Gen 24
24
UIsaka uganwa nguRebeka
1UAbrahama wayeseluphele eseleminyaka eminengi; iNkosi yayimbusisile kukho konke. 2UAbrahama wathi encekwini yakhe enkulu yendlu yakhe, ephatha konke alakho: Beka isandla sakho ngaphansi kwethangazi lami. 3Ngizakukufungisa iNkosi, uNkulunkulu wezulu loNkulunkulu womhlaba, ukuthi kawuyikuyithathela indodana yami umfazi emadodakazini amaKanani engihlala phakathi kwawo; 4kodwa uzakuya elizweni lakithi lasezihlotsheni zami, uyithathele khona umfazi indodana yami uIsaka. 5Inceku yathi kuye: Uba owesifazana engavumi ukuza lami kulelilizwe, ngiyise indodana yakho elizweni owavela kulo na? 6UAbrahama wathi kuye: Qaphela ukuba ungayibuyiseli khona indodana yami. 7INkosi, uNkulunkulu wezulu, eyangikhupha endlini kababa laselizweni lokuzalwa kwami, yafunga kimi yathi: Ngizalinika inzalo yakho lelilizwe; izathuma isithunywa sayo phambi kwakho, ukuze uyithathele khona umfazi indodana yami. 8Uba owesifazana engavumi ukubuya lawe, uzakuba ukhululekile kulesisifungo sami; kodwa ungayibuyiseli indodana yami. 9Inceku yasibeka isandla sayo ngaphansi kwethangazi likaAbrahama inkosi yayo, yafunga kuye ngalindaba. 10Inceku yasithatha amakamela alitshumi kuwo amakamela enkosi yayo, kanye lenhlobo zonke ezinhle zempahla yenkosi yayo, yasisuka isiya eMesopotamiya emzini kaNahori. 11Yaguqisa amakamela ngaphandle komuzi ngasemthonjeni wamanzi ntambama, ngesikhathi abaphuma ngaso abesifazana ukukha amanzi. 12Yathi: Nkosi, Nkulunkulu wenkosi yami uAbrahama, ungiphumelelise lamuhla, uyenzele inkosi yami uAbrahama umusa. 13Kangela, sengimi ngasemthonjeni wamanzi, kuza amadodakazi amadoda omuzi ukukha amanzi. 14Kakuthi intombi engizakuthi kuyo: Beka phansi imbiza yakho unginathise, iphendule ithi: Natha, ngizakunathisa lamakamela akho; kayibe yiyo oyikhethele uIsaka inceku yakho; ngalokho ngizakwazi ukuthi uyenzele inkosi yami umusa.
15Kwathi ingakaqedi ukukhuluma, kwehla uRebeka owayezalwa nguBethuweli indodana kaMilka, umkaNahori umfowabo kaAbrahama, ebeke imbiza yakhe ehlombe. 16Intombi yayinhle kakhulu, iyintombi engayaziyo indoda; yehlela ngasemthonjeni, yagcwalisa imbiza yayo, yakhuphuka. 17Inceku yasigijima ukuyihlangabeza yathi: Nginathisa amanzi embizeni yakho. 18Yathi: Natha, nkosi. Yaphangisa yehlisela imbiza yayo esandleni, yayinathisa. 19Isiqedile ukuyinathisa yathi: Ngizakukhelela lamakamela akho aze akholwe wonke. 20Yaphangisa yathululela amanzi ayo emkolweni, yabuya yagijimela emthonjeni ukuyakukha, yakhelela amakamela wonke. 21Indoda yasithula iyikhangelisisa ukuba ibone ukuthi iNkosi ibiphumelelisile indlela yayo yini.
22Kwathi amakamela eseqedile ukunatha, indoda yasithatha icici legolide, ubunzima balo buyingxenye yeshekeli, lamasongo amabili egolide ezandleni zayo, ubunzima bawo bungamashekeli alitshumi. 23Yathi: Uyindodakazi kabani na? Ngitshela. Kukhona indawo endlini kayihlo ukuba singenise khona na? 24Yathi kuyo: Ngiyindodakazi kaBethuweli indodana kaMilka owazalwa nguNahori. 25Yathi kuyo futhi: Silotshani lokudla kwamakamela okunengi, kanye lendawo yokulala. 26Indoda yasikhothamisa ikhanda layo, yadumisa iNkosi, 27yathi: Kayibongwe iNkosi, uNkulunkulu wenkosi yami uAbrahama, engayekelanga ukuyenzela inkosi yami umusa lobuqotho; lami iNkosi ingiholile endleleni ngaze ngafika endlini yesihlobo senkosi yami.
28Intombi yagijima, yatshela abendlu kanina lezizinto. 29URebeka wayelomnewabo obizo lakhe lalinguLabani; uLabani waphuma wagijimela kuleyondoda ngasemthonjeni. 30Kwathi esebonile icici lamasongo ezandleni zikadadewabo, esezwile amazwi kaRebeka udadewabo okuthi: Itsho njalo indoda kimi; waya kuleyondoda eyayimi kuwo amakamela ngasemthonjeni. 31Wathi: Ngena wena obusisiweyo yiNkosi; umeleni ngaphandle na? Ngoba sengilungisile indlu lendawo yamakamela. 32Leyondoda yasingena endlini, yakhulula amakamela. Amakamela anikwa utshani lokudla, kwalethwa amanzi okugeza inyawo zayo lenyawo zamadoda ayelayo. 33Kwabekwa ukudla phambi kwayo ukuba idle; kodwa yathi: Kangiyikudla ngingakakhulumi indaba yami. Wathi: Khuluma.
34Yathi: Ngiyinceku kaAbrahama. 35INkosi iyibusisile kakhulu inkosi yami, yaze yaba nkulu. Yayinika izimvu lezinkomo, isiliva legolide, izinceku lezincekukazi, amakamela labobabhemi. 36USara umkankosi yami wayizalela inkosi yami indodana esemdala; yayinika konke elakho. 37Inkosi yami yangifungisa yathi: Ungayithatheli indodana yami umfazi kuwo amadodakazi amaKanani, engihlala elizweni lawo; 38kodwa uye endlini kababa lasezihlotsheni zami, uyithathele khona indodana yami umfazi. 39Ngathi enkosini yami: Mhlawumbe owesifazana kayikungilandela. 40Yathi kimi: INkosi, engihamba phambi kwayo, izathuma isithunywa sayo lawe, iphumelelise indlela yakho; uzakuyithathela indodana yami umfazi ezihlotsheni zikababa. 41Emva kwalokho uzakhululeka esifungweni sami uba ufika ezihlotsheni zami zingakuniki yena.
42Kuthe ngifika emthonjeni lamhla, ngathi: Nkosi, Nkulunkulu wenkosi yami uAbrahama, akuphumelelise indlela yami. 43Khangela, sengimi ngasemthonjeni wamanzi; kakuthi intombi eza ukukha engizakutsho kuyo: Nginathisa amanzi embizeni yakho; 44iphendule ithi kimi: Natha wena, ngizakhelela lamakamela akho; kayibe nguye owesifazana iNkosi emkhethele indodana yenkosi yami.
45Ngingakaqedi ukukhuluma ngenhliziyo yami, kufike uRebeka ethwele imbiza yakhe ehlombe; wehlela emthonjeni, wakha. Ngasengisithi kuye: Akunginathise. 46Waphangisa, wethula imbiza yakhe ehlombe wathi: Natha, ngizanathisa lamakamela akho. 47Ngambuza ngathi: Uyindodakazi kabani? Wathi; Ngiyindodakazi kaBethuweli, indodana kaNahori ozalwa nguMilka; ngasengifaka icici emakhaleni akhe lamasongo ezandleni zakhe. 48Ngakhothamisa ikhanda lami, ngayidumisa iNkosi, ngabonga iNkosi uNkulunkulu wenkosi yami uAbrahama, ebingihole endleleni elungileyo ukuba ngiyithathele indodana yenkosi yami indodakazi yomfowabo. 49Khathesi uba lithanda ukuyenzela inkosi yami umusa lobuqotho, ngitshelani; uba lingathandi, ngitshelani, ukuze ngiphendukele ngakwesokunene loba ngakwesokhohlo.
50Basebephendula oLabani loBethuweli bathi: Lokhu kuvela eNkosini; kasilakutsho lutho kuwe. 51Khangela, uRebeka uphambi kwakho; mthathe uhambe, abe ngumkandodana yenkosi yakho njengokutsho kweNkosi.
52Kwathi isizwile amazwi abo inceku kaAbrahama yakhothamela emhlabathini phambi kweNkosi. 53Inceku yakhupha izinto zesiliva, lezinto zegolide, lezambatho, yakunika uRebeka, yabanika lomnewabo lonina impahla eligugu. 54Basebesidla benatha, yona lamadoda ayelayo, balala khona. Sebevukile ekuseni, yathi: Ngivumelani ngibuyele enkosini yami. 55Kodwa umnewabo lonina wentombi bathi: Ake ihlale lathi intombazana okwensukwana, mhlawumbe ezilitshumi, andubana ihambe. 56Yathi kubo: Lingangibambeleli, lokhu iNkosi iphumelelisile indlela yami; ngivumelani ukuba ngiye enkosini yami. 57Bathi: Asimbize umntwana, sizwe kuye. 58Basebembiza uRebeka, bathi kuye: Uzahamba lalindoda na? Wathi: Ngizahamba. 59Basebemvumela ukuhamba uRebeka udadewabo lomlizane wakhe, lenceku kaAbrahama lamadoda ayo. 60Bambusisa uRebeka, bathi kuye:
Dadewethu, ube ngunina wezinkulungwane zezigidi,
inzalo yakho inqobe imizi yezitha zayo!
61URebeka wasesuka lamantombazana akhe, bagada amakamela, balandela indoda; inceku yamthatha uRebeka, yahamba.
62UIsaka wayesedabule inkangala waze wafika emthonjeni waseLahayi‐Royi, ngoba wayehlala elizweni laseNegebi. 63UIsaka waphuma ntambama ukuba ahambahambe emmangweni; waphakamisa amehlo akhe wabona amakamela esiza. 64LoRebeka waphakamisa amehlo akhe; esembonile uIsaka wehla ekameleni. 65Wathi encekwini: Ngubani lindoda ehamba emmangweni ukusihlangabeza na? Inceku yathi: Yinkosi yami. Wasethatha isimbombozo sakhe, wazigubuzela. 66Inceku yasimtshela uIsaka konke ebikwenzile. 67UIsaka wamngenisa ethenteni lakhe, wamthatha uRebeka, waba ngumkakhe. UIsaka wamthanda, waseduduzeka emva kokufa kukanina.
Currently Selected:
Gen 24: BE1978
Highlight
Share
Copy
Want to have your highlights saved across all your devices? Sign up or sign in
Bible Society of Zimbabwe 1978
