Gen 27
27
UJakobe uzizuzela isibusiso kuIsaka
1Kwathi uIsaka esemdala lamehlo akhe esefiphele engasaboni, wambiza uEsawu indodana yakhe enkulu, wathi: Mntanami! Wathi kuye: Ngilapha. 2UIsaka wathi: Khangela, sengimdala, angilwazi usuku lokufa kwami. 3Ngakhoke thatha izikhali zakho, imitshoko yakho ledandili lakho, uye egangeni ungizingelele inyamazana, 4ungilungisele inyama emnandi engiyithandayo, uyilethe kimi ukuba ngidle, ngikubusise ngingakafi. 5URebeka wezwa uIsaka ekhuluma loEsawu indodana yakhe. UEsawu waya egangeni ukuyazingela inyamazana ukuze abuye layo. 6URebeka wasekhuluma loJakobe indodana yakhe, wathi: Khangela, ngizwile uyihlo ekhuluma loEsawu umnewenu, 7esithi: Ngilethela inyama yenyamazana, ungiphekele inyama emnandi ukuba ngidle, ngikubusise phambi kweNkosi ngingakafi. 8Ngakhoke, mntanami, ngilalela kulokhu engikulaya khona. 9Yana khathesi emhlambini, ungithathele kuwo amazinyane amabili amahle ezimbuzi, ngilungisele uyihlo inyama emnandi njengalokho akuthandayo; 10wena uzakuyisa kuyihlo ukuba adle, akubusise engakafi. 11UJakobe wathi kuRebeka unina: Khangela, uEsawu umnewethu ungumuntu olihwanqa, mina ngibutshelezi. 12Mhlawumbe ubaba uzakungiphulula, ngibe ngokhohlisayo kuye, ngizilethele ukuqalekiswa endaweni yokubusiswa. 13Unina wathi kuye: Ukuqalekiswa kwakho kakube phezu kwami, mntanami; ngilalela, uhambe ungilandele wona. 14Wasehamba, wawathatha, wawaletha kunina; unina walungisa inyama emnandi njengalokho akuthandayo uyise. 15URebeka wathatha ingubo ezinhle zikaEsawu indodana yakhe enkulu, ayelazo endlini, wazambathisa uJakobe indodana yakhe encinyane; 16wamambathisa izikhumba zamazinyane ezandleni zakhe lasebutshelezini bentamo. 17Wanika indodana yakhe uJakobe inyama emnandi lesinkwa ayekulungisile. 18Yena weza kuyise wathi: Baba! Wathi: Ngilapha; ungubani wena mntanami? 19UJakobe wathi kuyise: NginguEsawu izibulo lakho; sengenzile njengokungitshela kwakho; vuka uhlale, udle inyama le andubana ungibusise. 20UIsaka wathi kuyo indodana yakhe: Kwenzeke kanjani ukuba uyizuze masinyane kangaka, mntanami na? UJakobe wathi: Ngoba iNkosi uNkulunkulu wakho ungiphumelelisile. 21UIsaka wathi kuJakobe: Sondela ukuba ngikuphulule, mntanami, ngazi impela ukuthi uyiyo indodana yami uEsawu, loba kawusuye. 22UJakobe wasondela kuIsaka uyise; wamphulula wathi: Ilizwi liyilizwi likaJakobe, kodwa izandla ziyizandla zikaEsawu. 23Kamazanga ngoba izandla zakhe zaziloboya njengezandla zomnewabo uEsawu; ngakho wambusisa. 24Wasesithi: Uyindodana yami uEsawu uqobo na? Wathi: Nginguye. 25Wathi: Sondeza kimi ngidle inyama yendodana yami, ngikubusise. UJakobe wayisondeza kuye, wadla; waletha kuye iwayini, walinatha. 26Uyise uIsaka wasesithi kuye: Sondela, mntanami, ungange. 27Wasondela, wamanga; wanuka iphunga lengubo zakhe, wambusisa wathi:
Khangela, iphunga lendodana yami linjengephunga lensimu iNkosi eyibusisileyo.#Heb 11:20
28UNkulunkulu akunike amazolo ezulu lokuvunda komhlaba, lenala yamabele lewayini.
29Abantu kabakukhonze, lezizwe zikukhothamele.
Ube yinkosi yabafowenu, amadodana kanyoko akukhothamele.
Kathukwe okuthukayo, abusiswe okubusisayo!#Gen 12:3
30Kwathi uIsaka eseqedile ukumbusisa uJakobe, uJakobe esand’ukusuka kuIsaka uyise, kwafika uEsawu umnewabo evela ekuzingeleni kwakhe. 31Laye walungisa inyama emnandi, wayisa kuyise; wathi kuyise: Ubaba kavuke, adle inyama yendodana yakhe, ukuba angibusise. 32UIsaka uyise wathi kuye: Ungubani wena? Wathi: Ngingumntanakho, izibulo lakho uEsawu. 33UIsaka esethuthumela kakhulu, wathi: Pho, ngubani othathe inyama wayiletha kimi, ngayidla yonke ungakafiki, ngambusisa na? Yena uzakuba ngobusisekileyo. 34Kwathi uEsawu esezwile amazwi kayise, wakhala ngosizi olukhulu impela, wathi kuyise: Ngibusisa lami njalo, baba! 35Wasesithi: Umfowenu ufike ngenkohliso, wathatha isibusiso sakho. 36UEsawu wathi: Kathiwanga kuhle ibizo lokuthi nguJakobe na? Ngoba sekukabili engidla; wathatha ubuzibulo bami, lakhathesi usethethe isibusiso sami. Wathi futhi: Kawungigcinelanga mina isibusiso na?#Gen 25:29–34 37UIsaka wamphendula uEsawu wathi: Khangela, sengimenzile inkosi yakho, ngamnika bonke abafowabo babe zinceku zakhe; ngimnikile amabele lewayini; pho, ngingabe ngisakwenzelani wena, mntanami na? 38UEsawu wathi kuyise: Baba, sinye kuphela isibusiso sakho na? Ngibusisa lami njalo, baba. UEsawu wadazuluka wakhala.#Heb 12:17 39UIsaka wasemphendula wathi:
Khangela, umuzi wakho uzakuba khatshana lokuvunda komhlaba lamazolo ezulu avela phezulu.#Heb 11:20
40Uzakuphila ngomkhonto wakho, umkhonze umfowenu.
Kuzakuthi lapho usudlubulunda,
waphule ijogwe lakhe entanyeni yakho.#Gen 36:8; 2 Kho 8:20
41UEsawu wasemzonda uJakobe ngenxa yokubusiswa kwakhe nguyise. UEsawu wathi enhliziyweni yakhe: Sezisondele insuku zokulilela ubaba, khona ngizambulala umnawami uJakobe. 42URebeka watshelwa amazwi kaEsawu indodana yakhe enkulu; wasebiza uJakobe indodana yakhe encinyane, wathi kuye: Khangela, umnewenu uEsawu uyaziqinisa ngokuthi uzakukubulala. 43Ngakhoke, mntanami, ngilalela; suka ubalekele eHarani kuLabani umfowethu, 44uhlale laye insuku ezilutshwana, luze luphele ulaka lomnewenu, 45akhohlwe lokho okwenze kuye, kudede ukukuthukuthelela kwakhe; besengithumela ngikulande; ngizalahlekelwa yini lobabili ngosuku lunye na?
UIsaka uthumela uJakobe eHarani
46URebeka wasesithi kuIsaka: Sengidiniwe yikuphila ngenxa yamadodakazi kaHethi; uba uJakobe ethatha umfazi kuwo amadodakazi kaHethi anjengala amadodakazi alelilizwe, kungisiza kanjani ukuphila kwami na?
Currently Selected:
Gen 27: BE1978
Highlight
Share
Copy
Want to have your highlights saved across all your devices? Sign up or sign in
Bible Society of Zimbabwe 1978
