HADUI DAHA' SIHU TUHAN 12
12
Katé' té' daha' sidang ha' Yerusalem.
Yakobus matei. Daha' mapuh Petrus
1 #
HST 4:3
Jarun anan pah laja' Herodes meté' pekaté' kuri-kuri la'ung daha' alem sidang. 2En na' lematei nah Yakobus harin Yohanes té' malat. 3Tegu iha' nyineng hadui na' atih na daha' Yahudi sayu kenep, tei nah iha' mapuh Petrus lahuh. Atih nah tegu dau aya' luti aleng em té' tavah. 4Uh ha' mapuh iha', lun na' tei nah iha' alem jin dahin nyihu pulu-nem seladu menga iha', kenep na' seng ma'uk iha' men daha' kahum men'uh dau aya' Paskah. 5#Yak 5:16 Avin anan, muleng nah Petrus alem jin, bi daha' sidang sebayang té' Allah men iha' dahin tangen-tangen kenep daha'.
Petrus takau men alem jin
6 #
HST 5:22-23
Tegu malem em payan Herodes seng geri Petrus besara', bi tegu anan Petrus tudu té' hang dua' seladu, dua' avit pah en daha' tei kaput na', té' pah kuri-kuri seladu aleng menga ha' ba ketamen uma jin anan lahuh. 7#HST 5:9 Tenup-tenup nekring nah ji meliket Tuhan té' béh na', dahin ji alah malah lelan alem tilung anan, pelalau na' nebip nah tekhang Petrus, dahin megoh iha', ken na', “Ma'un nah ajen.” Pelalau puvan nah avi té' usu na'. 8Lun ken meliket anan men iha', “Im jet nah besahan ka' té' iung-u'ing ka', té' nah kasut ka'.” Pelalau na' na nah awi kurin na' anan. Lun ken na' men iha', “Té' nah basung ka', ngioh nah akui.” 9Petrus pah musang ngioh iha', bi nusi' ha' jam hadui meliket atih ket lan, bi kio' na' iha' nyineng ket aleng tula tua. 10Uh dawa' lalau ji kelunan aleng menga behalem, dahin lalau ji la'an, ateng nah dawa' ha' ba titei aleng tei ha' daléh, beka' neng'ap nah ba ketamen anan dep men dawa'. Musang nah dawa', pelalau ngejeloh ji alan, uh anan pelalau leka' nah meliket anan men béh na'.
11Tegu kenep Petrus nei pelemana', lun ken na' nah, “Kerei inih kitak lan-lan nah Tuhan uh nyihu meliket Na' nei, Iha' pah uh makau akui men usu Herodes dahin men lim kenep daha' Yahudi.” 12#HST 12:25; 15:37 Uh ha' pelemana hadui anan, tei nah iha' ha' uma Maria hinan Yohanes aleng aran na' Markus, hinan té' kuri-kuri la'ung daha' aleng uh pepeng sebayang. 13Tegu iha' negek ketamen aya', nei nah ji anak-doh aran na' Rode, ngenep seng jam seng hi kah iha' aleng negek atih. 14En na' kelenghi nah ké', beka' dahun Petrus, pelalau iha' em neng'eng ba avin iha' melu, bi iha' pelalau tepurung tei halem bara marung Petrus té' nekring ha' ba ketamen. 15#HST 26:24; Lk 24:37 Ken daha' atih men iha', “Na' nun ka' awi ngelarap di du!” ken daha', bi ketatau tua ha' kuma' iha' lan. Lun ken daha' men iha', “Meliket na' anan.”
16Bi Petrus pa'en negek ketamen. Uh daha' neng'ap ba anan, pelalau kitan daha' nah iha', daha' pah ngeniheng lelan. 17Bi iha' meju usu na', nyihu daha' tepaka', pelalau ha' na'lung men daha' anan nuno' tuk Tuhan uh geri iha' musang men alem jin anan. Ken na' pah la'an, “Bara nah tuk anih men Yakobus dahin men daha' harin-harin tam lim.” Uh anan musang nah iha' tei ha' béh.
18 #
HST 5:21-22
Tegu dau malah, nusi' beloh daha' seladu lim pivek ilau hino' Petrus tei. 19Uh Herodes em deng ilau Petrus la'an, en na' ngetneng nah daha' aleng menga jin dahin nyihu lematei daha' anan. Men'uh anan leka' nah iha' men Yudea tei ha' Kaisarea, melo' hinan.
Patei Herodes
20 #
Yehez 27:17
Herodes pah uh heléh lelan té' daha' Tirus dahin Sidon. Bi tei nah daha' dahin ji kenep pala ha' unan na'. En daha' na nah Blastus aleng bakéh laja' ja iha' bakéh daha', uh anan en daha' kahi pekesayu na dahin na', avin daléh daha' anan murip té' daléh laja' anan. 21Té' ji dau en Herodes petneng, en na' té' nah kanan na', dahin melo' hujung ladung aren na', dahin nebara-nebara daha'. 22#Yehez 28:2 Daha' kahum anan pah medéng, ken daha', “Anih nah dahun ji ket en tam ketalau, nusi' ha' dahun kelunan.” 23#Dan 5:20 Pelalau tegu anan ji meliket Tuhan mangen iha' avin nusi' ha' meju Allah; iha' en haleng kani, pelalau pah nah hengan na'.
24 #
HST 6:7; Yes 55:11 Bi dahun Allah pah sa'-sa' tei putat en kelunan kelenghi.
25Uli nah Barnabas dahin Saulus men Yerusalem, men'uh dawa' pek'uh hadui dawa', dawa' geri nah Yohanes aleng aran na' Markus dahin dawa' lahuh.
Currently Selected:
HADUI DAHA' SIHU TUHAN 12: TDK1990
Highlight
Share
Copy
Want to have your highlights saved across all your devices? Sign up or sign in
Bible in Today's Dahun Kayan Version © Bible Society of Malaysia, 1990.
