Gen 25
25
Amadodana kaAbrahama kuKetura; ukufa kukaAbrahama
1UAbrahama wabuya wathatha omunye umfazi obizo lakhe linguKetura. 2Wamzalela uZimrani loJokishani loMedani loMidiyani loIshibaki loShuwa. 3UJokishani wazala uSheba loDedani. Amadodana kaDedani ayengamaAshuri lamaLetushi lamaLewumi. 4Amadodana kaMidiyani ayengoEfa loEferi loHanoki loAbida loElidaha. Bonke labo babengabantwana bakaKetura. 5UAbrahama wamupha uIsaka konke ayelakho. 6Kodwa amadodana abafazi bakhe abanye uAbrahama wawanika izipho; esekhona wawasusa kulsaka indodana yakhe, wawasa ngasempumalanga elizweni lasempumalanga.
7Iminyaka yokuhamba kukaAbrahama yayilikhulu lamatshumi ayisikhombisa lanhlanu. 8UAbrahama waguga, wafa eseluphele kakhulu esehambe iminyaka eminengi, wambelwa kwabakibo. 9UIsaka loIshmayeli amadodana akhe bamngcwaba obhalwini lwaseMakaphela, esiqintini sikaEfroni indodana kaZohari umHethi, esiseduze leMamre, 10isiqinti asithenga uAbrahama ebantwaneni bakaHethi; uAbrahama wangcwatshelwa khona loSara umkakhe.#Gen 23:3–16 11Kwathi emva kokufa kukaAbrahama, uNkulunkulu wambusisa uIsaka indodana yakhe; uIsaka wahlala emthonjeni waseLahayi‐Royi.
Inzalo kaIshmayeli
12Lezi yizizukulwana zikaIshmayeli indodana kaAbrahama eyazalwa nguHagari umGibithe incekukazi kaSara. 13La ngamabizo amadodana kaIshmayeli njengokuzalwa kwawo; izibulo likaIshmayeli nguNebayothi; eselanywa ngoKedari loAdibeli loMibisama 14loMishima loDuma loMasa 15loHadadi loTema loJeturi loNafishi loKedema; 16yilawoke amadodana kaIshmayeli, yilawo amabizo awo ngemizana yawo langemizi yawo, izikhulu ezilitshumi lambili ngezizwe zawo. 17Iminyaka yokuhamba kukaIshmayeli yaba likhulu lamatshumi amathathu lesikhombisa; wasesifa, wambelwa kwabakibo. 18Bahlala kusukela eHavila kwaze kwaba seShuri elingasempumalanga kweGibithe, ekuhambeni ukuya eAsiriya; wakha ngasempumalanga kwabafowabo.
Ukuzalwa kukaEsawu loJakobe
19Lezi yizizukulwana zikaIsaka indodana kaAbrahama; uAbrahama wazala uIsaka. 20UIsaka wayeleminyaka engamatshumi amane mhla ethatha uRebeka, indodakazi kaBethuweli umAramu wasePadani‐Arama, udadewabo kaLabani umAramu, abe ngumkakhe. 21UIsaka wamkhulekela umkakhe eNkosini, ngoba wayeyinyumba; iNkosi yamlalela, uRebeka umkakhe wathatha isisu. 22Abantwana babedubana phakathi kwakhe; wathi: Uba kunjalo, ngisekhona ngani na? Waya ukubuza eNkosini. 23INkosi yathi kuye:
Esizalweni sakho kukhona izizwe ezimbili,
inhlobo ezimbili zabantu zizakwahlukana esiswini sakho.
Esinye isizwe sizakuba lamandla kulesinye,
omkhulu uzakukhonza omncinyane.#Roma 9:12
24Kwathi sesifikile isikhathi sokubeletha kwakhe, kwakukhona amaphahla esiswini sakhe. 25Kwaphuma owokuqala ebomvu, umzimba wakhe wonke unjengengubo yoboya; bamutha ibizo bathi nguEsawu. 26Emva kwakhe kwaphuma umnawakhe, isandla sakhe sibambelele esithendeni sikaEsawu; wabizwa ngokuthi nguJakobe. UIsaka wayeleminyaka engamatshumi ayisithupha ekuzalweni kwabo.
27Abafana bakhala; uEsawu waba ngumzingeli ohlakaniphileyo, umuntu wasegangeni; uJakobe waba ngumuntu omnene ehlala emathenteni. 28UIsaka wayemthanda uEsawu ngoba wayesidla inyama yenyamazana zakhe; kodwa uRebeka wathanda uJakobe. 29Kwathi uJakobe epheka ukudla, kwafika uEsawu evela egangeni, efile yindlala. 30UEsawu wathi kuJakobe: Ake ungiphe lokho okubomvu ngoba ngifile yindlala. Ngalokhu wabizwa ngokuthi nguEdoma. 31UJakobe wathi: Ngithengisela lamuhla ilungelo lobuzibulo bakho. 32UEsawu wathi: Khangela, sengizakufa; ubuzibulo buzakungisiza njani na? 33UJakobe wathi: Funga kimi lamuhla. Wasefunga kuye, wathengisa kuJakobe ubuzibulo bakhe.#Heb 12:16 34UJakobe wanika uEsawu isinkwa lalokho okubomvu; wadla wanatha, wavuka wahamba; ngalokho uEsawu wadelela ubuzibulo bakhe.
Currently Selected:
Gen 25: BE1978
Highlight
Share
Copy
Want to have your highlights saved across all your devices? Sign up or sign in
Bible Society of Zimbabwe 1978
