HADUI DAHA' SIHU TUHAN 13
13
Sidang ha' Antiokhia mukéh Saulus dawa' Barnabas ja dawa' nyadui men Tuhan
1Ha' daléh Antiokhia alem sidang atih té' kuri-kuri la'ung daha' nabi dahin guru, iha' atih Barnabas dahin Simion aleng Nigar aran na' lahuh, dahin Lukius kelunan Kirene dahin Menahen anak-amung Taman Herodes aleng gem hida laja', dahin Saulus lahuh. 2#HST 9:15 Alem daha' atih sebayang té' Tuhan dahin pelien, beka' ken Belua Ma'ung, “Ukéh nah men Akui Barnabas dawa' Saulus ja dawa' anan na hadui aleng Ek nyihu dawa' na.” 3#HST 6:6; 14:23; 1 Tim 4:14; 5:22 Lun pelien nah daha' dahin sebayang, uh anan daha' metei usu daha' té' ujung dawa', nyihu dawa' tei.
Saulus dawa' Barnabas ha' Siprus
4 #
HST 15:39
Dawa' anan tei hu'en Belua' Ma'ang, pelalau tei ha' daléh Seleukia, dahin men inan nah dawa' panau kapen tei ha' daléh Siprus. 5#HST 12:12,25; 13:13 Alem dawa' té' ha' Salamis, pelalau dawa' bara dahun Allah alem uma sebayang daha' Yahudi, Yohanes pah té' dahin dawa' masi dawa' lahuh. 6Tegu dawa' atih uh panau alem lim busang atih ateng ha' Pafos, dawa' pah pesuk ji laké' aleng haman peplak kelunan, iha' atih ji nabi amoh, kelunan Yahudi, aleng aran na' Bar-Yesus. 7Iha' té' dahin Sergius Paulus, kelunan aleng nyemugen aleng kalui gabnur daléh atih, aleng muvui Barnabas dawa' Saulus seng ngenep kelenghi dahun Allah. 8#2 Tim 3:8 Bi Elimas (avin nunan halem aran na' kurin daha' Yunani) aleng haman peplak kelunan atih nyagen na dawa' atih ngenep ngelisah kenep laké' aleng kalui gabnur atih ja iha' em nginah. 9Bi Saulus aleng aran na' Paulus atih lahuh, penu dahin Belua' Ma'ang, nyelingau iha', 10#Hos 14:9 pelalau kuma', “U ika' aleng penu dahin lim-lim pamoh dahin peluvat, anak Iblis, ayau ket lim aleng teneng, nusi' ka' seng ngeta' men hadui ka' aleng ngawi alan Tuhan aleng tutau iah? 11#Yoh 9:39; HST 9:8 Nyineng nah, kerei inih usu Tuhan té' nei té' ujung ka', ika' seng buta', nusi' nah ika' seng nyineng matan dau kuri-kuri dau dara na'.” Pelalau tekjet nah matan na' mabah dahin lidem, ateng iha' pivek-pivek ilau kelunan mayak usu na'. 12Tegu laké' kalui gabnur atih jam hadui aleng uh jadi' atih, pelalau melak nah iha' marung katuk Tuhan atih, pelalau nginah.
Paulus pedengah dengah sayu ha' Antiokhia alem daléh Pisidia
13 #
HST 12:12,25; 15:38 Paulus dahin kelunan aleng dahin na' panau kapen men Pafos tei ha' Perga ha' daléh Pamfilia, Yohanes pah petat men dawa' pelalau uli ha' Yerusalem. 14Bi dawa' atih panau lalau daléh Perga ateng ha' Antiokhia aleng ha' daléh Pisidia. Lun tei nah dawa' atih halem uma sebayang tegu Dau Kelarah, pelalau melo'. 15#HST 15:21 Tegu daha' uh basa' tebara Musa dahin buhup daha' nabi-nabi, daha' aleng dekaya' alem uma sebayang metei daho' men dawa', kuma', “U kua' harik, iha' té' nun-nun daho' seng en kua' nangen kamé' pahu anih, bara nah,” ken na'. 16Lun peju mah Paulus dahin meju usu na', ken na',
“U ikam kelunan Israel dahin ikam aleng takut té' Allah, kelenghi nah. 17#Us 6:1,6; 12:37,41; 14:8; Yes 1:2 Allah aleng Tuhan pahu tam Israel anih uh mili sepun tam, dahin meju pahu atih tegu daha' nyakei ha' daléh Mesir, dahin geri daha' musang té' usu Na' aleng ningan. 18#Us 16:35; Kah d Is 14:34; Kel d M 1:31 Té' awi pat-pulu duman dara na' Iha' kelung barik daha' ha' tana ngahit. 19#Kel d M 7:1; Yos 14:1-2 Hu'uh Ha' nasa' tusu bengsa' kelunan ha' daléh Kanaan, pelalau Iha' ma'uk tana kelunan anan, en daha' sengayan nah tana daha' awi pat atuh lima'-pulu duman dara na'. 20#1 Sam 3:20; D ag Pet 2:16 Men'uh anan en Na' uk nah men daha' kuri-kuri kelunan aya' aleng petneng, ateng ha' urip nabi Samuel.
21 #
1 Sam 8:5; 10:21,24 “Men'uh atih la'an en daha' kahi nah ji laja', en Allah uk nah Saul aleng anak Kisy men daha', iha' atih ji la'ung men hang daha' pahu Benyamin, pat-pulu duman dara na'. 22#1 Sam 13:14; 16:12-13; NDI 89:20; Yes 44:28 Men'uh laja' anan uh en Na' bet, pelalau Iha' meju Daud jadi' laja' gem daha' atih. Marung iha' nah Allah uh bara, ken Na', ‘Akui uh pesuk Daud anak Isai, ji la'ung aleng kenep Kui, aleng seng pela'ung lim-lim kenep Kui.’ 23#2 Sam 7:12; Yes 11:1 Men hang anak Daud atih uh en Allah uk nah men bengsa' Israel ji la'ung Aleng Pekurip, Iha' atih nah Yesus, ngioh jaji Na'.’ 24#Lk 3:3 Bi men em payan Ha' nei, Yohanes nah aleng medéng katuk, ja lim-lim pahu Israel nei ngelisah kenep dahin en duh. 25#Mk 1:7; Lk 3:16; Yoh 1:20,27 Alem Yohanes pela'ung hadui na', lun kuma' nah iha', ‘Hi kah akui kurin kelo'? Akui anih bareng kui Iha', bi aleng lan na' té' ji la'ung aleng seng nei ngebaya akui, muvan talé' kasut Na' pah akui em tekep.’
26 #
NDI 107:20; HST 13:46 “U kelo' harik-harik aleng sau Abraham dahin lim-lim kelo' aleng takut té' Allah, men itam nah dengah urip anih uh en Na' kato'. 27#HST 3:17; Yoh 16:3 Avin kelunan huang Yerusalem dahin dalo' kelunan aya' em menglan Iha' Yesus. Alem daha' lematei Iha' daha' pela'ung dahun daha' nabi-nabi aleng alem surat Tuhan aleng en daha' basa' pa'en ha'ut Dau Kelarah. 28#Mat 27:22-23 Lan pah daha' em pesuk nun-nun ngavan daha' tekep lematei Iha', bi daha' akei té' Pilatus ja daha' lematei Iha'. 29#Mat 27:57-61 Men'uh daha' pela'ung lim daho' aleng uh kalung marung Iha' nunan, en daha' tapah nah Iha' men ujung kayo' atih, pelalau metei Iha' halem tanem. 30#HST 3:15 Bi Allah meju Iha' men patei. 31#HST 1:3 Men'uh anan tula nah Iha' alem kuri-kuri dau dara na' té' daha' kelunan aleng nei tugung Iha' men daléh Galilea tei ha' Yerusalem, daha' anan pah jadi' teksi'.
32 #
HST 13:23
“Kawa' anih geri men ikam dengah sayu marung jaji aleng uh en Allah pejaji men sepun tam, 33#NDI 2:7; Ib 1:5; 5:5 iha' atih Iha' uh pela'ung jaji atih men anak tam avin Iha' uh meju Yesus, awi aleng uh kalung alem Nyanyi Daha' Israel aleng kedua'.
“Ika' nah Anak Kui,
té' dau anih nah Akui uh nganak Ika'.’
34 #
Yes 55:3
Bi marung tuk Allah uh meju Iha' men hang kelunan aleng matei, ja Iha' em uli pala tasa' la'an, Iha' uh bara nunih,
‘Akui seng ma'uk men kelo' lim-lim asi aleng uh Ek jaji men Daud,
jaji aleng ma'ang dahin aleng tageng.’
35 #
NDI 16:10; HST 2:27 avin Iha' uh bara alem Nyanyi Daha' Israel aleng ji lahuh,
‘Nusi' pah Ika' ma'uk Kelunan Ka' aleng Ma'ang atih seng ga' tasa'.’
36 #
1 Laj 2:10; D ag Pet 2:10; HST 2:29 Avin hu'uh nah Daud na aleng kenep Allah alem urip na', tudu nah iha', pelalau en daha' tepiha' nah iha' tei dahin sepun na', iha' pah ga' tasa'. 37Bi Iha' aleng en Allah ju atih nusi' Ha' ga' tasa'. 38#Kah d Is 15:30; HST 10:43; Ib 9:9; 13:20 Avin anan, u kelo' harik lim-lim, sayu kelo' jam daho' anih, té' kelunan anih nah kawa' bara men kelo' ngavan sala pebet; 39#Rom 10:4 kenan Na' pah ha'ut la'ung aleng nginah uh teneng men ket lim-lim aleng ngavan tam em deng teneng kenan tebara Musa. 40#Hab 1:5 Avin atih, mengan nah sayu-sayu bahi ha' ga' té' kelo' awi aleng uh kalung alem buhup daha' nabi, ken na',
41‘Nyineng nah, u kelo' lim aleng nuten, meng kam em ngeniheng,
avin té' alem urip kelo' Akui seng na ji hadui,
aleng kam peletu-letu em nginah, lan pah daha' bara na' men kelo'.’ ”
42Alem Paulus dawa' Barnabas atih musang, pelalau daha' akei dawa' mejoh daho' atih, en dawa' bara nah men daha' la'an té' Dau Kelarah aleng seng ateng. 43#HST 11:23 Tegu daha' uh petat men peng daha', kahum lan kelunan Yahudi dahin daha' bengsa' ha' béh aleng uh masuk adet daha' Yahudi dahin nei nginah té' Allah, lim daha' anan nah aleng ngioh Paulus dawa' Barnabas nan, dawa' anan pah nangen daha' nyihu daha' ta'en alem asi Allah.
44Tegu Dau Kelarah la'an, jeleng lim huang daléh atih pah pepeng kelenghi dahun Allah. 45#HST 13:50; 14:2 Bi tegu daha' Yahudi nyineng kelunan kahum atih, kelalé' mi'en nah daha' atih dahin nyakat dahun Paulus dahin peji'ek iha'. 46#Mat 10:6; Lk 7:30; HST 3:26; 18:6 Bi Paulus dahin Barnabas pah hakéh duan-duan, ken dawa', “Adang dahun Allah en bara men ikam una, bi avin kam muéh na' dahin itung batung kam em tekep ala urip aleng pa'en, lun ngelisah nah kawa' pala daha' aleng bengsa' ha' béh. 47#Yes 42:6; 49:6 Avin nunih nah sihu Tuhan men kawa', ken Na'.
‘Akui uh petneng ika' jadi' ji alah men kelunan bengsa' ha' béh,
ja ika' geri urip aleng men Akui tei ateng ha' lirin usun tana.”
48 #
HST 11:18; Rom 8:29 Tegu daha' kelunan aleng bengsa' ha' béh kelenghi atih pah sayu nah kenep daha' dahin meju dahun Allah, dahin kuri-kuri kahum kelunan aleng uh en Allah petneng seng ala urip aleng pa'en, daha' atih pah nginah nah. 49Lun putat nah dahun Tuhan ji-ji daléh anan. 50Bi daha' Yahudi pebisau lelan kenep daha' doh aleng té' aran aleng nginah, dahin daha' laké' aleng geri daléh atih, pelalau na katé' té' Paulus dahin Barnabas, dahin mebet dawa' men alem daléh. 51#Mat 10:14; HST 18:6 Bi dawa' atih pah negak pup kudek dawa' itung ji tada' té' daha' atih, pelalau tei ha' Ikonium. 52Lim daha' anak sekulah atih pah penu té' kenep aleng melu dahin té' Belua' Ma'ang.
Currently Selected:
HADUI DAHA' SIHU TUHAN 13: TDK1990
Highlight
Share
Copy
Want to have your highlights saved across all your devices? Sign up or sign in
Bible in Today's Dahun Kayan Version © Bible Society of Malaysia, 1990.
