Seb 7
7
Ukuziphendulela kukaStefane
1Umpristi omkhulu wasesithi: Lembala lokhu kunjalo na? 2UStefane wathi: Bobaba labazalwane, lalelani. UNkulunkulu wenkazimulo wabonakala kubaba uAbrahama eseMesopotamiya, engakakhi eHarani,#Gen 12:1 3wathi kuye: Suka elizweni lakini lasezihlotsheni zakho, uye elizweni engizakukutshengisa lona. 4Wasesuka elizweni lamaKaladiya, wakha eHarani. Kwathi ngemva kokufa kukayise, uNkulunkulu wamsusa lapho, wamhlalisa kulelilizwe elakhe kilo lina.#Gen 11:31; 12:4 5Kodwa kamnikanga ilifa kilo, ngitsho lelingangonyawo, kodwa wathembisa ukumnika lona libe ngelakhe lelenzalo yakhe emva kwakhe, lanxa wayengakabi lamntwana.#Gen 12:7; 13:15; 15:18; 17:8 6UNkulunkulu wakhuluma kanje, wathi: Inzalo yakho izakuhlala elizweni labanye abazakuyenza izigqili, bayiphathe kubi iminyaka engamakhulu amane.#Gen 15:13, 14 7Kodwa lesosizwe abazakuba yizigqili kuso ngizakusilahla mina, kutsho uNkulunkulu; emva kwalokho bazakuphuma, bangikhonze kulindawo. 8Wasemnika isivumelwano sokusoka; ngakhoke uAbrahama wazala uIsaka, wamsoka ngosuku lwesificaminwembili; uIsaka wazala uJakobe, uJakobe wazala okhokho abalitshumi lambili.#Gen 17:10–14; 21:2–4; 25:26; 29:31—35:18
9Okhokho babelomona ngoJosefa, bamthengisa eGibithe; kodwa uNkulunkulu wayelaye,#Gen 37:11, 28; 39:2, 21 10wamkhulula kuzo zonke inhlupheko zakhe, wamnika umusa lokuhlakanipha phambi kukaFaro inkosi yaseGibithe; yena wamenza abe ngumbusi weGibithe lowendlu yakhe yonke.#Gen 41:39–41 11Kwasekufika indlala elizweni lonke laseGibithe lelaseKanani, lokuhlupheka okukhulu; okhokho baswela ukudla.#Gen 42:1, 2 12UJakobe esezwile ukuba kukhona amabele eGibithe, wathumela okhokho okokuqala. 13Ngokwesibili uJosefa waziveza kubafowabo; labakibo kaJosefa babonakaliswa kuFaro.#Gen 45:1, 16 14UJosefa wasethumela ukubiza uyise uJakobe lazo zonke izihlobo zakhe, abantu abangamatshumi ayisikhombisa lanhlanu.#Gen 45:9, 10, 17, 18; 46:27 15UJakobe wehlela eGibithe; wafela khona yena labokhokho.#Gen 46:1–7; 49:33 16Bathwalelwa eShekema, bangcwatshwa khona elibeni uAbrahama ayelithenge ngemali yesiliva kumadodana kaHamori eShekema.#Gen 23:3–16; 33:19; 50:7–13; Josh 24:32
17Kwathi sesisondele isikhathi sesithembiso uNkulunkulu ayesenze kuAbrahama, banda abantu, baba banengi eGibithe,#Eks 1:7, 8 18kwaze kwavela enye inkosi eGibithe eyayingamazi uJosefa. 19Yona yasiphatha ngobuqili isizwe sakithi, yabahlupha okhokho ngokubalahlisa abantwana babo ukuze bangaphili.#Eks 1:10, 11, 22 20Ngalesosikhathi kwazalwa uMose, waba muhle phambi kukaNkulunkulu; wondliwa endlini kayise inyanga ezintathu;#Eks 2:2 21eselahliwe, indodakazi kaFaro yamthola, yazondlela yena ukuba abe yindodana yayo.#Eks 2:3–10 22UMose wafundiswa konke ukuhlakanipha kwamaGibithe; waba lamandla ngamazwi langemisebenzi yakhe.
23Kwathi eseleminyaka engamatshumi amane ezelwe, kwafika enhliziyweni yakhe ukuba ahambele abafowabo, abakoIsrayeli. #Eks 2:11–15 24Wabona omunye wabo ephathwa kubi, wamvikela ekuhlutshweni ngokutshaya umGibithe, wambulala. 25Wayethemba ukuba abafowabo bazaqedisisa ukuthi uNkulunkulu ubanika inkululeko ngesandla sakhe; kodwa kabaqedisisanga. 26Ngosuku olulandelayo wafica ababili besilwa, wazama ukubalamula, wathi: Madoda, lingabazalwane; liphathanelani kubi na? 27Kodwa lowo owayemona umakhelwana wakhe wamsunduza esithi: Ubekwe ngubani ukuba ube ngumbusi lomthonisisi phezu kwethu na? 28Usufuna ukungibulala lami, njengokuba ubulele umGibithe izolo na? 29Ngenxa yalamazwi uMose wabaleka, waba ngowezizwe elizweni laseMidiyani, lapho azala khona amadodana amabili.#Eks 18:3, 4
30Kwathi sekudlule iminyaka engamatshumi amane, kwabonakala kuye enkangala yasentabeni iSinayi isithunywa phakathi kwelangabi lomlilo esihlahleni.#Eks 3:1–10 31Kwathi uMose esekubonile wamangala; esasondela ukuba acinge, kwezwakala ilizwi leNkosi, lathi: 32NginguNkulunkulu wabokhokho benu, uNkulunkulu kaAbrahama lokaIsaka lokaJakobe. UMose wathuthumela, kazaba lesibindi sokukhangela. 33INkosi yathi kuye: Khumula amanyathelo enyaweni zakho, ngoba indawo omi kiyo ingumhlabathi ongcwele. 34Ngikubonile impela ukuhlutshwa kwabantu bami abaseGibithe, ngizwile ukububula kwabo; ngehlile ukuba ngibakhulule. Wozake, ngizakukuthuma eGibithe. 35UMose lo abamalayo besithi: Ubekwe ngubani ukuba ube ngumbusi lomthonisi na? — nguye uNkulunkulu amthumayo ngesandla sesithunywa esabonakala kuye esihlahleni, ukuba abe ngumbusi lomkhululi. 36Yena lowo wabakhupha esenze izimangaliso lezibonakaliso eGibithe, lasoLwandle oluBomvu, lasenkangala iminyaka engamatshumi amane.#Eks 7:5; 14:21 #Nani 14:33 37Nguye lowo uMose owathi kwabakoIsrayeli: UNkulunkulu uzakulivusela umprofethi kubazalwane benu onjengami.#Dute 8:15, 18 38Nguye lowo owayesebandleni enkangala kanye lesithunywa ekhuluma laso entabeni iSinayi kanye labokhokho, wamukela amazwi okuphila, ukuze asinike thina.#Eks 19:1—20:17; Dute 5:1–33 39Okhokho kabavumanga ukumlalela, kodwa bamsunduzela eceleni, babuyela eGibithe ngenhliziyo zabo, 40bathi kuAroni: Senzele onkulunkulu abazakuhamba phambi kwethu; ngoba uMose lowo owasikhupha elizweni laseGibithe, kasazi ukuba wehlelwe yini.#Eks 32:1 41Benza ithole ngalezonsuku, baletha umhlatshelo esithombeni, bajabula ngemisebenzi yezandla zabo.#Eks 32:2–6 42Kodwa uNkulunkulu wabafulathela, wabanikela ukuba bakhonze izinkanyezi, njengokulotshiweyo encwadini yabaprofethi ukuthi:
Laletha kimi imihlatshelo leminikelo
iminyaka engamatshumi amane enkangala lina ndlu kaIsrayeli na?#Amos 5:25–27
43Atshi, lathatha ithente likaMoloki lenkanyezi kankulunkulu wenu uRefani,
imifanekiso elayenza ukuba likhuleke kuyo.
Ngizakulithuthela ngaphambili kweBabiloni.
44Okhokho babelalo ithente lobufakazi enkangala njengokulayela kwalowo owakhuluma kuMose ukuba alenze ngomfanekiso ayewubonile;#Eks 25:9, 40 45okhokho kanye loJoshuwa balamukela balingenisa elizweni lezizwe uNkulunkulu azixotsha phambi kwabo, lalikhona kwaze kwaba sensukwini zikaDavida.#Josh 3:14–17 46Yena wafumana umusa emehlweni kaNkulunkulu, wacela ukuzuzela uNkulunkulu kaJakobe idumba.#2 Sam 7:1–16; 1 Lan 17:1–14 47Kodwa nguSolomoni owamakhela indlu.#1 Kho 6:1–38; 2 Lan 3:1–17 48Kanti oPhezukonke kahlali ezindlini ezenziwe ngezandla njengokutsho komprofethi ukuthi:
49Izulu liyisihlalo sami sobukhosi,
lomhlaba uyisigcabha senyawo zami;
lizakungakhela indlu enjani, kutsho iNkosi,
ingabe yiyiphi indawo yami yokuphumula na?#Isa 66:1, 2
50Isandla sami kasizenzanga zonke lezizinto na?
51Lina abanhliziyo ezilukhuni, abangasokanga enhliziyweni lasendlebeni, limelana njalo loMoya oNgcwele; njengabokhokho benu linjalo lani.#Isa 63:10 52Nguwuphi owabaprofethi okhokho benu abangamzingelanga na? Bababulala labo abamemezela ngaphambili ukuza koLungileyo, eselimnikele lambulala, 53lina elamukela umlayo ngokulaya kwezithunywa, kodwa kaliwulondolozanga.
Ukufa kukaStefane
54Bathi sebezwile lezizinto, bahlabeka enhliziyweni, bamgedlela amazinyo. 55Kodwa yena egcwele uMoya oNgcwele wajolozela ezulwini, wabona inkazimulo kaNkulunkulu, loJesu emi ngakwesokunene sikaNkulunkulu, 56wathi: Khangelani, ngibona izulu livulekile, leNdodana yomuntu imi ngakwesokunene sikaNkulunkulu. 57Kodwa bamemeza ngelizwi elikhulu, bavala indlebe zabo, bonke batheleka phezu kwakhe, 58basebemkhuphela ngaphandle komuzi, bamkhanda ngamatshe. Ofakazi babeka ingubo zabo ngasenyaweni zensizwa ethiwa nguSawuli. 59Bamkhanda ngamatshe uStefane ekhuleka esithi: Nkosi Jesu, yamukela umoya wami. 60Waseguqa phansi, wamemeza ngelizwi elikhulu, esithi: Nkosi, ungababaleli lesisono. Esetshilo lokhu wafa.
USawuli wayevumelene labo ngokubulawa kwakhe.
Currently Selected:
Seb 7: BE1978
Highlight
Share
Copy
Want to have your highlights saved across all your devices? Sign up or sign in
Bible Society of Zimbabwe 1978
