Saŋ 8

Udikaamo m’ammumbne n’aŋay kunnungaŋo

[ 1Afúrumi na, Yensa adék ba a Montaaño Olifo. 2Gucunkánom táptápáro aŋoolin ba a Jaameŋo Adénno. Angu jamaŋo andékeh ba bulahunkánam. Angu maŋ nim gankanne f'andek anrumun na tip. Yensa úmár mungu anooh maŋ na k'aŋay bukawandinkinin. 3Angu f’aŋane kawando ñanfarasiyaŋo ingi ñankeekihu Hañaañeno ampútor. Agida immereŋ n'andoohor udikaam úduk m’amumbaa n’aŋay basango. Angu bampútri, anwonnálin udikaamo a jannoho 4k'anyéj:

- Arafaŋ, udikaamo ummu amumbaamumb n’aŋay basang. 5Eke Luwahu Musa ayéjyej, udikaamo m’akanne basango, agihaa bawaalo f’adék aniiro. Angu inini, fi neeraŋ gúyejne? Karo ibujommiŋ, karo neeraŋ?

6Agida, na ansíibáásiib buninkuku Yensa kábo ki nim ampiren k’andékirem a binaal. Angu Yensa mungu ajokun k’aŋay guñaaño a réeŋo. 7Kanda jamaŋo ammincineh na k’annotohom ki k'alób. Bamiñilay Yensa ayoofa aŋoyindeeniŋ k’ayéjeeniŋ:

- Inini ninkinan, moŋon moŋon m’afeerem maro yikireŋ jínub, anohum apad udikaamo buwaalo.

8Angu Yensa ajokun aŋoolin abocin guñaaño a réeŋo. 9Jamaŋo banyennehini ni Yensa alóbne ankeng úmánduk úmánduk k'ambicay. Ñanlaamero annohumne andék ba kireŋ índukoŋo k'ambicay immereŋ nip f'adék afalla na udikaamo ingi Yensa bareŋ. 10Angu Yensa ayoofunaa k’aning, fégireŋ na wúur. Ayéj udikaamo:

- Angu immeraŋ? Yikireŋ m'ayéj uñantay ubujaa?

11Udikaamo ayéjem:

- Wówo! Yikireŋ m'ayéj nim.

Yensa ayéjem:

- Me mees díyejo uñantay ubujaa. Inini déker, kanda dahu úduk ubocinahar bukanku hójondoŋo.] #8.11H’agoobane ñaañiiraa a hañaañeno háduko. Aññañaañ a halabay, kanda nanka gireŋ. Añaañaañaañ bíduk a Gúloku Díino.

Jiyanku duniyaŋo inno, jímár ingine Yensa

12Ayikyik bísiba bi Yensa akawandah ayéjeh:

- Me ingine jiyaaŋo j'awúnnurohne k'ampiren anfég hóbun a duniyaŋo inno. Wúuro m'atifeemne daguyahar a bumurul. Aguyhuneh a jiyaaŋo j'adékikinemne ba a kanjébo ka bandór.

13Angu balóbi nim, ñanfarasiyaŋo anyéjem:

- Heh! Fi, gúseediyahu bigokon guŋane! Angu mint dijahmiŋ h'ólobne. Dipirenmiŋ k'ijahmiŋ balóku m'aséediyane bigokunom. H'oŋane gúseediyahu bigokon yikireŋ nafa.

14Yensa aŋoyindeeniŋ ayéjeeniŋ:

- Haani íseediya bigokum, h'élobne marigen maro ípápájul b'ífuruntne ingi b'ídekehne. Agida ninkinan pájiiroŋ b'ífuruntne ingi b'ídekehne. 15Ninkinan, guŋayeŋ bulekhu balóbo guru uninginkinkeŋ ho Díino alóbne a ninlekorumo. Ninkinan ufant ulekeŋ maŋ ni jamaŋo anlekehne balóbo baŋ. Me ŋayri búneku haani úmánduk kayúulenkinem. 16Kanda ninlekorunkum balóbo, a binaal gininkne. Fégeŋ baŋ, me úmánduk gireŋ. Bááhum m'abúuñureemne gaséediyahumseediya. 17Eke aññañaañ a luwaŋankánan maro aji ñanraagof inak anséediyahen, afeero maro séedo nómár ayikhineh nafa? Eke luwaŋo nim gayéjne? 18Inini, me, ñanraagofo inak angune na m’anséediyaheemne. Me moo k'ílob gunaam gu bigokum. Bááhum m'abúuñureemne mees, ummo na gúseediyahum.

19Yensa balóbi nim aŋŋoyindem anyéjem:

- Angu inini bááhán umoraŋ?

Aŋoyindeeniŋ ayéjeeniŋ:

- Ninkinan nuko! Aji úpájulemuŋpájuler, ugumb úpájiheŋer Bááhum mees. Kanda ninkinan pájiirumuŋ, angu gúmár akanne pájiiroŋ Bááhum.

20Nim Yensa akawandne dam a Jaameŋo Adénno. Agida n’anooh a gúbidhu keesenku sadaŋaŋo. Wúur pirendeŋ bulakánam maro bísibahánam fanti bapút.

Ka Yensa ayéjne: «Me igune.»

21Yensa afak ayéj jamaŋo:

- Me ba hadéko gídekehne. Kanda útibhunumuŋ te dúfegemuŋ. Kanda ninkinan, uniirohunoŋ ni jínubonkánan kafariiraa. Ingah! B'ídekehne faŋo, ninkinan dupireneŋ k'úputoŋ bim.

22Balóbi nim, ñanlaameku Ñanyahudo anlóboh ayéjeh:

- Angu n'ayéjehne ba hadék dínfegomoŋ, ingi b'adékehne, mintor dimpirenoŋ búput bim, karo inini ba gubujoora gasíibane?

23Banlóbi nim mees, Yensa apájul, ayéjeeniŋ:

- Ninkinan uguyeŋne jamanku réeŋo. Kanda me mungu ummu raaf. Ninkinan ñammi duniyaŋo inno. Kanda me ummu duniyaŋo inno gireŋ. 24Gúmár gitengahoonuŋne maro ninkinan uniirohunoŋ ni jínubonkánan kafariiraa. Ingah! Aji dómároŋ maro me igune m'igune#8.24Fam Anabila Musa amiihmiih Díino ayéjem: «Fi, gurethen neeraŋ?» Díino aŋoyindem ayéjem: « Me igune m'igune. Gúmár gurethum.» Angu fo Yensa alóbne nim, adoodooh gurethu Díino. Ningereŋ Gúfuro 3.14,15. úduk uniirohunoŋ ni jínubonkánan kafariiraa.

25Angu immereŋ aŋŋoyindem anyéjem:

- Inini, fi nuko f’ugune hantaŋ?

Yensa ayéjeeniŋ:

- Me igune maŋ wúuro m'íteekinoonuŋne káriman faliiho. 26Me ipirenkineh íteekinoonuŋ halabay a gúbidhu kayúulenkinan, kanda k'íteekinoonuŋ bareŋ maro m'abúuñureemne gara ajodumoh. H’ajellihinkumne hómár bareŋ gíteekinehne jamaŋo.

27Angu, fo Yensa alóbne nim, ñanlabahi wuturoŋoŋ maro ho Báábám Díino, hómár galóbumohne.

28Angu Yensa, bafégi maro h’alóbne, jamaŋo wuturoŋoŋ ayéjeeniŋ:

- Ingah! Me igune wúuro m'íteekinoonuŋne káriman faliiho. Ayikhineh bísiba b'úpájihineŋne mara me igune Údiigeeno M'acaabenaane. Ninkinan, ba buyoofunkunom gúdekiheŋne. Uyoofunoŋdir Údiigeeno M'acaabenaane gukur úpájihineŋne maro me igune maŋ úmár.

Ayéjeeniŋ:

- Dam úfekineŋ maro giri ikaanoorah honj. Dam úfekineŋ maro h’eŋane búteekinkinan nip, ho Bááhum Díino ajellihineemne. 29Ingah! m'abúuñureemne a binanan umomiye ingi me. Hoobálahadum maro gikaanakaan h'asúumne úmár nip.

30Nim Yensa alóbne a Jaameŋo Adénno dam, te f’aŋane balóbo ñanlabahi anfiyumem.

Ka Yensa alóbne a buguyhu úsoku Iblisa

31Angu, Yensa ayéj Ñanyahudo m’anfiyumemne:

- Ingah! Ninkinan, moŋon moŋon alahne kawandhum aliŋ, marigen fi utaalibehum. 32Ingah, aji ulahi kawandhum aliŋ, úpájihineh maro nómár agune ho marigeno. Agida a sabaabhu marigeno nómár, uguyhunoŋ ininkaman ñansóog m'ambennaa.#8.32 Aji úfegi ni Yensa alóbne nim, mara Díino dayeheneeniŋ a gubaarhu júnubonkinin.

33Fo Yensa alóbne nim, immereŋ aŋŋoyindem anyéjem:

- Angu horaŋ akanne k'úyeji mint iguyhunemiŋ ininkaman ñansóog m'ambennaa? Ingah! Mint guyahadimiŋ ñansóku wúur. Mint, ii, a muhenku Ibrahiima gífuruntuminne.

34Angu, Yensa aŋoyindeeniŋ ayéjeeniŋ:

- Ingah! Ninkinan! Janteneŋ baŋ k'íteekinoonuŋ marigeno! Ugurumaareŋ aŋane bukanku hójondoŋo, hójondoŋo alakánam k’aguy úsokánom. Afeero mara uguyhuneh úsoku hójondoŋo h'okaanahne. 35Inini, úsoku wúuro, hóge apiren atoh a bádimo ba dígo baman dagurumaareŋ? Wówo! Dapiren k’atoh! Úbáku ummu dígo ba bareŋ apirenkinehne atoh a bádimo bámár baman dagurumaareŋ.

36Ayéjeeniŋ:

Gúmár gíyejoonuŋne, aji Úbáku Díino apahunoonuŋ k'úbennahaŋ, duguyahaaraŋ angu ñansóku bukanku hójondoŋo. Uguyhunoŋ jamaŋ ñampahi. 37Inini me nuko, ípápájul maro ninkinan a muhenku Ibrahiima gúfurunteŋne, kanda maŋ nim guŋayeŋne bútibhu bigokum. Nim guŋayeŋne bukaano maro lahudumuŋ balókum. 38Kanda me, ho Bááhum Díino ajellihineemne, maŋ hómár gílobumohne. Kanda ninkinan mees gukankaŋkaan ho bááhánan ajellihinoonuŋne.

39Fo Yensa alóbne nim aŋŋoyindem anyéjem:

- Ingah! Maamankint, úmár agune Ibrahiima.

Banlóbi nim Yensa ayéjeeniŋ:

- Karo nim o? Kanda ninkinan! Aji marigen, ninkinan a muhenku Ibrahiima gúfurunteŋne, ugumb ukankaŋ ho Ibrahiima akaanahne. Kanda ninkinan ŋayroŋ bukaano hómár. 40Kanda me gíteekinkoonuŋteekin marigeno no Díino atéekineemne. Kanda ninkinan uŋayeŋŋay bukaano ho Ibrahiima kaanahadaŋne, maro ninkinan bigokum gútibheŋne. 41Na ninkinan gukankaŋkaan ínhonduko ingi ho bááhánan akaanahne.

K'anyéjem:

- Mint bááh úmánduk bareŋ giyikminne. Úmár agune Díino. Mint guyrimiŋ jaraah j'ambosaa a kunnungaŋo.

42Ayéjeeniŋ:

- Ingah! Aji ninkinan jaraku Díino, ugumb upokunkumuŋer maro imbi ámár gífuruntne. Ingah! Me dékoraarári. Díino abúuñureemne. 43Inini, ninkinan, horaŋ akanne wuturoŋ ho me ílobne? Ninkinan aji úfegeŋ ni wuturoŋne h’élobne maro yikuroŋ ilaah ijantenumo. 44Bááhánan agune Iblisa. Angu, gúmár akanne úsiibahaŋ bukaano ho bááhánan asíibane.

Ayéjeeniŋ:

- Ningeŋ baŋ, Iblisa, úmár ubujum káriman fam. Faka wonnáhadaŋ a marigen. Iblisa, wúur mu yikahadaŋ marigen. Iblisa apulpul hajodaŋo maro hómár bareŋ galóbuntohne. Iblisa ulaameku hajodaŋo nip. 45Kanda me marigeno gílobohne, angu gúmár akanne dómároŋ h’élobohne.

46Amiiheeniŋ ayéj:

- Hóge imbi ninkinan ayikyik m’apirenkinehne aséediya karo iyikyik jínub? Kanda gílobi marigeno, horaŋ akanne ninkinan pirendoŋ k’údomoŋ gúlokum? 47Kanda m'agune ingi Díino, úmár gayennehineyennehin Gúloku Díino. Kanda ninkinan guyroŋ ingi Díino, gúmár akanne ufoyeŋ buyennehindukum.

48Fo Yensa alóbne nim immereŋ aŋŋoyindem anyéjem:

- Fi údin Samareya #8.48 Ñammi Samareya ingi Ñanyahudo immereŋ garanyennehinayeŋ haman hotir. Angu, Ñanyahudo gansebeseb ñammi Samareya k'anyéj gara ambúuña luwaŋanku Díino, ingi faka mees, anyéjeh gaŋŋoosunoŋoosun gúlokunom. Ingi faka ñammi Samareya ñanlabahi ganramunaramun hafaaso. Angu, gúmár akanne Ñanyahudo ansebi ñammi Samareya. Angu, inini, dam, fo Ñanyahudo anhuyne Yensa «Údin Samareya!» na ansutunemsutun fanfaŋ. deh! F’éyejminne fáguh aruurenruur na imarigenmiŋmarigen.

49Yensa ayéjeeniŋ:

- Fo úyejeŋne me fáguh aruureemruur, na nim gireŋ. Me gíbuuñabuuña Bááhum Díino kanda ninkinan mungu uheelenemuŋheelen. 50Ingah! Me ŋayri bútib ki jamaŋo andankam. Hómár nip íbendurbendur Bááhum Díino maro úmár gadékehne ba bulekhu balóbo.

Úbáro ingi Ibrahiima

Yensa abocin ayéjeeniŋ:

51Janteneŋ baŋ k'íteekinoonuŋ marigeno! Wúuro m’abúuñane kawandhum daniirohar.

52Yensa balóbi nim, immereŋ aŋŋoyindem anyéjem:

-Iyoo! Angu, arennumrennum mint maro fi fáguh aruurenruur. Horaŋ akanne k’úyej m’abúuñane kawandhan daniirohar? Agida Ibrahiima aniironiiro! Anabiyoŋoŋo anniironiiro, fi f'úyej m’abúuñane kawandhan daniiro! 53Ingah! Haani maamankint Ibrahiima aniironiiro. Neeraŋ gupirenkinehne úyejoora ufaŋi úmár? Anabiyoŋoŋo anniironiiro mees. Fi kaaraŋ guninkne bigokon?

54Yensa aŋoyindeeniŋ ayéjeeniŋ:

- Ingah! Me guyroŋ karo guyoofunoora giŋane. Aji iyoofunooray, guyoofunooraŋo g’eyoofunoorane dayik nafa. Kanda Bááhum Díino, úmár gayoofunkumne.

Abocin ayéjeeniŋ:

- Ninkinan, ingah! Gúyejheŋyej úmár guramunkaŋne k’uhuyomoŋ Díino. Nim gúyejeheŋne. 55Agida ninkinan pájiiromoŋ faŋo. Kanda me ípájulempájul arenn fet. Aji íyeji pájiirem, iguyhuneh ujoda, maŋ ni ninkinan ujodahaŋne. Kanda Díino, me ípájulempájul ifak íbuuñaham a gúlokunom. 56Ingah! Maamankánan Ibrahiima aséwosewo dáde f'alahne maro adék afékineh jamaanihum. Adékiidek afég, te f’afégne asúumemsuum dáde.

57Angu, fo Yensa alóbne nim anyéjem:

- Puuy! Fi fi, ni fanti búputun díineŋ jamaŋinak ingi haala! Neeraŋ gakaanorumne k'úyej úfefeg Ibrahiima?

58Ayéjeeniŋ:

- Janteneŋ baŋ k'íteekinoonuŋ marigeno. Me, jandiŋ Ibrahiima babosumaane, me igune m’igune.#8.58Fam Anabila Musa amiihmiih Díino ayéjem: «Fi, gurethen neeraŋ?» Díino aŋoyindem ayéjem, «Me igune m'igune. Gúmár gurethum.» Angu fo Yensa alóbne nim adoodooh gurethu Díino. Ningireŋ Gúfuro 3:14,15.

59Angu, fo Yensa alóbne nim, antot bawaalo k’anyéj ba bugikinem ambujom. Angu Yensa afúr a buteerehu Jaameŋo Adénno k’ajokála ni wúur fégurom.

Currently Selected:

Saŋ 8: GD

Highlight

Copy