Luka 2
2
Ukuzalwa kukaJesu Kristu
(Mat 1:18–25)
1Kwathi ngalezonsuku kwaphuma isimemezelo kuKesari uAgastasi sokuba kubalwe ilizwe lonke. 2Lokhukubalwa kwakungokokuqala ukwenziwa nxa uKwiriniya wayengumbusi waseSiriya. 3Bonke baya ukubalwa, ilowo lalowo emzini wakubo. 4LoJosefa laye wakhuphuka eGalili emzini othiwa iNazaretha, waya eJudiya emzini kaDavida othiwa yiBetlehema, ngoba wayengowendlu losendo lukaDavida; 5kwahamba laye uMariya owayemiselwe ukuba abe ngumkakhe, ukuze abalwe kanye laye. UMariya wayesekhulelwe. 6Kwathike beselapho, kwafika isikhathi sakhe sokubeletha. 7Wazibula ngendodana, wayigoqela ngamalembu, wayilalisa emtshokotshweni, ngoba baswela indawo endlini yezihambi.
8Kwakukhona kulelolizwe abelusi ababesegangeni, belinda imihlambi yabo ebusuku. 9Kwabonakala kubo isithunywa seNkosi, lenkazimulo yeNkosi yabazingeleza ngokukhanya; besaba kakhulu. 10Isithunywa sathi kibo: Lingesabi; ngoba ngililethele indaba ezinhle zokuthokoza okukhulu okuzakuba kibo bonke abantu, 11ngoba lizalelwe lamuhla emzini kaDavida uMkhululi onguKristu iNkosi. 12Lokhu kuzakuba yisiboniso kini: Lizakufumana umntwana egoqelwe ngamalembu, elele emtshokotshweni. 13Kwahle kwaba khona kanye lesithunywa ixuku lebandla lasezulwini, lidumisa uNkulunkulu, lisithi:
14Udumo kalube kuNkulunkulu kweliphezulu,
lokuthula emhlabeni ebantwini abathokozelwa nguye.
15Kwathi sezihambile izithunywa sezibuyele ezulwini, abelusi bakhulumisana besithi: Ake siye eBetlehema sibone leyonto eyenzakeleyo iNkosi esibikele yona. 16Bahamba ngokuphangisa, bafumana uMariya loJosefa lomntwana elele emtshokotshweni. 17Sebebonile balandisa ngalokho ababekutshelwe ngomntwana. 18Bonke abakuzwayo bamangala ngokukhulunywe ngabelusi. 19Kodwa uMariya walondoloza zonke lezizinto enakana ngazo enhliziyweni yakhe. 20Babuyake abelusi, bemdumisa bembonga uNkulunkulu ngakho konke ababekuzwile lababekubonile, njengalokho okwakukhulunywe kibo.
21Kwathi seziphelile insuku ezificaminwembili zokuba umntwana asokwe, wathiwa ibizo lokuthi uJesu, ibizo ayelithiwe yisithunywa, engakomulwa esiswini.#Levi 12:3; Luka 1:31
USimiyoni loAna
22Kwathi sekuphelele isikhathi sokuhlanjululwa kwabo ngokomlayo kaMose, bamletha eJerusalema ukuba bammise phambi kweNkosi,#Levi 12:6–8 23njengokulotshiweyo emlayweni weNkosi ukuthi konke okwesilisa okulizibulo kuzakuthiwa ngokwahlukaniselwe iNkosi;#Eks 13:2, 12 24lokuba banikele umhlatshelo njengokutshiwo emlayweni weNkosi ukuthi kakunikelwe amajuba amabili ingabe inkwilimba ezimbili.
25Kwakukhona eJerusalema umuntu othiwa nguSimiyoni ibizo lakhe. Wayelungile, emesaba uNkulunkulu, loMoya oNgcwele ube phezu kwakhe; wayelindele inkululeko kaIsrayeli. 26Kwakubonakalisiwe kuye nguMoya oNgcwele ukuthi kayikubona ukufa engakamboni uKristu weNkosi. 27Eholwa nguMoya wangena ethempelini. Kwathi ukuba abazali bamlethe umntwana uJesu ukuba bamenzele ngokomkhuba womlayo, 28wamthatha wamgona, wabonga uNkulunkulu esithi:
29Nkosi, khathesi akuyiyekele inceku yakho
ihambe ngokuthula njengelizwi lakho,
30ngoba amehlo ami akubonile ukusilisa kwakho
31okulungisileyo phambi kwabantu bonke,
32ukukhanya kokwambulela abezizwe
lenkazimulo yesizwe sakho uIsrayeli.#Isa 42:6; 49:6; 52:10
33Uyise lonina bamangaliswa yilokho okwatshiwo ngaye. 34USimiyoni wababusisa, wathi kuMariya unina: Khangela, lumntwana umiselwe ukuba abe yisibonakaliso esizakuphikwa ngabantu — 35lawe, umhedla uzakugwaza umphefumulo wakho. — Abanengi koIsrayeli bazakuma ingabe bawe ngenxa yakhe; ngokunjalo imicabango yenhliziyo zabanengi izakwambulwa.
36Kwakukhona lomprofethikazi, uAna indodakazi kaFanuweli, owesizwe sikaAsheri; wayesekhulile kakhulu, ebehlale lendoda iminyaka eyisikhombisa emva kobuntombi bakhe; 37wayesengumfelwakazi waze waba leminyaka engamatshumi aficaminwembili lane, engasuki ethempelini, ekhonza ngokuzila ukudla langokukhuleka ebusuku lemini. 38Layeke efika ngalesosikhathi wadumisa uNkulunkulu, wakhuluma ngaye kubo bonke ababelindele inkululeko yeJerusalema.
39Kwathi sebekwenzile konke okungokomlayo weNkosi, babuyela eGalili emzini wakubo iNazaretha.#Mat 2:23 40Umntwana wakhula, waba lamandla, wagcwala ukuhlakanipha; lomusa kaNkulunkulu wawuphezu kwakhe.
Umntwana uJesu ethempelini
41Abazali bakhe baya eJerusalema iminyaka yonke ngomkhosi wePhasika.#Eks 12:1–27; Dute 16:1–8 42Kwathi eseleminyaka elitshumi lambili, baya khona njengomkhuba. 43Seziphelile insuku zomkhosi, ekubuyeni kwabo, umfana uJesu wasala eJerusalema, abazali bakhe bengazi. 44Babesithi ukwababehambisana labo, bahamba usuku lonke; emva kwalokho bamdinga phakathi kwezinini zabo labazana labo. 45Bengamfumani babuyela eJerusalema, bemdinga. 46Ngemva kwensuku ezintathu bamfumana ethempelini ehlezi phakathi kwabafundisi, ebalalela, ebabuza imibuzo. 47Bonke ababemuzwa bamangaliswa yikwazi kwakhe lokuphendula kwakhe. 48Kwathi bembona, bamangala; lonina wathi kuye: Mntanami, wenzeleni okunje kithi na? Khangela, uyihlo lami besikudinga sidubekile. 49Wathi kibo: Belingidingelani na? Belingakwazi yini ukuthi kumele ukuba ngibe sendlini kaBaba na? 50Kabawaqedisisanga amazwi awakhuluma kibo. 51Wehla labo, weza eNazaretha, wabalalela; lonina walondoloza zonke lezizinto enhliziyweni yakhe.
52UJesu waqhubeka ekuhlakanipheni, lasekukhuleni, lasekuthandweni nguNkulunkulu langabantu.#1 Sam 2:26; Zaga 3:4
Currently Selected:
Luka 2: BE1978
Highlight
Share
Copy
Want to have your highlights saved across all your devices? Sign up or sign in
Bible Society of Zimbabwe 1978
