YOHANES 20

Tuhan Yesus tula té' Maria

Mat 28:1-10; Mk 16:1-11; Lk 24:1-12

1Té' dau aleng aring migu anan, jihima pesun-pesun alem ha' lidem loh, tei nah Maria Magdalena ha' tanem atih, iha' nah iha' jam bato' ben tanem atih uh pasan. 2#Yoh 13:23 Pelalau iha' tepurung pala Simon Petrus dahin anak sekulah aleng ha' béh atih lahuh aleng ngavan Yesus dekaya' kenep atih, dahin kuma' men dawa', “Uh daha' ala nah Tuhan men alem tanem Na', nusi' pah telo' jam ngavan daha' metei Iha',” ken na'. 3Tei nah Petrus dawa' anak sekulah aleng ji atih, pala tanem Na'. 4Tepurung nah dawa' tugung, bi anak sekulah aleng ji atih tu'a ha', ateng nah iha' una' ha' tanem, 5pelalau nudok nyineng halem, kitan na' nah lim balun lanih atih melek tinan, bi nusi' ha' tei halem. 6Uh anan ateng nah Petrus men la'ung na', pelalau tei halem tanem atih. Kitan na' pah balun lanih atih, 7#Yoh 11:44 dahin pelasa' aleng ha' kahung Na' dih, bi nusi' pelasa' anan peji dahin balun lanih atih, bi uh lulun ha' avan ha' béh. 8Anak sekulah aleng ateng una' ha' tanem atih dih tei halem lahuh, pelalau nyineng dahin nginah, 9#HST 2:24-32; 1 Kor 15:4 avin nusi' payan dawa' jam sin daho' alem surat Tuhan aleng kuma' Iha' nusi' deng em peju men hang kelunan matei, arei dih.

10Uli nah dawa' pala uma dawa'. 11Bi Maria nekring hawang, nangih té' béh tanem atih. Alem ha' nangih, iha' nudok nyineng halem tanem, 12pelalau iha' jam dua' meliket puti lelan kanan dawa', melo' té' ngavan patei Yesus atih, ji ha' ngavan kahung Na', ji ha' ngavan kudek Na'. 13Lun kuma' nah meliket atih men Maria, “U Aré', na' nun ka' nangih?” ken dawa'. Iha' nah Maria kuma' men dawa', “Avin daha' uh ala Tuhan kui, nusi' pah akui ji'ek jam ngavan daha' metei Iha',” ken na'. 14Uh Maria kuma' nunan nyili nah iha', pelalau kitan na' nah Yesus nekring, bi nusi' ha' jam Iha' Yesus. 15Yesus meteng iha', “U Aré', na' nun ka' nangih? Ilau hi ika' nan?” ken Na'. Bi avin Maria ngio' Iha' puboh lida, iha' ha' nyu'ei, “U Amei, iha' ika' uh geri Iha' men inih, im bara ngavam metei Iha' men akui sikah, ja kui tei ala Iha',” ken na'. 16Pelalau Yesus kuma' men iha', “Maria,” ken Na'. Pelalau Maria nyili dahin kuma' alem dahun Ibrani, “Raboni,” ken na', aleng aran na', “Guru.” 17#Rom 8:29; Ib 2:11-12 Iha' nah Yesus kuma' men iha', “Meng im ivit Akui, avin nusi' payan Kui tei ma'un ha' Tamei. Tei nah im ha' dalo' harik lim, bara men dalo' Akui seng ma'un tei ha' Tamak aleng Taman kelo' lahuh, tei pala Allah Kui aleng Allah kelo' pah lahuh,” ken Na'. 18Tei nah Maria Magdalena atih bara men dalo' anak sekulah, “Akui uh nyineng Tuhan,” ken na', té' pah iha' nira marung Yesus uh bara lim tuk-tuk atih men iha'.

Tuhan Yesus tula té' dalo' anak sekulah

Mat 28:16-20; Mk 16:14-18; Lk 24:36-49

19Tegu levi dau migu nan pepeng nah lim dalo' anak sekulah Yesus alem ji amin, en dalo' malen nah lim ketamen avin dalo' takut té' daha' Yahudi. Tegu anan beka' nei nah Yesus nekring marung belua dalo' dahin kuma', “Dena' sayu nah kenep kelo'.” 20#1 Yoh 1:1 Uh Iha' kuma' nunan, Iha' bara usu dahin tekhang Na' men dalo'. Sayu lelan nah kenep dalo' tegu dalo' nyineng Tuhan. 21#Yoh 17:18 Iha' pah Yesus kuma' men dalo' la'an, “Dena' sayu nah kenep kelo'. Piah awi Tamak uh nyihu Akui nei, nunan kah Akui nyihu kelo' tei.” 22#Ar Kel 2:7 Uh Ha' kuma' nunan, pelalau Iha' mahen dalo', dahin kuma', “Ala nah kelo' Belua' Ma'ang. 23#Mat 16:19; 18:18 Sala hi-hi kah aleng en kelo' bet, pebet nah sala daha' atih. Sala hi-hi kelo' em mun mebet, nusi' sala daha' atih pebet,” ken Na'.

Tuhan Yesus tula té' Tomas

24 # Yoh 11:16; 14:5 Té' pah Tomas, ji la'ung men dalo' pulu-dua' anak sekulah, aleng en daha' na aran na' Didimus, nusi' té' iha' dahin dalo' tegu Yesus ateng anan. 25#Yoh 19:34 Iha' nah dalo' anak sekulah aleng ha' béh atih kuma' men Tomas, “Kalo' uh nyineng Tuhan dih,” ken dalo'. Bi Tomas kuma' men dalo', “Em payan akui jam ava' usu Na' ga' tapek, dahin metei jahangau kui té' ava' anan, dahin metei usu kui té' tekhang Na', nusi' kui nginah,” ken na'.

26 # Yoh 20:19 Saya' dau men'uh anan dalo' anak sekulah pepeng té' alem uma, Tomas pah té' dahin dalo' lahuh. En dalo' malen nah ketamen, beka' nei nah Yesus nekring marung belua dalo' dahin kuma', “Dena' sayu nah kenep kelo'.” 27Pelalau Iha' kuma' men Tomas, “Jei jahangau ka', nyineng usu Kui, jei nah usu ka', tei té' tekhang Kui. Meng im em nginah, bi sayu im nginah,” ken Na'. 28#Yoh 1:1 Lun nyu'ei nah Tomas dahin kuma' men Iha', “u Tuhan kui, u Allah kui,” ken na'. 29#1 Pet 1:18 Yesus kuma' men iha', “Avin ika' uh nyineng Akui nih, iha' nah ika' nei nginah. Bi sayu lan nah men kelunan aleng nginah pekuna' em payan iha' nyineng,” ken Na'.

30Lan, ngahum pah tada' aleng ha' béh lahuh en Yesus na ha' unan alo' anak sekulah Na', aleng em té' alem surat anih. 31#Rom 1:17; 1 Yoh 5:13 Bi tuk-tuk anih ek ngalung ja ikam nginah marung Yesus Iha' nah Kristus, Anak Allah, alem ikam nginah pah ikam deng ala urip avin aran Na'.

Currently Selected:

YOHANES 20: TDK1990

Highlight

Copy