مَرْقُس 3
3
يَسُوع يَشفي كَتيرين
1و دَخَل بيت الرَّب مَرَّه تانيَه. و كان في راجِل هِناك إيدو يابسَه. 2و عايَنو ليهو عَشان يَشوفو إذا كان يَشفيهو في السَّبِت، فِشان كانو عاوِزين يَشتَكوهو. 3و يَسُوع قال لِلرّاجِل الإِيدو يابسَه: ”قوم في الوَسط.“ 4و قال ليهُم: ”بِالقانون بيَعمِل الكَويس في السَّبِت ولّا بيَعمِل البَطّال؟ يَخَلِّص النَّفس ولّا يَكتُلو؟“ لَكِن هُم سَكَتو. 5و عايَن ليهُم و حَوَليهو بِزَعل، و كان حَزين عَلَشان قُلوبُم قَوّيَّه. و قال لِلرّاجِل: ”مِد إيدَك.“ و هو مَدّاها، و إيدو بِقَت طَيبَه. 6و الفَرّيسيّين مَرَقو، و طَوّالي إتكَلَّمو عَليهو مَعَ الهِيرُودُسين كيف يَكتُلوهو.
7يَسُوع مَرَق مَعَ تَلاميذو لِلبَحَر. و ناس كُتار مِن الجَّليل تَبَعوهو. و كَمان مِن اليَهُودِيَّه، 8و أُورُشَلِيم، و أدومِيَّه، و مِن فوق الأُردُن، و مِن حَول صُور و صَيدا، ناس كُتار جِدّاً سِمِعو كُل الهو عَمَل، و جو ليهو. 9و هو كَلَّم تَلاميذو عَشان يَحَضِّرو مُركَب صَغَيرَه بِسَبَب النّاس عَشان ما يَقَرِّبو ليهو. 10عَلَشان هو شَفى ناس كُتار، حَتّى كُل العِندَهُم أمراض إتلَمّو قَريب مِنّو لِيَلمَسوهو. 11و الأرواح النَّجسَه كُلّو وَكِت لَمّا شافوهو، وَقَعو قِدّامو و كورَكو و قالو: ”إنتَ إبن الله.“ 12و يَسُوع أمَرُم شَديد أن ما يَقولو هو مِنو.
إختِيار الإتناشَر رَسول
13و طَلَع لِلجَّبَل، و نادى ليهو النّاس الهو دايِرُم. و هُم جو ليهو. 14و هو إختار مِنَّهُم إتناشَر عَشان يَكونو مَعاهو، و عَشان يَرَسِّلُم لِيَبَشِّرو 15و يَكون ليهُم سُلطَه عَشان يَمَرِّقو الشّياطين. 16و أهُم ديل الإتناشَر الهو إختارُم: سِمْعَان، الأدّاهو الإسم بُطْرُس، 17و يَعْقُوب إبن زَبَدي و يُوحَنَّا أخو يَعْقُوب، الهو أدّاهُم الإسم بُوَانَرْجِس، يَعني أولاد صوت البَرق. 18و أنْدَرَاوُس، و فِيلُبُّس، و بَرْثُلَمَاوُس، و مَتَّى، و تُومَا، و يَعْقُوب إبن حَلْفَى، و وَتَدَّاوُس، و سِمْعَان القَانَوِي، 19و يَهُوذَا الإِسْخَرْيُوطِي السَّلَّمو.
يَسُوع و بَعلَزَبول
20بَعدين دَخَلو البيت. و النّاس إتلَمّو مَرَّه تانيَه، حَتّى ما كان مُمكِن ياكُلو. 21و لَمّا أهلو سِمِعو عَن دا، مَرَقو لِيَمسِكوهو، فِشان قالو: ”هو مَجنون.“ 22و مُعَلِّمين القانون النَّزَلو مِن أُورُشَلِيم قالو: ”بَعلَزَبول فيهو. بِرَئيس الشّياطين هو يَمَرِّق الشّياطين.“ 23و هو ناداهُم و كَلَّمُم بِأمثال: ”كيف الشّيطان يَقدَر يَمَرِّق الشّيطان؟ 24إذا مَملَكَه مِنقَسِمَه عَلى نَفسا، المَملَكَه دي ما بِتَقدَر تَثبُت. 25و إذا كان بيت إنقَسَم عَلى نَفسو، البيت داك ما بِقدَر يَثبُت. 26و إذا الشّيطان قام عَلى نَفسو و إنقَسَم، هو ما بِقدَر يَثبُت، لَكِن نِهايَتو جايَه. 27ما مُمكِن واحِد يَدخُل بيت راجِل قَوّي و يَشيل مالو، إلّا هو بِيَربُط الرّاجِل القَوّي. بَعدين هو بِقدَر يَشيل مالو.
28الحَق أقول ليكُم، كُل الخَطايا بِتكون مَغفورَه لِأولاد النّاس، و الشَّتايِم اليَشتِمو بيها. 29و لَكِن اليَجَدِّف عَلى الرّوح القُدُس ما بِكون مَغفور ليهو أبَداً. خَطِيَّتو فوق رَقَبتو لِلأبَد.“ 30عَشان هُم قالو: ”فيهو روح نَجِس.“
31و أُمّو و أخوانو جو، و كانو واقفين بَرَّه. و رَسَّلو واحِد عَشان يَناديهو. 32و ناس كُتار كانو قاعِدين حَولو، و قالو ليهو: ”أُمَّك و أخوانَك في بَرَّه يَطلُبوك.“ 33و رَدَّ عَليهُم و قال: ”مِنو أُمّي و أخواني؟“ 34و إتلَفَت لِلنّاس الكانو قاعِدين حَولو و قال: ”أهُم ديل أُمّي و أخواني! 35هو البيَعمِل إرادَة الله، هو أخوّي، و أُختي، و أُمّي.“
Currently Selected:
مَرْقُس 3: APD2024
Highlight
Share
Copy
Want to have your highlights saved across all your devices? Sign up or sign in
© 1978 SIM, adapted in 2024 by Pioneer Bible Translators
