HADUI DAHA' SIHU TUHAN 17
17
Hadui Paulus ha' Tesalonika dahin ha' Berea
1 #
1 Tes 2:2
Tegu dawa' atih uh lalau Amfipolis dahin Apolonia, ateng nah dawa' ha' Tesalonika, hinan té' uma sebayang daha' Yahudi. 2Paulus pah tei halem uma sebayang tih dahin daha' anan awi kalei na' pa'en. Ha'ut Dau Kelarah anan, alem telo' migu, iha' pehu'ei dahin daha' atih marung alem surat Tuhan, 3#Lk 24:26-27,45-46 iha' nujo' dahin bara marung Kristus adang ga' katé' dahin peju murip men hang kelunan matei, ken na', “Yesus, aleng ek bara ikam anih, iha' nah Kristus.” 4Té' balei men daha' atih nei nginah, daha' atih nah aleng peji dahin Paulus dawa' Silas, nunan pah lahuh ngahum kelunan Yunani aleng uh nginah té' Allah men'a, dahin kuri-kuri doh aleng té' aran lahuh.
5Bi mi'en uh kenep daha' Yahudi tih, en daha' ala nah men pasen kuri-kuri kelunan aleng na hadui aleng ji'ek lelan, daha' anan pah pelalau mepeng daha' ngahum, nei peju lawan té' alem daléh anan. En daha' pehigum nah uma Yason, ngenep geri Paulus dawa' Silas musang ha' kelunan ngahum. 6#HST 16:20 Bi avin daha' em pesuk dawa' atih, daha' mejat Yason dahin kuri-kuri daha' harin tam ha' unan daha' aleng dekaya' daléh anan, pelalau medéng, ken daha', “Dalo' kelunan anih aleng uh nga'um ji usun tana anih té' kah uh ateng ha' daléh tam nih, 7#Lk 23:2; Yoh 19:12; Rom 16:21 Yason pah uh ala dawa' lebau uma na' lahuh. Bi lim kelunan anih na barik daha' dep, aleng muau tebara Kaisar, dahin kuma' té' laja' ha' béh, iha' tih Yesus,” ken daha'. 8Kawah nah kenep kelunan kahum anan dahin dalo' pengulu' daléh atih tegu daha' kelenghi daho' atih. 9Tegu Yason dahin dalo' aleng ha' béh ma'uk ket kalui batung dalo', iha' nah daha' atih mekoh dalo' tei.
Tangen kenep daha' ha' Berea
10Pelalau dalo' harin tam atih nyihu Paulus dawa' Silas tei salet tegu malem, tei ha' Berea. Tegu dawa' uh ateng tinan, pelalau dawa' tei alem uma sebayang daha' Yahudi. 11#Yoh 5:3 Daha' aleng tinan sayu men'uh daha' kelunan Tesalonika, avin daha' ala dahun Tuhan dahin tangen lelan kenep, dahin ha'ut-ha'ut dau nyineng dahin ngetneng alem surat Tuhan ja daha' jam iha' uh teneng lan tuk na' nunan. 12Avin anan ngahum nah kelunan men hang daha' anan nginah, nunan pah lahuh daha' doh aleng té' aran men daha' Yunani, dahin laké' pah ngahum lahuh. 13#Yoh 5:3 Bi tegu daha' Yahudi ha' Tesalonika jam marung tuk dahun Allah en Paulus bara ha' Berea, lun tei nah daha' anan hinan lahuh, pebisau dahin pekihau kenep daha' kahum. 14#1 Tes 2:14 Uh anan pelalau daha' harin tam atih neven Paulus nyihu iha' tei ha' benghé' banget, bi Silas dahin Timotius melo' ha' Berea nan.
Paulus ha' Atena
15Bi kelunan aleng maten Paulus anan geri iha' ateng ha' Atena. Uh anan leka' nah daha' seng uli, té' pah daha' geri dahun Paulus men Silas dawa' Timotius nyihu dawa' salet nei ha' iha' hinan.
16Alem Paulus pidah dawa' anan ha' Atena nan, negisuk nah alem kenep na' tegu iha' nyineng daléh anan penu dahin hudo'. 17Iha' nah iha' nengaran pehilu-hilu alem uma sebayang men daha' Yahudi dahin daha' aleng nginah lan, nurei pah ha' pasen ha'ut dau iha' meté' bara daha' aleng pesuk na'. 18#1 Kor 4:12 Té' pah kuri-kuri la'ung aleng haman alem katuk daha' Epikuros dahin katuk Stoa pehating dahin na'. Té' aleng kuma', “Nun aleng kenep laké' mipan anih bara pa?” Bi té' aleng ha' béh kuma', “Jam na' iha' pedengah to' aleng ha' béh.” Nunan dahun daha' avin Paulus bara marung tuk Yesus dahin marung Iha' nei peju murip. 19Daha' atih pah gem Paulus pelalau geri iha' ha' uma Areopagus, ken daha', “Sayu im bara men kamé' katuk aleng maring aleng im bara anih. 20Avin ika' geri daho' aleng selap tula té' iling amé'. Avin anan kamé' ngenep jam nun alem daho' anih.” 21(Lim-lim kelunan Atena dahin kelunan hakei pah nusi' daha' na hadui aleng ha' béh, bi daha' tengaran-tengaran tua dahin kelenghi marung nun-nun daho' aleng maring.)
22Lun biti nah Paulus marung belua uma Areopagus anan, dahin kuma', “U kelunan Atena, awi ngioh ket aleng kitak, adang akui kuma' ikam tangen alem adet kam. 23Avin tegu akui panau-panau dahin pelemana' lim-lim ket ngavan kam sebayang, té' nah akui jam lahuh ji davan lasan laluh aleng té' kalung nunih, ‘MEN ALLAH ALENG EM KITAN KELUNAN.’ Ket ngavan kam sebayang aleng em kitan kam kurin kama anan, Iha' pah aleng seng ek bara men ikam.
24 #
1 Laj 8:27; Yes 42:5; Mat 11:25; HST 7:48 “Allah aleng na usun tana dahin lim-lim huang na', Iha' nah aleng Tuhan langit dahin tana, nusi' Ha' melo' alem uma aleng kenan usu kelunan, 25#NDI 50:12 nusi' pah kelunan pekwat ma'uk ket men Iha', awi jam tuk Iha' humé' té' nun-nun, avin batung Na' aleng ma'uk urip men ket lim-lim, dahin henga', dahin lim-lim ket nun-nun. 26#Kel d M 32:8 Men ji la'ung tua Iha' na lim-lim na'an kelunan ja daha' melo' té' ji usun tana anih. Iha' pah aleng petneng jaka' daha' dahin na hang ngavan daha' murip, 27#Yes 55:6 ja daha' atih ilau Allah, ja daha' ngakap ilau Iha', dahin pesuk Iha'. Bi Iha' em su men itam ha'ut-ha'ut la'ung, 28#NDI 145:18; Yer 23:23 avin
‘Alem Na' itam murip dahin ngimet, alem Na' pah itam uh la'ung murip.’
Awi dahun kuri-kuri la'ung men ikam aleng haman peleken,
Avin itam pah pahu men Iha' lahuh,’
ken daha' di. 29#Ar Kel 1:27; Yes 40:18; HST 19:26; 1 Kor 12:2 Avin itam uh pahu Allah, nusi' tekep itam kuma' Allah atih awi jam tuk met, awi pirek, awi bato', aleng en daha' na hudo' kenan ugé' dahin haman kelunan. 30#Lk 24:27; HST 14:16; 17:23 Urip aleng buta' anan dih en Allah kelung tua anan menuna', bi kerei inih, lim-lim kelunan hino'-hino' pah en Na' nyihu nah itam ngelisah kenep, 31avin Iha' uh petneng ji dau, aleng ngavan Na' seng mukum usun tana anih dahin teneng. Té' pah ji kelunan aleng uh en Na' petneng seng mukum na'. Marung tuk Iha' nah Iha' uh na lim kelunan jam lan, iha' tih Iha' uh meju Iha' murip men hang kelunan matei.”
32Tegu daha' atih kelenghi daho' marung kelunan matei nei peju murip, balei men daha' nuten, bi té' daha' balei aleng kuma', “Kamé' ngenep kelenghi la'an marung tuk anih.” 33Men'uh anan musang nah Paulus men hang daha', 34bi té' kuri-kuri la'ung aleng peji uyun dahin na', dahin nginah. Té' hang daha' anan té' Dionisius kelunan kemiti Areopagus dahin ji doh aran na' Damaris dahin kelunan ha' béh pah lahuh dahin dawa'.
Currently Selected:
HADUI DAHA' SIHU TUHAN 17: TDK1990
Highlight
Share
Copy
Want to have your highlights saved across all your devices? Sign up or sign in
Bible in Today's Dahun Kayan Version © Bible Society of Malaysia, 1990.
