مَرْقُس 4
4
مَثَل المُزارِع
1وَكِت تاني يَسُوع بِقى يَعَلِّم بِجَمب البَحَر. و ناس كُتار خالِص إتلَمّو ليهو، حَتّى دَخَل مُركَب و قَعَد فيها عَلى البَحَر. و النّاس كُلّو كانو قاعِدين بِجَمب البَحَر عَلى الطَّرف. 2و عَلَّمُم حاجات كَتيرَه بِأمثال. و في تَعليمو قال ليهُم، 3”أسمَعو! المُزارِع مَرَق لِيَزرَع تيرابو. 4و وَكِت ما يَزرَع، بَعض مِن التّيراب وَقَع في السِّكَّه، و الطُّيور جو و أكَلوهو. 5و بَعض مِنّو وَقَع عَلى أرض فيها حُجار، و ما كان في تُراب كَتير. و طَوّالي قام، عَشان التُّراب كان خَفيف. 6و لَمّا الشَّمِس طَلَعَت، إنحَرَق و بِقى يابِس، فِشان ما كان عِندو عِرق. 7و تيراب تاني وَقَع بين الشّوك، و الشّوك طَلَع و خَنَقو. و ما جاب ثِمار. 8و تيراب تاني وَقَع عَلى الأرض الكوَيسَه، و قام و كِبِر و جاب دُرَه، بِتَلاتين، و بِسِتّين، و بِمِيَّه.“ 9و قال: ”العِندو إضنين لِلسَّمَع، خَليهو يَسمَع.“
10و لَمّا كان بَراهو، النّاس الكانو حَولو مَعَ الإتناشَر سَألو عَن الأمثال. 11و قال ليهُم: ”أدّو ليكُم تَعرِفو سِر مَلَكوت الله، و لَكِن ليهُم الفي بَرَّه، كُلّو شي بِأمثال، 12عَشان،
بِعاينو بِعُيونُم و لَكِن ما بِشوفو،
و بِسمَعو سَمَع و لَكِن ما بِفهَمو،
عَشان ما يَرجَعو و هو يَغفِر ليهُم.“
13و قال ليهُم: ”ما تَفهَمو المَثَل دا؟ و كيف بِتَفهَمو كُل الأمثال؟ 14المُزارِع يَزرَع الكِلمَه. 15و ديل هُم العَلى السِّكَّه، المَحَل الفيهو يَزرَعو الكِلمَه. لَمّا يَسمَعو الكِلمَه، طَوّالي الشّيطان بِجي و ياخُد الكِلمَه الكان مَزروعَه فيهُم. 16و زي دا، ديل هُم المَزروعين عَلى الأرض الفيها حُجار. لَمّا يَسمَعو الكِلمَه، طَوّالي يَقبَلوها بِفَرَح. 17و ما ليهُم عِرق في نُفوسُم، لَكِن يِستَنّو وَكِت قَليل. بَعدين، لَمّا الضّيق ولّا الطَّرد يَحصَل عَشان الكِلمَه، طَوّالي يَقَعو. 18و تانيين، هُم المَزروعين بين الشّوك. ديل هُم اليَسمَعو الكِلمَه، 19و لَكِن #4:19 هُموم: الحاجات اليَفَكِّرو كَتير فيهو. هُموم الدُّنيا، و غِش #4:19 غِنى: خيرات كَتيرَه. الغِنى، و مَحَبَّة حاجات تانيَه تَدخُل و تَخنُق الكِلمَه، و هي بِتكون بِدون ثِمار. 20و لَكِن ديل المَزروعين عَلى الأرض الكوَيسَه، هُم اليَسمَعو الكِلمَه و يَقبَلوها و يَجيبو ثِمار، بِتَلاتين، و بِسِتّين، و بِمِيَّه.“
21و قال ليهُم: ”يَجيبو لَمبَه عَشان يَخُتّوها تِحِت قُفَّه؟ ولّا تِحِت العَنقَرِيب؟ و ما يَخُتّوها عَلى الطَّرَبيزَه؟ 22عَشان ما في حاجَه مَدسوسَه إلّا عَشان بِتكون باينَه. و ما في شي مُغَطّى إلّا عَشان بِتكون مَعروف. 23إذا واحِد عِندو إضنين لِيَسمَع، خَليهو يَسمَع.“ 24و قال ليهُم: ”خَلّو بالكُم لِلإنتو تَسمَعو. الكيلَه الإنتو تَدّوها، بِتكون الكيلَه الهُم بِدّوكُم إنتو، و زِيادَه. 25عَشان العِندو، بِدّوهو أكتَر. و الما عِندو، حَتّى الحاجَه العِندو بِشيلوها مِنّو.“
26و قال: ”مَلَكوت الله زي زول يَزرَع تيراب عَلى الأرض. 27و يَنوم و يَقوم ليل و نَهار. و التّيراب يَطلَع و يَكبَر، و هو ما يَعرِف كيف. 28الأرض مِن نَفسَها تَجيب الدُّرَه، في الأوَّل القَش، بَعدين راس الدُّرَه، و بَعدين راس مَليان دُرَه. 29و لَكِن لَمّا الدُّرَه جاهِزَه، طَوّالي يَخُت فيهو المَنجَل، فِشان وَكِت يَلِمّو الدُّرَه جا.“
مَثَل تيراب الخَردَل
30و قال: ”بِنقول مَلَكوت الله زي شِنو؟ ولّا بِياتو مَثَل نَمَثِّلو؟ 31هو زي #4:31 حَبَّه: تيرابَه واحدَه.حَبَّة #4:31 خَردَل. نوع مِن النَباتاتخَردَل. لَمّا تَكون مَزروعَه في الأرض، هي أصغَر كُل التّيراب العَلى الأرض. 32و لَكِن لَمّا كانَت مَزروعَه، تَكبَر و تَبقى أكبَر كُل النَباتات. و تَعمِل فُروع كَبيرَه حَتّى طُيور السَّما يَقدَرو يَقَنِّبو في ضُلّا.“
33بِأمثال كَتيرَه زي دي، هو قال ليهُم الكِلمَه، زي ما هُم كانو يَقدَرو يَفهَمو. 34يَسُوع ما كَلَّمُم بِدون مَثَل، لَكِن هو وَرّا مَعنى كُلّو شي لِتَلاميذو لَمّا كانو بَراهُم.
يَسُوع يَسَكِّت الهَبوب
35اليوم داك في المِسا، قال ليهُم: ”نَمشي لِلطَّرف التّاني.“ 36و هُم خَلّو الجَّماعَه و اَخَدو يَسُوع مَعاهُم زي ما هو كان، في المُركَب. و مَراكِب تانيَه كانَت مَعاهو. 37و نَزَلَت هَبوب شَديدَه، و المويَه ضَرَبَت و دَخَلَت في المُركَب حَتّى المُركَب قَرَّبَت تَبقى مَليانَه. 38لَكِن هو كان في مؤخِّر المُركَب، نايِم فوق المَخَدَّه. و قَوَّموهو مِن النّوم و قالو ليهو: ”يا مُعَلِّم، ما مُهِم ليك إذا نَموت؟“ 39و قام مِن النّوم، و وَبَّخ الهَبوب، و قال لِلبَحَر: ”أسكُت ساكِت.“ و الهَبوب سَكَتَت، و كان في سُكوت كَبير. 40و قال ليهُم: ”إنتو خايفين كِدا لِشِنو؟ كيف ما عِندَكُم إيمان؟“ 41و خافو خوف شَديد و قالو بَعضَهُم لِبَعض: ”مِنو دا؟ عَشان الهَبوب و البَحَر يَطيعوهو!“
Currently Selected:
مَرْقُس 4: APD2024
Highlight
Share
Copy

Want to have your highlights saved across all your devices? Sign up or sign in
© 1978 SIM, adapted in 2024 by Pioneer Bible Translators