ingi báábám! Angu, neeraŋ gayéjorunkunehne maro afúruntifurunt arjanna?

43Yensa, bafégi ni Ñanyahudo lókirdomne ayéjeeniŋ:

- Ninkinan, bonkerereŋ! Bénteŋ buhunhuniino! 44Ingah! Wúur dapiren k’adéker a binaam ni Bááhum bááhururom. Te m'andékirne ba a binaam, alikiyaama ba bukenginkinin nip gídekehne k’íneereeniŋ kanjébo ka bandór. Nim gídekehne bukaano.

45Ayéjeeniŋ:

- Fégeŋ baŋ, ayikyik ho anabiyoŋo añaañne a Jabuuro a gubaarhu immereŋ. Inini galóbne ayéj: «Díino fankánam ajellihinkineeniŋ binaalo immereŋ nip.» Fégeŋ baŋ, moŋon moŋon ajanten gúloku Bááhum k’afak alóki ki Bááhum ajellihinem binaalo, afeero mara wúuro úmár adékekineh a binaam k’afiyumeem. 46Kanda hómár guyroŋ karo wúuro úmár afégne Bááhum. Wówo! M'afúruntne imbi Bááhum bareŋ, úmár afégemne .

47Ayéjeeniŋ:

- Ninkinan! Janteneŋ baŋ k'íteekinoonuŋ marigeno ki nim bulaahánan apiren awaana. Wúuro m'afiyumeemne ayikyik mees kanjébo ka bandór. 48Angu, aji úfegeŋ n’íyejne nim, maro me ingine úmbuuro n'anéerumehne kanjébo ka bandór. 49Lentálaareŋ maro maamaamankánan, f'anguyerne a kanaŋaŋo, ankábkáb úmbuuro n'ayéjuhne manaho. Kanda haani maŋ nim, adékiidek simayahánin amukmuk. 50Úpájuleŋ, úmbuuro n'afúruntne arjanna no me ílobumohne mídeŋeŋ ingi no maamaamankánan ankábáhne a kanaŋaŋo. Úmbuuro n’élobumohne, nómár, agi úkábi duniirohar. 51Fégeŋ baŋ, úmbuuro n’afúruntne arjanna n’élobumohne, úmbuuro n'anéerumehne kanjébo, nómár agune bumburunku arinkum. Moŋon moŋon ufoolane úmbuuro inno duniirohar. Úmbuuro no ikarakánehne jamaŋo k’ankáb, nómár ingine bumburunku arinkum. Ikarakáneh jamaŋo arinkum ki nim anyikum na kanjébo ka bandór.

52Angu fo Yensa alóbne nim jamaŋo ansekánayeh maŋ bim k’anyéjayeh:

- Dadíigeeno inda, neeraŋ gakafarorunkunehne mintor arinkinem k’ínkáboŋ?

53Fo Yensa ayennehinne n’anlóbohne, aŋoyindeeniŋ ayéjeeniŋ:

- Ninkinan! Janteneŋ baŋ k'íteekinoonuŋ marigeno: Ingah! Moŋon moŋon kábáráŋne arinku Údiigeeno M'acaabenaane, faka ruuhuroŋne muhenkinem, dapiren k'ayik kanjébo ka bandór.#6.53 Na Yensa funaare ganéerne. Galóbolob a gubaarhu jafoolahu jamméejenkintor.

54Ayéjeeniŋ:

- Fégeŋ baŋ! Moŋon moŋon gakábáhne arinkum, aruuhoh muhenkum, ayikhineh na kanjébo ka bandór. Alikiyaama, wúuro úmár ikenginkinem k'ajéb bandór. 55Úpájuleŋ, me, arinkum jafoola ki muhenkum baaru. 56Ayéjeeniŋ:

- Angu, moŋon moŋon gakábáhne arinkum, aruuhoh muhenkum, wúuro úmár ingi me gagune, me mees ingi úmár gigune. 57Bááhum m’abúuñureemne, ummo bim n’ajéb baman dagurumaareŋ. Me a sabaabhu úmár giyikumne kanjébo ka bandór. Te maŋ nim gagune imbi moŋon moŋon m'akábáhne arinkum, k’aruuhoh muhenkum. Wúuro úmár a sabaabhu me me gayikunkunehne kanjébo kámár.

58Abocin ayéjeeniŋ:

- Úmbuuro no me ílobumohne, nómár agune inno, n'afúruntne arjanna. Úmbuuro nómár mídeŋeŋ ingi úmbuuro no maamaamankánan ankábne fam a kanaŋaŋo. Fégeŋ baŋ! Immereŋ ankábkáb, kanda haani maŋ nim simayahánin adék ayikyik k’amuk. Kanda úmbuuro n'élobumohne, moŋon moŋon akábne ajébhineh baman dagurumaareŋ.

59Nim Yensa alóbne f'aŋane kawando a jaameŋo n'agune Kapáneyum. 60Kanda ñantifilinku Yensa ñanlabahi, fo Yensa akawandinne nim lókiireŋeŋ k’anyéjeh:

- Inho amenuhmenuh fanfaŋ. Inho dimpirenoŋ k’inlahuromoŋ.

61Yensa apápájul maro ñantifilinkinem a h'akawandineeniŋne ganlóbumohne, agida wúur téekindom. Aŋoolin ayéjeeniŋ:

- Ninkinan, karo h'éloboonuŋne anuyoonuŋnuy baŋ?

62Angu, aji inho akaanumoonuŋ inneŋ, angu neeraŋ gulakunaaŋne aji úfegeŋ Údiigeeno M'acaabenaane n'aŋay jaŋafo k’aŋoolin b'afúruntne? 63Úpájuleŋ, Jamméejhu Díino ganéerumehne kanjébo ka bandór. Uraagofoŋo, haani amaja dáde, dapiren k'ayik kanjébo kámár. Fo Jamméejhu Díino anéero. Ingah! Aji ufiyumi h'élobohne, Jamméejhu Díino apiren anéero kanjébo ka bandór. 64Kanda haani maŋ nim, ayikyik m'úpájulne fiyindeŋeŋ h'élobne.

Nim Yensa aŋoyindeeniŋne. Agida Yensa, káriman d’atooŋne bukawandino gapájulne mi fiyundomne. Afak apájul m'adékehne gujuliyahu bigokunom.

65Yensa abocin ayéjeeniŋ:

- Ingah! Inho akanne k'íyejoonuŋ, wúur dapiren adéker a binaam ni Bááhum lahindom.

66Angu káriman dam índukoŋo m'angune a dayrahu Yensa aŋŋoolin mángáár k’anhoobálaham. 67Angu Yensa aŋoolin amiih ñantaalibehinem Haalaŋo ingi Inako, ayéjeeniŋ:

- Karo ninkinan mees úsiibááhaŋsiib buhoobálahum?

68Simon Piyer aŋoyindem ayéjem:

- Umuyhint, ídekemiŋ ba imbi hantaŋ? Eke fi bareŋ gúfunnohne halóbo h'anéerumehne kanjébo ka bandór! 69Mint ii, ifiyummiŋfiyum k'ípájulmiŋ maro fi ugune M'arennáne, M'afúruntne imbi Díino.

70Yensa ayéjeeniŋ:

- Eke ninkinan Haalaŋo ingi Inako, me icaabenoonuŋcaaben k’uguyoŋ ñantaalibehum? Kanda ninkinan, ayikyik m'atoh a binanan m'alah jamméejhu Iblisa.

71Agida, na Yensa a gubaarhu Judas, úbáku Simon Iskariyot galóbumohne. Fégeŋ baŋ, úmár, maŋ ni atohne imbi ñantaalibeŋo Haalaŋo ingi Inako, maŋ nim gadékehne ba gujuliyahu bigoku Yensa.

Currently Selected:

Saŋ 6: GD

Highlight

Copy