HADUI DAHA' SIHU TUHAN 16
16
Paulus geri Timotius.
Anau dalo' ha' daléh Asia aleng da'uk ateng ha' Troas
1 #
HST 17:14; 19:22; Fil 2:19-22; 2 Tim 1:5 Ateng nah Paulus ha' daléh Derbe dahin ha' Listra. Té' ji anak sekulah tinan aran na' Timotius, anak ji doh Yahudi aleng nginah, bi taman na' kelunan Yunani. 2#HST 6:3 Timotius atih en lim daha' harin tam ha' daléh Listra dahin ha' Ikonium hek. 3Kelunan anih nah Paulus ngenep geri panau dahin na'. En na' geri nah iha' dahin nyunat iha' avin daha' Yahudi aleng melo' ha' daléh anan, avin daha' lim jam taman na' kelunan Yunani. 4#HST 15:23-29 Alem Paulus dawa' Silas panau-panau té' alem lim daléh atih en dawa' bara nah lim-lim utet daho' aleng hu'uh en daha' sihu Tuhan dahin daha' kelunan aya' aleng ha' Yerusalem petneng, ja daha' ngioh na'. 5Nunan pah lim sidang atih nei tageng kinah daha', ha'ut dau pah daha' sa'-sa' nei pi'at.
Ket nei tula té' Paulus—kelunan Makedonia muvui iha'
6 #
HST 18:23
Panau nah dawa' alem lim daléh Frigia dahin Galatia, avin Belua' Ma'ang em mun dawa' bara ha' Asia dahun Tuhan. 7Uh dawa' ateng jeleng té' béh daléh Misia dawa' pesek seng ngenep masuk daléh Bitinia, bi nusi' nah Beluan Yesus mekoh dawa' tei. 8Alem dawa' lalau daléh Misia, dawa' ngiléh tei ha' Troas. 9Tegu malem kitan Paulus nah ji ket tula, iha' tih, té' ji la'ung kelunan Makedonia nekring muvui iha', ken na', “Nei nah lawat ha' Makedonia, masi kamé'.” 10Uh ha' nyineng ket tula atih, salet nah kalo' ngenep tei ha' Makedonia avin kalo' petyah alem kenep alo' Allah uh muvui kalo' hinan pedengah dengah sayu men daha' atih.
Panau ha' Makedonia. Lidia nginah té' Tuhan
11Avin anau, kalo' leka' men Troas, kalo' tei pelalau tua ha' Samotrake, dau malah ji ha' Neapolis. 12Men inan nah kalo' tei ha' Filipi, iha' tih daléh ha' Makedonia aleng dekaya' alem daléh anan, aleng alem keligem Roma. Té' daléh anih nah kalo' ngeta' kuri-kuri dau. 13tegu Dau Kelarah, tei nah kalo' musang men ba ketamen daléh tei ha' benghé' hungei, avin kalo' ngio té' ji avan daha' Yahudi sebayang hinan. Pelalau melo' nah kalo' petengaran dahin daha' doh aleng uh pepeng atih. 14#Yoh 6:44 Té' nah ji doh aran na' Lidia, aleng pebelé' bareng bela temen, aleng nei men daléh Tiatira, aleng nginah té' Allah, kelenghi dahun alo'. Kenep na' en Tuhan awang, ateng iha' pelemana' marung ket aleng uh en Paulus bara. 15Hu'uh ha' duh alem aran Tuhan dahin lim daha' alem amin na' lahuh, pelalau iha' muvui kalo', ken na', “Iha' kelo' anih kuma' akui teneng té' alem Tuhan, nei nah halem, melo' ha' uma kui,” ken na'. Avin dahun na' uh nunan, iha' nah kalo' tei.
Paulus dawa' alem jin
16 #
HST 19:24
Té' pah tegu kalo' tei ha' ngavan daha' sebayang atih, té' ji nyemdoh pehura' kalo' aleng en to' bara ket aleng sihuk, aleng na utung kahum men dalo' aleng nyihu iha' té' hadui na' anan. 17#Mk 1:24,34 Nyemdoh anan pah muyang kalo' Paulus, dahin medéng-medéng, ken na', “Kelunan anih nyam-panyin Allah aleng Kelalau Bau aleng bara men ikam alan urip.” 18#Mk 16:17; HST 19:13 Nunan nah iha' na kuri-kuri dau dara na'. Bi Paulus em deng pihen, avin to' atih petusah nutih, pelalau iha' nelunga' dahin kuma' men to' atih, “Alem aran Tuhan Yesus Kristus akui nyihu ika' musang men alem na',” ken na'. Pelalau musang nah iha' alem jam anan.
19Tegu dalo' aleng nyihu iha' atih nyineng ket aleng avan dalo' ala utung uh em té', pelalau dalo' atih gem Paulus dahin Silas, dahin mahin dawa' atih halem pasen pala dalo' kelunan aya'. 20#1 Laj 18:17; HST 17:6 Uh dalo' geri dawa' atih pala dalo' kelunan aya', iha' nah dalo' kuma', “Dawa' kelunan anih kelunan Yahudi aleng petusah lelan daléh tam anih, 21aleng bara adet aleng em haman en tam ala dahin ngioh, avin itam anih kelunan Roma.” 22#2 Kor 11:25; Fil 1:30; 1 Tes 2:2 Peng kelunan atih pah peju lawan dawa' atih, pelalau dalo' kelunan aya' atih mirak mebet ket en dawa' té' dahin nyihu nukun dawa' té' tukun. 23Tegu daha' uh nukun dawa' kuri-kuri hangun, en daha' uleng nah dawa' alem uma jin, dahin nyihu laké' aleng dekaya' alem uma jin anan pian dawa' sayu-sayu. 24Uh iha' ala daho' nunan, pelalau iha' metei dawa' halem tilung aleng marung belua alem jin dahin mesung kudek dawa' té' kayo' pesung.
25Bi tegu kio' belua malem Paulus dahin Silas pah sebayang dahin nyanyi mahek Allah, lim daha' alem jin atih pah kelenghi dahun dawa'. 26Beka' tenup-tenup nah tana ngetiwet aya' lan-lan, ateng jihé' uma atih pah megiung. Pelalau neng'ap nah lim-lim ba ketamen, dahin lim kaput pesung lim kelunan anan pah puvan nah. 27Laké' aleng jaga jin atih pah tekjet ma'un men udu na' dahin nyineng ba ketamen jin atih uh neng'ap, lun en na' jat nah malat na' seng ngenep lematei batung na' dep, avin kio' na' kelunan aleng alem jin atih uh lap. 28Paulus pah medéng dahin daho' aya', ken na' “Meng im meté' batung ka', avin té' kah kamé' lim.” 29Pelalau laké' aleng jaga jin atih kahi lirui, pelalau tepurung tei halem, dahin ngetiwet ngihau, pelalau ngelu'ep kahi asi ha' unan Paulus dawa' Silas atih. 30#HST 2:37 En na' geri nah dawa' musang, pelalau kuma', “U Amei, nun aleng tekep seng ek na ja akui murip?” 31Lun ken dawa' nah, “Nginah nah té' Tuhan Yesus, nurei ika' ala urip, ika', dahin lim huang amin ka' lahuh.” 32Pelalau dawa' bara dahun Tuhan men iha', dahin lim kelunan aleng té' alem amin na'. 33Pelalau malem anan pah iha' geri dawa' atih, pelalau mayau kelepatung dawa', tegu anan pah iha' duh alem aran Tuhan dahin lim daha' alem amin na'. 34Lun en na' geri nah dawa' ma'un hujung uma na', pelalau na' uk nah kanen men dawa', iha' pah sayu lelan kenep na', dahin lim daha' alem amin na', avin daha' uh nginah té' Allah.
35Dau malah ji, en dalo' kelunan aya' nyihu nah daha' pulis tei pala laké' aleng jaga uma jin atih dahin kuma' men iha', “Akau nah dawa' anan.” 36Pelalau laké' aleng jaga uma jin atih bara daho' atih men Paulus, ken na', “Dalo' kelunan aya' uh mekoh kua' ji'ek puéh. Avin iha' nunan pelihei nah kua' ji'ek tei musang, tei nah kua' dahin dena' kenep kua'.” 37#HST 22:25 Bi ken Paulus men dalo', “Kawa' anih pah uh en daha' nukun ha' unan daha' ngahum alem em payan butet daho' marung kawa', lan pah kawa' kelunan Roma lahuh, en daha' sau nah kawa' halem jin, kerei inih ké' beka' daha' ngenep makau kawa' nyilem. Nusi' peletu-letu ha' nutih. No' tuken batung daha' nei geri kawa' musang, uréh ha'.” 38Tegu dalo' pulis atih bara dawa' atih kelunan Roma men daha' kelunan aya' pelalau takut nah daha'. 39#Mat 8:34 Nei nah dalo' atih pelalau nyebelang dawa'. Tegu dalo' uh geri dawa' musang, iha' nah daha' nyihu dawa' lap men daléh atih. 40Musang nah dawa' men alem jin atih, pelalau tei alem uma Lidia. Uh dawa' pejam dahin lim daha' harin tam alem Tuhan, en dawa' nangen nah daha', uh anan pelalau panau nah dawa'.
Currently Selected:
HADUI DAHA' SIHU TUHAN 16: TDK1990
Highlight
Share
Copy
Want to have your highlights saved across all your devices? Sign up or sign in
Bible in Today's Dahun Kayan Version © Bible Society of Malaysia, 1990.
