Seb 8
8
USawuli uzingela amakholwa
1Ngalolosuku kwasuka ukuzingelwa okukhulu kwebandla laseJerusalema, bahlakazeka bonke ngaphandle kwabaphostoli emazweni aseJudiya laseSamariya. 2Amadoda akholwayo ambela uStefane amkhalela kakhulu. 3Kodwa uSawuli walichitha ibandla, engena ezindlini ngezindlu, ehudula abesilisa labesifazana, ebafaka entolongweni.#Seb 22:4, 5; 26:9–11
UFiliphu utshumayela eSamariya
4Abahlakazekileyo bahamba, betshumayela ivangeli. 5UFiliphu wehlela emzini waseSamariya, watshumayela kubo ngoKristu. 6Amaxuku alalela nganhliziyonye okwakhulunywa nguFiliphu, esizwa ebona izibonakaliso azenzayo. 7Ngoba baphuma omoya ababi kwabanengi ababengenwe yibo, bememeza ngelizwi elikhulu; labanengi ababeyizilima lababeyiziqhuli basiliswa. 8Kwaba khona ukuthokoza okukhulu kulowomuzi.
USimoni oyisanuse
9Kwakukhona indoda ethiwa nguSimoni, eyayikade isenza imilingo kulowomuzi, yasimangalisa isizwe samaSamariya, izitshaya umuntu omkhulu. 10Bamlalela bonke kusukela kwabancinyane kuze kube kwabakhulu, besithi: Lo uyilawo amandla kaNkulunkulu athiwa maKhulu. 11Bamlalela ngoba wabamangalisa isikhathi eside ngemilingo yakhe. 12Kodwa kwathi ukuba bakholwe uFiliphu etshumayela ivangeli ngombuso kaNkulunkulu langebizo likaJesu Kristu, babhaphathizwa abesilisa labesifazana. 13LoSimoni laye wakholwa; esebhaphathiziwe, wanamathela kuFiliphu, wamangala ebona izibonakaliso lezimangaliso ezinkulu ezazisenziwa.
14Kwathi ukuba abaphostoli abaseJerusalema bezwe ukuthi iSamariya lilamukele ilizwi likaNkulunkulu, bathumela kubo uPetro loJohane; 15sebefikile khona babakhulekela ukuba bamamukele uMoya oNgcwele, 16ngoba wayengakehleli lakoyedwa wabo, kodwa babesabhaphathizwe ebizweni leNkosi uJesu kuphela. 17Basebebeka izandla zabo phezu kwabo; bamamukela uMoya oNgcwele. 18USimoni esebonile ukuthi ngokubekwa kwezandla zabaphostoli uyaphiwa uMoya oNgcwele, waletha imali kubo, 19esithi: Ngipheni lami lawomandla, ukuze kuthi lowo engibeka izandla zami phezu kwakhe amukele uMoya oNgcwele. 20Kodwa uPetro wathi kuye: Isiliva sakho kasibhubhe kanye lawe, ngoba uthi isiphiwo sikaNkulunkulu singathengwa ngemali. 21Ngoba kawulasabelo lelifa kulelilizwi, ngoba inhliziyo yakho kayilunganga phambi kukaNkulunkulu. 22Ngakhoke phenduka kulobububi bakho, ucele iNkosi ukuthi uba kungenzeka uthethelelwe iminakano yenhliziyo yakho, 23ngoba ngibona ukuthi ulomona omubi, ubotshiwe yisono. 24USimoni wasemphendula esithi: Ngikhulekelani lina eNkosini, ukuze ngingehlelwa ngolunye lwalezizinto elizitshiloyo. 25Kuthe sebefakazile, bekhulumile ilizwi leNkosi, babuyela eJerusalema, behamba betshumayela ivangeli emizini eminengi yamaSamariya.
Ukuphenduka kwenduna yaseEtiyopiya
26Isithunywa seNkosi sathi kuFiliphu: Suka uye ngaseningizimu endleleni esuka eJerusalema isiya eGaza; yona iyinkangala. 27Wasesuka ehamba. Wasebona umuntu waseEtiyopiya, umthenwa, induna enkulu kaKandake inkosikazi yaseEtiyopiya, eyayiphatha impahla yakhe yonke, yayifikile eJerusalema ukukhuleka; 28yayisibuyela, ihlezi enqoleni yayo, ifunda umprofethi uIsaya. 29UMoya wathi kuFiliphu: Sondela, uhambe lalinqola. 30Ngakho uFiliphu wasegijimela kuyo, wayizwa ifunda umprofethi uIsaya, wathi: Uyaqedisisa kambe lokhu okufundayo na? 31Yathi: Ngingaqedisisa kanjani, kungekho ongiqondisayo na? Yamcela uFiliphu ukuba akhwele ahlale layo. 32Isahlukwana sombhalo eyayisifunda yilesi esithi:
Walethwa ekuhlatshweni njengemvu;
njengewundlu lithule phambi komgundi walo
kunjalo kawuvulanga umlomo wakhe.#Isa 53:7, 8
33Ekuthobeni kwakhe ukuthonisiswa kwakhe kwasuswa.
Ngubani ongalandisa isizukulwana sakhe na?
Ngoba ukuphila kwakhe kuyasuswa emhlabeni.
34Induna yathi kuFiliphu: Ngiyakucela, umprofethi ukhuluma lokhu ngobani lapha na? Uyazitsho yena ingabe omunye na? 35UFiliphu wavula umlomo wakhe, eqala kulowombhalo wamtshumayeza ivangeli ngoJesu. 36Kwathi besahamba endleleni, bafika emanzini; induna yathi: Khangela, nanka amanzi; kwalani ukuba ngibhaphathizwe na? 37[UFiliphu wathi kuyo: Uba ukholwa ngenhliziyo yonke, kungenzeka. Yaphendula yathi: Ngiyakholwa ukuthi uJesu Kristu uyiNdodana kaNkulunkulu.] 38Walaya ukuba inqola ime. Behla bobabili bangena emanzini, uFiliphu lenduna; wayibhaphathiza. 39Kwathi sebekhuphukile emanzini, uMoya weNkosi wamsusa uFiliphu, kayabe isambona induna, kodwa yahamba ngendlela yayo ithokoza. 40Kodwa uFiliphu wafunyanwa eAzotu, wahamba etshumayela ivangeli kuyo yonke imizi, waze wafika eKesariya.
Currently Selected:
Seb 8: BE1978
Highlight
Share
Copy
Want to have your highlights saved across all your devices? Sign up or sign in
Bible Society of Zimbabwe 1978
