LUKAS 12
12
Yesus mano' daha' aleng dua' jela'
1 #
Mat 16:6; Mk 8:15 Alem nunan dih, uh pepeng nah kuri-kuri libu' kelunan ateng daha' ngepu'an tedah tua peng daha'. Pelalau Yesus matoh katuk Na' men dalo' anak sekulah Na' una' dahin kuma', “Mengan nah batung kelo' men tavah daha' Farisi aleng dua' jela'. 2#Mat 4:22; Lk 8:17 Avin ket aleng en havun karih loh kah baya, dahin ket aleng en huk tula loh kah baya tih lahuh. 3Avin anan ket aleng uh kelo' bara alem lidem seng kelenghen daha' alem malah, dahin daho' hivuk kelo' men daha' alem tilung seng en daha' pedengah men ujung mubung uma.
Meng takut té' kelunan. Meng'i Yesus
Mat 10:28-33; 12:32; 10:19-20
4“Akui kuma' men ikam, u bakéh Kui, meng nah kelo' takut té' kelunan aleng lematei batung, men'uh anan pah ji nun-nun pah daha' em deng na la'an. 5Bi Akui bara men kelo' té' hi aleng ngavan kam tekep takut, sayu nah kelo' takut té' Iha' aleng deng lematei atih, avin Iha' nah aleng té' tingan mesau alem apui neraka. Lan, Akui kuma' men ikam, sayu nah ikam takut té' Iha'.
6“En kam nyineng nah manuk pit, dua' sin kah legah lima' batung pit di? Lan pah iha' nunan, ji-ji batung pah Allah em tei hadau té' daha'. 7#Lk 21:18 Bi buk aleng té' ha' kahung kam lim na' uh en Na' ujap. Meng nah ikam takut, ikam aleng kelalau sayu men'uh manuk pit aleng kahum atih.
8“Akui kuma' men ikam, ha'ut-ha'ut la'ung aleng meng'i Akui ha' unan kelunan, Anak-kelunan pah seng meng'i iha' ha' unan meliket Allah. 9#Lk 9:26 Bi hi aleng muau Akui ha' unan kelunan, iha' pah seng en uau ha' unan meliket Allah.
10 #
Mat 12:32; Mk 3:29 “Bi hi-hi aleng na daho' nun-nun melawan Anak-kelunan, sala na' seng pebet, bi hi-hi aleng peji'ek Belua' Ma'ang, nusi' nah sala na' pebet.
11 #
Mat 10:19-20; Lk 21:14-15 “Tegu kelunan geri ikam ha' unan kemiti uma sebayang dahin ha' unan laja' dahin perintah, meng nah ikam kawah kenep marung nuno' tuk dahin nun-nun aleng kenep kam nyu'ei, dahin nun-nun aleng kenep kam kuma', 12avin tegu jaka' atih Belua' Ma'ang aleng seng katuk ikam marung tuk-tuk daho' aleng seng en kam tira.”
Ivun laké' kaya' aleng palui
13Té' hang peng daha' atih, té' ji kelunan aleng kuma' men Iha', “Guru, Im nyihu harik petulan daven awa' men kawa'.” 14#HST 7:27 Bi ken Yesus men iha', “U anak, hi kah aleng na Akui hakim dahin kelunan aleng petulan daven men ikam?” 15#1 Tim 6:9-10 Ken Na' pah men daha' la'an, “Hituk nah sayu-sayu, lavat nah ikam, bahi ikam ngivah nun-nun, avin nusi' kelunan murip kenan kahum daven na'.” 16Pelalau Iha' bara ji ivun men daha', ken Na', “Té' ji laké' kaya' aleng ala kahum lelan uli tuvuh na' té' tana na'. 17Ken na' alem kenep na', ‘Nun aleng tekep ek na lo? Avin nusi' nah té' avak melo' uli tuvuh kui la'an.’ 18Ken na', ‘Nunih nah. Akui seng nasa' lim lepau kui dahin na aleng dekaya' la'an. Hinan nah akui melo' parei kui dahin lim daven kui lahuh. 19Akui pah seng kuma' men urip kui, U urip kui, té' pah kuri-kuri daven uh en lo' patem men ika', deng kuri-kuri duman dara na'. Peseneng nah im, kuman, du'i dahin pekelu'an.’ 20#Ib 9:27 Bi Allah kuma' men iha', ‘U kelunan palui, malem anih hengam seng Ek ala men batung ka'. Lim ket aleng uh im temei atih, hi seng hipun na' la'an.” 21#Mat 6:20 Nurei pah lahuh kelunan aleng mepeng daven men batung na' dep, bi nusi' ha' kaya' dahin Allah.”
Marung tuk kawah té' henga'
Mat 6:25-34
22Ken Na' men dalo' anak sekulah Na', “Avin atih Akui kuma' men kelo', meng nah kelo' kawah marung tuk hengan kelo', iha' tih nun aleng seng en kelo' kani dahin marung tuk batung kelo' nun aleng en kelo' pakei. 23Avin henga' atih lalau men'uh ket kelo' kani, dahin batung atih lalau men'uh kanan kelo'. 24#NDI 147:9 Pelemana' nah marung manuk ka, nusi' daha' murah beni dahin ngelunau, nusi' pah té' ngavan nguyo' daha' dahin lepau daha', bi Allah tuboh daha'. Lalau lan pah kelo' men'uh manuk-manuk atih. 25Hi men hang kam seng deng metuk uk-iduk urip na' iha' ha' kawah kenep na' té' urip na'? 26Tana' ikam em deng na ket aleng kelalau da'uk, seng nun pekwat ikam kawah té' ket aleng ha' béh atih?
27“Pelemana' nah pidang bunga' nuno' tuk urip daha', nusi' daha' nyadui dahin nalé'. Akui kuma' men kelo', lan pah Salomo dahin lim-lim aren na' nusi' pah iha' kajau awi ji bunga' atih. 28Nyineng kelo' kajau uro' aleng hawang tana tih kereng, jima duji tih en daha' sau alem apui kah tua, lalau lan nah kelo' anih, nusi' beloh-beloh halam Allah té' kelo', na' nun kelo' em nginah pa? 29Avin anan meng kelo' kawah kenep marung ket en kelo' kani dahin du'i. 30Nunan nah kenep kelunan aleng em nginah pa, pa'en kawah té' ket aleng nunan daha', bi marung kelo' anih, Taman kam pah aleng jam lim ket aleng alem kenep kelo' anan. 31Bi ilau nah Keligem Na', avin lim-lim ket atih pah seng Na' mi'at men ikam.
Daven ha' Surga
Mat 6:19-21
32 #
Yes 41:14; Lk 22:29 “Meng nah takut, u kelo' peng duba aleng da'uk anih, avin melu lelan kenep Taman kam seng ma'uk keligem Na' men ikam. 33#Lk 18:22 Belé' nah daven kelo' dahin ma'uk na' tua men kelunan. Kam na nah sut ligit aleng em tei muvuk men ikam ji daven ha' Surga aleng em tei pah, iha' tih ha' ngavan kelunan nakau em deng tei, dahin aleng em deng agin kuman na'. 34Avin hino'-hino' daven kam, hitih pah lahuh kenep kam.”
Ivun panyin aleng menga dahin aleng lekoh
35 #
Us 12:11; 1 Pet 1:13 Sayu nah kelo' temei nganan dahin lirui kelo' uh nyavet. 36#Mat 25:1-13; Mk 13:34-36 Sayu nah kelo' awi jam tuk kelunan aleng penga laké' aya' na tegu iha' uli men pahlung hawa', ja tegu iha' ateng dahin negek ketamen, daha' pah salet tei neng'eng ketamen men iha'. 37Sayu lan nah men daha' panyin na', aleng menga alem laké' aya' daha' tekjet ateng. Dahuk lan men kelo', laké' aya' tih pah seng nganan dahin nyihu daha' atih melo' kuman, pelalau iha' nei ateng matah kanan men daha' atih. 38Awi iha' nei ateng tegu daha' jaga malem, mina hiap ngeturut kah iha' ateng, bi daha' atih pa'en menga, sayu lan nah men panyin-panyin atih. 39Hituk nah, awi laké' aleng geri amin jam hiran jaka' kelunan nakau seng ateng, adang iha' mengan, nusi' nah iha' mun uma na atih seng en na' nasa'. 40Sayu nah ikam temei lahuh, avin dau ikam em ngio', dau atih nah Anak-kelunan seng nei.”
41Ken petrus, “Tuhan, ivun anan mega' té' kalo' dep iah, mega' té' kelunan lim iah?” 42#2 Tim 2:15 Ken Tuhan, “Hi kah bakéh aleng teneng dahin aleng nyemugen aleng en laké' aya' na' ju jadi' dekaya' alem uma na', aleng seng petulan kanen men daha' ha'ut-ha'ut la'ung tegu jaka' na'? 43Sayu lan nah men panyin atih aleng na nunan tegu laké' aya' na' atih ateng. 44#Mat 25:21 Dahuk lan men kelo', iha' seng petneng iha' té' ujung lim-lim ketanun na'. 45Bi awi panyin atih kuma' alem kenep na', ‘Laké' aya' kui dara em nei ateng,’ ken na', men'uh anan iha' jeliket daha' panyin laké' dahin doh, dahin kuman dahin du'i ateng mavuk, 46laké' aya' panyin atih seng ateng té' ji dau aleng em en na' ngio', dahin té' jam aleng em kitan na', pelalau iha' seng jeliket iha' lelan dahin metei iha' dahin daha' aleng em nginah.
47 #
Yak 4:17
“Té' pah panyin aleng jam kenep laké' aya' na', bi alem anan iha' em petmei dahin em ngioh aleng kenep laké' aya' atih, iha' seng ga' jeliket tutek, 48bi aleng em jam kenep laké' aya' na' atih dahin na ket aleng tekep ngavan jeliket iha', iha' seng en na' jeliket kanya tua. Avin men ha'ut-ha'ut kelunan aleng en daha' uk kahum, men iha' pah seng en daha' ilau kahum, dahin men kelunan aleng en daha' nginah lan, men iha' pah seng en daha' ilau kelalau kahum.
Yesus na daha' peselepi
Mat 10:34-36
49“Té' pah Akui nei anih seng murah apui té' usun tana. Java' ha' awi hu'uh havet men kerei inih! 50#Mat 20:22; 26:28; Yoh 12:27 Té' ji duh aleng adang Ngavak tei duh la'an, kelalau bahat kenep Kui marung tuk atih em payan la'ung. 51Té' kah kelo' ngio' Akui nei anih seng geri dena' té' usun tana anih? Akui kuma' men kelo', nusi', bi Akui nei seng ngenep na daha' peselepi. 52Avin men kerei inih lima' la'ung alem ji uma seng peselepi, iha' tih telo' la'ung melawan dua', dahin dua' la'ung melawan telo'. 53#Mik 7:6 Daha' seng peselepi, taman seng melawan anak-aké' na' dahin anak-aké' melawan taman na', dahin hinan melawan anak-doh na', dahin anak-doh melawan hinan na', hinan-divan seng melawan anak-divan na' aleng doh, dahin divan aleng doh melawan hinan-divan na'.”
Sayu nelana' urip
Mat 16:2-3
54Té' pah la'an dahun Yesus men kelunan aleng kahum, “Tegu ikam nyineng ji avun peju men béh matan dau ngesem, pelalau ikam kuma', ‘Iha' seng usan,’ adang usan atih nei lahuh. 55Tegu té' dih men pedah ulei matan dau pa'un ikam kuma', ‘Dau anih seng lasu jera',’ adang atih nei lahuh. 56U ikam aleng dua' jela', usun tana dahin langit ikam jam nelana', nuno' kah ikam em jam nelana' urip anih?
57“Avin nun kah tavit na' ikam em deng pelemana' men ikam dep ket aleng teneng? 58#Mat 3:10; 21:19; Mk 11:13; Lk 3:9 Alem ika' tei dahin kelunan aleng heléh dahim tei pala pengulu', alem kua' panau, nengayet im na sayu dahin na' ja ika' takau men iha', bahi iha' mahin ika' pala hakim atih, dahin hakim atih pah la'an ma'uk ika' men pulis, dahin pulis atih pah metei ika' alem jin. 59Akui kuma' men ika', nusi' peletu ika' seng musang men inan la'an em payan ika' bayen lim-lim utang ka' atih.”
Currently Selected:
LUKAS 12: TDK1990
Highlight
Share
Copy
Want to have your highlights saved across all your devices? Sign up or sign in
Bible in Today's Dahun Kayan Version © Bible Society of Malaysia, 1990.
