YA-SFADOCI MRKV 10
10
1Chena ini uci pvfaqi, macimi ini sqriv Cudia si biawv ini Jrtane vlikv : macimi nuhgi u biaci mrwvdwa-ludr-kuhi mahsa-lalici; chena, yr-silvweci galv, nuhgi u kvgahgi-mvhi nihi.
2Chena ’n’tvsi utfa-kuhi Palasihi, macimi u nvtuhdr-kuhi, Hv mvyrwvtwi ini kutaladewa-nagi ilani wvhsi pvgilrci wewvli? u takuhi, hu kucihgr-kuhi. 3Chena rpvfsa macimi Nahiwa gi tapima-kuwv Mosise? u talvhi. 4Mosise welrni u ta la-latv wvhsi vwi-gagi pgahudewi awigrdagi wvhsi inv pvgilrci nili, iwvki nihki. 5Pvyaqv Jesise, Xvga sepafeiv ki tahiwa waci vwigol-wrqa yomv tapigamowa u talvhi. 6Wakv ina vlamvh-kvmikvtwi ini waskvh-kvhmigigi uci, Ilani macimi iqawv u tasi mac-hvhi inv. 7Xvga yomv uci ilani wah nvkvlrli u fvli macimi u gali, chena wah si ryec-sinwv wewvli; 8macimi nihki neswi wah nakude-yrli wivufi : waci-ganvhi nihki mvtv gidani neswi, nakuti wivufi wakv. 9Goqa-nahi waciganvhi Mvnatu mviahci tvkudoci, tagi welrni ilani wih puskunv. 10Chena nihki kvgahgimrfvki ini wegiwr-pagi nuhgi u nvtuhtvwr-wrli yomv si wiahi. 11Macimi Goqa-nafv-grci wah pvgilrli wewvli, macimi kutvkvli u wewi-nrli, u mvci-lvwihtv-wrli wrpvsiphigawa nili : 12chena qahqi welv inv iqawv wah pvgilrli wahsici, macimi kutvkvli usinrli, mvci-lvwi inv wrpvsiphigawa, u talvhi.
13Chena nihki u pami biatvwr-wrli cvgi vpaluhfafhi, wih pahsanrci nihi : macimi nihki kvgahgimrfvki u kutalr-wvhi nihi. 14Pvyaqv iah namagi ini Jesise, u mrci-lapwvha-kuhi gisfadewa, macimi Welrni nihki cvgi vpaluhfafvki ni bialudr-goki; tagi ki nvnvkuwhr-wrki : xvga nihgeni ya-tagiki welvwv ini ugimrwi-drmkumi Mvnatu. 15Tapilo gi tala-pwv nelv, Goqa-nafv-grei mvtv u tvhsi utvhpanv ini ugimrwi-drmkumi Mvnatu brsi cvgi vpaluhfafv, mvtv ivh wiahisi becfa ’n’tvsi, u talvhi. 16Chena u tah mvmvhi nihi u nahgigi, macimi u gisrda-lamaku-whvhi, chena u tah bonvmv-wvhi u laciwvli usgici nihi.
17Chena yasi via wapfaci ini ya-hrci, nakuti ’n’tvsi biap-doli, macimi u nvtuhdr-goli, Uwasi Ga-gahgimiwa, nahiwa nah si Ivwi wvhsi manvwvhi lrpi-tabalatvmv buryr jaiahqrgi lanvwa-wewa? u tagoli. 18Chena Jesise Gociwa gelv uwasi gi tasi? mvtv wiyafv ulafi waciwaphi nakuti Mvnatu inv u talrli. 19Gi wrku-drnv nili tapigamowanv, Tagi gi nsiwa, Tagi gih mvci-lvwi wrpvsiphi-gawa, Tagi gih gimota, Tagi gih weci-tahrtv myrsi-jegingamowa, Tagi gih wvnigamu, Hutvga-lami g’uhfv macimi gi giv, u talrli. 20Ga-gahgimiwa, jrivhki yolumv wiahi naiahkv ni gcitvwrfi iah mvyrni-laniwiv uci, u tagoli. 21U ta Irpvmrli Jesise macimi ut vhqala-mrli, Nakuti wiahi gi notqelafi : ’n’hrlu, myagilu goqa-nahi-grci gi bonv, chena meli inv gitamrfv, macimi gah bonv pvwawa betiga wafapvh-kvmigigi : macimi birlu, nakv-silu, u talrli. 22Pvyaqv inv kutvgi-lrpaskv ini iyowa uci, macimi via wapfa uqrwafi mvci-labwrwa : xvga inv nakuti ba-bonvkv msi nhvlwrfewanv.
23Chena Jesise gryrukv Irpi, macimi Cah fvgrgi nihki ba-bonvgiki pvwrwanv wah becfaki ini ugimrwi-drmkumi Mvnatu ! u ta-lvhi u kvgahgimrfhi. 24Macimi nihki kvgahgimrfvki u qvqahdrna-latv-mvwr-wrli u kvlvwewanv. Pvyaqv nuhgi rpvfsa Jesise, Vpa-luhfati, Ivkuqa gesanrci ini nihki wesrlv ya-lalatvgiki pvwrwanv wvhsi becfr-wrci ini ugimrwi-drmkumi Mvnatu ! 25Vliwi wacihi ini wvhsi gamvli srbweci srpunikv u sgesaqi, notv pvwawi ’lani wvhsi becfrci ini ugimrwi-wrmkumi Mvnatu, u talvhi. 26Macimi nihki vnhiwawi cihsi-tahaki, Huwa nafvwa wih kvtvwi wrpvnas-hofu? u takuhi. 27Jesise u mamaginrpv-mvhi, Welvwv ilaneki mvtv-yaci-wvtwi ini, wakv welv Mvnatu mvtv : xvga welv Mvnatu jrivhki wiahi dapi-wvtwi, iwv. 28Betv ut vlami ilrli, Cih, naiahkv nelvwa ni nvkvdrpa jrivhki, macimi naiahkv ki nakvla-lapa, u talrli. 29Tapilo gi tala-pwv nelv, iwv Jesise, Mvtv ilani vpiwv mviahci nvkvtvkv wegiwv, walr ujaninrnhi, walr utqami-mvhi, walr ugali, walr ufimrli, walr vpalufhi, walr vsisgi-wvli, nelv uci macimi ini uwasi-biadrcimowa uci, 30wakv inv wa hutfaku tabawa-yatfwagifagi inugi uwa, wegiwr-pvli, chena ujaninrnhi, chena utqami-mvhi, chena vpalufhi, chena vsisgi-wvli, gilagi nochrladewa; macimi buryr jaiahqrgi lanvwawewa betiga ini waskvh-kvmigigi wrsv biayrgi. 31Pvyaqv maci na-nhihdr-wicki wa hudrnrgi-weki; macimi nihki udrnrgi nhihtv.
32Chena mr vlamfaki ini ya-hrwrci, pami Culosalame si ku-qicsi-noki; macimi Jesise via negrni nihi : chena qvqahdrni-tahaki nihki; macimi nihki na-nakvsi-wacki kupanaki. Chena nuhgi ud rmwa-lvhi nihi matvhfwi-gita-neswi, macimi ut vlami wetvmv-wvhi ini wiahi wrsv sinvgi welv, 33Wrpvtv-muku, Culosalame ki ta kuqicsi-napa; chena nili u Qihfvli ilani wah melo-foki nihki ugimrwi mkvtaukulvyaki chena nihki yr-ivwigacki; macimi nihki nabowa-nagi wah si mvtvhkuwrlr-wrli nili, chena wah melr-wvhi nihi Nvnvhkvwi-lanvwahi nili : 34macimi nihki wah wrpvlrchr-wrli, chena wah fe-faqrlr-wrli, chena wah lihfewvn-whr-wrli, macimi wa nfrwrli nili; chena mahci nfukunv-giga inv wa hunskv nuhgi, iwv.
35Chena ’n’tvsi biahi mrlrqvhi Jamseli chena Jrneli, nihi u qifhi Sapade, Ga-gahgimiwa, skvtv ni tasi tahapa wvhsi gelv ini ipanvsi-yrga gopa-nahi-grci gah nvtutvmo-lapa, u takuhi. 36Na-hiwa ki tasi taha-pwv wv ipanvla-lvku gelvwv? u talvhi. 37Welrni lalatvmvwi-nrga wvhsi manvwvhi nelvwa lamvtvpi-yrga, nakuti gi mvyrwen-gigi, macimi nakuti gi nvmvjen-gigi, ina gi wvhfrcimaku-fewa-nagi, u takuhi. 38Pvyaqv Jesise Mvtv ki wrkudr-nrwv na-tutv-maqa. Hv ki dabelafi-pwv gelvwv wvhsi mana-yaqa inv taphikv ma-naiv nelv? walr wvhsi fvfvhqi-ulalhofu-yaqa ini fvfvhqi-ulalwewa wa-lalho-fuiv? u talvhi. 39Macimi Ni dabelafipa, u takuhi. Inv taphikv ma-manaiv gah mana-pwv-iu; chena gilagi ini fvfvhqi-ulalwewa fa-fvfvhqi-ulalho-fuiv nahfrpi gah fvfvhqi-ulalhago-pwv; 40wakv wvhsi lamvtvpi-yaqa ni mvyrwen-gigi walr ni nvmvjen-gigi mvtv nelv ini wvhsi meliwaiv; wakv nihki welvwv ini ya-kvwrcfado-fucki, u talvhi Jesise. 41Chena nihki matvhfwi iah nodrga-wrci ini, vlami mrci-tahaki gisfadewa nihesi Jamseli chena Jrneli. 42U tah wihku-mvhi nihi Jesise, macimi Ki wrkumr-wrki nihki ya-lvgi-mo-fucki wvhsi msi-giluhtvwr-wrci nihi Nvnvhkvwi-lanvwahi yasi ini tabalatvm-panvlr-wrci nihi; macimi welvwv u mse-lafem-wvhi u mr-msi-makufihdrku-wvhi u talvhi. 43Pvyaqv mvtv ini inwi alagenv gelvwv : wakv goqa-nafv-grci wih wesv mselafi alagenv gelvwv, ga hu mesvmrgami-pwv; 44chena goqa-nafv-grci wih wesv nhihdrwi alagenv gelvwv, ga hut vlolrkvni-pwv jrivhki. 45Xvga inv u Qihfvli ilani nahfrpi biawv mvtv wvhsi mesvmv-waci, wvhsi mesvmrgaci wakv, macimi wvhsi meli-waci u ta lanvwawewa maci udwanikvni ini.
46Chena Calago si biaki : chena yasi Calago uci luhfrci, gi-lagi u kvgahgimrfhi macimi maci mahsa-lalici, inv u qihfvli Drmi-vse, Brtvmevs’ sifu, gr-kvtuwatv kvgabeqa, lamvtvpiwv pvkvckvnv. 47Chena inv iah nodrgaci yasi Jesise-wilici nili Nrsalenewi-la-neli, vlamv-hotvmwv, Jesise, gelv u qihfvii Dapide, bonvmv-wilu gitaminrqa-ladewa iwv. 48Macimi maci u kutalr-wrli wih nolawi-lici : pvyaqv inv ini vlikv si ulrmv-hotvmwv, Gelv u qihfvli Dapide bonvmv-wilu gitaminrqa-ladewa. 49Chena Jesise nola nepvwi, macimi Utvhpi-mahku iwv. Chena nihki utvhpimr-wrli nili ga-gabe-qalici ilaneli, Uwasi-labwrwa-filu : pvfaqelu, g’ utvhpi-maqv, u talr-wrli. 50Macimi inv u pami mr ipvgitv u betanikv, pvfaqicfa, chena Jesiseli si biawv. 51Chena ud rpvftv-wrli Jesise, Nahiwa gi tasi taha wi ipanvlalv nelv? utalrli. Lapunrye, wvhsi manvwvhi nelv utfakuiv ni tapinvmowa, u talrli inv ga-gabeqatv ilani. 52Macimi Jesise Wapfalu ya-hrivni; gi dapwahsawa gi mahci mafafi-haku, u talrli. Macimi inv walanv utfaku u tapinvmowa, macimi u nakvla-goli ya-hrci.
Currently Selected:
YA-SFADOCI MRKV 10: SJW
Highlight
Share
Copy
Want to have your highlights saved across all your devices? Sign up or sign in
Published for Thomas Wildcat Alford in 1929
