YA-SFADOCI MRKV 15

1Chena walanv ini wvyrpvgi nihki ugimrwi mkvtaukulvyaki gilagi nihki gigi-laneki chena yr-ivwigacki, macimi inv jrivhgi dapuwatv, tapuwaki, chena u gijepilr-wrli Jesiseli, macimi ud rmwalr-wrli, chena Brlvdeli u pvgfanv-mvwr-wrli nili. 2Macimi Brlvde u nvtuhtv-wrli, Hv gelv inv ugimrm-wrli nihki Josvki? u talrli. Macimi inv pami rpvfsa, Gelv gi taiu, u talrli. 3Chena nihki ugimrwi mkvtaukulvyaki u cvhtvwrcimr-wrli maci wiahi. 4Chena Brlvde nuhgi u nvtuhtv-wrli, Hv mvtv-wiahi gid rpvfsa? wr-pvtvnu, maci wiahi ki cvhtvwrcima-goki nihki, u talrli. 5Pvyaqv Jesise mvtv gidani rpvfsa wiahi; waciganvhi Brlvde qvqahdrni-taha.

6Huwa ini tvh wihfanci-gagi u br-pvgfanvmv-wvhi nihi nakuti geganigrfvli, nili na-tutvmr-kuci nihi. 7Macimi ’n’tvsi vpiwv nakuti Pvlapvse yr-lofu saxinwv gijepifu weci nihi mviahci noc-hadetv-malici u kvpanvle-mwv, ilaneki ini tvh nochadetvmu-wrci mvci-lvweki nsiwawa. 8Chena nihki mahsa-lagiki spamagi haki macimi ut vlami nvtutvmvwr-wrli wvhsi ini si lvwelici yrsi Ivwihtv-wrci. 9Macimi Brlvde ud rpvftv-wvhi, Hv ki tasi taha-pwv wvhsi pvgfanvmo-lvku inv ugimrm-wrli nihki Josvki? u talvhi. 10Xvga u mola-latv yasi vhbaladewa nihki ugimrwi mkvtaukulvyaki uci mahci pvgfanvmr-gaki nili. 11Pvyaqv nihki ugimrwi mkvtaukulv-yaki u gicidrmr-wvhi nihi mahsa-lalici, wvhsi Pvlapvseli grjekv palhvmv-wrci inv. 12Chena Brlvde nuhgi rpvfsa macimi Nahiwa uwa na ipanvlv inv ugimrm-wrli nihki Josvki yr-ilvqa? u talvhi. 13Macimi nihki, Hrsitafwhi, Ivhotv-moki nuhgi. 14Chena Brlvde Gociwa, nahiwa si majrfigi si Ivwi? u talvhi. Pvyaqv nihki vnhiwawi wivkvho-tvmoki, Hrsitafwhi, lvho-tvmoki. 15Macimi Brlvde, wvhsi dabalam-hrci nihi mahsa-lalici pami si taha, u palhvmv-wvhi Pvlapvseli, chena u tah pvgfa-nrli Jesiseli, iah mahci lihfewvn-whrci, wvhsi rsitafho-fulici.

16Chena nihki svmrkvnvki u tasi walr-wrli betiga ini tvh tapuwagi, Pladolivme ini; macimi u mrwvtumr-wvhi malsga nakudwa-lanv svmrkvnhi. 17Chena nihki u betanigahr-wrli masqi-sgipvgirgi, macimi u pami vpganr-nrwv grwihi uci ugimr-wi-patvghowa, ini u patvgwhr-wrli nili; 18chena ut vlam usilv-wrlr-wrli, Hai, Ugimrm-wrli nihki Josvki ! 19Chena u br-pgitawhr-wrli welagi mfvsqvlwi, chena u fe-faqrlr-wrli, macimi pami wrgi-jeqvnas-grki usvsilvwahr-wrli. 20Chena iah mahci wrpvlrchr-wrci nihki, u leginr-wrli ini masqi-sgipvgirgi, chena u betanigahr-wrli welv u betanikvnv.

21Chena nihki u mvmelowih-kvwr-wrli nakuti pami pamfali, Svimvne Srilene uci, ini belasgi umoli, nili u fwrli Alaxantv che-na Lofvse, wvhsi wedamaku-wrci, wvhsi inv manvwvhga rmwatv-wrci ud rsitahfage-milici.

22Chena nihki u tah bialr-wrli nili ini Kvlgofv tvsi, Ini ukvnrtapigi, yrsi lrbrtudota ini. 23Macimi wesv melr-wrli wveni gilagfadota mr : pvyaqv inv mvtv utvhpanv ini. 24Chena ud rsitafwhr-wrli nihki, macimi ialskunv-mrtihi u betanikvnv alagenv nihi, gisginikvni-tvlwrtihi nili, wvh mvmagi mosv nakuti. 25Chena ini ina mvwi-nfana yr-tafvgi, chena ud rsitafwhr-wrli nili. 26Chena ini spvwigawa u cvhtvwrcimo-fowa uci mahtvwi-grta spamagi, NILENI UGIMRM-WRLI NIHKI JOSVKI, Ivwigrta. 27Chena weci nili nihki ud rsitafwhr-wvhi neswi jekuniwah-fihi; nakuti u mvyrwen-gigi, chena nakuti u nvmvjen-gigi. 29Chena nihki ’n’tvsi ba-pamfacki u lsgimr-wrli, pami pvpvuqasgrki, chena Hai ! gelv ma-cilutvkv ini mvmrtumawi-kvmiqi macimi nfuku ini wa-pvtanvkv, 30wr-pvnasdolu geiv, macimi ini yrsitahfagi uci lrsiwalu, u talr-wrli. 31Heni-ivskv nahfrpi nihki ugimrwi mkvtaukulvyaki u pami wrpvlrchr-wrli alagenv welvwv gilagi nihki yr-ivwigacki, U wrpvnas-hvhi kutvkhi; weiv ud rlwi wrpvnastu. 32Welrni inv Klvisde, nili u-gimr-mvli Iswelv uwa qvsfrta ini yrsitahfagi uci, wvhsi manvwvh naga-ivqa macimi depwahsa-ivqa, iwvki. Chena nihi wa-weci rsi-tafho-fulici u mvei kvlola-kuhi.

33Chena ina ini mvwi-nakutwvh-fana yr-tafvgi iah bia-yrgi, ’n’tvsi vhdawi ba-pagijrgi ini mafhega vsisgegi brlu’ hint mvwi-jrkvtfana yr-tafvgi. 34Chena tv hini jrkvtafana ’rtafvgi Jesise ulrmv-hotvmwv, Elui, Elui, lamv sapvgfanvi? Ni Mvnadomv, ni Mvnadomv, goeiwa gelv gi pvgida-lami? yrsi lrbrtudota ini. 35Chena nrlatv nihki mrlrqvhi na-nepvwicki, iah notvmu-wrci ini, Wrpvmahku, u wihku-mrli Elvicvli, iwvki. 36Chena nakuti mamaqi, macimi u pami uqikvm-hrli gcikvmewi vtuwvli uqrwi psgibrpu, mfvsqvl-wigi u tah bonrli nili, chena u melrli wvhsi manalici, Welrni; wrpvmr-drku qahqi Elvicvli wah biali wvhsi irsiwa-nakuci, iwv. 37Chena Jesise ulrmv-hotvmwv, macimi u pvgfa-nrli nili jepvli. 38Macimi ini lrpici-mutv ini mvmrtumawi-kvmikugi uci neswa-lanv si pvhfahkv ini spamagi uci brlu’ hini svhgigi. 39Chena inv kvpdenv, mrlrqvhi na-nepvwitv ya-lvhfv-melici nili, iah namagi yasi yone si pvgfa-nrci nili jepvli, Dabwawa yoloni u Qihfvli Mv-natu, iwv. 40Chena ’n’tvsi nahfrpi vbeki iqaki u pami ilrpvmr-wrli paluwihi uci : alagenv nihi vbeki nayeswi Male Magitalenv, chena Male nili u giwrli Jamse inv utvhbefv chena Josise, macimi Salome; 41niheni, ina Galalegi ia hvpici, u nakvla-kuhi, macimi u mesvmr-kuhi; chena maci kutvkv-ki iqaki ba-biaci wedfa-makuci Culosalamegi si.

42Chena ia hulrqefigi uwa, xvga ini vhdawi ini Nvnvhiwa, ini galv, ini wrpvga ini vlwrkvhsi-grsagigi, 43’n’tvsi biawv Jo-se Rlimafia uci-lani, dr-tapuwatv utvga-lamaqi nhvlwrfewani, henv nahfrpi na-tvwrpvtvkv ini ugimrwi-drmkumi Mvnatu; macimi wesigi-tahawi nhawv Brlvdeli, chena nvtutv-mrga nili weyrnvli Jesise. 44Macimi Brlvde qvqahdrni-taha qahqi tuga naiahkv inv napwv : macimi utvhpi-mrli nili kvpdenvli, u nvtuhtv-wrli qahqi tuga inv naiahkv mrlrqvsi mahci napwv. 45Chena ini iah wrkutala-kuci nili kvpdenvli, welrni u tala-latvmv-wrli Joseli nili nabowanvli. 46Chena inv u tapanv mvfrni-mutv, macimi u pami pananrli nili, u fapvta-nrli ini mvfrni-mudrgi, macimi u tah saximrli nabowrlv-kugi mviahci sekunagi uci wrlqvdho-dagi; chena u tah kulapa-nrli sekunvli ini sqrdagi ini nabowrlvqi. 47Macimi Male Magitalenv chena Male nili u gali Josise u talrpvdr-nrwv tvh saximo-fulici.

Currently Selected:

YA-SFADOCI MRKV 15: SJW

Highlight

Copy