Gen 26
26
UIsaka useGerari laseBerisheba
1Kwaba khona indlala elizweni, enjengendlala yakuqala ensukwini zikaAbrahama. UIsaka waya eGerari kuAbimeleki inkosi yamaFilistiya. 2INkosi yasibonakala kuye, yathi: Ungehleli eGibithe, kodwa uhlale elizweni engizakukutshela lona; 3hlala kulelilizwe, ngizakuba lawe ngikubusise; ngoba ngizakunika wena lenzalo yakho wonke lamazwe, ngiqinise isifungo engasifunga kuAbrahama uyihlo.#Gen 22:16–18 4Ngizakwandisa inzalo yakho ibe ngangezinkanyezi zezulu, ngiyinike inzalo yakho lamazwe wonke; ngenzalo yakho zizabusiswa izizwe zonke zomhlaba; 5ngoba uAbrahama walalela ilizwi lami, wagcina amazwi ami lemilayo yami lezimiso zami lemithetho yami.
6UIsaka wahlalake eGerari. 7Amadoda aleyondawo ambuza ngomkakhe. Wathi: Ungudadewethu; ngoba wesaba ukuthi: Ungumkami. Wathi: Mhlawumbe amadoda aleyondawo azangibulala ngenxa kaRebeka, ngoba emuhle kakhulu.#Gen 12:13; 20:2 8Kwathi esehlale khona isikhathi eside, uAbimeleki inkosi yamaFilistiya walunguza ngewindi, wabona uIsaka edlala loRebeka umkakhe. 9UAbimeleki wambiza uIsaka, wathi: Khangela, impela yena ungumkakho; utsholoni ukuthi: Ungudadewethu? UIsaka wathi kuye: Bengisesaba ukuthi mhlawumbe ngizakufa ngenxa yakhe. 10UAbimeleki wathi: Wenzeni kithi na? Bekulula ukuba omunye ebantwini alale lomkakho; ubususibeka icala. 11UAbimeleki walaya bonke abantu, wathi: Othinta lumuntu lomkakhe uzabulawa impela.
12UIsaka walima kulelolizwe, wazuza ngalowomnyaka okuphindwe kalikhulu; iNkosi yambusisa. 13Lowomuntu waba mkhulu, lokwakhe kwanda kakhulu waze waba mkhulu sibili. 14Waba lemfuyo yezimvu lemfuyo yezinkomo lenceku ezinengi; ngakhoke amaFilistiya aba lomona ngaye. 15Yonke imithombo ezaziyimbile inceku zikayise ensukwini zikaAbrahama uyise, amaFilistiya ayeyigqibele, ayigcwalisa ngomhlabathi. 16UAbimeleki wasesithi kuIsaka: Suka kithi, ngoba ulamandla kakhulu kulathi.
17UIsaka wasesuka lapho, wakha amathente akhe esigodini saseGerari, wahlala khona. 18UIsaka wabuya waphanda imithombo yamanzi ababeyimbile ensukwini zikaAbrahama uyise; ngoba amaFilistiya ayeyigqibele emva kokufa kukaAbrahama. Wayibiza ngamabizo ayibiza ngawo uyise. 19Inceku zikaIsaka zemba esigodini, zafumana khona umthombo wamanzi agobhozayo. 20Abelusi baseGerari bababangisa abelusi bakaIsaka, bathi: Amanzi ngawethu. Ngakho wabiza ibizo lomthombo wathi yiEseki, ngoba baphikisana laye khona. 21Zemba omunye umthombo, lawo bawubanga. Wawubiza ngokuthi yiSitina. 22Wasuka lapho, wemba omunye umthombo, kodwa lowo kabawubanganga. Wawubiza ngokuthi yiRehobothi, wathi: INkosi isisenzele indawo, sizakwanda elizweni.
23Wasuka lapho waya eBerisheba. 24INkosi yabonakala kuye ngalobobusuku yathi: NginguNkulunkulu kaAbrahama uyihlo. Ungesabi ngoba ngilawe, ngizakukubusisa ngiyandise inzalo yakho ngenxa yenceku yami uAbrahama. 25Wakha khona ialtare, wakhuleka ebizweni leNkosi, wamisa khona ithente lakhe; inceku zikaIsaka zemba khona umthombo.
Isivumelwano sikaIsaka loAbimeleki
26UAbimeleki wasesiya kuye evela eGerari kanye loAhuzathi umngane wakhe loFikoli induna yempi yakhe.#Gen 21:22 27UIsaka wathi kubo: Lizeleni kimi, lokhu liyangizonda, lingixotshile kini? 28Bathi: Sesibonile ngokusobala ukuthi iNkosi ilawe. Sathi: Kakube khona phakathi kwethu lawe isifungo, senze isivumelwano lawe 29sokuthi kawuyikwenza okubi kithi, njengokuba singakuthintanga, sikwenzele okuhle kuphela, sakuyekela wahamba ngokuthula; usubusisiwe yiNkosi. 30Wasebenzela idili, badla banatha. 31Bavuka ekuseni, bafungisana omunye lomunye; uIsaka wabavalelisa, basuka kuye ngokuthula. 32Kwathi ngalolosuku inceku zikaIsaka zafika, zamtshela ngomthombo ebeziwumba, zathi kuye: Sesifumene amanzi. 33Wawubiza ngokuthi yiSheba; ngakho ibizo lomuzi liyiBerisheba lalamuhla.
34UEsawu eseleminyaka engamatshumi amane wathatha uJudithi indodakazi kaBeri umHethi, loBasemathi indodakazi kaEloni umHethi. 35UIsaka loRebeka baba losizi enhliziyweni ngenxa yabo.
Currently Selected:
Gen 26: BE1978
Highlight
Share
Copy
Want to have your highlights saved across all your devices? Sign up or sign in
Bible Society of Zimbabwe 1978
