Mark 16
16
Ukuvuka kukaJesu
(Mat 28:1–10; Luka 24:1–12; Joha 20:1–10)
1Kwathi iSabatha selidlulile, uMariya Magadalena, loMariya unina kaJakobe, loSalome bathenga amakha ukuba bamgcobe. 2Ekuseni kakhulu ngosuku lokuqala lweviki beza elibeni ekuphumeni kwelanga. 3Bakhulumisana besithi: Ngubani ozakusigiqela ilitshe, lisuke emlonyeni weliba na? 4Bathi ukukhangela babona ilitshe seligiqiwe lanxa lalilikhulu. 5Kuthe bengena elibeni, babona insizwa yembethe ingubo emhlophe, ihlezi ngakwesokunene; bamangala kakhulu. 6Yathi kibo: Lingamangali; lidinga uJesu waseNazaretha obebethelwe; uvukile; kakho lapha; khangelani indawo lapho bebembeke khona. 7Kodwa hambani, litshele abafundi bakhe kanye loPetro ukuthi uzakulandulela ukuya eGalili, lizakumbona khona, njengokutsho kwakhe kini.#Mat 26:32; Mark 14:28 8Baphuma, babaleka elibeni, ngoba bafikelwa yikuthuthumela lokumangala; kabatshongo lutho kumuntu, ngoba babesesaba.
Ukuzibonakalisa kukaJesu emva kokuvuka kwakhe
(Joha 20:11–18; Luka 24:13–35; Mat 28:16–20; Luka 24:36–49; Joha 20:19–23)
[9Esevukile ekuseni, ngosuku lokuqala lweviki, wabonakala kuqala kuMariya Magadalena, ayekhuphe kuye omoya ababi abayisikhombisa. 10Yena wasuka, wababikela labo ababelaye besalila bekhala. 11Bona sebezwile ukuba usaphila lokuba ubonwe nguye, kabaze bakholwa.
12Emva kwalokhu wabonakala ngesinye isimo kwababili babo behamba, besiya emaphandleni. 13Bahamba babikela abanye; lalabo kabaze babakholwa.
14Emva kwalokhu wabonakala kwabalitshumi lanye ngokwabo behlezi ekudleni, wabasola ngokungakholwa kwabo langobulukhuni benhliziyo zabo, ngoba bengakholwanga labo abambonayo esevukile. 15Wathi kubo: Hambani liye emhlabeni wonke, litshumayele ivangeli kukho konke okudatshuliweyo.#Seb 1:8 16Lowo okholwayo abhaphathizwe uzakusiliswa, kodwa ongakholwayo uzakulahlwa. 17Lezizibonakaliso zizakubalandela abakholwayo; ebizweni lami bazakukhupha omoya ababi, bakhulume ngendimi ezintsha, 18bazakuphatha inyoka ngezandla; uba benatha okubulalayo, kakuyikubalimaza; bazakubeka izandla phezu kwabagulayo, basile.
Ukwenyuka kukaJesu
(Luka 24:50–53)
19Kwathi iNkosi uJesu isikhulumile labo yakhutshulelwa ezulwini, yahlala ngakwesokunene sikaNkulunkulu. 20Kodwa bona basuka batshumayela endaweni zonke, iNkosi isebenza labo, iqinisa ilizwi ngezibonakaliso ezazibalandela.]
Amavesi la (16:9–20) kawalotshwanga encwadini ezinye zakudala.
Currently Selected:
Mark 16: BE1978
Highlight
Share
Copy
Want to have your highlights saved across all your devices? Sign up or sign in
Bible Society of Zimbabwe 1978
