LUKAS 13
13
Yesus nyihu daha' Galilea ngelisah kenep
1Men tegu atih té' kuri-kuri kelunan aleng nei bara Yesus marung daha' Galilea aleng uh en Pilatus peklet daha daha' dahin laluh daha'. 2Hu'ei Yesus dahin kuma' men dalo' atih, “Nuno' aleng kio' kelo', kelunan Galilea anih kelalau dekaya' sala daha' men'uh lim kelunan Galilea ha' béh iah, avin daha' jam katé' nunan? 3Akui kuma' men kelo', nusi' ha' nutih. Bi awi kelo' em ngelisah kenep, adang kelo' lim pah seng tasa' awi daha' atih lahuh. 4Nuno' kio' kelo', pulu-saya' la'ung aleng matei belepuk kenan uma ha' daléh Siloam atih lalau dekaya' kah sala daha' men'uh lim daha' ha' béh aleng melo' ha' Yerusalem iah? 5Akui kuma' men kelo', nusi' ha' nutih, bi awi kelo' em ngelisah kenep, adang kelo' lim pah seng tasa' awi daha' atih lahuh.”
Ivun ji iung bua ara aleng em ngebua
6 #
Mat 3:10; 21:19; Mk 11:13; Lk 3:9 En Na' bara nah men dalo' ivun anih, ken Na', “Té' nah ji kelunan aleng hipun ji pa'un ara aleng uh na' tuvuh té' alem lida bua agun na'. Tei nah iha' ilau bua na' men pa'un atih, bi nusi' nah iha' pesuk. 7Pelalau ken na' men iha' aleng puboh lida atih, ‘Nyineng im, telo' duman uh dara na' akui nei ateng ilau bua men pa'un ara anih, bi nusi' kui pesek bua na'. Teveng nah iha'. Avin nusi' té' bang na' la'an, iha' na tana anih peset tua'. 8#2 Pet 3:9,15 Iha' pah nyu'ei dahin kuma' men iha', ‘U Amei, bei nah iha' em té' duman anih la'an, ek nyakun teliling na' arin, dahin metei baja té' iha', 9mina nei kah ngebua duman aréh na'a, tana' ha' em ngebua ia' ju im teveng kah tua Amei.’ ”
Iha' petagéh ji doh aleng té' perah pulu-saya' duman té' Dau Kelarah
10Alem Yesus katuk daha' alem ji uma sebayang té' Dau Kelarah. 11Té' nah ji doh tinan aleng uh té' to' nilung té' iha' pulu-saya' duman dara na' aleng na iha' perah ngehuyang, iha' uh katut la'ung na', dahin peletu em deng nei nekring tutau. 12Tegu Yesus nyineng iha', pelalau Iha' muvui doh atih dahin kuma' men iha', “U ika' doh anan, ika' uh takau men perah ngehuyang ka' anan,” 13#Mk 7:32 pelalau en Na' tei nah usu Na' té' ujung doh atih. Tugung atih tutau nah la'ung na', pelalau iha' meju aran Allah. 14#Us 20:9-10; Kel d M 5:13-14 Heléh nah kenep pengulu' uma sebayang atih avin Yesus petagéh iha' té' Dau Kelarah, dahin kuma' men daha' kahum, “Té' nem dau aleng tekep ngavan kelunan nyadui; avin atih tekep nah alem nem dau atih ikam nei ateng ala agéh, bi meng ha' tegu Dau Kelarah.” 15#Lk 14:5 Bi hu'ei Tuhan men iha' dahin kuma', “U kelo' aleng dua' jela', nusi' ikam makau kelebau dahin keledei kam tei geri daha' du'i tegu Dau Kelarah iah? 16#HST 3:25; Lk 19:9 Doh anih aleng ji la'ung anak Abraham aleng uh kaput kenan Setan uh pulu-saya' duman dara na', nusi' kah tekep iha' seng takau men kaput na' tegu Dau Kelarah iah?” 17Alem Iha' kuma' nunan, ha'éh nah lim daha' aleng heléh té' Iha' atih, bi lim kelunan aleng kahum atih melu avin lim hadui Na' aleng kelalau sayu aleng en na' Na.
Ivun ji la'ung sabéh dahin tavah
Mat 13:31-33; Mk 4:30-32
18Ken Na' la'an, “Nuno' jam keligem Allah kurin kam? Nun aleng en ta' katah na' re? 19#Yehez 17:23; 31:6; Dan 4:12,21 Iha' awi ji la'ung sebéh en ji la'ung api en na' tuvuh té' alem lida na', murip nah beni atih, pelalau jadi' ji iung aya', dahin manuk-manuk hida kelekawah anih pah murip té' ujung da'an na'.”
20Ken Na' pah la'an, “Te' nun nah Ita' ngatah keligem Allah lo? 21Iha' nah awi jam tavah aleng en ji doh ala, en na' peklet nah te' alem tepung telo' tebeng ateng iha nei ban lim.”
Ketamen aleng da'uk
Mat 7:13-14,21-23
22Men'uh anan dih panau nah Yesus alem lim daléh, leka' men ji daléh tei ha' ji daléh, leka' men ji uma tei ha' ji uma, katuk daha', dahin mejoh anau Na' tei ha' Yerusalem. 23Iha' ji la'ung kuma' men Iha', “U Tuhan, kanya tua kelunan aleng ala urip iah?” Ken Na' men daha', 24#Fil 3:12; 1 Tim 6:12 “Nengayet nah kelo' tei halem men ketamen aleng da'uk, avin Akui kuma' men kelo', kahum kelunan ngenep tei halem, bi nusi' nah daha' deng.
25 #
Mat 25:11-12
“Tegu Laké' Aya' uma peju malen ketamen, men'uh anan ikam ateng nekring hawang dahin negek ketamen dahin kuma', ‘U Amei, teng'eng nah ketamen men kamé',’ Iha' pah nyu'ei, ‘Nusi' Kui jam men ino' kelo' ateng.’ 26#Mat 7:22-23 Men'uh anan ikam seng kuma', ‘Kamé' hu'uh kuman dahin du'i ha' unan Ka', dahin Ika' pah hu'uh katuk kamé' té' alem alan-alan amé'. 27#NDI 6:9 Iha' pah seng kuma', ‘Dahuk lelan men kelo', nusi' Kui jam men ino' kam nei. Lap nah men Akui, ikam lim aleng manau hadui aleng em teneng,’ 28#Mat 8:11-12; 22:13; 25:30 Adang seng té' angih dahin gi'ét ipa' hinan tegu ikam nyineng Abraham dahin Ishak dahin Yakub dahin lim nabu alem keligem Allah, bi ikam anih seng en harang hawang. 29#NDI 107:3; Yes 49:12; 59:19; Mal 1:11; Lk 14:15 Té' kelunan aleng seng nei men pedah matan dau pa'un dahin men pedah matan dau uli, dahin men bah ta'o matan dau pa'un dahin men bah ulei matan dau pa'un seng pahlung alem keligem Allah. 30#Mat 19:30; 20:16; Mk 10:31 Lan té' daha' aleng da'uk aleng seng jadi' dekaya', dahin daha' aleng dekaya' seng jadi' da'uk.”
Daha' Farisi bara kenep Herodes.
Yesus bara katé' aleng seng nei té' Yerusalem
Mat 23:37-39
31Tegu atih lahuh nei nah kuri-kuri la'ung kelunan Farisi pala Iha' dahin kuma', “Musang nah Im lap men inih, avin Herodes ngenep lematei Ika'.” 32Ken Yesus men dalo' atih, “Tei nah im bara men lejau danum atih, ‘Nunih nah dahun Na', Lan, dau anih dahin jima Akui mesau to' dahin petagéh kelunan, dahin ketlo' dau Akui seng nei la'ung, 33bi adang Akui pejoh anau Kui men dau anih dahin jima dahin duji, avin nusi' deng ji la'ung nabi en daha' lematei bah hawang Yerusalem,’ ken kelo' men iha'.
34“U Yerusalem, Yerusalem aleng lematei daha' nabi dahin nyeparik bato' té' daha' aleng en Allah nyihu nei ha' ika', kuri-kuri hangun Akui hu'uh ngenep mepeng anak-anak ka' awi jam tuk hinan hiap mepeng anak-anak na' té' hida kapit na', bi nusi' nah ikam ngenep! 35#NDI 69:25; 118:26; Yer 12:7; 22:5 Nyineng nah, uma kam uh melek henung. Akui kuma' men ikam, nusi' nah ikam nyineng Akui la'an ateng ikam kuma', ‘Meju lelan nah Iha' aleng nei alem aran Tuhan.’ ”
Currently Selected:
LUKAS 13: TDK1990
Highlight
Share
Copy
Want to have your highlights saved across all your devices? Sign up or sign in
Bible in Today's Dahun Kayan Version © Bible Society of Malaysia, 1990.
