Mark 14

Icebo lokumbulala uJesu

(Mat 26:1–5; Luka 22:1–2)

1Ngemva kwensuku ezimbili kwaba khona iPhasika, lomkhosi wesinkwa esingelamvubelo; abapristi abakhulu lababhali bafuna icebo lokumbamba ngobuqili, bambulale.#Eks 12:1–27 2Kodwa bathi: Kakungabi ngesikhathi somkhosi, funa kube lesiphithiphithi ebantwini.

UJesu ugcotshwa eBethani

(Mat 26:6–13; Joha 12:1–8)

3Kwathi eseBethani endlini kaSimoni olobulephero ehlezi ekudleni, kwafika owesifazana ephethe umfuma wamagcobo awenadi elibiza imali enengi; waphahlaza umfuma, wathela amagcobo ekhanda likaJesu.#Luka 7:37–38 4Kwakukhona abanye abakhulumisana bodwa ngokuthukuthela, besithi: Achithelwani lamagcobo na? 5Ngoba lamagcobo ngabe athengisiwe ngemali edlula amadola angamatshumi amathathu, kwanikwa abayanga. Bamthukuthelela kakhulu. 6UJesu wathi, Myekeleni; limhluphelani na? Wenzile umsebenzi omuhle kimi. 7Ngoba abayanga lihlala lilabo; uba lithanda, lingabenzela okuhle; kodwa mina kalihlali lilami.#Dute 15:11 8Yena wenzile abengakwenza; uqalile phambili ukuwugcobela ukumbelwa umzimba wami. 9Ngiqinisile ngithi kini: Loba kungaphi emhlabeni wonke lapho kutshunyayelwa khona ivangeli, lokhu akwenzileyo kuzakukhulunywa ngakho, kube yisikhumbuzo ngaye.

Umvuzo wokumnikela uJesu

(Mat 26:14–16; Luka 22:3–6)

10UJudasi Iskariyothi, omunye wabalitshumi lambili, waya kubapristi abakhulu ukumnikela kubo. 11Sebezwile bathokoza, bathembisa ukumnika imali. Wasefuna ithuba elihle lokumnikela.

Ukumiswa kwesidlo esingcwele

(Mat 26:17–30; Luka 22:7–23; Joha 13:21–30; 1 Kor 11:23–25)

12Ngosuku lokuqala lomkhosi wesinkwa esingelamvubelo ababehlaba ngalo iPhasika, abafundi bakhe bathi kuye: Uthanda ukuba siye silungisele ngaphi ukuba udle iPhasika na? 13Wasethuma ababili kubafundi bakhe, wathi kubo: Hambani liye emzini; khona lizahlangana lendoda ithwele imbiza yamanzi; liyilandele. 14Lapho ingena khona, kalibokuthi kumninindlu: UMfundisi uthi: Ingaphi indlu yami, lapho ngingadlela khona iPhasika labafundi bami na? 15Yena uzakulitshengisa indlu enkulu ephezulu, eyendlelweyo, elungisiweyo; silungiseleni khona. 16Bahamba abafundi, bangena emzini, bafumana njengokutsho kwakhe kubo; balungisela iPhasika.

17Kusihlwa wafika labalitshumi lambili. 18Sebehlezi ekudleni uJesu wathi: Ngiqinisile ngithi kini: Omunye wenu, odla lami, uzakunginikela.#Hubo 41:9 19Baqala ukudabuka, bathi kuye ngamunye: Kungaba yimi na? 20Wathi kubo: Ngomunye wabalitshumi lambili, otsheba kanye lami emganwini. 21Ngoba iNdodana yomuntu ihamba njengokulotshiweyo ngayo, kodwa maye kulowomuntu enikelwa nguye iNdodana yomuntu! Kungakuhle aluba wayengazalwanga lowomuntu.

22Kwathi besadla, uJesu wathatha isinkwa, wabonga, wasihlephula wabanika, wathi: Thathani, lokhu kungumzimba wami. 23Wathatha inkezo, wabonga, wabanika; banatha kuyo bonke. 24Wathi kubo: Lokhu kuligazi lami lesivumelwano elichithelwa abanengi.#Eks 24:8; Jer 31:31–34 25Ngiqinisile ngithi kini: Kangisayikunatha futhi okwesithelo sevini, kuze kube yilolosuku engizakusinatha ngalo sisitsha embusweni kaNkulunkulu.

26Kwathi sebehlabele ingoma baphuma baya entabeni ethiwa iOliveti.

Ukuxwayiswa kukaPetro

(Mat 26:31–35; Luka 22:31–34; Joha 13:36–38)

27UJesu wathi kubo: Lizakukhubeka lonke, ngoba kulotshiwe ukuthi: Ngizakutshaya umalusi, izimvu zichitheke.#Zek 13:7 28Kodwa ngemva kokuvuswa kwami ngizakulandulela ukuya eGalili.#Mat 28:16 29UPetro wathi kuye: Lanxa bekhubeka bonke, kodwa mina kangiyikukhubeka. 30Kodwa uJesu wathi kuye: Ngiqinisile ngithi kuwe: Lamhlanje ngalobubusuku, lingakakhali kabili iqhude, wena uzakungilandula kathathu. 31Kodwa waqinisa ngamandla, esithi: Loba ngingaze ngife lawe, kangiyikukulandula. Batsho njalo bonke.

EGetsemane

(Mat 26:36–46; Luka 22:39–46)

32Bafika endaweni ethiwa iGetsemane; wathi kubafundi bakhe: Hlalani lapha, ngisayakhuleka. 33Wathatha uPetro loJakobe loJohane, waqala ukudabuka lokukhathazeka kakhulu. 34Wathi kubo: Umoya wami udabukile kakhulu kungathi ngingaze ngife; hlalani lapha, lilinde. 35Waqhubeka ingcosana, wawa phansi, wakhuleka ukuba, uba kungenzeka, kungadlula kuye lesisikhathi. 36Wathi: “Aba,” Baba, zonke izinto ziyenzeka kuwe; susa linkezo kimi; kodwa kungabi njengokuba ngithanda mina, kodwa njengokuba uthanda wena. 37Weza, wabafumana belele; wathi kuPetro: Simoni, ulele na? Ubungelinde iawa ibenye na? 38Lindani, likhuleke ukuze lingangeni ekulingweni; umoya uyavuma, kodwa inyama ibuthakathaka. 39Wabuya wahamba wayakhuleka esitsho wona lawomazwi. 40Ebuya futhi, wabafumana belele, ngoba amehlo abo ayenzima kakhulu; babengazi ukuba bazamphendula bathini. 41Wabuya ngokwesithathu, wathi kubo: Lisalele liphumula na? Kwanele, isikhathi sesifikile; khangelani, iNdodana yomuntu iyanikelwa ezandleni zezoni. 42Sukumani sihambe. Khangelani, onginikelayo useseduze.

Ukubotshwa kukaJesu lokuthethwa kwecala lakhe

(Mat 26:47–56; Luka 22:47–53; Joha 18:1–11)

43Kwathi masinyane esakhuluma, kwafika uJudasi, omunye wabalitshumi lambili, elexuku liphethe imihedla lezinduku, livela kubapristi abakhulu lababhali labadala. 44Omnikelayo wayebanike isiboniso sokuthi: Lowo engizakumanga, nguye; mbambeni, lihambe laye, limqinise. 45Esefikile wasondela kuye masinyane, wathi: Mfundisi! Wamanga. 46Bamdumela, bambamba. 47Omunye kwababemi khona wakhokha umhedla, wageca inceku yompristi omkhulu, waquma indlebe yayo. 48UJesu wathi kubo: Liphume lemihedla lezinduku ukuzangibamba kungathi ngingumphangi na? 49Bengilani insuku ngensuku ethempelini ngifundisa, kodwa kalingibambanga; kodwa lokhu kwenziwe ukuba kugcwaliseke umbhalo.#Luka 19:47; 21:37 50Bonke bamtshiya, babaleka.

51Insizwa ethile yamlandela yambethe ingubo emzimbeni oze; bayibamba. 52Yatshiya ingubo, yabaleka ize.

UJesu uphambi kompristi omkhulu

(Mat 26:57–68; Luka 22:54–55, 63–71; Joha 18:17, 19–24)

53Basebemqhuba uJesu bamusa kumpristi omkhulu; babuthana abapristi abakhulu bonke labadala lababhali. 54UPetro wamlandela ekhatshana, waze wangena egumeni lompristi omkhulu; wahlala kanye lezinceku esotha umlilo. 55Abapristi abakhulu lomphakathi wonke bafuna ubufakazi ngoJesu ukuze bambulale, kodwa kababufumananga. 56Ngoba abanengi bafakaza amanga ngaye, kodwa ubufakazi babo kabuvumelananga. 57Kwasukuma abanye bafakaza amanga ngaye besithi: 58Thina samuzwa esithi: Ngizakudiliza lelithempeli elenziwe ngezandla, ngakhe elinye ngensuku ezintathu elingenziwanga ngezandla.#Joha 2:19 59Loba kunjalo ubufakazi babo kabuvumelananga. 60Kwasekusukuma umpristi omkhulu phakathi kwabo, wambuza uJesu, esithi: Kawuphenduli lutho na? Kuyini lokhu abafakaza ngakho ngawe laba na? 61Kodwa wathula, kaphendulanga lutho. Umpristi omkhulu wabuye wambuza, wathi kuye: UnguKristu, iNdodana yoBongekayo na? 62UJesu wathi: Nginguye. Lizakubona iNdodana yomuntu ihlezi ngakwesokunene saMandla, isiza ngamayezi aphezulu.#Dan 7:13 63Umpristi omkhulu wadabula ingubo zakhe, wathi: Sisafunelani ofakazi na? 64Liyizwile inhlamba; lithini na? Bonke bamlahla bathi ufanele ukufa.#Levi 24:16 65Abanye baqala ukumkhafulela ngamathe, bamgubuzela ubuso bakhe, bamdutshuza, besithi kuye: Profetha! Lezinceku zamamukela ngokumtshaya.

UPetro ulandula uJesu

(Mat 26:69–75; Luka 22:56–62; Joha 18:15–18, 25–27)

66UPetro esesegumeni ngaphansi, kwafika enye yamantombazana ompristi omkhulu, 67ibona uPetro esotha umlilo, yamkhangela yathi: Wena ubuloJesu waseNazaretha. 68Kodwa walandula wathi: Kangikwazi, futhi kangikuqedisisi okutshoyo; waphumela entubeni; lakhala iqhude. 69Intombazana imbona yabuya yaqala ukutsho kwababemi khona ukuthi: Lumuntu ungomunye wabo. 70Kodwa wabuya walandula. Ngemva kwesikhatshana futhi labo ababemi khona bathi kuPetro: Impela ungomunye wabo, ngoba ungowaseGalili. 71Waseqala ukuthuka lokufunga, esithi: Kangimazi lumuntu elikhuluma ngaye. 72Lahle lakhala iqhude ngokwesibili. UPetro wakhumbula ilizwi uJesu ayelitshilo kuye lokuthi: Lingakakhali kabili iqhude, uzakungilandula kathathu; waphihlika wakhala.

Currently Selected:

Mark 14: BE1978

Highlight

Copy