Luka 1
1
Isingeniso
1Njengoba abanengi sebezamile ukuloba belandisa ngalezizinto ezigcwaliseke phakathi kwethu, 2njengalokho basinika zona labo ababekhona ekuqaleni, bezibonela ngamehlo, beyizikhonzi zelizwi, 3kube kuhle lakimi, sengizihlolisisile zonke izinto kusukela ekuqaleni, ukuba ngikulobele ngokulandelana, mhlekazi Teyofilu, 4ukuze wazi iqiniso ngalezozinto ozifundisiweyo.
Ukuzalwa kukaJohane kuyabikezelwa
5Ensukwini zikaHerodi inkosi yaseJudiya kwakukhona umpristi othiwa nguZekariya, owesigaba sikaAbija; wayelomkakhe owamadodakazi kaAroni, ibizo lakhe linguElizabethi.#1 Lan 24:10 6Babelungile bobabili emehlweni kaNkulunkulu behamba ngayo yonke imilayo lezimiso zeNkosi, bengasoleki. 7Kodwa babengelabantwana, ngoba uElizabethi wayeyinyumba; bobabili basebekhulile.
8Kwathi lesenza inkonzo yobupristi phambi kukaNkulunkulu njengokumiswa kwesikhathi sesigaba sakibo, 9ngomkhuba wobupristi kwaba nguye owakhethelwa ukungena ethempelini leNkosi ukuba ayetshisa impepha. 10Lonke ixuku labantu lalikhuleka ngaphandle ngesikhathi sempepha. 11Kwabonakala kuye isithunywa seNkosi simi ngakwesokunene sealtare lempepha. 12UZekariya esibona wethuka, watshaywa luvalo. 13Kodwa isithunywa sathi kuye: Ungesabi, Zekariya, ngoba umkhuleko wakho uzwakele; umkakho uElizabethi uzakukuzalela indodana, uyithe ibizo uthi nguJohane. 14Uzakuba lokuthaba lokuthokoza wena; labanengi bazakujabulela ukuzalwa kwakhe. 15Ngoba uzakuba mkhulu emehlweni eNkosi; kasoze anathe iwayini lokunye okudakisayo; uzakugcwaliswa ngoMoya oNgcwele esesesiswini sikanina.#Nani 6:3 16Abanengi kwabakoIsrayeli uzakubaphendulela eNkosini uNkulunkulu wabo. 17Uzakuhamba phambi kwayo emoyeni lasemandleni kaElija ukuphendulela inhliziyo zaboyise kubantwana, lokuphendulela abangalaleliyo ekuhlakanipheni kwabalungileyo, lokulungisela iNkosi isizwe esilungisiweyo.#Mal 4:5–6 18UZekariya wathi kuso isithunywa: Ngizakukwazi ngani lokhu na? Ngoba sengilixhegu, lomkami usekhulile. 19Isithunywa samphendula sathi: NginguGabriyeli mina, omayo phambi kukaNkulunkulu; ngithunyiwe ukukhuluma lawe lokukubikela lindaba enhle.#Dan 8:16; 9:21 20Khangela, uzakuba yisimungulu, ungakhulumi kuze kube lusuku okuzakwenzeka ngalo lezizinto, ngoba ungakholwanga amazwi ami azagcwaliseka ngesikhathi sawo. 21Abantu babemlindele uZekariya, bamangala ngokuphuza kwakhe ethempelini. 22Kuthe esephuma, wehluleka ukukhuluma labo; bazi ukuba ubone umbono ethempelini. Wayelokhu ebaqhweba ngesandla, wahlala eyisimungulu. 23Kuthe sesiphelile isikhathi sokukhonza kwakhe, wabuyela ekhaya.
24Emva kwalezinsuku uElizabethi umkakhe wathatha isisu, wazifihla okwezinyanga ezinhlanu esithi: 25Yenze lokhu kimi iNkosi ensukwini eyangikhangela ngazo ukususa ihlazo lami phakathi kwabantu.
Ukuzalwa kukaJesu kuyabikezelwa
26Ngenyanga yesithupha isithunywa uGabriyeli sathunywa nguNkulunkulu emzini waseGalili othiwa iNazaretha 27entombini emsulwa eyayigane indoda ethiwa nguJosefa eyendlu kaDavida; ibizo lentombi lalinguMariya.#Mat 1:18 28Sangena sathi kuye: Okuhle, wena othandiweyo! INkosi ilawe. 29Kodwa yena wethuswa yilelolizwi, wanakana enhliziyweni yakhe ukuthi kambe kungaba yini lokhukubingelela. 30Isithunywa sathi kuye: Ungesabi, Mariya, ngoba uthandiwe nguNkulunkulu. 31Khangela, uzakuthatha isisu, uzale indodana; uzakuyitha ibizo uthi nguJesu.#Mat 1:21 32Yena uzakuba mkhulu, uzakubizwa ngokuthi yiNdodana yoPhezukonke; iNkosi uNkulunkulu izakumnika isihlalo sobukhosi sikayise uDavida;#2 Sam 7:12, 13, 16; Isa 9:7 33uzakubusa phezu kwendlu kaJakobe kuze kube nininini, lombuso wakhe kawuzukuba lakuphela. 34UMariya wathi kuso isithunywa: Lokhu kungenzeka njani, njengoba ngingazi indoda na? 35Isithunywa sathi kuye: UMoya oNgcwele uzakuba phezu kwakho, lamandla oPhezukonke azakukwambesa; ngakho umntwana ozakuzalwa uzakuthiwa ungcwele, uyiNdodana kaNkulunkulu. 36Khangela, isinini sakho uElizabethi laye ukhulelwe yindodana esemdala; le yinyanga yesithupha kuye obekuthiwa uyinyumba. 37Ngoba kuNkulunkulu kakulalutho olwahlulayo.#Gen 18:14 38UMariya wathi: Khangela, ngiyincekukazi yeNkosi; kakube kimi njengelizwi lakho. Isithunywa sasesisuka kuye.
UMariya uhambela uElizabethi
39Ngalezonsuku uMariya wasuka waya ngokuphangisa kwelezintaba, emzini waseJuda. 40Wangena endlini kaZekariya, wabingelela uElizabethi. 41Kwathi ukuba uElizabethi ezwe ukubingelela kukaMariya, umntwana weqa esiswini sakhe, loElizabethi wagcwaliswa ngoMoya oNgcwele, 42wamemeza ngelizwi elikhulu, wathi: Ubusisiwe wena esifazaneni! Ibusisiwe lenzalo yesisu sakho! 43Kwenzeke kanjani kimi ukuba ngihanjelwe ngunina weNkosi yami na? 44Ngoba kuthe ilizwi lokubingelela kwakho lifika endlebeni zami, umntwana weqa esiswini sami ngokuthokoza. 45Ubusisiwe yena okholiweyo ukuthi kuzakugcwaliseka lokho okwakhulunywa kuye yiNkosi.
46UMariya wasesithi:
Umphefumulo wami uyayidumisa iNkosi,#1 Sam 2:1–10
47lomoya wami uyathokoza ngoNkulunkulu, uMsilisi wami,
48ngoba uhawukele ubuphansi bencekukazi yakhe.
Khangela, kusukela khathesi zonke izizukulwana zizakuthi ngibusisiwe.
49Ngoba uSomandla ungenzele izinto ezinkulu; ibizo lakhe lingcwele.
50Isihawu sakhe sikuzo zonke izizukulwana zalabo abamesabayo.
51Wenzile amandla ngengalo yakhe; uhlakazile abazigqajayo ekunakaneni kwenhliziyo zabo.
52Wehlisile amakhosi ezihlalweni zawo, uphakamisile abantukazana.
53Abalambileyo ubasuthise ngezinto ezimnandi, abanothileyo wabaxotsha beze.
54Uyisizile inceku yakhe uIsrayeli, ekhumbula isihawu sakhe,
55njengokuthembisa kwakhe kubokhokho ukuthi uzakuba lesihawu kuAbrahama lasenzalweni yakhe kuze kube nininini.#Gen 17:7
56UMariya wahlala laye okungaba zinyanga ezintathu, wasebuyela ekhaya.
Ukuzalwa kukaJohane
57Isikhathi sikaElizabethi sokuba abelethe sesiphelele, wabeletha indodana. 58Abakhelene laye lezinini zakhe bezwa ukuthi iNkosi imenzele isihawu esikhulu, bathokoza laye. 59Kwathi ngosuku lwesificaminwembili beza ukusoka umntwana, babethanda ukumutha ibizo likayise bathi nguZekariya.#Levi 12:3 60Kodwa unina wathi: Atshi bo, uzakuthiwa nguJohane. 61Bathi kuye: Kakho loyedwa ezihlotsheni zakho obizwa ngalelibizo. 62Basebeqhweba uyise bambuza ukuthi yena angathanda ukumutha liphi. 63Wasecela into yokubhalela, wabhala ukuthi: Ibizo lakhe nguJohane. Bamangala bonke. 64Wahle wavuleka umlomo wakhe, lolimi lwakhe lwatshombuluka, wakhuluma edumisa uNkulunkulu. 65Bonke abakhelene laye behlelwa yikwesaba, kwakhulunywa ngazo zonke lezizinto kulo lonke elezintaba elaseJudiya, 66labo bonke abazizwayo bazilondoloza enhliziyweni zabo, besithi: Kambe lumntwana uzakuba yini na? Ngoba isandla seNkosi sasilaye.
67UZekariya uyise wagcwaliswa ngoMoya oNgcwele, wabikezela esithi:
68Kayibongwe iNkosi, uNkulunkulu kaIsrayeli. Ngoba ihambele abantu bayo, yabenzela inkululeko.
69Yasivusela uMkhululi olamandla endlini kaDavida inceku yayo,
70njengalokho yakhuluma ngomlomo wabaprofethi bayo abangcwele endulo,
71ukuba isikhulule ezitheni zethu lasesandleni sabo bonke abasizondayo,
72ukubenzela isihawu okhokho lokukhumbula isivumelwano sayo esingcwele.
73Yiso isifungo eyasifunga kubaba uAbrahama,
74ukusinika ukuba sithi sesikhululiwe esandleni sezitha zethu, siyikhonze singelakwesaba
75ngobungcwele langokulunga phambi kwayo zonke insuku zethu.
76Laweke mntwana, uzakuthiwa ungumprofethi woPhezukonke, ngoba uzakuhamba phambi kweNkosi ukulungisa indlela zayo#Mal 3:1
77lokunika abantu bayo ukwazi kokusiliswa ngokuthethelelwa kwezono zabo;
78ngoba ngobubele bukaNkulunkulu wethu sizakuhanjelwa yikusa kwaphezulu,
79ukubakhanyisela abahlezi emnyameni lasethunzini lokufa, lokuqondisa inyawo zethu endleleni yokuthula.#Isa 9:2
80Wakhulake umntwana, waba lamandla emoyeni. Wahlala enkangala kwaze kwaba lusuku lokubonakaliswa kwakhe kuIsrayeli.
Currently Selected:
Luka 1: BE1978
Highlight
Share
Copy
Want to have your highlights saved across all your devices? Sign up or sign in
Bible Society of Zimbabwe 1978
