Saŋ 7

Da Yensa asorne Gújunku Bákáso

1Angu afúrumi na, Yensa afaalen adékinah a didiirahu Galile bukawandinku jamaŋo. Na ganoohne bukawandinku jamaŋo mara lókiireŋ k'afúrum Galile adék a didiirahu Júde. Aji úfegi lókiireŋ k'afúrum Galile adék ba Júde maro na ñanlaameku Ñanyahudo gantíbehne bigokunom. Angu, gúmár akanne anoohi na a didiirahu Galile. 2Angu, ayikyik gujuŋ gúduk gu mint Ñanyahudo. Gújunku Bákáso#7.2 Gújunku Bákáso anafanafa dáde imbi Ñanyahudo. Gújuŋo gúmár gayikeyik f'andétálinne jafaco a júnku Septambur ingi Octobur. A Gújunku Bákáso ganlentálalentála ni Díino akooñeeniŋne a kanaŋaŋo kalaalinno a jamaanihu Musa. A gújuŋo gúmár, buru k'anguy a hádigenkinin ganjóoninejoonin bákásáŋ k'anguy na. ganyéjehne. Angu gújuŋo batéejari, 3índoonenenku Yensa andéker andak anlahuntam k’anyéjem:

- Fi, uñantay úfur nanka k’údek ba a didiirahu Júde k’ulahun bim m'angune a dayrahan. Ingah! Immereŋ mees aññantay anfég tamaseereŋo n'okaanahne. 4Eke wúur m'asíiba ki gurethinem ayéega dañoob jamaŋo h'akaanahne? Inini, déker ba bim ki nim upiren ujellihin jamaŋo nip tamaseereŋo n’okaanahne ki nim jamaŋo ampájulo!

5Aji úfegi ni índoonenenku Yensa anlóbne nim mara fiyindom. 6Yensa aŋoyindeeniŋ ayéjeeniŋ:

- Ingah! Ninkinan waatowaat gúsiibaheŋne upireneŋ ukengeŋ k'údekeŋ ba bim, kanda me waathum aroŋroŋ. 7Ninkinan kandoŋ honj ki jamaŋo anfoyoonuŋ. Kanda me uhacaah. Anhaceemhac n'íteekinkeeniŋne maro hakaanankánin jóndoŋ. Angu, gúmár akanne anhacaam. 8Inini ninkinan, ufant údekeŋ. Kanda me mungu bísibahum b'eñantane ídek aroŋroŋ.

9-10Angu fo Yensa alóbne nim, ankeng k’ankok ba a gújuŋo Jerusalem. Yensa mungu afant atúy na hotir a didiirahu Galile. Banoohiinooh, akeng akokálineeniŋ ba Jerusalem. Kanda baŋay hadéko, asutura hadékhinem.

11Angu na Jerusalem, a waathu gújuŋo, ñanlaameku Ñanyahudo ankomb bútibhu Yensa. Kanda fégurom. K’angu anyéjeh:

- Angu inini umoraŋ?

12-13Kanda jamaŋo m’ansorne a gújuŋo bollendeŋeŋ balóbo a gubaarhu Yensa ki jamaŋo anyennehin. K’angu anhohayeh anyéjeh: «Úmár wúur újooni.» Índukoŋo aññopoh anyéjeh: «Wówo! Ummu wúur újondoŋ. Aŋosunkuneh jamaŋo nip.» Nim jamaŋo aŋŋane sinhohayo, kanda wúur bollendeŋ alób ki jamaŋo anyennehin maro bollendeŋeŋ ñanlaameku Ñanyahudo.

14Angu da gújuŋo ayikne ásibaŋ alallaŋ, Yensa adék ba a Jaameŋo Adénno. Bapúti atoŋ bukawandinku jamaŋo. 15Angu Yensa, f’atoŋne gukawandino, ñanlaameku Ñanyahudo anyéjayeh:

- Kanda mintor! Apápájul Hañaañeno hóbun te karaŋáraŋ. Angu neeraŋ gapirenkinehne k'apájul Hañaañeno ineeŋ?

16K’angu Yensa ayéjeeniŋ:

- H'élobohne fúrunturoŋ a binaam. Imbi m'abúuñureemne gafúruntne. 17Ingah! Wúuro m’asíibane búpájulo ho Díino asíibane, wúuro úmár apájihineh maro h’élobohne imbi Díino gafúruntne. Wúuro úmár dayéj muk a bigokum gafúruntne. 18Wúuro m’alóbohne gunanaam asíibáásiib k’andankam. Ki úbuuñuraaŋo úwuuhinno asíibaháneh k'andank m'abúuñuremne. Wúuro úmár gara ajodumoh. 19Inini, ninkinan, eke Anabila Musa adoohutoonuŋdoohut Luwaŋanku Díino? Kanda ninkinan, haani úmánduk búuñaaraŋ hómár. Angu horaŋ akanne útibheŋ bigokum?

20Balóbi nim mees, immereŋ aŋŋoyindem anyéjem:

- Kanda, fi jéburo. Fáguh infa na arinken. Hantaŋ adékhinehne bútibhu bigokon?

21Yensa ayéjeeniŋ:

- Ninkinan, ingah! Me ii, ikankaan tamaseer amánduk a bísibaŋo bi guyohálaŋo. Kanda f’ekanne nim, ninkinan nip ujaháliheŋjaháli. 22Woseneŋ baŋ! Eke ninkinan, Musa adoohutoonuŋdoohut luwahu gusunnahu índiigeeno? Agida hómár cosaan imbi maamaamankánan biriman fam. Kanda ingah! Eke gúduk ungo na, haani bísibaŋo bi guyohálaŋo usunnahaŋ jádiigeeno? 23Eke ninkinan, usunnahunaŋ kowol kódiigeen a bísibaŋo bi guyohálaŋo ba gúbuuñahu Luwahu Musa? Angu inini, horaŋ akanne k'uñuumuloŋ ingi me a gubaarhu n'íjebunne bigoku wúuro a bísibaŋo bi guyohálaŋo? 24Ninkinan! Bénteŋ bulekhu balóbo a gubaarhu n'úfegorumoŋne. Ingah! Guŋayeŋ bulekhu balóbo, ulekeŋ a binaal.

25Angu índukoŋo m’angune Jerusalem, banyennehini ni Yensa akawandahne anyéj:

- Kanda mintor! Eke bigoku ummu ñanlaamekintor gantíbehne? 26Angu, horaŋ akanne k’ambénnem k'alóboh ineeŋ? Karo immereŋ andómdom inini maro úmár agune Umaasaŋo Mu Díino Acaabenne? 27Kanda dapiren k'aguy úmár! Eke Umaasaŋo Mu Díino Acaabenne anyéjyej dapájulaa b'afúruntne? Kanda úmár, mintor ímpájulomoŋpájul, infak ímpájuloŋ b'afúruntne.

28Angu fo Yensa ayennehinne n’anlóbne nim, gaŋay kawando a Jaameŋo Adénno, ayoofunoh síngiirhinem k'ayéjheeniŋ :

- Ninkinan! Hóge úpájulemuŋpájul? Hóge úpájuleŋpájul b’ífuruntne? Ingah! Me dékoraarári. Faka m'abúuñureemne gara ajodumoh. Kanda m'abúuñureemne, ninkinan pájiiromoŋ. 29Kanda me ípájulempájul maro imbi úmár gífuruntne, te úmár abúuñureemne ba a binanan.

30Angu Yensa balóbi nim, ansíiba buhubhánom kanda wúur pirendeŋ bumapunkánam maro Yensa, bísibahánam aroŋroŋ. 31Agida ñanlabahi m'angune na anfiyumfiyum Yensa. Immereŋ anlóboh anhohayeh k'angu anyéjeh:

- Kanda ummu! Añantay aguy Umaasaŋo mu Díino Acaabenne. Ninginteŋ tamaseereŋo n'akaanahne. Yikireŋ wúur m'afaŋam bukanku tamaseereŋo!

32Angu ñanfarasiyaŋo ingi ñanlaameku alimaamaŋo anyennehin jamaŋo n’anhohayehne. Banyennehini, ambúuñ ñammarahu Jaameŋo Adénno ba bulaku Yensa. 33Angu bampúti imbi Yensa, úmár ayéjeeniŋ:

- Me ii, ifant imiñilaháneh hotir ingi ninkinan k’ikir iŋoolin ba imbi m'abúuñureemne. 34Iŋoolindir, ninkinan útibhunumuŋ, kanda dupireneŋ k’úfegemuŋ maro b’igune, ninkinan dupireneŋ k'úputoŋ bim.

35Angu balóbi nim, ñanlaameku Ñanyahudo ammiihayeh k’anyéjeh:

- Kanda, mintor! N’ayéjne mintor, aŋoolindir dimpirenoŋ k’ínfegomoŋ. Neeraŋ gasíibane búyejo na? Angu beeraŋ gañantane adék bi dínfegomoŋne? Bam beeraŋ gadékehne? Karo alahlah ba hadék ba imbi Ñanyahudo m’andékne k’anguy akooroŋo n’aŋantinne? Karo nuko aguyhuneh ba bukawandinku mi guyroŋoŋne Ñanyahud? 36Angu k’ayéjne íntibhunomoŋ, dimpirenoŋ k’ínfegomoŋ, k’afak ayéj bim, mintor dimpirenoŋ k’ímputoŋ bim, na nuko, neeraŋ gasíibane faka búyejhintor?

Fo Yensa ammíirinahinne Jamméejhu Díino Jarenninno ingi baaruŋo b’anéerumehne kanjébo

37Afúrumi na, bísibaŋo bibiyaamo bi gújuŋo apút. Agida bímár afaŋunumne n'anafa. Angu dam Yensa awonn na a barumuno k’angu alóboh kabaŋ ayéjeeniŋ:

- M'asíiba baaru adéker a binaam k'aruuh.#7.37Agida dam ingine bísibaŋo bi Ñanyahudo ganlentálahne ni Díino anéereeniŋne baaruh káriman fam a waato n'anguyerne a kanaŋaŋo kalaalinno, te faka mukuroŋ na. Anéereeniŋneer barakeŋ bádukoŋ mees. Angu, na faka ganlentálahne mara Díino abúuñurokuneeniŋ Umaasaŋo mu úmár Díino Acaabenne. Agida úmár mees atohtoh a barakehu Díino bámáráŋ. Angu, dam, fo Yensa awonnáne ba buhuyhu jamaŋo k'anruuh a binaanam, na akankaan iniman na búteekinkinin gaŋane mara úmár agune Umaasaŋo mu Díino Acaabenne, ingi faka úmár bareŋ apirenne anéer wúuro kanjébo ka bandór. Agida mintoroŋ nip inhaamihoŋhaami baaruŋo bámár ba Yensa alóbumohne dam. Wúur m’afiyumeem adéker a binaam k'aruuh. 38Ingah! Aji údekári a binaam k'uruuh, «baaruŋo b'anéerumehne kanjébo abutohuneh hafithen afuuh dáde.» Nim gañaañne a Hañaañeno.

39Agida Yensa f’aretne na baaruŋo b'anéerumehne kanjébo, na Jamméejhu Díino Jarenninno galóbumohne. Ayikhineh bísiba bi jamaŋo m’anfiyumemne anjakáneh Jamméejo jámár, kanda bísibaŋo bímár aroŋroŋ. Úpájuleŋ, waato nómár ni Díino fanti bakucun Jamméejhinem Jarenninno imbi jamaŋo. Agida a waato nómár ni Yensa fanti bakengunaa k'ajah guramunkánam. Angu, gúmár akanne Díino fanti bakucun Jamméejhinem Jarenninno imbi m’anfiyumemne.

40Angu, dam barumuno akankaan habíd hanak a gubaarhu Yensa.

Immi ganyéji:

- Kanda! Marigeno, úmár agune Anabiyoŋo n'ayéjuhne a Hañaañeno adék adékekineh.

41-42Immi anyéjeh:

- Kanda úmár agune Umaasaŋo Mu Díino Acaabenne.

Kanda índukoŋo aññopoh k’anyéjeh:

- Wówo! Úmár gireŋ! Ingah! Umaasaŋo Mu Díino Acaabenne dafúrumor a didiirahu Galile deh! Aññañaañ a Hañaañeno maro afúrumokuneh a muhenku umaasaŋo Dawuda, te Dawuda a saariŋo n’aretuhne Betlihem gabosaane. Angu, na Umaasaŋo Mu Díino Acaabenne añantane afúrumor. Dafúrumor Galile.

43Nim jamaŋo ganlóbohne. Inini, gúmár akanne ankaani habíd hanak. Immi imbi Yensa, immi hóburo. 44Índukoŋo ansíiba bulakánam, kanda wúur mapundom a waato nómár.

45Angu ñanfarasiyaŋo ingi ñanlaameku alimaamaŋo imme na bútuyoh. Agida ambúuñbuuñer ñammarahu Jaameŋo Adénno ba bulaku Yensa. Lahurom. Angu aŋŋoolin ba imbi m’ambúuñureeniŋne. Bampúti, ñambúuñhánin anfég maro doohuroŋoŋ Yensa. K’angu ammiiheeniŋ anyéj:

- Kanda ninkinan, m’údekeŋne budooŋo umoraŋ? Horaŋ akanne lahururomoŋ?

46Anyéjeeniŋ:

- Mint, ídekmiŋdek baman maŋ bim. Bíputmiŋ, iwonnmiŋ k’ijantenmiŋ balókunom. Kanda halóbankánam yikireŋ ingi m’ammíir. Angu, gúmár akanne laháremmiŋ.

47Ñanfarasiyaŋo aŋŋoyindeeniŋ anyéjeeniŋ:

- Hom?! Ninkinan mees, ahar aŋoosunoonuŋoosun! 48Inini ningeŋ baŋ imbi mint ñanfarasiyaŋo ingi ñanlaamekánan, hantaŋ afiyumemne? Yikireŋ! 49Ningeŋ baŋ a Luwaŋanku Musa! Ingah! Jamaŋo immi n’angaalaane, yikireŋ haani úmánduk m’apájul binaahu Díino ingi Luwaŋankánam. Anhalakihalaki nip.

Nim ñanfarasiyaŋo anlóbne. 50Agida dam ayikyik ufarasiya úduk m’asor. Gurethinem Nikodem. Nikodem fam adékdek k'anwooñ ingi Yensa. Angu bayennehini ho índinenkinem ñanfarasiyaŋo anlóbne ayéjeeniŋ:

51- Ninkinan, hey! Hóge mintor a luwahintor inyikoŋyik binaal k’inlekoŋ balóbo ni huyuro wúuro k'umiihem káriman a bigofo baman a gukalo? Yikuroŋoŋ deh!

52Kanda Nikodem balóbi nim ankombom buyeefulo k’anyéjem:

- Huyi! Karo fi fi mees údomdom maro Umaasaŋo Mu Díino Acaabenne afúrumokuneh Galile? Inini, déker k’uning Hañaañeno! Hóge ayikyik anabiyoŋ m’afúrumor bim? Yikireŋ deh! Haani amánduk.

53Angu f'anlóbne nim ambicay, moŋon moŋon adék ba a díkinem.

Currently Selected:

Saŋ 7: GD

Highlight

Copy