YASFADOCI LOKU 13
13
1Huwa ’n’tvsi vbeki nrlatv wiyafvki qanv ina lrqv ud rtu-tvmvwr-wrli nihi Galalewi-lanvwahi niheni u mskumilici Brlvde u gilagfatu ut vpanawa-nilici. 2Macimi rpvfsa, Hv ki tasi ta-hapwv vlikv majelaficki iuhkumv Galalewi-lanvwaki yacsiwrci jrvihki nihki Galalewi-lanvwaki xvga mahci mvjesi nvmoki yomv wiahi? u talvhi. 3Gi talapwv nelv, Mvtv : wakv, waciwaphi mv-tveni si taha-yaqa, yone ivskv wah si iqina-yaqa jrivhki gelvwv. 4Walr nahga matvhfwi-gita-nfwrsigfwi, na-pulrqicki ini tvwada-wikv Svilomigi rgicfaiv, macimi u nfaku-nrwv, hv ki tasi taha-pwv vlikv ga-sfiwaficki nihki notv jrivhki nihki ilaneki Culo-salamegi yadrcki? 5Gi talapwv nelv, Mvtv : wakv, waciwaphi mvtveni si taha-yaqa, yone ufapi wah si iqina-yaqa jrivhki ge-lvwv, u talvhi.
6Chena yomv pamrtuwawa kvlvwi; Nr-nakuti ilani mahci vhdrqi gicimesi u mfvlomi-gtigr-nagi; chena biawv bami nvtun-ahvgi mvwifowa ’n’tvsi, macimi mvtv u mkv. 7Chena Wrpvmilu, yolumv nfwi gikvtu ni br-bir bami nvtunahvmv mvwifowa yomv gicimesigi, macimi mvtv ni mkv : kvuhvnu ini; gociwa nahfrpi ini utvmsgrwaiv ini vsisgegi? u talrli nili br-pvgicqvh-kutvmalici. 8Chena inv pami rpvfsa, Dabalamiwatv, welrni ini nahfrpi inugi nakuti gikvtwi, palvhci nah luhgrmaghrwa gryrukv ini, macimi nah muh’tu ini : 9chena qahqi negiga ini mvwifowa yoci inugi, hu-wasv; wakv qahqi mvtv, gah kvuhv ini, u talrli inv.
10Chena bami kvgahgimiwaci betiga nakuti nili msi-kvmiku ini tv hvlwrkvhsi-gesagigi. 11Macimi wrpvmahku, iqawv ba-bo-nvkv kvtunawi ilafewa matvhfwi-gita-nfwrsigfwi gikvtu; macimi mrtvkuca, chena ud rlwi wiahisi kuqitanv weiv. 12Chena iah nawrci Jesise utvhpi-mrli, macimi Iqawv, gi kvtunawa gi ta huci palskuna-gopi, u talrli. 13Macimi usgici nili u tah bonrnv u laciwvli : macimi walanv inv pasiqvhkuca-hofu, chena u wvhfrci-makuwhrli Mvnadoli. 14Chena inv dabalacigatv ini msi-kvmi-kugi, dawvhi mrci taha gisfaqewa xvga Jesiseli mahci gegahiwali ini tv hvlwrkvhsi-gesagigi, rpvfsa, Vhdawv nakutwvhfwi grsagiki wvh tv hilaneki pakvtaf i-wrci : ina nili waciganvhi birku chena gegahofuku, macimi tagi tv hini gesagigi ini vlwrkvhsewa, u talv-hi nihi mahsalalici. 15Pvyaqv inv Dabalamiwatv ud rpvftv-wrli, macimi Gelvwv naluhci-lvwiwah-feki, hv mvtv mrsv nakuti wiyafv gelvwv ini tvh-wihfanilici uci palwhrli ud rxinemvli walr u jagefamvli, tv hini vlwrkvhsi gesagigi, macimi u tvla fvginr-birlrli nili wvhsi manhrci? 16Macimi hv mvtv yrmv iqawv, da-wvhi Aplahame u drnahfvli, nileni u mahtvh-pilrli Satani, scih, vlvnili ne matvhfwi-gita-nfwrsigfwi gikvtu, iv hinv mahci yomv ryetvhpifowa uci palhofu inv tv hini gesagigi inv vlwrkvhsewa? isiwa. 17Chena yasi yolumv wiahi iuci jrivhki u mvdaladewa-nhi wivnrtiho-fuhi : macimi jrivhki nihi mahsalalici usvsilvwr-tvmahi jrivhki nili wvhfrci wiahi mviahci si lvwelici nili.
18Nahiwa ini ugimrwi-drmkumi Mvnatu sinrqvtwi? iwv waciganhi, Macimi drniwa nah si tvqrtutv ini? 19Brsi ini nakuti-paqa mvstvdewi menkv, ma-mvmagi ilani, macimi welv u mama-gin-cikv-nagi ut ipvgitv; chena ini sqineginwi, macimi mtakun-iwi; chena nihki wisgiluhfvki ini manqvtwi uci lwvhsinoki nili pah-giaivkuki ’n’tvsi.
20Chena Drniwa nah si tvqrtutv ini ugimrwi-drmkumi Mvnatu? iwv nuhgi. 21Brsi ini unvlascikv, ma-mvmagi iqawv u ta gigitu nfwi tapvcikv-nagi lughrnv, brlu’ hini jrivhgi unata.
22Chena wapfa yala hrci srpwi udawanv macimi udawana-fv, pami kvgahgimiwa, macimi Culosalame pami via lrmi. 23Chena nakuti wiyafvli, Dabalamiwatv, hv mrtfwihi nihki wa-wrpvnasho-fucki? u tagoli. Macimi u talvhi, 24Wesigihkv-muku wvhsi uci becfr-yaqa ini mrcqrlvkvdofi sqrta : xvga maci, gi tala-pwv nelv, wah nvtunahr-nrwv wvhsi becfr-wrci, macimi wa hrlwi ilafeki. 25Hvianwi balaku pvfaqeta inv ini wegiwr-pagi uci mastala, macimi mahci giphvga ini sqrdagi, chena gelvwv ga hvlami nepvwi-pwv frgici, macimi detuwvthr-nrwv ini sqrta, Dabalamiwatv, tvwanvmvwi-nrga, ga hisiwapwv; chena inv wa hrpvf sa, Mvtv gi wrkumala-pwv waciwi-yaqa ga hikuwv; 26hina uwa gelvwv, Svpkvhi ni wihfanipa macimi ni manapa git vbewa-nagi, chena gelv svpkvhi gi kvgahgimiwa n’udawani-myawana-nrgi, ga hvlami iupwv; 27macimi inv, Gi talapwv, mvtv ni wrku-tv waciwi-yaqa gelvwv; neyrgi uci srwaku, jrivhki gelvwv ba-kvtanvgiki mvjelafewa, wa hiwv. 28’Nitvsi wa vhdawi ini wih-fvqawa macimi ini wah tvlwawahfaki wepitvli, ina gah nawrwrki Aplahame, chena Visigi, chena Jakvbe, chena jrivhki nihki mrmo-sigesaacki, betiga ini ugimrwi-drmkumi Mvnatu, macimi gelvwv frgici kit ipvgila-gopwv. 29Chena nihki in wa-tvhkufvgi wa huci biaki macimi ya-pvximugi, chena ini pabongegi macimi ya-lrwvhqagi uci, chena betiga ini ugimrwi-drmkumi Mvnatu wah lamvtvbeki. 30Macimi wrpvmahku, vbeki ’n’tvsi udrnrgi-weki nihgeni wa nhihdr-weki, macimi vbeki ’n’tvsi nhihdr-weki nih-geni wa hudrnrgi-weki.
31Hina ufapi yrtafvgi biahi ’n’tvsi nr-nakuti Palasihi, che-na luhfrlu macimi yoci wapfalu : xvga Halade gi mrtvwi nfaqv, u takuhi. 32Macimi Nhrkuna chena ilahku inv wrkucahfi, Wrpv-tvnu, ni luhfa-pvgilrki wvninahfeki macimi ni pakvtanrnv gega-hadewanv inugi grsagigi macimi wrpvga, chena ini mvwi-nfwi gesagiga ni mafafiha-gopi, u talvhi nihi. 33Mvtv-ini-utvhpi qelvhi ni nahv yahriv inugi grsagigi macimi wrpvga chena ini vhkuwi grsagigi : xvga mvtv ivh kvtvwi inwi wvhsi mrmosigesqa-tv Culosalame uci iqinaci. 34O, Culosalam’, Culosalam’, nr-nfrtv nihi mrmosigesqalici, chena u sekunwhvhi nihi ba-bialkvmv-wofuci ! drniwa tfana naiahkv nih mahci mrwvtunrki gi nejrna-fvki, datapilvhi brsi palawv mrwvtunrci nahvlwrkv u pvlvsrnhi lrmagi u laqvnv, macimi mvtv ki tasi tahapwv ! 35Wrpvtvmuku yadr-yaqa wegiwv gi nvkvtvmr-gopwv lekvtvh-kvmikvtwi : chena gi talapwv nelv, Mvtv kitvh nawipwv, brluhi Gisrda-lamakufi ca hinv ba-birtv ini u wefowa-nagi inv Dabalamiwatv, ga hiupwv.
Currently Selected:
YASFADOCI LOKU 13: SJW
Highlight
Share
Copy
Want to have your highlights saved across all your devices? Sign up or sign in
Published for Thomas Wildcat Alford in 1929
