YOHANES 19

Marung katé' Yesus

Mat 27:15-31; Mk 15:6-20; Lk 23:13-25

1Uh anan Pilatus ala Yesus pelalau jeliket Iha'. 2En daha' seladu anyam nah ji lavung uleng metei na' té' kahung Na', dahin metei ji basung aru aleng bela, en Na' té', 3#Yoh 18:22 pelalau daha' nei pala Iha' dahin kuma', “Ju nah Laja' daha' Yahudi,” ken daha', dahin nebip hineng Na'.

4Musang nah Pilatus la'an dahin kuma', “Nyineng kam, akui geri Iha' musang men ikam, ja kam jam akui em pesuk sala nun-nun halem Na',” ken na'. 5Musang nah Yesus paget lavung uleng dahin basung aru aleng bela atih. Pelalau Pilatus kuma' men daha', “Nyineng kam kelunan anih,” ken na'. 6Tegu daha' imam aya' dahin daha' pulis nyineng Iha', medéng nah daha' lim-lim, “Selepang nah Iha'! Selepang nah Iha'!” ken daha'. Iha' nah Pilatus kuma' men daha', “Kam ala nah Iha', en kam selepang nah Iha', avin akui em pesuk sala nun-nun halem Na',” ken na'. 7#Lewi 24:16; Yoh 5:18; 10:33 Lun nyu'ei nah daha' Yahudi iha', “Té' ji tebara amé', ngioh tebara atih pah nusi' deng Iha' em matei, avin Iha' kuma' Iha' Anak Allah,” ken daha'.

8Tegu Pilatus kelenghi daho' atih, sa'-sa' takut nah iha', 9tei nah iha' halem kubu besara' la'an dahin kuma' men Yesus, “Men ino' pa'un Ka'?” ken na', bi nusi' Yesus nyu'ei iha'. 10Kuma' pah Pilatus men Iha' la'an, “Nusi' Ka' nyu'ei akui iah? Nusi' Ka' jam akui aleng deng makau Ika', nurei pah deng nyelepang Ika'?” ken na'. 11#Yoh 10:18; HST 2:23 Iha' nah Yesus nyu'ei, “Ji nun pah ika' em deng na té' Akui iha' Tamak em mekoh ika' na na'. Avin anan, kelunan aleng ma'uk Akui men ika', iha' nah aleng lalau sala,” ken Na'.

12 # HST 17:7 Men tegu atih Pilatus ilau alan seng makau Iha', bi medéng aya'-aya' nah daha' Yahudi, “Iha' ika' makau laké' anih, nusi' ika' bakéh Kaisar la'an. Ha'ut la'ung aleng meju iha' dep jadi' laja', iha melawan Kaisar anan,” ken daha'. 13Tegu Pilatus kelenghi daho' atih en na' geri nah Yesus musang, pelalau melo' nah iha' té' ladung besara' té' ngavan aleng aran na' Latan Bato', alem dahun Ibrani Gabata aran na'. 14Dau anan Dau Daha' Petmei Paskah, té' awi dau negreng. Kuma' nah Pilatus men daha' Yahudi, “Nyineng nah Laja' kam,” ken na'. 15#19:6 Bi medéng nah daha', “Sau nah Iha', sau nah Iha', selepang nah Iha'!” ken daha'. Pilatus kuma' men daha', “Seng tekep akui nyelepang Laja' kam iah?” ken na'. Nyu'ei nah lim daha' imam aya', “Nusi' té' laja' amé' ha' béh, Kaisar dep kah,” ken daha'. 16Avin ha' nunan Pilatus ma'uk Yesus men daha' ja daha' nyelepang Iha'.

Marung Tuhan Yesus té' té' salip

Mat 27:32-44; Mk 15:21-32; Lk 23:26-43

17En daha' ala nah Yesus, Iha' pah nyi'un kayo' salip Na' dep, musang tei pala ngavan aleng aran na' Ngavan Tulang Kahung, alem dahun Ibrani Golgota. 18Tinan nah daha' nyelepang Iha', dahin dua' la'ung kelunan pelengep Iha', Yesus marung belua.

19En Pilatus ngalung nah ji surat, en na telepet té' salip atih, nunih dahun na', “Yesus laké' Nazaret, Laja' daha' Yahudi.” 20Ngahum daha' Yahudi basa' kalung atih, avin ngavan daha' nyelepang Yesus atih jeleng daléh, ji pah la'an, kalung atih alem dahun Ibrani dahin dahun Roma dahin dahun Yunani lahuh. 21Daha' imam aya' dahin daha' Yahudi kuma' men Pilatus, “Meng ngalung ‘Laja' daha' Yahudi.’ Sayu na, ‘Kelunan anih kuma', Akui nah Laja' daha' Yahudi,’ ” ken daha'. 22Iha' nah Pilatus nyu'ei, “Uh nah anan aleng uh ek ngalung anan,” ken na'.

23Uh nah dalo' seladu nyelepang Yesus, en dalo' ala nah kanan Na', en dalo' petulan pat, ji tulan men ji la'ung dalo'. Té' pah basung aru Na' la'an en dalo' ala, nusi' té' kepet basung atih, ji tua anyam na' men ujung ateng ida, 24#NDI 22:19 iha' dalo' kuma' pedeng dalo', “Meng telo' mirak na', sayu telo' tikem surat ja telo' jam hi si' aleng ala na',” ken dalo', ja ha' nei la'ung dahun surat Tuhan aleng kuma',

“Dalo' petulan kanan Kui pedeng dalo',

ateng basung Kui en dalo' tikem surat.”

Nunan loh kah en dalo' seladu atih na. 25Té' béh kayo' salip Yesus atih hinan Na' nekring, dahin harin hinan Na' aleng doh, Maria doh Klopas dahin Maria Magdalena. 26#Yoh 13:23 Avin ha' nunan, tegu Yesus nyineng hinan Na' dahin anak sekulah aleng ngavan Na' halam atih nekring jeleng tinan, Iha' kuma' men hinan Na', “U Inei, nyineng nah Anak ka',” ken Na'. 27Uh anan Iha' kuma' men anak sekulah atih, “Im nyineng nah hinam,” ken Na'. Men jam atih anak sekulah atih geri iha' uli hamin na'.

Tuhan Yesus matei

Mat 27:45-56; Mk 15:33-41; Lk 23:44-49

28 # NDI 22:16; Yoh 13:3; 18:4 Men'uh anan kitan Yesus nah lim-lim hadui Na' hu'uh la'ung, iha' nah Iha' kuma', “Megang ba Kui,” ken Na', ja ha' nei la'ung dahun surat Tuhan. 29#NDI 69:22 Té' pah ji tajau tinan penu ata' agun aleng sem, pelalau en daha' ala nah ji lumut karang mesup na' alem ata' sem atih, en daha' tei hujung ji da'an kayo' jupa en daha' tei té' ba Yesus. 30Uh Yesus pesek ata' agun aleng sem atih, Iha' kuma', “Uh nah,” ken Na', pelalau Iha' nukem ma'uk Beluan Na'.

31 # Kel d M 21:23 Avin dau atih dau daha' Petmei, iha' nah daha' Yahudi tei pala Pilatus ja patei atih em té' ha' kayo' salip tegu Dau Kelarah, avin Dau Kelarah atih ji dau aya' lan. Daha' kahi seng merung kudek dalo' dahin geri dalo' hida. 32Avin ha' nunan, dalo' seladu tei, pelalau dalo' merung kudek dawa' laké' aleng en daha' selepang pelengep Iha' anan. 33Bi tegu dalo' ateng ha' Yesus kitan dalo' Iha' matei, nusi' nah dalo' merung kudek Na'. 34Bi ji seladu muluh tekhang Na', pelalau musang nah daha dahin ata'. 35Laké' aleng nyineng na' atih, iha' aleng bara marung anih, tira na' atih pah lan, iha' pah jam marung tira na' atih teneng, ja kam nginah. 36#Us 12:46; Kah d Is 9:12; NDI 34:21 Avin lim-lim tuk anih jadi' ja ha' nei la'ung dahun surat Tuhan, “Ji tulang Na' pah em berung,” ken surat arei dih. 37#Zak 12:10; K Tula 1:7 Té' pah surat Tuhan aleng ha' béh kuma', “Daha' seng nyineng Iha' aleng en daha' muluh.”

Daha' nepiha' Yesus

Mat 27:57-61; Mk 15:42-47; Lk 23:50-56

38Men'uh anan tei nah Yusuf, ji laké' Arimatea, anak sekulah Yesus kah iha' lahuh, bi alem kenep na' selem tua, avin iha' takut té' daha' Yahudi, iha' tei ha' Pilatus akei patei Yesus. Pilatus pah mun iha' ala na'. Pelalau iha' tei ala patei Yesus. 39#Mat 2:11; Yoh 3:1-2 Nikodimus aleng tei pala Yesus malem menuna' dih pah tei lahuh, geri tepung mur, peklet tepung garu', té' awi matuh kati' nih bahat na'. 40Dawa' ala patei Yesus, en dawa' nutun té' balun lanih, nutun dahin tuk uro' bu sayu anan dih, ngioh adet tepiha' daha' Yahudi. 41Té' ji lida jeleng ngavan daha' nyelepang Yesus atih, alem lida atih té' ji tanem bato' en daha' na maring, nusi' payan daha' metei kelunan halem na'. 42Tinan nah dawa' metei patei Yesus avin Dau Petmei daha' Yahudi, ji pah la'an avin tanem bato' atih jeleng tinan.

Currently Selected:

YOHANES 19: TDK1990

Highlight

Copy